प्रधानमंत्री नरेंद्र मोदी ह किहीन हे कि पाछू कुछू बछर म भारत के स्वास्थ्य ढांचा अउ मजबूत होय हे। ‘‘सबका साथ सबका विकास-जनता की आकांक्षाओं की पूर्ति‘‘ बिसय उपर बजट के बाद वेबिनार ल संबोधित करत हुए श्री मोदी ह ए बात ल किहीन हे।
प्रधानमंत्री नरेंद्र मोदी ह किहीन हे कि जनता के आकांक्षा के पूर्ति ल सिरिफ चर्चा के बिसय नो हरय, बल्कि एहा बजट के आधार अउ सरकार के प्रतिबध्दता हरय। अर्थव्यवस्था ल बढ़ाय बर जोर देवत हुए ओमन ह किहीन कि देस के लाखों जवान लइका मन ल कौशल आधारित रोजगार के नवा मउका मिलत हे।
प्रधानमंत्री ह विज्ञान, प्रौद्योगिकी, इंजीनिरिंग अउ गणित के क्षेत्र म माईलोगिन मनके बाढ़त संख्या गरब करीन हे। श्री मोदी ह भविष्य के प्रौद्योगिकी म बेटी मन बर समान अवसर सुनिश्चित करे के सरकार के प्रतिबध्दता ल बताइन हे।
राज्यसभा प्रत्याशी-निर्वाचित
छत्तीसगढ़ ले राज्यसभा के खाली होय दू सीट बर भाजपा उम्मीदवार लक्ष्मी वर्मा अउ कांग्रेस प्रत्यासी फूलोदेवी नेताम ह निर्विरोध निर्वाचित होय हे। दूनों दल ह एक दूसर के खिलाफ प्रत्यासी नइ उतारिन, जेखर ले चुनाव ह निर्विरोध संपन्न होइस। आज दूनों प्रत्यासी ह विधानसभा परिसर पहुंचके आधिकारिक रूप म अपन निर्वाचन प्रमाण पत्र प्राप्त करीन।
जानबा के अनुसार लक्ष्मी वर्मा ह वर्तमान म छत्तीसगढ़ राज्य महिला आयोग के सदस्य के रूप म काम करत हे। ओमन ह बछर उन्नीस सौ नब्बे म भाजपा के प्राथमिक सदस्यता ले रिहीन। एखर बाद ले ओमन ह संगठन म कतकोन महत्वपूर्ण पद म रहे हे। उहें, फूलोदेवी नेताम ह बस्तर क्षेत्र ले अवइया आदिवासी नेत्री हरय। ओमन ह अभी राज्यसभा सदस्य हरय अउ कांग्रेस पार्टी म कतकोन पद म रहे हे।
‘‘नारी शक्ति सम्मान समारोह‘‘
नगरीय प्रशासन विभाग कोति ले अंतर्राष्ट्रीय महिला दिवस के मउका म काली दस मार्च के रईपुर के शासकीय मेडिकल कालेज के सभागार म ‘‘नारी शक्ति सम्मान समारोह‘‘ के कारीकरम करे जाही। उपमुख्यमंत्री अरूण साव ह ए कारीकरम म अच्छा काम करइया स्वच्छता दीदी, स्व-सहायता समूह के माईलोगिन अउ महिला हितग्राही मन ल सम्मानित करही। ए बेरा म राज्य के सबो नगरी निकाय म स्वच्छता ल बढ़ावा देबर छत्तीसगढ़ स्वच्छता लीग के सुभारंभ घलो करे जाही। स्वच्छ सर्वेक्षण दू हजार चौबीस म राष्ट्रीय पुरस्कार, सुपर स्वच्छ लीग सहर, वाटर प्लस, जीएफसी सेवन-स्टार अउ फाइव स्टार मिलइया सहर के स्वछता दीदी के समूह के प्रतिनिधि मनके घलो सम्मान करे जाही।
मुख्यमंत्री-अंकित सकनी
बीजापुर जिला के गुदमा गांव के अंकित सकनी ह यूपीएससी के परीक्षा म आठ सौ सोलहवां स्थान पाय हे। ए उपलब्धि बर मुख्यमंत्री विष्णुदेव साय ह अंकित सकनी अउ उंखर माता-पिता ले वीडियो काल के माध्यम ले गोठबात करके ओमन ल बधई अउ सुभकामना दीन। श्री साय ह किहीन कि सीमित संसाधन अउ कठिन परिस्थिति के बाद घलो अंकित ह अपन मेहनत, लगन अउ दृढ़ संकल्प के बल म ए सिध्द कर दे हे कि अगर लक्ष्य साफ होही, त सफलता जरूर मिलथे।
विकसित भारत युवा संसद
माय भारत छत्तीसगढ़, युवा कारीकरम अउ केंंद्रीय खेल मंत्रालय कोति ले काली दस मार्च के विकसित भारत युवा संसद के आयोजन करे जाही। रईपुर के पुराना विधानसभा के प्रेक्षागृह म होवइया युवा संसद म तीस जिला के कुल डेढ़ सौ विजेता युवा प्रतिभागी मन ह भाग लिही। जेमा ले तीन झिन विजेता मन ल राष्ट्रीय स्तर म छत्तीसगढ़ के प्रतिनिधित्व करे के मउका मिलही।
न्यायालय-बम धमकी
प्रदेस के बालोद अउ बेमेतरा जिला न्यायालय परिसर ल बम ले उड़ाय के धमकी मिले हे। बताय जात हे कि ए धमकी ह ई-मेल के माध्यम ले मिले हे। धमकी मिले के बाद पुलिस प्रशासन कोति ले न्यायालय परिसर के सुरक्षा ल बढ़ा दे गेहे अउ बम स्क्वॉड के टीम ह जांच म जुट गेहे।
होरी तिहार के बाद छत्तीसगढ़ विधानसभा के बजट सत्र आज ले फेर सुरू हो गेहे। विपक्ष ह आज सदन म दुरूग म करे जात अफीम के खेती के बिसय ल उठाइन। सून्यकाल म नेता प्रतिपक्ष डॉक्टर चरणदास महंत ह ए मामला उपर स्थगन प्रस्ताव पेस करत हुए सरकार उपर दोषी मन ल बचाय के प्रयास के आरोप लगाइन। आसंदी कोति ले स्थगन प्रस्ताव ल आग्राह्य करतेच विपक्षी सदस्य मन ह गर्भगृह म उतरके नाराबाजी करे लगिन अउ विधानसभा के नियम के अनुसार खुदे निलंबित होगे। एखर बाद हंगामा के बीच सदन के कार्यवाही ल पांच मिनट बर रोक दे गीस।
बाद म उपमुख्यमंत्री विजय शर्मा ह सदन म ए मामला म अपन वक्तव्य दीन। विधानसभा परिसर म मीडिया ले गोठबात करत हुए श्री शर्मा ह बतइन कि दुरूग मामला म मुखबिर के सूचना के आधार म तुरते कार्रवाई करे गीस। ओमन ह बतइन कि पाछू दू बछर के दउरान राज्य म मादक पदार्थ के अवैध तस्करी के खिलाफ कड़ा कार्रवाई करे गेहे। ओमन ह किहीन कि मादक पदार्थ के अवैध तस्करी म सामिल होय हरेक मनखे के खिलाफ एनडीपीएस एक्ट के चलत कठोर कार्रवाई करे जात हे।
इही बीच, सदन के बाहिर मीडिया ले गोठ करत हुए मुख्यमंत्री विष्णुदेव साय ह किहीन हे कि छत्तीसगढ़ म हमर सरकार बने के बाद ले ही हर प्रकार के अपराध उपर सक्ति ले कार्रवाई करे जात हे। अभी के होय घटना म घलो मुख्य आरोपी के गिरफ्तारी हो चुके हे अउ मामला के जांच चलत हे। जांच म अगर कोनो अउ आने मनखे के नाम आथे, त ओखर खिलाफ घलो सख्त कार्रवाई करे जाही।
उहें, प्रश्नकाल म आज भाजपा विधायक प्रमोद मिंज ह दिव्यांगजन मन ल पदोन्नति म आरक्षण के बिसय ल उठाइन। ओमन ह किहीन कि केंद्र सरकार कोति ले चार प्रतिसत पदोन्नति के नियम हरय। सुप्रीम कोर्ट ह घलो एखर बर निरदेस देहे। राज्य सरकार ह अभी तक ए दिसा म कोनो कार्रवाई नइ करे हे।
जवाब म महिला अउ बाल विकास मंत्री लक्ष्मी राजवाड़े ह किहीन कि केंद्र ह राज्य ल जउन अधिकार देहे, एखर चलत छत्तीसगढ़ सरकार ह तीन प्रतिसत पदोन्नति के व्यवस्था देहे। ओमन ह बतइन कि पदोन्नति बर एक ठिन आवेदन आय रिहीस, जेला वापिस ले ले गेहे।
अइसने, प्रश्नकाल म ही विधायक चैतराम अटामी ह दंतेवाड़ा म कुपोषण के बिसय ल उठाइन। एमा महिला अउ बाल विकास मंत्री लक्ष्मी राजवाडे़ ह बतइन कि पांच हजार ले जादा लइका मन ल कुपोषण के श्रेणी म चिन्हांकित करे गेहे। ओमन ह बतइन कि बेरा-बेरा म प्रदेस भर म लइका मन ल पोषण आहार दे जात हे।
राज्य विधानसभा म आज विपक्षी सदस्य मन ह बस्तर संभाग म होय धान खरीदी के मुद्दा ल उठाइन। प्रश्नकाल के बेरा म विधायक लखेश्वर बघेल ह एसो करे गे धान खरीदी अउ ओखर उठाव के बारे म जानकारी मांगिन, जेमा खाद्य मंत्री दयालदास ह बतइन कि बस्तर संभाग म लगभग छियालिस हजार आठ सौ सैंतालीस मीट्रिक टन धान के उठाव होय हे।
पूर्व मुख्यमंत्री भूपेश बघेल अउ कांग्रेस सदस्य कवासी लखमा ह घलो एमा विभागीय मंत्री ले पूरक सवाल करीन हे। जवाब म मंत्री दयालदास बघेल ह किहीन कि जउन किसान धान खरीदी केंद्र तक धान ले के पहुंचे रिहीन, उंखर धान खरीदे गेहे। एखर बाद मंत्री के जवाब ले असंतुष्ट विपक्षी सदस्य मन ह सदन ले बाहिर निकल गीन।
उहें, सत्ता पक्ष के विधायक भावना बोहरा ह आज ध्यानाकर्षण प्रस्ताव के माध्यम ले वन अधिकार पट्टा ल नई बांटे के बिसय ल उठाइन। जेखर जवाब म आदिमजाति विकास मंत्री राम विचार नेताम ह किहीन हे कि राज्य म वन भूमि अधिकार पट्टा बर चार लाख ले जादा के आवेदन ले खारिज करे गेहे। ओमन ह किहीन हे कि प्राप्त होय आवेदन के जांच करे जाही अउ वन अधिकार अधिनियम के प्रावधान के अनुसार जरूरतमंद लोगन मन ल वन भूमि अधिकार पट्टा दे जाही।
अइसने, कांग्रेस विधायक ब्यास कश्यप ध्यानाकर्षण प्रस्ताव के माध्यम ले राज्य के फैक्ट्री म औद्योगिक नीति के अनुपालन नइ होय के मुद्दा ल उठाइन। जेखर जवाब म श्रममंत्री लखन लाल देवांगन ह किहीन कि प्रदेस म औद्योगिक नीति के कड़ाई ले पालन करे जात हे। ओमन ह किहीन कि अगर कोनो उल्लंघन होही त, संबंधित फैक्ट्री के खिलाफ कड़ा कार्रवाई करे जाही।