प्रश्नकाल के दउरान कांग्रेस विधायक दिलीप लहरिया ह रासन आवंटन के मुद्दा ल उठाइन। ओमन ह ई-केवाइसी नइ कर पाय हितग्राही मनके रासन रोके जाय के बारे म जानकारी मांगिन। जुवाब म खाद्य मंत्री दयालदास बघेल ह बतइन कि एक लाख ले जादा हितग्राही मनके ई-केवाइसी नइ होय हे, जेखर सेति उंखर रासन ल रोके गेहे। ओमन बतइन कि हितग्राही मनके ई-केवाइसी बर शासकीय उचित मूल्य के दुकान म प्रावधान करे गेहे। संगेसंग मोबाइल ऐप के माध्यम ले घलो हितग्राही मन ह ई-केवाइसी कर सकत हे। एमा पूर्व मुख्यमंत्री भूपेश बघेल ह किहीन हे कि कतकोन हितग्राही मन अइसन हे, जिंखर फिंगर प्रिंट के परेसानी हे, या गांव मन म सर्वर के सेति ई-केवाइसी नइ हो सकय त, का ओमन ल रासन नइ मिलही। एमा मंत्री दयालदास बघेल ह किहीन हे कि कतकोन अइसे हितग्राही मन हे जउन मन रासन लेबर नइ आय। एखर बाद मंत्री के जुवाब ले असंतुष्ट विपक्षी सदस्य मन ह सदन ले बहिर्गमन कर दीन।
अइसने, विधायक व्यास कश्यप ह कोरबा म अमानक चांउर के खरीदी के मुद्दा उठाइन। ओमन किहीन कि ए मामला म जिम्मेदार अधिकारी मन उपर का कार्यवाही होइस। एखर जुवाब म मंत्री दयालदास बघेल ह किहीन कि एक झन अधिकारी ल निलंबित करे गेहे। दू झन कर्मचारी मन उपर कार्रवाई होय हे अउ दस झन कर्मचारी मन ल कारण बताओं नोटिस जारी करे गेहे।
अइसने, भाजपा विधायक पुरंदर मिश्रा ह राज्य म अमानक बारदाना के मुद्दा उठाइन। एमा मंत्री बघेल ह बतइन कि राज्य म चार हजार ले जादा गठान अमानक पाय गीस। जेखर क्लेम जूट कमिश्नर कार्यालय म करे गीस।
विधानसभा कार्यवाही
सदन म आज कांग्रेस विधायक रामकुमार यादव ह धान खरीदी केंद्र ले धान उठाव नइ होय के मुद्दा ल उठाइन। ओमन ह सक्ति जिला म तीस करोड़ रूपिया के धान खराब होय के आरोप लगइन। एमा मंत्री दयालदास बघेल ह किहीन कि सक्ति जिला म सैंतालीस लाख कुंटल ले जादा धान के खरीदी करे गेहे, जेमा ले करीब साढ़े तीन लाख कुंटल धान के उठाव बांकी हे। ओमन किहीन कि इकतीस मार्च ले पहिली प्रदेस के सबो खरीदी केंद्र ले धान के उठाव कर ले जाही। एमा नेता प्रतिपक्ष चरणदास महंत ह किहीन कि सत्रह जनवरी के रिसाइक्लिंग के नांव म धान खरीदी बंद करवा दे गे रिहीस। एमा मंत्री ह किहीन कि ओमन ह सत्रह जनवरी के धान खरीदी के नइ, उठाव के बात केहे रिहीन। मंत्री के जुवाब ले विपक्ष संतुष्ट नइ होइस अउ सदन ले बहिर्गमन कर दीस।
प्रश्नकाल म ही कांग्रेस विधायक लखेश्वर बघेल ह बस्तर संभाग म जर्जर भवन म चलत आंगनबाड़ी केंद्र के मामला उठाइन। एमा महिला अउ बाल विकास मंत्री लक्ष्मी राजवाड़े ह जल्दीच सबो व्यवस्था ल पूरा करे के आश्वासन दीन।
उहें, सदन म आज बारहवीं बोर्ड के हिंदी पेपर लीक होय के मामला घलो गुंजिस। कांग्रेस विधायक देवेन्द्र यादव ह ए मुद्दा ल उठावत प्रदेस के स्कूली शिक्षा व्यवस्था उपर सवाल खड़ा करीन। जुवाब म स्कूल शिक्षा मंत्री गजेन्द्र यादव ह किहीन कि मामला के जांच बर माध्यमिक शिक्षा मंडल ल निरदेस दे गे हवय। यदि जांच म कोई दोषी पाय जाही, त ओखर खिलाफ कड़ा कार्रवाई करे जाही।
कांग्रेस विधानसभा घेराव
प्रदेस कांग्रेस ह काली सत्रह मार्च के मनरेगा बचाव संग्राम, बिजली दाम म बढ़ोत्तरी, गैस सिलेंडर के कमी अउ स्थानीय मुद्दा ल लेके विधानसभा के घेराव करही। प्रदेस कांग्रेस अध्यक्ष दीपक बैज ह बतइन कि रईपुर के शंकर नगर के भारतमाता चौक ले कांग्रेसी मन ह मंझनिया बारह बजे विधानसभा बर निकलही।
विधानसभा कार्यवाही
विधानसभा म आज सून्यकाल के दउरान बीजापुर जिला के गंगालूर म चलत पोटाकेबिन म छात्रा मन के गभर्वती होय के मामला घलो गुंजिस। ए मुद्दा उपर विपक्ष ह स्थगन प्रस्ताव लाईस, फेर मंत्री जुवाब के बाद सभापति ह स्थगन सूचना ल अग्राह्य कर दीन। एखर बाद विपक्ष ह सदन ले बहिर्गमन कर दीस।
पूर्व मुख्यमंत्री भूपेश बघेल ह गंगालूर पोटाकेबिन के मामला उठावत किहीन कि उंहा सरलग नाबालिग छात्रा मन के संग अइसन घटना होवत हे, फेर सरकार दोषी मन उपर कोनो कार्रवाई नइ करत हे। ओमन किहीन कि सबो काम ल रोक के ए मुद्दा उपर चर्चा कराय जाय। विधायक विक्रम मंडावी, संगीता सिन्हा, अनिला भेड़िया अउ देवेन्द्र यादव ह घलो ए मुद्दा उपर चर्चा कराय के मांग करीन। नेता प्रतिपक्ष डॉक्टर चरणदास महंत ह किहीन कि पोटाकेबिन म अइसन घटना कई बछर ले होवत हे। नोनी मन के अचानक मउत हो जथे। पोटाकेबिन म न तो डॉक्टर हे अउ न ही रहे के ठीक व्यवस्था हे।
विपक्ष के आरोप के जुवाब देवत शिक्षा मंत्री गजेन्द्र यादव ह किहीन हे कि ए सबो आरोप निराधार हे, कोनो आरोपी ल बचाय नइ जावत हे अउ जउन नोनी मनके बात करे जावत हे, ओमन ह पोटाकेबिन म नइ पढ़य। नोनी अउ उंखर परिवार वाला मन ह किहीन हे कि अेमन ह उंहा आना-जाना करथे। श्री यादव ह किहीन कि अइसन कोनो घटना होथे त, सरकार तुरते कार्रवाई करथे। ओमन किहीन कि पोटाकेबिन कलेक्टर के देखरेख म चलथे। मामला के जांच जारी हे जउन कोई भी दोषी होही ओखर उपर कड़ा कार्रवाई करे जाही। एखर बाद आसंदी ह स्थगन सूचना ल अग्राह्य कर दीन।
विस-ध्यानाकर्षण
भाजपा विधायक धरमलाल कौशिक ह आज विधानसभा म ध्यानाकर्षण प्रस्ताव के माध्यम ले छत्तीसगढ़ खादी ग्रामोद्योग बोर्ड डहार ले सामग्री के पूर्ति म अनियमितता के मुद्दा ल उठाइन। ओमन किहीन कि बोर्ड ह भंडार खरीद नियम के उल्लंघन करत सामग्री के आपूर्ति करे हे। एखर जुवाब म मंत्री गजेन्द्र यादव ह बोर्ड डहार ले सामग्री खरीदी म अनियमितता ले इंकार करीन। ओमन बतइन कि छत्तीसगढ़ खादी अउ ग्रामोद्योग बोर्ड म छप्पन ठन संगठन पंजीकृत हे अउ बोर्ड डहार ले एक सौ सत्रह ठन समान के पूर्ति करे जाथे। मंत्री ह विधायक ल मामला के जांच कराय के आश्वासन घलो दीन।
उहें, कांग्रेस विधायक बालेश्वर साहू ह ध्यानाकर्षण सूचना के माध्यम ले मुख्यमंत्री निर्माण श्रमिक मउत अउ दिव्यांग सहायता योजना म वित्तीय अनियमितता के मुद्दा उठाइन। ओमन सदन म बतइन कि जांजगीर-चांपा जिला के एक झन माईलोगिन के मउत के बाद उंखर परिवार वाला मन ह दिव्यांग सहायता योजना के फायदा लीन। एमा श्रम मंत्री लखनलाल देवांगन ह श्रम विभाग के अधिकारी मनके वित्तीय अनियमितता म संलिप्त होय ले इंकार करीन। ओमन किहीन कि मामला के जांच करे जावत हे अउ जल्दीच महिला के मउत के सही तारीख के पता लगाय जाही।
राष्ट्रीय टीकाकरण दिवस
आज राष्ट्रीय टीकाकरण दिवस हे। ए मउका म प्रदेसभर म कतकोन कारीकरम कराय जावत हे। इही कड़ी म गौरेला-पेण्ड्रा-मरवाही जिला म एचपीवी टीकाकरण अभियान के सुरूआत करे गीस। ए अभियान के माध्यम ले किशोरी मन ल सर्वाइकल कैंसर ले बांचे के टीका लगाय जावत हे। जिला टीकाकरण अधिकारी डॉक्टर के.के. सोनी ह बतइन कि राष्ट्रीय टीकाकरण के मउका म जिला भर म एचपीवी टीकाकरण कारीकरम के सुरूआत करे गेहे। एमा चौदह ले पंद्रह बछर के नोनी मन ल ए टीका लगाय जाही।
अउ अब थोरकुन समाचार सार म –
– मुख्यमंत्री विष्णुदेव साय रईपुर के बीटीआई मैदान म छत्तीसगढ़ िंसंधी सेवा महापंचायत डहार ले होवत ‘‘चन्ड्र जी रात, सिंधिन जो मेलो-आनंद मेलो‘‘ म सामिल होइन।
– नई दिल्ली के मिलिट्री पाईप बैंड प्रतियोगिता म पहिली घांव द ग्रेड इंडिया सैनिक स्कूल ल तीसरा स्थान मिले हे। ए उपलब्धि म मुख्यमंत्री विष्णुदेव साय ह विद्यार्थी मन ल अपन बधई अउ सुभकामना दीन हे।
अउ
– कबीरधाम जिला के ग्राम छपरी म काली सत्रह मार्च के भोरमदेव महोत्सव के आयोजन करे जाही। कारीकरम म उपमुख्यमंत्री विजय शर्मा अउ सांसद संतोष पांडे सामिल होही।