ए मउका म केंद्रीय राज्य मंत्री तोखन साहू, कृषि अउ पशुधन विकास मंत्री रामविचार नेताम, छत्तीसगढ़ के गौसेवा आयोग के अध्यक्ष विशेषर पटेल समेत कई झन जनप्रतिनिधि उपस्थित रिहीन।
केंद्र-एलपीजी उपलब्ध
केंद्र सरकार ह घर, अस्पताल, शिक्षण संस्थान अउ दूसर जरूरी सेवा मन ल निर्बाध ईंधन आपूर्ति के आश्वासन दे हे। रिफाईनरी मन म घरेलू एलपीजी उत्पादन म तीस प्रतिसत ले जादा के वृध्दि करे गेहे। पेट्रोलियम अउ प्राकृतिक गैस मंत्रालय के संयुक्त सचिव सुजाता शर्मा ह बतइन कि उपभोक्ता मन ल प्राथमिकता के आधार म वितरण बर राज्य सरकार ल व्यावसायिक एलपीजी सिलेंडर उपलब्ध कराय गेहे।
ऐति, छत्तीसगढ़ के उपमुख्यमंत्री अरूण साव ह किहीन हे कि देस म पेट्रोल-गैस के कोई शॉर्टेज नइ हे। ओमन किहीन कि लोगन मन थोरकुन धीरज राखय अउ अफवाह उपर झन जावय। राज्य सरकार काला बाजारी उपर ठोस कार्रवाई करत हे।
सुप्रीम कोर्ट नगर सैनिक राहत
उच्चतम न्यायालय ह एक ठन महत्वपूर्ण फैसला म समान काम-समान वेतन के सिध्दांत लागू करत हुए नगर सैनिक मन ल पुलिस कर्मी के समान वेतन अउ दूसर सुविधा देके छत्तीसगढ़ सरकार ह निरदेस देहे। छत्तीसगढ़ सरकार ल ए आदेस ल तीन महिना के भीतर परिपालन करना होही।
बतादन कि बछर दू हजार बाईस म बिलासपुर जिला म कार्यरत होमगार्ड ह छत्तीसगढ़ उच्च न्यायालय म याचिका दायर कर समान काम के एवज म समान वेतन देके मांग करे रिहीस। मामला के सुनवाई के बाद हाईकोर्ट ह याचिका ल स्वीकार करत हुए राज्य सरकार ल समान काम के बदला समान वेतन देके निरदेस दे रिहीन। पाछू राज्य सरकार ह आदेस ल चुनौती देवत हुए रिट अपील दायर करे रिहीन, जेला हाईकोर्ट ह खारिज कर दे रिहीस। हाईकोर्ट के आदेस ल चुनौती देवत हुए छत्तीसगढ़ सरकार ह उच्चतम न्यायालय म एसएलपी दायर करे रिहीन, जेला खारिज करत हुए उच्चतम न्यायालय ह हाईकोर्ट के आदेस के तहत होमगार्ड ल पुलिस कर्मी मनके समान वेतनमान अउ दूसर सुविधा देके निरदेस देहे।
महाविद्यालय-भर्ती
राज्य सरकार ह शासकीय महाविद्यालय मन म आने-आने पद बर भर्ती के प्रक्रिया सुरू कर देहे। उच्च शिक्षा विभाग डहार ले सहायक प्राध्यापक के छै सौ पच्चीस, ग्रंथपाल के पचास अउ क्रीड़ा अधिकारी के पच्चीस समेत कुल सात सौ पद बर भर्ती करे जाही। भर्ती प्रक्रिया के तहत राज्य शासन के प्रचलित नियम मनके अनुसार आरक्षण रोस्टर अउ विषयवार रिक्त पद मन ल निर्धारित करत हुए उंखर विस्तृत रोस्टर, ब्रेकअप घलो तैयार कर ले हे।
राष्ट्रीय लोक अदालत
राष्ट्रीय विधिक सेवा प्राधिकरण नई दिल्ली के तत्वाधान म आज राष्ट्रीय लोक अदालत के आयोजन करे गीस। ए कड़ी म राज्य विधिक सेवा प्राधिकरण बिलासपुर डहार ले प्रदेस के सबो जिला अउ व्यवहार न्यायालय मन म घलो लोक अदालत आयोजित करे गीस। एमा मोटर दुर्घटना दावा ले संबंधित प्रकरण, चेक बाउंस, जल कर, संपत्ति कर, राजस्व संबंधी प्रकरण, ट्रैफिक चालान, भाड़ा नियंत्रण अउ आबकारी ले संबंधित मामला मनके निराकरण करे गीस। एखर अलावा बैंक, विद्युत संबंधी प्री-लिटिगेशन प्रकरण, राजस्व न्यायालय खंडपीठ म खातादार मनके बीच आपसी बंटवारा अउ वारिस मनके बीच बंटवारा के निराकरण घलो होइस।
राजनांदगांव-भूमिपूजन
मुख्यमंत्री विष्णुदेव साय आज नवा रायपुर स्थित मुख्यमंत्री निवास कार्यालय ले राजनांदगांव के आने-आने विकास कार्य मनके भूमिपूजन कारीकरम म वर्चुअल रूप ले सामिल होइन। ए अवसर म ओमन दू सौ छब्बीस करोड़ रूपिया ले जादा के लागत ले होवइया आने-आने विकास काम मनके भूमिपूजन करीन। कारीकरम ल संबोधित करत हुए राजनांदगांव म दू हजार सीटर के विसाल अत्याधुनिक ऑडिटोरियम बनाय जाही, जउन ह संस्कारधानी के कला, साहित्य अउ सांस्कृतिक गतिविधि मन ल नवा मंच प्रदान करही।
कारीकरम ल संबोधित करत हुए विधानसभा अध्यक्ष डॉक्टर रमन सिंह ह किहीन कि ए बछर के बजट म राजनांदगांव जिला के समग्र विकास बर एक हजार करोड़ रूपिया के प्रावधान करे गेहे।
अशासकीय संकल्प-पारित
छत्तीसगढ़ विधानसभा म काल सर्वसम्मति ले एक ठन अशासकीय संकल्प पारित करे गेहे। ए संकल्प म केंद्र सरकार ले दुरूग जिला के सेक्टर नौ भिलाई म स्थित जवाहर लाल नेहरू अस्पताल अउ अनुसंधान केंद्र ल मल्टी स्पैशलिटी अस्पताल के रूप म पुनः स्थापित करे के सिफारिस करे गेहे। ये अशासकीय संकल्प वैशाली नगर विधानसभा क्षेत्र ले भाजपा विधायक रिकेश सेन ह पेस करे रिहीन।
आदि परब-शुभारंभ
छत्तीसगढ़ के समृध्दि जनजातीय संस्कृति, कला अउ परंपरा ल राष्ट्रीय मंच देके उद्देस्य ले आयोजित आदि परब काली ले नवा रायपुर म सुरू हो गेहे। ए परब के सुभारंभ छत्तीसगढ़ राज्य जनजातीय आयोग के अध्यक्ष रूप सिंह मंडावी ह करीन। दू दिवसीय ए उत्सव म छत्तीसगढ़ समेत तेलंगाना, ओड़िशा, महाराष्ट्र अउ झारखंड के आदिवासी लोक कलाकार मन सामिल होवत हे। आदि परब के थीम ‘‘परंपरा से पहचान तक‘‘ राखे गेहे।
सुभारंभ के अवसर म जनजातीय समाज के युवा मन ह रैंप उपर आदिवासी संस्कृति अउ परंपरा के प्रदर्सन करीन। एखर अलावा कारीकरम स्थल म जनजातीय समाज के खानपान, वेशभूषा अउ आने-आने कलाकृति मनके प्रदर्सनी लगाय गेहे। संगेसंग चित्रकला महोत्सव अउ आदि- हाट, जनजातीय सिल्प मेला घलो लगाय गेहे, जेमा छत्तीसगढ़ के जनजातीय हस्तसिल्प, वनोपज अउ पारंपरिक उत्पाद मनके प्रदर्सन करे जात हे।
आदि परब के समापन समारोह अभी ले कुछ देर बाद सुरू हो जही। कारीकरम म मुख्यमंत्री विष्णुदेव साय ह मुख्य अतिथि के रूप म सामिल होही।
सहकारी बैंक शाखा-सुभारंभ
मुख्यमंत्री विष्ण्ुदेव साय ह काली राजधानी रायपुर म टीजेएसवी सहकारी बैंक के रायपुर शाखा के सुभारंभ करीन। ए मउका म श्री साय ह किहीन कि सहकारी बैंक के नवा शाखा खुले ले प्रदेस के सहकारी गतिविधि मन ल गति मिलही।
जिले की चिट्ठी
प्रादेशिक समाचार एकांश, आकाशवाणी रायपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली संझा छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र एके संघरा रिले करही। ए बखत के अंक म ‘‘दुरूग‘‘ जिला के गतिविधि के बारे म जानकारी दे जाही।
वन विकास निगम विजन-30 कार्यशाला
छत्तीसगढ़ राज्य वन विकास निगम लिमिटेड डहार ले- ‘‘विजन-दो हजार तीस-छत्तीसगढ़ राज्य वन विकास निगम के लिए उच्च विकास व्यवसाय मॉडल का निर्माण‘‘ विषय उपर एक ठन कार्यसाला के आयोजन करे गीस। नवा रायपुर म आयोजित ए कार्यसाला म वन अउ जलवायु परिवर्तन मंत्री केदार कश्यप सामिल होइन।
अउ अब पेस हे मौसम के हाल…
मौसम विभाग ह काली प्रदेस म एक-दू जघा म हल्का बरसा होय, गरज-चमक के संग हवा गरेर चले अउ गाज गिरे के संभावना जताय हे। मौसम विभाग के अनुसार उत्तर-पूर्व, उत्तर प्रदेस के मध्य भाग ले अंदरूनी ओडिसा तक छत्तीसगढ़ ले चलत हुए एक ठन द्रोणिका बने हे, जेखर असर ले बदली-बरसा के संभावना बने हुए हे। बरसा के मुख्य क्षेत्र दक्षिण छत्तीसगढ़ रइही। संगेसंग सरगुजा संभाग के कुछेक जिला म घलो हल्का ले मध्यम बरसा हो सकत हे।