प्रधानमंत्री नरेंद्र मोदी ह किहीन कि कृषि भारतीय अर्थव्यवस्था के रीढ़ हरय अउ दीर्घकालिक विकास यात्रा के महत्वपूर्ण स्तंभ हरय। कृषि अउ ग्रामीण परिवर्तन बिसय उपर बजट के बाद वेबिनार ल वीडियो कॉन्फ्रेंस के माध्यम ले संबोधित करत श्री मोदी ह किहीन कि सरकार ह कृषि क्षेत्र ल मजबूत करे बर नियमित रूप ले कई कदम उठाय हे।
प्रधानमंत्री श्री मोदी ह रसायन मुक्त खेती अउ प्राकृतिक खेती ल सुदृढ़ करे के संग निर्यात उपर बिसेस धियान देमा जोर दीन। ओमन किहीन कि केंद्रीय बजट दू हजार छब्बीस-सत्ताईस म उच्च मूल्य कृषि उत्पाद म घलो ज्यादा धियान दे गेहे।
यूपीएससी-परिणाम
संघ लोक सेवा आयोग-यूपीएससी ह सिविल सेवा परीक्षा-दू हजार पच्चीस मुख्य के अंतिम परिणाम जारी कर देहे। ए दारी राजस्थान के अनुज अग्निहोत्री ह टॉप करे हे। दूसर स्थान म राजेश्वरी सुवे एम. हरय। उहें, तीसर स्थान एकांश ढूल ह पाय हे। ए परिणाम लिखित परीक्षा अउ साक्षात्कार के आधार म जारी करे गेहे। आयोग ह मेरिट के आधार म कुल नौ सौ अंठावन उम्मीदवार मन ल आने-आने सेवा म नियुक्ति बर अनुसंसित करे हे।
राज्यसभा-नामांकन पत्र जांच
छत्तीसगढ़ के दू सीट समेत दस राज्य के सैंतीस राज्यसभा सीट बर दाखिल नामांकन पत्र के आज जांच करे गीस। प्रदेस ले भाजपा प्रत्यासी लक्ष्मी वर्मा अउ कांग्रेस उम्मीदवार फूलोदेवी नेताम के नामांकन पत्र वैध पाय गेहे। एखरे संग दूनों के निर्विरोध चुनई ह तय माने जात हे। नामांकन पत्र के जांच के दउरान विधानसभा कक्ष म भाजपा अउ कांग्रेस के प्रतिनिधि मौजूद रिहीन। उहें, तेलंगाना के एक मनखे ह घलो राज्यसभा प्रत्यासी के रूप म छत्तीसगढ़ ले नामांकन पत्र भरे रिहीस, लेकिन अधूरा होय के सेति एला निरस्त कर दे गीस।
छत्तीसगढ़ समेत दस राज्य के सैंतीस राज्यसभा सीट के प्रत्यासी नौ मार्च तक अपन नांव लहुटा सकथे। जिंहा जरूरी हे, उंहा सोलह मार्च के मतदान होही अउ इही दिन परिणाम घलो घोसित कर दे जाही।
‘‘वीबी-जी राम जी यूथ डिजिटल कैंपेन‘‘
केंद्रीय ग्रामीण विकास मंत्रालय ह माय भारत के संग मिलके आज ले एक ठिन राष्ट्रव्यापी डिजीटल अभियान ‘वीबी-जी राम जी यूथ डिजिटल कैंपेन‘ के सुरूआत करे हे। एमा देसभरके पंद्रह ले उनतीस साल के आयु वर्ग के युवा क्विज, वीडियो चैलेंज अउ रचनात्मक प्रतियोगिता जइसे गतिविधि के माध्यम ले जुड़ सकही। युवा अपन गांव के विकास, रोजगार सृजन अउ आजीविका संवर्धन म अधिनियम के भूमिका ल रचनात्मक रूप ले प्रस्तुत कर सकही। प्रतिभागी कोनो भी भारतीय भाषा म तीस ले साठ सेकेंड के अवधि के वीडियो तियार करके माय भारत पोर्टल के माध्यम ले ऑनलाइन जमा कर सकही।
डेमोंस्ट्रेशन हाउसिंग प्रोजेक्ट
प्रधानमंत्री आवास योजना सहरी के तहत रतनपुर म आधुनिक तकनीक आधारित डेमोंस्ट्रशन हाउसिंग प्रोजेक्ट सुरू करे के मंजूरी दे गेहे। ए परियोजना बर तेरह करोड़ रूपिया ले जादा के केंद्रीय सहायता दे जाही।
केंद्रीय आवासन अउ सहरी कार्य राज्य मंत्री तोखन साहू ह उम्मीद जतइन कि रतनपुर म स्वीकृत ए परियोजना आधुनिक निर्माण तकनीक के एक उत्कृष्ट उदाहरण बनही। ओमन किहीन कि ए परियोजना ले स्थानीय स्तर म रोजगार के मउका बाढ़ही अउ क्षेत्र के संपूर्ण विकास ल घलो मजबूती मिलही।
दुर्घटना
जशपुर जिला के गोडाअंबा गांव करा आज एक तेज रफ्तार यात्री बस अनियंत्रित होके पलट गीस। ए सड़क हादसा म पांच मनखे के मउत होगे, जबकि करीबन पच्चीस यात्री घायल हो गेहे।
ए यात्री बस झारखंड के कुरडेग ले कुनकुरी कोति आत रिहीस। एमा तीस ले जादा यात्री सवार रिहीन। जइसे ही बस तपकरा थाना क्षेत्र के गोडाअंबा गांव करा पहुंचिस, तभे रफ्तार जादा होय के सेति वाहन चालक के बस ले नियंत्रण हटगे अउ ए बस सड़क किनारे पलटगे। बस के पलटे ले कई झन यात्री अंदर फंस गीन अउ मउका म अफरा-तफरी होगे। ए दउरान स्थानीय ग्रामीण मन बस म फंसे यात्री मन ल बाहिर निकाले म मदद करीन। सूचना मिले के बाद तपकरा अउ करडेगा पुलिस के टीम मउका म पहुंचिस अउ राहत बचाव के काम सुरू करे गीस। अतिरिक्त पुलिस अधीक्षक राकेश पाटनवार ह बतइन कि घायल मनके इलाज कुनकुरी अस्पताल म चलत हे अउ ए दुर्घटना के कारण के जांच करे जात हे।
उहें, बलौदाबाजार-भाटापारा जिला म सिमगा थाना क्षेत्र करा दरचूरा गांव म यात्री बस अउ ट्रक के बीच आपस म भिडंत होगे। हादसा म चार मनखे के मउत होगे। जबकि पंद्रह यात्री गंभीर रूप ले घायल हो गेहे। मिले जानकारी के अनुसार ए बस रईपुर ले बिलासपुर कोति जात रिहीस अउ एमा पैंतीस यात्री सवार रिहीन। ए हादसा राष्ट्रीय राजमार्ग म होय हे अउ घटनास्थल म राहत अउ बचाव कार्य सुरू कर दे गेहे।
इही बीच, मुख्यमंत्री विष्णुदेव साय ह ए दूनों हादसा उपर दुख जतइन ओमन जिला प्रशासन के अधिकारी मन ल निरदेस दीन कि घायल मन ल हर संभव चिकित्सा सुविधा अउ जरूरी सुविधा उपलब्ध कराय जाय।
जनऔषधि सप्ताह-पदयात्रा
प्रधानमंत्री भारतीय जनऔषधि परियोजना के तहत मनाय जात जनऔषधि हफ्ता के दउरान आज रईपुर म जनऔषधि पदयात्रा निकाले गीस। नागरिक मन ल सस्ता अउ उच्च गुणवत्ता वाला जेनेरिक दवा बर जागरूक करे के उद्देस्यस ले ए कारीकरम के आयोजन करे गीस। ए पदयात्रा सहर के फूल चौक ले सुरू होइस जउन आने-आने चौक-चौराहा ले गुजरिस। पद यात्रा म सामिल लाभार्थी मन आम जन ल जेनेरिक दवा के फायदा ल बतइन। ए हफ्ता के समापन काली सात मार्च के जनऔषधि दिवस के रूप म होही।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों में‘‘ ए बखत एक मार्च ले देसभर म मनाय जात जनऔषधि सप्ताह उपर केंद्रित रइही। ए बिसय म प्रधानमंत्री भारतीय जनऔषधि परियोजना के प्रबंधक अनीश वोडितेलवार ले गोठबात करे गेहे। ए कारीकरम के प्रसारण काली सात मार्च के आकाशवाणी के रईपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
ट्रेन परिचालन
दक्षिण पूर्व मध्य रेलवे के बिलासपुर-झारसुगड़ा सेक्शन अउ नागपुर मंडल के बोरतलवा-दरेकसा अउ गुदमा-गोंदिया रेलखंड के बीच तकनीकी कार्य के सेति मार्च अउ अप्रैल महिना के दउरान कुछेक यात्री गाड़ी के परिचालन प्रभावित होही। उहें, कुछ गाड़ी गंतव्य ले पहिली ही समाप्त कर दे जाही।
एखर तहत बिलासपुर-चांपा सेक्सन के बीच अकलतरा स्टेसन म चौथी लाइन निर्माण कार्य के सेति इकतीस मार्च ले ग्यारा अप्रैल तक बिलासपुर-रायगढ़-बिलासपुर मेमू अउ गेवरा रोड-रईपुर मेमू पैसेंजर रद्द रइही। ए अवधि म बिलासपुर-कोरबा मेमू घलो नइ चलही। यात्री मनके सुविधा बर इकतीस मार्च ले ग्यारा अप्रैल के बीच हसदेव एक्सप्रेस ल कोरबा-बिलासपुर के बीच पैसेंजर के रूप म चलाय जाही।
उहें, नागपुर मंडल के बोरतलाव-दरेकसा अउ गुदमा-गोंदिया रेलखंड के बीच गर्डर लगाय के सेति आज अउ काली ट्रेन मनके अवई-जवई प्रभावित रइही। ए दउरान रईपुर, डोंगरगढ़ अउ गोंदिया मेमू रद्द रइही। टाटा इतवारी एक्सप्रेस ल घलो बोरतलाव तक चलाय जाही।
धान खरीदी-शिकायत
रईपुर जिला के आरंग विकासखंड स्थित भलेरा सहकारी समिति के धान खरीदी केंद्र म धान के स्टाक ल पानी ले फिलोय संबंधी सिकायत के जांच बर तीन सदस्यीय समिति बनाय गेहे। जिला कलेक्टर डॉक्टर गौरव सिंह ह किहीन कि धान खरीदी प्रक्रिया म कोनो भी प्रकार के अनियमितता या लापरवाही नइ सहे जाही।