शिशु संरक्षण माह
प्रदेस म आज ले शिशु संरक्षण माह मनाय जावत हे। इक्कीस अप्रैल तक चलइया ए अभियान म नौ महीना ले पांच बछर तक के लइका मन ल विटामिन ए के खुराक दे जाही। उहें, छह महीना ले पांच बछर तक के लइका मन ल आयरन फोलिक एसिड सिरप पिलाय जाही।
धमतरी जिला अस्पताल म शिशु संरक्षण माह के सुरूआत महापौर रामू रोहरा ह करीन। ए मउका म ओमन ह अभिभावक मन ले लइका मनके नियमित टीकाकरण कराय के अपील करीन।
उहें, गौरेला-पेण्ड्रा-मरवाही जिला म शिशु संरक्षण माह के तहत लइका मन ल विटामिन-ए अउ आयरन फोलिक एसिड सिरप के खुराक दे गीस। जिला टीकाकरण अधिकारी डॉक्टर के.के. सोनी ह बतईन कि शिशु संरक्षण माह के उद्देश्य लइका मनके टीकाकरण अउ माता मन ल लइका मनके देखभाल बर जागरूक करना हे।
विधानसभा कार्यवाही
कार्यवाही दुबारा सुरू होय के नेता प्रतिपक्ष डॉक्टर चरणदास महंत अउ कांग्रेस सदस्य कवासी लखमा के संगेच दूसर विपक्षी सदस्य मन ह फेर ‘‘जी राम जी‘‘ उपर चर्चा कराय के मांग करीन। इही बीच, आसंदी ह विपक्ष के स्थगन प्रस्ताव ल अग्राह्य कर दीस। एखर बाद नाराज विपक्षी सदस्य मन ह आज पूरा दिन के कार्यवाही के बहिष्कार करत सदन ले बहिर्गमन कर दीन।
सदन म आज प्रश्नकाल के दउरान विधायक अंबिका मरकाम ह धमतरी अउ कांकेर जिला म अवैध प्लाटिंग के मामला उठईन। ओमन जानना चाहन कि बछर दू हजार चौबीस ले इकतीस जनवरी दू हजार छब्बीस तक अवैध प्लाटिंग के कतका सिकायत मिले हे। जवाब म राजस्व मंत्री टंकराम वर्मा ह बतईन कि धमतरी म तीन अउ कांकेर म पांच सिकायत मिले हे। ए मामला म जांच चलत हे। तीन झन पटवारी मनके इंक्रीमेंट ल रोके गेहे अउ कतकोन अधिकारी-कर्मचारी मन ल नोटिस जारी करे गेहे। मंत्री के जवाब ले असंतुष्ट विपक्ष ह मामला के जांच आर्थिक अपराध अन्वेषण ब्यूरो-ईओडब्ल्यू ले कराय के मांग करत सदन ले बहिर्गमन कर दीन।विधानसभा कार्यवाही
प्रश्नकाल म आज कांग्रेस विधायक चातुरी नन्द ह अपन मूल प्रश्न ल बदले के आरोप लगईन। ओमन किहीन कि उंखर मूल प्रश्न ल बदल दे गेहे अउ एमा समय अवधि के उल्लेख नइ रिहीस। पूर्व मुख्यमंत्री भूपेश बघेल ह किहीन कि ए बहुत गंभीर विषय हे। ओमन आसंदी ले विभाग के खिलाफ कार्रवाई करे के मांग करीन। एमा आसंदी ह किहीन कि प्रश्न म समय अवधि एखर सेती जोड़े गेहे, ताकि प्रश्न ग्राह्य हो सकय। एखर बाद कांग्रेस सदस्य मन ह नाराबाजी करत सदन ले बहिर्गमन कर दीन।
प्रश्नकाल के दउरान ही सत्तापक्ष के विधायक गोमती साय ह पत्थलगांव म अउ विधायक भावना बोहरा ह कवर्धा जिला म आदिवासी मनके जमीन के खरीदी-बिक्री के मामला ल उठईन। जवाब म राजस्व मंत्री टंकराम वर्मा ह किहीन कि पत्थलगांव विधानसभा क्षेत्र म बछर दू हजार बाईस-तेईस ले जनवरी दू हजार छब्बीस तक अनुसूचित जनजाति आदिवासी भूमि के अंतरण के कुल उन्नीस ठन प्रकरण दर्ज हे। उहें, विधायक भावना बोहरा के सवाल के जवाब देवत राजस्व मंत्री ह किहीन कि कोनों मेर भी आदिवासी मनके जमीन ल गलत तरीका ले बदले नइ गेहे।
सदन म आज ध्यानाकर्षण प्रस्ताव के माध्यम ले भाजपा विधायक ललित चंद्राकर ह कार्यस्थल म माईलोगिन मनके यौन उत्पीड़न बर बने अधिनियम के तहत आंतरिक शिकायत समिति के गठन नइ होय के मुद्दा उठईन। जवाब म महिला अउ बाल विकास मंत्री लक्ष्मी राजवाड़े ह बतईन कि राज्य म सात हजार ले जादा आतंरिक सिकायत समिति बनाय गेहे अउ बांचे कार्यालय मन म एखर प्रक्रिया चलत हे।
विधानसभा कार्यवाही
विधानसभा म आज राज्य सरकार ह छत्तीसगढ़ धर्म स्वातंत्र्य संशोधन विधेयक ल वापिस ले लेहे। उपमुख्यमंत्री अउ गृहमंत्री विजय शर्मा ह राज्यपाल डहार ले लहुटाय गे छत्तीसगढ़ धर्म स्वातंत्र्य संशोधन विधेयक उपर विचार के प्रस्ताव प्रस्तुत करीन। श्री शर्मा ह किहीन कि पुराना प्रावधान ल वापस ले जावत हे। सबके सहमति के बादेच नवा प्रस्ताव रखे जाही। एखर बाद आसंदी ह सरकार ल विधेयक वापिस लेके मंजूरी दीन।
एखर अलावा सदन म आज छत्तीसगढ़ भू-राजस्व संहिता संशोधन विधेयक, छत्तीसगढ़ नगर अउ ग्राम निवेश संशोधन विधेयक, छत्तीसगढ़ गृह निर्माण मंडल संशोधन विधेयक के पुर्नस्थापन प्रस्ताव सर्वसम्मति ले पारित करे गीस।
एखर बाद मुख्यमंत्री विष्णुदेव साय के विभाग ले जुड़े अनुदान मांग उपर सदन म चर्चा होइस। एमा विपक्षी सदस्य मन ह भाग नइ लीन।
कांग्रेस-विधानसभा घेराव
प्रदेस कांग्रेस ह आज केन्द्र सरकार डहार ले मनरेगा के नाव बदले जाय के अउ रसोई गैस सिलेंडर के कमी संघरा दूसर मुद्दा ल लेके विधानसभा घेराव के परयास करीस। रईपुर म प्रदर्सन के दउरान पुलिस ह कांग्रेस पदाधिकारी अउ कार्यकर्ता मन ल रस्तच म रोक लीस। ए दउरान कुछेक नेता अउ कार्यकर्ता मन ल पुलिस ह गिरफ्तार घलो करीस, जउन मन ल बाद म रिहा कर दे गीस।
एखर पहिली, कांग्रेस डहार ले शंकर नगर के भारत माता चौक म जनसभा म अखिल भारतीय कांग्रेस कमेटी छत्तीसगढ़ प्रभारी महासचिव सचिन पायलट, पूर्व मुख्यमंत्री भूपेश बघेल, नेता प्रतिपक्ष डॉक्टर चरणदास महंत अउ प्रदेस कांग्रेस अध्यक्ष दीपक बैज संघरा दूसर बड़े नेता मन म सामिल होइन।
वीबी जीरामजी-कार्यशाला
पत्र सूचना कार्यालय रईपुर डहार ले भिलाई म ‘‘विकसित भारत – जी राम जी अधिनियम – ‘‘ग्रामीण भारत का परिवर्तनकारी बदलाव‘‘ विषय उपर कार्यशाला कराय गीस। कार्यशाला म मुख्य अतिथि के रूप म छत्तीसगढ़ राज्य औद्योगिक विकास निगम के अध्यक्ष राजीव अग्रवाल सामिल होइन। ए मउका म श्री अग्रवाल ह किहीन कि विकसित भारत – जी राम जी अधिनियम के परिकल्पना ग्रामीण भारत म बड़े परिवर्तन के नींव हे। एमा एक सौ पच्चीस दिन के रोजगार के गारंटी दे गेहे।
माओवादी सामग्री-बरामद
मोहला-मानपुर-अंबागढ़ चौकी जिला म सुरक्षा बल ह सर्चिंग के दउरान हथियार अउ माओवादी सामग्री बरामद करे हे। जिला के पुलिस अधीक्षक यशपाल सिंह ह पत्रकार मन संग होय चर्चा म बतईन कि औंधी थाना क्षेत्र के कोहकाटोला गांव के जंगल म माओवादी मनके मौजूदगी के सूचना म सुरक्षा बल के टीम ह सर्चिंग अभियान म निकले रिहीस। इही दउरान माओवादी मन ह उहां ले भाग गीन। मउका ले सुरक्षा बल ह एक ठिन इंसास रायफल, पन्द्रह नग जिंदा कारतूस अउ माओवादी जिनीस बरामद करीस।
केन्द्रीय राज्यमंत्री-बिलासपुर स्कूल
केन्द्रीय राज्यमंत्री तोखन साहू ह बिलासपुर के एक ठिन प्राईवेट स्कूल डहार ले विद्यार्थी अउ उंखर अभिभावक मन ल गलत जानकारी दे म नाराजगी जतईन हे। ए मामला म ओमन ह मुख्य सचिव विकासशील ले चर्चा करके स्कूल प्रबंधन के खिलाफ कार्रवाई करे बर चिट्ठी लिखीन हे।
अउ अब पेश हे मौसम के हाल….
मौसम विभाग के अनुसार अवइया चौबीस घंटा के दउरान एक-दू जघा म हल्का बरसा होय के या गरज-चमक के संग छींटा पड़े के संभावना हे। उहें, एक-दू जघा म तेज अंधड़ चले के, आकाशीय बिजली गिरे के अउ करा गिरे के संभावना हे। करा गिरे के क्षेत्र मुख्य रूप ले सरगुजा अउ बिलासपुर संभाग के कुछेक जिला हे। मौसम विभाग ह अवइया चार दिन म प्रदेस के अधिकतम तापमान म करीबन चार डिग्री सेल्सियस के गिरावट आय के संभावना जताय हे।
इही बीच, रायपुर, भखारा अउ धमतरी संघरा प्रदेस के कुछेक जिला म पाछु रतिहा गरज-चमक के संग करा गिरे हे।