दुर्ग जिला के ग्राम समोदा म अफीम के अवैध खेती करे के मामला म पुलिस ह भाजपा नेता विनय ताम्रकार समेत तीन झन ल गिरफ्तार करे हे। इंखर मन ले पूछताछ करे जात हे, मउका म आबकारी, राजस्व, मजिस्ट्रेट, पुलिस अउ नारकोटिक्स कंट्रोल ब्यूरो-एनसीबी रायपुर के टीम मौजूद रिहीस। अतिरिक्त पुलिस अधीक्षक सुखनंदन राठौर ह बतइन कि पुलिस ए मामला के जल्द ही खुलासा करही। अब तक तीन लोगन मन ल गिरफ्तार करे गेहे, जेमा विनायक ताम्रकार के आलावा बृजेश ताम्रकार अउ राजस्थान निवासी केयर टेकर विकास बिसनोई सामिल हे।
एखर पहिली काली दुरूग पुलिस ह छापामार के करीब डेढ़ एकड़ जमीन म अफीम के पौधा बरामद कर नमूना जांच बर भेजे रिहीन।
इही बीच, भाजपा के प्रदेस इकाई ह पार्टी के राइस मिल प्रसंस्करण प्रकल्प किसान मोर्चा के प्रदेस संयोजक विनय ताम्रकार ल तत्काल प्रभाव ले निलंबित कर देहे। पार्टी ह किहीन हे कि श्री ताम्रकार के ए कृत्य अनुशासनहीन अउ पार्टी के छवि धूमिल करने वाला हे। उंखर उपर मक्का के फसल के बीच अफीम के पौधा लगाय के आरोप हे।
उहें, भाजपा नेता के निलंबन उपर उपमुख्यमंत्री अरूण साव ह किहीन कि कानून ले उपर कोई नइ हे। गैर कानूनी काम करइया मन उपर कार्रवाई होही।
ओति, पूर्व मुख्यमंत्री भूपेश बघेल अफीम के खेती के जायजा लेबर आज गा्रम समोदा पहुंचिन। श्री बघेल के खेत पहुंचे के खबर मिलते ही बड़ संख्या म ग्रामीण मन इकठ्ठा होगे। ए दउरान पुलिस अउ ग्रामीण मनके बीच झूमाझटकी घलो होइस। पुलिस के कहना हे कि ओमन ग्रामीण मन ल सुरक्षा के दृष्टि ले खेत म जाय बर रोकत रिहीन।
अंतर्राष्ट्रीय महिला दिवस के पाछू संझा म आज रायपुर म छत्तीसगढ़ राज्य ग्रामीण आजीविका मिशन-बिहान डहार ले ‘‘लखपति दीदी संवाद‘‘ कारीकरम के आयोजन करे गीस। कारीकरम म मुख्यमंत्री विष्णुदेव साय सामिल होइन। कारीकरम म प्रदेसभर ले उत्कृष्ट कार्य करइया स्व-सहायता समूह के महिला, कैडर्स अउ लखपति दीदी मन ल सम्मानित करे गीस। उहें, मुख्यमंत्री ह ए बेरा म ‘‘लखपति दीदी ग्राम पोर्टल‘‘ के सुभारंभ करीन। संगेसंग लखपति दीदी उपर आधारित कॉफी टेबल बुक अउ छत्तीसकला आधारित ब्रांड बुक के विमोचन घलो करे गीस।
कारीकरम म उपमुख्यमंत्री विजय शर्मा घलो उपस्थित रिहीन।
जनऔषधि दिवस
आज जनऔषधि दिवस हरय। ए मउका म छत्तीसगढ़ समेत देसभर म आने-आने कारीकरम आयोजित करे जात हे। प्रधानमंत्री नरेंद्र मोदी ह ए अवसर म प्रधानमंत्री भारतीय जनऔषधि परियोजना ले लाभांवित लोगन मन ल बधाई देहे। श्री मोदी ह किहीन कि परियोजना ले अनगिनत परिवार मनके इलाज के खर्चा म बचत होय हे। ओमन किहीन कि सरकार किफायती कीमत म गुणवत्तापरक दवा उपलब्ध कराय बर प्रतिबध्द हे।
ऐति, राजधानी रायपुर के कोटा म आज राज्य स्तरीय कारीकरम के आयोजन करे गीस। ए कारीकरम म राज्य भर के जनऔषधि केंद्र प्रभारी मन सामिल होइन। कारीकरम ल संबोधित करत हुए रायपुर के मुख्य चिकित्सा अउ स्वास्थ्य अधिकारी डॉक्टर मिथिलेश चौधरी ह जेनेरिक दवा मन के संबंध म आम जनता के बीच फैले भ्रांति मन ल दूर करे के प्रयास करीन। ओमन किहीन कि सस्ता दवा के मतलब कम गुणवत्ता होय के धारणा उचित नइ हे। डॉक्टर चौधरी ह लोगन मन ले सस्ता जेनेरिक दवाई मनके लाभ उठाय के अपील करीन।
मुख्यमंत्री-लोक निर्माण विभाग
मुख्यमंत्री विष्णुदेव साय ह किहीन कि प्रदेस म सड़क निर्माण कार्य म कोनो भी प्रकार के लापरवाही या अनियमितता बर्दास्त नइ करे जाय। श्री साय ह काली मंत्रालय म लोक निर्माण विभाग के काम अउ गतिविधि मनके समीक्षा करीन। ए दउरान ओमन किहीन कि कहू भी निर्माण कार्य म कमी पाय जाय उपर संबंधित अधिकारी मनके खिलाफ कार्रवाई कर दोषी ठेकेदार मन ल ब्लैक लिस्ट करे जाही।
अंतर्राष्ट्रीय महिला दिवस
काली अंतर्राष्ट्रीय महिला दिवस हरय। ए अवसर म छत्तीसगढ़ समेत देसभर म अलग-अलग कारीकरम आयोजित करे जाही।
राष्ट्रपति द्रौपदी मुर्मु काली नई दिल्ली म एक ठन कारीकरम ल संबोधित करही। केंद्रीय महिला अउ बाल विकास मंत्री अन्नपूर्णा देवी अउ राज्य मंत्री सावित्री ठाकुर घलो ए अवसर म उपस्थित रइही। कारीकरम म सशस्त्र बल, पुलिस अउ दूसर क्षेत्र समेत एक सौ पचास मंत्रालय, विभाग अउ संगठन ले लगभग एक हजार महिला मन भाग लिही। कारीकरम म दू पैनल चर्चा घलो होही। पहिली चर्चा श्रम संहिता-महिला सशक्तिकरण उपर अउ दूसर चर्चा स्व-सहायता समूह के महिला उद्यमी मन उपर केंद्रित होही।
यूपीएससी परीक्षा-छत्तीसगढ़
संघ लोक सेवा आयोग-यूपीएससी दू हजार पच्चीस के परीक्षा परिणाम घोसित हो गेहे। ए परीक्षा म छत्तीसगढ़ के सात झन अभ्यर्थी मन के घलो चयन होय हे। एमा रायपुर जिला के वैभवी अग्रवाल अउ रौनक अग्रवाल सामिल हे। उहें, दुरूग जिला ले अनुभव अग्रवाल, मनेन्द्रगढ़ ले दर्शना सिंह, धमतरी ले डायमंड िंसंह धु्रव, बीजापुर ले अंकित संकनी अउ महासमुंद जिला ले संजय डहरिया ह सफलता हासिल करे हे।
मुख्यमंत्री विष्णुदेव साय ह चयनित सबो अभ्यर्थी मन ले वीडियो काल के माध्यम ले उंखर ले गोठबात कर उनला बधाई अउ सुभकामना दीन। ओमन किहीन कि प्रदेस के प्रतिभासाली युवा मन ह अपन मेहनत लगन अउ दृढ़ संकल्प के संग ए उपलब्धि हासिल कर छत्तीसगढ़ के गौरव बढ़ाय हे।
उहें, यूपीएसी परीक्षा म पैंतीसवीं रैंक हासिल करइया रायपुर के वैभवी अग्रवाल ह आज मुख्यमंत्री ले उंखर रायपुर स्थित निवास कार्यालय म मुलाकात करीन।
हेल्थ एटीएम-लोकार्पण
वन मंत्री केदार कश्यप ह काली बस्तर जिला के भानपुरी स्थित सिविल अस्पताल म हेल्थ एटीएम स्वास्थ्य सुविधा के लोकार्पण करीन। ए बेरा म श्री कश्यप ह ग्राम राजपुर अउ खड़का म छत्तीस लाख रूपिया ले जादा के निर्माण कार्य मनके भूमिपूजन घलो करीन।
कारीकरम ल संबोधित करत हुए वन मंत्री ह किहीन कि हेल्थ एटीएम बस्तर के दूरस्थ अंचल मन बर कोनो संजीवनी ले कम नोहय। ए सुविधा के सुरू होय ले अब ग्रामीण मन ल जांच बर बड़े सहर के चक्कर नइ कांटेल पड़य। ए अत्याधुनिक मसीन के जरिया अब ब्लडप्रेसर, सुगर, ईसीजी अउ ऑक्सीजन लेवल समेत सौ ले जादा प्रकार के स्वास्थ्य जांच करे जा सकही।
खेलो इंडिया ट्राइबल गेम्स
छत्तीसगढ़ म ‘‘खेलो इंडिया ट्राइबल गेम्स‘‘ के आयोजन आगामी पच्चीस मार्च ले छै अप्रैल तक करे जाही। ए प्रतियोगिता रायपुर, सरगुजा अउ बस्तर म आयोजित करे जाही। मुख्यमंत्री विष्णुदेव साय ह काली मंत्रालय म खेल अउ युवा कल्याण विभाग के समीक्षा बइठका लेके ए आयोजन के तैयारी के जानकारी लीन। ओमन किहीन कि ‘‘खेलो इंडिया ट्राइबल गेम्स‘‘ न केवल वनांचल के खिलाड़ी मनके प्रतिभा ल पहिचान देके मंच बनही, बल्कि ओमन ल राष्ट्रीय स्तर तक पहुंचाय के सशक्त माध्यम घलो सिध्द होही।
बतादन कि केंद्र सरकार डहार ले प्रथम ‘‘खेलो इंडिया ट्राइबल गेम्स‘‘ के मेजबानी छत्तीसगढ़ ल मिले हे। ए प्रतियोगिता म सात प्रतिस्पर्धात्मक अउ दू प्रदर्सनात्मक खेल आयोजित करे जाही। रायपुर म तीरंदाजी , फुटबाल, हॉकी, वेट लिफि्ंटग, स्वीमिंग अउ कबड्डी के प्रतियोगिता होही। उहें, सरगुजा म कुस्ती अउ मलखंभ अउ बस्तर म एथलेटिक्स के प्रतियोगिता आयोजित होही। ए प्रतियोगिता म देस के लगभग तीस राज्य ले करीब पच्चीस सौ खिलाड़ी अउ अधिकारी मन भाग लिही।
बिजली उपभोक्ता-राहत
छत्तीसगढ़ राज्य विद्युत वितरण कंपनी ह समाधान योजना लागू करे हे। ये योजना के माध्यम ले लंबा समय ले बकाया बिजली बिल वाला उपभोक्ता मन ल सरचार्ज म विसेस छूट प्रदान कर बकाया रासि के निराकरण के अवसर दे जात हे। योजना के लाभ उन उपभोक्ता मन ल मिलही, जेखर बिजली बिल इकतीस मार्च दू हजार तेईस तक बकाया हे।