निर्वाचन आयोग ह पश्चिम बंगाल, तमिलनाडु, असम, केरल अउ पुद्दुचेरी बर विधानसभा चुनाव के तारीख के घोसना कर देहे। आयोग ह तमिलनाडु, असम, केरल अउ पुद्दुचेरी म एक चरण म चुनाव कराय के घोसना करे हे अउ पश्चिम बंगाल म दू चरण म चुनाव होही। नई दिल्ली म आज चुनाव कारीकरम के घोसना करत मुख्य निर्वाचन आयुक्त ज्ञानेश कुमार ह बतइन कि असम, केरल अउ पुद्दुचेरी म मतदान नौ अप्रैल के होही अउ तमिलनाडु म तेईस अपै्रल के वोट डारे जाही। उहें, पश्चिम बंगाल म मतदान तेईस अउ उनतीस अप्रैल के होही। सबो चार राज्य अउ केंद्रशासित प्रदेस पुद्दुचेरी म मतगणना चार मई के होही। श्री कुमार ह किहीन कि चुनाव कारीकरम के घोसना के संगेच ए राज्य अउ केंद्रशासित प्रदेस म आचारसंहिता तत्काल प्रभाव ले लागू हो गेहे।
केंद्र पीएनजी/एलपीजी-कार्रवाई
पेट्रोलियम अउ प्राकृतिक गैस मंत्रालय ह पाईप वाले प्राकृतिक गैस-पीएनजी अउ द्रवीकृत पेट्रोलियम गैस एलपीजी दूनों के कनेक्सन वाले परिवार ल तुरते अपन एलपीजी कनेक्सन वापिस करे के निरदेस देहे। मंत्रालय ह केहे हे कि पीएनजी कनेक्सन रखइया कोनो भी मनखे ल घरेलू एलपीजी कनेक्सन राखे के या सरकारी तेल कंपनी ले एलपीजी सिलेंडर भरवाय के मंजूरी नइ होही। तेल ंकंपनी मन ल घलो निरदेस दे गे हवय कि ओमन ह वइसन उपभोक्ता मन ल नवा एलपीजी कनेक्सन जारी झन करय, जिंखर तीर पहिलीच ले पाईप वाले प्राकृतिक गैस के सुविधा मौजूद हे। सरकार ह केहे हे कि ए कदम रसोई गैस के आपूर्ति म होवत दोहराव ल रोके बर उठाय गे हवय।
इही बीच, भारत के राजनैतिक प्रयास के बाद, खाड़ी देस ले एलपीजी लेगइया दू ठन वाहक जहाज शिवालिक अउ नंदादेवी, काली सुरक्षित रूप ले होर्मुज जलडमरू मध्य ल पार कर लीन। जहाजरानी मंत्रालय के बिसेस सचिव राजेश कुमार सिन्हा ह बतइन कि ए जहाज मन ह सोलह अउ सत्रह मार्च के गुजरात के मुंद्रा अउ कांडला बंदरगाह पहुंचने वाला हे। एमा करीब बयानवे हजार सात सौ मीट्रिक टन एलपीजी लाय जावत हे।
ऐति, छत्तीसगढ़ म रसोई गैस सिलेंडर के जमाखोरी अउ कालाबाजारी के खिलाफ जिला प्रशासन डहार ले छापा के कार्रवाई करे जात हे। इही कड़ी म सूरजपुर जिला के करकोली गांव ले पैंतीस ठन रसोई गैस जब्त करे गीस। जिला म अभी तक तिरानवे ठन घरेलू सिलेंडर जब्त करे गे हवय।
केंद्र पीएनजी/एलपीजी-कार्रवाई
उहें, बिलासपुर के भारती नगर क्षेत्र म गैस सिलेंडर के अवैध रिफिलिंग के सिकायत मिले म खाद्य विभाग डहार ले कार्रवाई करे गेहे। अइसने, जांजगीर-चांपा जिला म पामगढ़-शिवरीनारायण क्षेत्र के होटल अउ रेस्टोरेंट म छापा के दउरान ग्यारा ठन घरेलू गैस सिलेंडर जब्त करे गीस।
राष्ट्रीय लोक अदालत
प्रदेस म काली आयोजित राष्ट्रीय लोक अदालत म करीब बहत्तर लाख लंबित मामला के निपटारा करे गीस। एहा एक ठन नवा कीर्तिमान हे। दुरूग जिला अदालत परिसर म आयोजित ए लोक अदालत के दउरान सैंतीस अरब बत्तीस करोड़ रूपिया ले जादा के मुआवजा घलो मंजूर करे गीस।
इही कड़ी म रईपुर के जिला सत्र न्यायाधीश बलराम प्रसाद वर्मा के मौजूदगी म जिला अदालत परिसर म आयोजित राष्ट्रीय लोक अदालत म करीबन सोलह लाख लंबित प्रकरण के निपटारा करे गीस।
राष्ट्रीय पशु रोग नियंत्रण
राष्ट्रीय पशु रोग नियंत्रण कारीकरम म आज ले प्रदेस म खुरहा-चपका रोग के रोकथाम बर निसुल्क टीकाकरण अभियान सुरू हो गेहे। ए अभियान तीस अप्रैल तक चलही। ए दउरान पशु पालन विभाग के अधिकारी अउ कर्मचारी मन पशु पालक मन के घर-घर जाके टीकाकरण करही। संगेसंग उंखर बीमारी के इलाज घलो करही।
केंद्रीय जल शक्ति मंत्रालय-वीसी
केंद्रीय जल शक्ति मंत्री सीआर पाटिल के अध्यक्षता म काली नई दिल्ली म होय बइठका म छत्तीसगढ़ के उपमुख्यमंत्री अउ लोक स्वास्थ्य यांत्रिकी मंत्री अरूण साव वर्चुअल रूप म सामिल होइन।
बइठका म उपमुख्यमंत्री श्री साव ह बतइन कि जल जीवन मिसन के काम बर राज्य सरकार डहार ले तीन हजार चार सौ छब्बीस करोड़ रूपिया के उपराहा रासि राज्यांश के रूप म जारी करे गेहे। ओमन ह एखरे असन केंद्रांश के रासि ल प्राथमिकता ले जारी करे के आग्रह करीन।
अफीम खेती-पटवारी तबादला
बलरामपुर जिल म अफीम के खेती करे के मामला आगू आय के बाद कलेक्टर राजेन्द्र कुमार कटारा ह एक्के संघरा अंठावन झन पटवारी मनके तबादला आदेस जारी करे हे, जेखर अनुसार राजपुर, रामानुजगंज, कुसमी, वाड्रफ नगर, शंकरगढ़, रघुनाथ नगर अउ बलरामपुर संघरा कतकोन तहसील म कई बछर ले एके जघा म पदस्थ पटवारी मन ल हटाके दूसर जघा भेजे गीस। आदेस म स्पष्ट करे गे हे कि सबो पटवारी मन ल सोलह मार्च तक अपन कार्यभार ग्रहण करना जरूरी हे। तय करे गे बेरा म पदभार ग्रहण नइ करे म पटवारी मनके खिलाफ विभागीय कार्रवाई करे जाही।
आदि परब-समापन
नवा रईपुर के आदिमजाति अनुसंधान अउ प्रसिक्षण संस्थान परिसर म ‘‘परंपरा से पहचान तक‘‘ के थीम म चलत दू दिवसीय ‘‘आदि परब‘‘ के काली समापन होगिस। समापन कारीकरम म मुख्यमंत्री विष्णुदेव साय सामिल होइन। ए मउका म ओमन किहीन कि राज्य सरकार जनजातीय समाज के भविष्य ल गढ़े बर सरलग काम करत हे। ओमन किहीन कि अइसन आयोजन हे, राज्य के समृध्द जनजातीय संस्कृति अउ परंपरा ल बढ़ावा मिलथे।
कारीकरम म मुख्यमंत्री ह जनजातीय समाज के युवा मन ल उच्च शिक्षा अउ शोध के बने अवसर देवाय के उद्देस्य ले टी.आर.टी.आई. परिसर म पांच करोड़ रूपिया के लागत ले बने सौ सीटर छात्रावास के लोकार्पण करीन।
समापन समारोह ल आदिमजाति विकास मंत्री रामविचार नेताम अउ वन मंत्री केदार कश्यप ह घलो संबोधित करीन। ए मउका म मुख्यमंत्री ह यूपीएससी परीक्षा म सफलता हासिल करइया जनजातीय समाज के अंकित साकिनी अउ डायमंड धु्रव ल सम्मानित करीन।
अमृत मित्र महोत्सव
नई दिल्ली के भारत मंडपम म आयोजित अमृत मित्र महोत्सव म छत्तीसगढ़ के पचहत्तर अमृत मित्र माई लोगिन मन भागीदारी करीन। ए माईलोगिन मन राज्य के आने-आने नगरीय निकाय म वृक्षारोपण, जल गुणवत्ता परीक्षण, जल संरचना संचालन अउ सामुदायिक जल संरक्षण के क्षेत्र म सुघ्घर काम करत हे। ए कारीकरम म राज्य के दू झन माईलोगिन-बिलासपुर नगर निगम के रूक्मणी गोस्वामी अउ लोरमी के हेमलता खत्री ह केंद्रीय आवास अउ सहरी कार्य मंत्री मनोहर लाल खट्टर के मौजूदगी म देसभर के एक हजार अमृत मित्र मन संग अपन अनुभव साझा करीन।
रेलवे-डीआरएम कप
रईपुर के सेकरसा मैदान म चलत डीआरएम कप क्रिकेट प्रतियोगिता के खिताब रेलवे के आपरेटिंग टीम ह जीत ले हवय। तेरह मार्च को खेले गे फाइनल मुकाबला म आपरेटिंग टीम ह वैगन रिपेयर श्ॉाप के टीम ल टाई के बाद सुपर ओवर म पराजित करीन। दक्षिण पूर्व मध्य रेलवे के रईपुर खेल संघ डहार ले राखे गे ए प्रतियोगिता म रेलवे के कतकोन टीम भाग लीस। प्रतियोगिता के समापन समारोह म रईपुर के मंडल रेल प्रबंधक दयानंद ह विजेता अउ उपविजेता टीम ल पुरस्कार अउ ट्रॉफी दीन। प्रतियोगिता म रेलवे सुरक्षा बल के टीम तीसर स्थान म रिहीस।
अउ अब पेस हे मौसम के हाल…
प्रदेस म गर्मी के असर बाढ़े के संगेच काली मौसम म थोरबहुत परिवर्तन होय के संभावना हे। मौसम विभाग के अनुसार ए बेरा छत्तीसगढ़ के उपरी हवा म एक ठन चक्रीय-चक्रवाती घेरा बने हे। एखर असर ले काली प्रदेस म एक-दू जघा म हल्का बरसा होय के या गरज-चमक के संग बौछार पड़े के संभावना हे। बरसा के क्षेत्र मुख्य रूप ले बस्तर संभाग रइही। एखर अलावा मौसम विभाग ह एक-दू जघा म अंधड़ चले के अउ वज्रपात होय के चेतावनी घलो देहे।