ऐति, कतकोन सामाजिक संस्था मन ह पर्यावरण जागरूकता के चलत लोगन मन ल सूखा होली खेले के बात किहीन संस्था के कार्यकर्ता अउ पदाधिकारी मन गुलाल लगाके एक-दूसर ल होली के बधाई दीन।
छत्तीसगढ़ म बस्तर ले सरगुजा तक होली के आने-आने तरीका के रंग देखे बर मिलिस। बस्तर म हर बार जइसन होली म जनजातीय संस्कृति अउ परंपरा मनके आने-आने झलक देखे बर मिलीस। बस्तर म होली के सुरूवात दंतेवाड़ा के फागुन मेला ले होथे। ए परंपरा के मुताबिक साफ माटी अउ पलास के फूल ले बने रंग ल दंतेश्वरी देवी अउ, मेला म प्रतीकात्मक रूप ले आय जम्मों देवी-देवता ल चढ़ाय जाथे। ए मउका म सांकेतिक होली के दिया बारे जाथे। उहें, फागुन मेला के दूसर दिन बस्तर के पहिली होली के दिया माड़पाल म बारे जाथे। प्रदेस म सुरक्षा बेवस्था के घलो तगड़ा इंतजाम करे गेहे।
मानता हे कि बस्तर म पूर्व राजपरिवार के संग पहिली होली इंहे, जलाय जाथे। ए परंपरा आज घलो चलत हे। माड़पाल म होलिका दहन करे के बाद जगदलपुर म मावली मंदिर, भैरमदेव मंदिर अउ जगन्नाथ मंदिर म एके संघरा होलिका दहन करे जाथे। रंग, अबीर अउ गुलाल के संग पारंपरिक लोक नृत्य, नाटक, ढोल, मांदर अउ नंगाड़ा के गुंज के बीच लोगन मनके सामूहिक उछाह ए परब ल खास बना देथे। जानबा के मुताबिक बस्तर म होली के तिहार धार्मिक परंपरा मनके भाग हरय अउ इंहा के जादा परब प्रकृति के संगेसंग देवी-देवता मन उपर समर्पित हे।
ऐति, रईपुर म सुरक्षा के चाक-चौबंद बेवस्था करे गेहे। जघा-जघा पुलिस मनके टीम तैनात हे। सहर म चेकिंग प्वाइंट लगाके गाड़ी मनके जांच करे जात हे। नसा करके गाड़ी चलइया मन उपर कार्रवाई करे जात हे। नगर के जम्मों थाना क्षेत्र मन म सांति बनाय बर पुलिस के संगेसंग नगर सेना के जवान मन ल घलो तैनात करे गेहे।
राष्ट्रपति द्रौपदी मुर्मू, उपराष्ट्रपति सी.पी. राधाकृष्णन, प्रधानमंत्री नरेन्द्र मोदी अउ केंद्रीय गृहमंत्री अमित शाह ह होली तिहार के मउका म देस के लोगन मन ल बधाई अउ सुभकामना दे हवय। उंहे, छत्तीसगढ़ के राज्यपाल अउ मुख्यमंत्री ह घलो होली तिहार के सुभकामना देहे।
राज्यसभा चुनाव नामांकन
छत्तीसगढ़ के दू सीट के संगेसंग देश के सैंतीस ठिन राज्यसभा सीट मन बर नामांकन पत्र दाखिल करे के काली आखरी दिन हरय। नामांकन पत्र मनके जांच छह मार्च के करे जाही। प्रत्यासी मन नौ मार्च तक अपन नाव वापिस ले सकथे। त उंहे, मतदान सोला मार्च के होही। अउ इही दिन परिणाम घलो घोषित कर दे जाही। जानबा के मुताबिक भारतीय जनता पार्टी ह छत्तीसगढ़ ले लक्ष्मी वर्मा ल अपन उम्मीदवार बनाय हे।
भारतनेट प्रोग्राम-राशि स्वीकृत
केंद्रीय संचार मंत्रालय ह संसोधित भारतनेट प्रोग्राम के तहत छत्तीसगढ़ बर तीन हजार नौ सौ बयांलिस करोड़ रूपिया के मंजूरी देहे। ए परियोजना म छत्तीसगढ़ के ग्यारा हजार छह सो बयांसी ग्राम पंचायत मन ल रिंग टोपोलॉजी के माध्यम ले जोड़े जाही। ए नेटवर्क संरचना जादा विश्वसनीय, सुरक्षित अउ बिना रूके डिजिटल सेवा देवाय म कारगर होही।
मुख्यमंत्री विष्णुदेव साय ह रासि के मंजूरी बर प्रधानमंत्री अउ केंद्रीय संचार मंत्री ज्योतिरादित्य सिंधिया के प्रति आभार जताय हे। ओमन किहीन कि ए परियोजना ग्रामीण डिजिटल सशक्तिकरण के दिसा म एतिहासिक कदम हरय। एखर ले ई-गर्वनेस सेवा के विस्तार होही, ऑनलाईन शिक्षा ल अउ जादा मजबूती मिलही। टेलीमेडिसिन के माध्यम ले दूरदराज के जघा तक स्वास्थ्य सेवा पहुंचही अउ गांव के युवा मन बर नवा मउका खुलही।
हाईकोर्ट शराब-घोटाला
छत्तीसगढ़ उच्च न्यायालय ह सराब घोटाला मामला म आरोपी बनाय गे पांच झिन लोगन मन ल जमानत दे देहे। जेमा, पूर्व आईएएस अनिल टुटेजा, अनवर ढेबर, यश पुरोहित, नितेश पुरोहित अउ दीपेन्द्र सामिल हवय। ए जम्मों मन ह जमानत बर न्यायालय म याचिका दायर करे रिहीन। न्यायाधिश अरविंद कुमार वर्मा के एकलपीठ ह मामला के सुनवाई के बाद आरोपी मन ल जमानत देके आदेस दीन।
अपर मुख्य सचिव-पुर्नवास केन्द्र
अपर मुख्य सचिव मनोज पिंगवा ह कोण्डागांव जिला के प्रवास के दउरान देव खरगांव स्थित पुर्नवास केन्द्र के निरीक्षण करीन। ए दउरान ओमन पुर्नवासित मनखे मन ले गोठबात करके इंहा के बेवस्था के जानबा लीन। संगेसंग केन्द्र म चलत कतकोन प्रशिक्षण कारीकरम ल देखीन, ओमन अधिकारी मन ल पुर्नवासित मनखे मनके प्रशिक्षण के संगेसंग उंखर शिक्षा मन उपर घलो बिसेस ध्यान दे बर किहीन। श्री पिंगवा ह कृषि ले जुड़े स्व-रोजगार उपर घलो बिसेस ध्यान देके बात किहीन।
अपन प्रवास के दउरान अपर मुख्य सचिव ह कोंडानार स्थित गारमेंट फैक्ट्री के निरीक्षण करे के संगेसंग इंहा चलत आजीविका गतिविधि ल देखीन।
प्रावीण्य छात्रवृत्ति योजना-परीक्षा
केंद्रिय शिक्षा मंत्रालय कोति ले चलाय जात स्कूल शिक्षा अउ साक्षरता विभाग डहार ले राष्ट्रीय साधन सह प्रावीण्य छात्रवृŸा योजना के परीक्षा अवइया दू मई के होही। ए परीक्षा के माध्यम ले कक्षा आठवी म पढ़हइया आर्थिक रूप ले कमजोर छात्र मनके चयन करे जाही। जेमन ल नौवीं ले बारवीं तक के पढ़ई बर केंद्र सरकार कोति ले हरेक महिना एक हजार रूपिया के छात्रवृत्ति दे जाही।
छत्तीसगढ़ माध्यमिक शिक्षा मंडल के सचिव पुष्पा साहू ह बतईन कि ए परीक्षा बर अर्जी के काम सुरू हो गेहे। एमा, छात्र मन ऑफलाइन अर्जी कर सकथे अर्जी जमा करे के आखिरी तारिख बीस मार्च राखे गेहे। केंद्रीय, नवोदय, प्राईवेट अउ आवासीय विद्यालय मन म पढ़ई करत छात्र मन ल ए योजना म पात्रता नई मिलय।
बेमेतरा-जल संरक्षण महाभियान
बेमेतरा जिला म सरलग गिरत भू-जल स्तर अउ जल संकट ल देखत ‘‘जल संरक्षण महाभियान‘‘ के तहत जनजागरूकता अभियान चलाय जात हे। ए दउरान सभा, चौपाल अउ रैली के माध्यम ले गांव-गतौरी अउ सहरी जघा म लोगन मन ल अपन घर म रिचार्ज पिट बनाय के बात केहे जात हे। आठ मार्च के अंतर्राष्ट्रीय महिला दिवस के मउका म लोगन मन ले बिनती करे गेहे कि ओमन ए दिन माईलोगिन मनके सम्मान म अपन घर म रिचार्ज पिट बनाके पानी बचाय के संकलप लेवय।
इही बीच, स्वास्थ्य विभाग ह लोगन मन ले मंझनिया बेरा घाम म जरूरी काम नई हे त, झन निकले, जादा पानी पिये अउ हल्का कपड़ा पहिरे के सलाह देहे। किसान मन ल घलो फसल के सिंचाई अउ गाय गरू मनके देखभाल के बारे म जरूरी सावधानी बरते बर केहे हे।
इही बीच, राजधानी रईपुर म संभावित हीट वेव के स्थिति ले निपटे बर जिला प्रशासन ह तियारी सुरू कर देहे। पंडरी स्थित जिला चिकित्सालय परिसर म ‘‘हीट स्ट्रोक रूम‘‘ बनाय गेहे, जिंहा जादा बिस्तर के बेवस्था करे गेहे। मरीज मनके सरीर के तापमान तेजी ले कम करे बर दू बिसेस बाथ टब लगाय गेहे। जेमा ठंडा पानी अउ बर्फ के सहायता ले इमर्षन कूलिंग करे जा सकही। एखर संगेसंग बर्फ के सरलग बेवस्था बर आइस मेकिंग मसीन घलो स्थापित करे गेहे।
अउ अब थोरकुन समाचार सार म –
– सूरजपुर जिला के सरईडांड बोंगा स्थित प्राथमिक शाला के एक झिन सहायक शिक्षक ल सराब के नशा म स्कूल आय के आरोप म जिला शिक्षा अधिकारी ह निलंबित कर देहे।
अउ
– कबीरधाम जिला के गांव बिरकोना के तीर एक ठिन गाड़ी के चपेट म आय ले फटफटी म बईठे एक झिन मनखे के मउत होगे।