बस्तर के संभागीय मुख्यालय जगदलपुर म आज एक सौ आठ माओवादी मन पुलिस के वरिष्ठ अधिकारी मनके आगू आत्मसमर्पण करे हे। एमा चवालीस महिला माओवादी घलो सामिल हे। ए माओवादी कैडर मन उपर कुल तीन करोड़ उनतीस लाख रूपिया के इनाम घोषित रिहीस। ए माओवादी बस्तर संभाग के आने-आने जिला म सक्रिय रिहीन। एमा बीजापुर ले सैंतीस, दंतेवाड़ा ले तीस, सुकमा ले अट्ठारह, बस्तर ले सोलह, नारायणपुर ले चार अउ कांकेर ले तीन माओवादी आत्मसमर्पण करे हे।
आत्मसमर्पण करइया माओवादी मनके सूचना के आधार म पुलिस ह आने-आने जघा म नक्सली मन डहार ले छिपाय गे हथियार के डम्प घलो बरामद करे हे। एमा सात ठिन एके-फोर्टी सेवन रायफल, चार लाइट मशीन गन, ग्यारह बैरेल ग्रेनेड लांचर समेत एक सौ एक हथियार सामिल हे। एखर अलावा माओवादी मन कोति ले एक जघा म लुकाय गे करीबन तीन करोड़ साठ लाख रूपिया के नगद रकम अउ एक किलो सोना घलो बरामद करे गेहे।
उपमुख्यमंत्री अउ गृहमंत्री विजय शर्मा ह किहीन कि सरकार के नीति अउ सुरक्षा बल कोति ले चलाय जात अभियान के सेती माओवादी अब हिंसा के रद्दा छोड़के समाज के मुख्यधारा म लहुटत हे। सरकार ओमन ल पुनर्वास के जम्मों सुविधा देवत हे। श्री शर्मा ह दोहरईन कि अवइया इकतीस मार्च तक राज्य म नक्सलवाद सिराय के हमर लक्ष्य पूरा होही।
मंत्रिपरिषद-निर्णय
मुख्यमंत्री विष्णुदेव साय के अध्यक्षता म काली नवा रायपुर म होय राज्य मंत्रिमंडल के बइठका म कई महत्वपूर्ण निर्णय ले गीस। उपमुख्यमंत्री अरूण साव ह बइठका म ले गे फइसला के जानकारी देवत बतईन कि धर्मांतरण उपर अंकुश लगाय बर मंत्रिपरिषद ह छत्तीसगढ़ धर्म स्वातंत्रय विधेयक के प्रारूप के अनुमोदन करे हे। ए विधेयक के उद्देश्य राज्य म एक धर्म ले दूसर धर्म म बदले बर बल प्रयोग, प्रलोभन, कपटपूर्ण नीति अउ साधन, अनुसूचित प्रभाव या मिथ्या निरूपण म प्रभावी ढंग ले रोक लगाना हे।
एखर अलावा मंत्रिपरिषद ह राजनीतिक आंदोलन ले जुड़े तेरह प्रकरण ल न्यायालय ले लहुटाय के भी अनुमोदन करे हे। उहें, अपारंपरिक ऊर्जा स्त्रोत म आधारित संयंत्र अउ परियोजना बर अनुदान के दर के निर्धारण करे जाय के प्रस्ताव उपर सहमति देहे। बइठका म छत्तीसगढ़ उपकर संसोधन विधेयक के प्रारूप के अनुमोदन करे गीस। एखर ले पंजीयन म प्रभार्य उपकर शुल्क खतम हो जही। उहें, छत्तीसगढ़ नगर अउ ग्राम निवेस संसोधन विधेयक के संघरा ही छत्तीसगढ़ गृह निर्माण मंडल अधिनियम अउ छत्तीसगढ़ कर्मचारी चयन मंडल विधेयक के प्रारूप के अनुमोदन करे गीस। मंत्रिपरिषद ह छत्तीसगढ़ लोक भर्ती अउ व्यावसायिक परीक्षा मन म अनुचित साधन के रोकथाम विधेयक अउ छत्तीसगढ़ भू-राजस्व संहिता संशोधन विधेयक के प्रारूप के घलो अनुमोदन करे हे।
एक दूसर निर्णय म मंत्रिपरिषद ह राजनांदगांव जिला क्रिकेट एसोसिएशन ल राजगामी संपदा के पांच एकड़ भूमि आवंटित करे के निर्णय लेहे। ए भूमि म अत्याधुनिक क्रिकेट अकादमी के निर्माण करे जाही।
विधानसभा समाचार
राज्य विधानसभा म आज कांग्रेस विधायक उमेश पटेल ह बालोद जिला म होय जंबूरी कारीकरम के दउरान करे गे खरच के मुद्दा उठाइन। ओमन विभागीय मंत्री ले आय व्यय के जानकारी मांगिन। एमा शिक्षा मंत्री गजेन्द्र यादव ह पूरा कारीकरम के दउरान अलग-अलग मद म करे गे खर्चा के ब्योरा पेस करीन। शिक्षा मंत्री ह किहीन कि जंबूरी कारीकरम भारत स्काउट गाइड के तय मानक के हिसाब ले होय हे। मंत्री के जवाब ले असंतुष्ट पूर्व मुख्यमंत्री भूपेष बघेल समेत कांग्रेस विधायक मन भ्रष्टाचार के आरोप लगात विधानसभा समिति ले इंखर जांच कराय गे मांग करीन। एखर बाद सत्ता पक्ष अउ विपक्षी सदस्य मन के बीच नोक-झोंक सुरू होगे, जेखर बाद कांग्रेस विधायक मन सदन ले बहिर्गमन कर दीन।
विधानसभा समाचार
राज्य विधानसभा म आज सत्तापक्ष अउ विपक्षी सदस्य मन प्रदेस म आयुष्मान कार्ड ले इलाज नइ होय के मुद्दा उठाइन। विपक्षी सदस्य कविता प्राण लहरे ह स्वास्थ्य मंत्री श्याम बिहारी जायसवाल ले सवाल करीन कि निजी अस्पताल म हितग्राही मन ल आयुष्मान योजना के फायदा काबर नइ मिलत हे। उहें, सत्तापक्ष के विधायक अजय चंद्राकर, धरमजीत सिंह अउ अमर अग्रवाल ह एला जनहित ले जुड़े संवेदनसील मामला बतइन। आसंदी ह घलो किहीन कि एमा स्वास्थ्य मंत्री ल तुरते निर्णय लेना चाही। जवाब म स्वास्थ्य मंत्री ह किहीन कि एखर बर नियम-निरदेस के पालन करना होथे। ओमन किहीन कि अवइया एक हफ्ता म विभागीय समीक्षा कराके जादा ले जादा अस्पताल म आयुष्मान योजना ेके फायदा हितग्राही मन ल मिल सकय। एखर उपर निर्णय ले जाही।
रसोई गैस आपूर्ति-निर्देश
पश्चिम एशिया म चलत भू-राजनीतिक तनाव ल देखत छत्तीसगढ़ के मुख्यमंत्री विष्णुदेव साय ह कहिन हे कि रसोई गैस के उपलब्धता ल लेके लोगन मन ल कोनों भी तरह के चिंता करे के जरूरत नइ हे। ओमन किहीन कि प्रदेस म एलपीजी के संघरा पेट्रोल अउ डीजल के पर्याप्त स्टॉक मौजूद हे। मुख्यमंत्री ह किहीन कि राज्य म रसोई गैस के सुचारू आपूर्ति सुनिश्चित करे बर जम्मों जिला के अधिकारी मन ल जरूरी निरदेस दे गेहे। उहें, अधिकारी मन ल गैस एजेंसी के स्टॉक के नियमित मॉनिटरिंग करे अउ आपूर्ति व्यवस्था म नजर रखे बर केहे गेहे।
मुख्यमंत्री ह कालाबाजारी या अनियमितता के सिकायत मिले म कड़ा कार्रवाई करे के निरदेस दीन हे। श्री साय ह प्रदेसवासी मन ले अपील करीन हे कि ओमन कोनों भी तरह के अफवाह म ध्यान झन देवय अउ जरूरत के अनुसार ही रसोई गैस के बुकिंग करयं।
इही बीच, खाद्य विभाग के सचिव रीना बाबा साहेब कंगाले ह आज मंत्रालय म ऑयल कंपनी के अधिकारी मन संग बइठका करके प्रदेस म घरेलू एलपीजी गैस अउ डीजल, पेट्रोल के उपलब्धता के समीक्षा करीन।
किसान सम्मान निधि-राशि
प्रधानमंत्री नरेन्द्र मोदी तेरह मार्च के प्रधानमंत्री किसान सम्मान निधि योजना के बाईसवां किश्त के राशि जारी करही। गुवाहाटी म आयोजित होवइया ए कार्यक्रम म देस के करीबन नौ करोड़ बत्तीस लाख किसान मनके खाता म अट्ठारह हजार छह सौ पचास करोड़ रूपिया के रासि अंतरित करे जाही। ए योजना के तहत छत्तीसगढ़ के चौबीस लाख इकहत्तर हजार ले जादा किसान मनके खाता म घलो चार सौ अंठानवे करोड़ तिरासी लाख रूपिया के रासि अंतरित करे जाही। ए दिन ल प्रदेस के जम्मों जिला म पीएम किसान उत्सव दिवस के रूप म मनाय जाही।
कृषि विभाग के अधिकारी मन बतईन कि पीएम किसान उत्सव के तहत प्रदेस के आने-आने ग्राम पंचायत म किसान बइठका के आयोजन करे के संघरा प्रधानमंत्री के कार्यक्रम के सीधा प्रसारण करे जाही।
राष्ट्रपति-जल महोत्सव
राष्ट्रपति द्रौपदी मुर्मु ह किहीन कि जल संरक्षण हरेक नागरिक के कर्तव्य हे। नई दिल्ली म जारी जल महोत्सव के हिस्सा के रूप म एक राष्ट्रीय कार्यक्रम ल संबोधित करत श्रीमती मुर्मु ह राष्ट्र ले जल के संग अमूल्य खजाना के जइसे व्यवहार करे के आग्रह करीन। ओमन जल ल अवइया पीढ़ी बर संरक्षित करे के बात किहीन।
आदि परब
नवा रईपुर स्थित आदिमजाति अनुसंधान अउ प्रसिक्षण संस्थान परिसर म तेरह अउ चौदह मार्च के ‘‘परंपरा से पहिचान तक‘‘ के थीम उपर ‘‘आदि परब‘‘ के आयोजन करे जाही। आदिम जाति विकास विभाग के प्रमुख सचिव सोनमणि बोरा अउ आदिवासी अनुसंधान अउ प्रसिक्षण संस्थान के संचालक हिना अनिमेष नेताम ह आज रईपुर म पत्रकार मनले गोठियात आयोजन के संबंध म जानकारी दीन। ओमन बतइन कि ए कारीकरम म छत्तीसगढ़ समेत मध्यप्रदेस, तेलंगाना, ओडिशा, महाराष्ट्र अउ झारखंड के जनजातीय कलाकार सामिल होही। कारीकरम म राज्य के चिन्हांकित तैंतालीस जनजाती अउ उपजाति के संस्कृति परिधान अउ चित्रकला के प्रदर्सन करे जाही।
प्रधानमंत्री मातृत्व वंदना योजना
प्रधानमंत्री मातृत्व वंदना योजना के क्रियान्वयन म छत्तीसगढ़ ह देसभर म पहिली स्थान पाय हे। ए योजना के तहत छत्तीसगढ़ ह तिरानवे दशमलव तीन-सात प्रतिशत नामांकन, तिरासी दशमलव आठ-सात प्रतिशत स्वीकृति दर अउ लगभग चौरानवे प्रतिशत सिकायत मनके समाधान करे हे।
मुख्यमंत्री विष्णुदेव साय अउ महिला अउ बाल विकास मंत्री लक्ष्मी राजवाड़े ह ए उपलब्धि बर महिला अउ बाल विकास विभाग के अधिकारी, कर्मचारी, आंगनबाड़ी कार्यकर्ता अउ मैदानी अमला ल बधाई दीन हे। श्री साय ह कहिन कि प्रधानमंत्री मातृत्व वंदना योजना के माध्यम ले गर्भवती महिला मन ल आर्थिक सहायता देके सुरक्षित मातृत्व ल बढ़ावा दे जात हे।