प्रधानमंत्री नरेन्द्र मोदी ह किहीन हे कि भारत मजबूत अर्थव्यवस्था के संग विश्व बर आशा के किरण बने हे। बजट के बाद ‘‘अर्थिक विकास को सतत अउ सुदृढ़ बनाना‘‘ विषय म राखे गे वेबिनार ल संबोधित करत प्रधानमंत्री ह किहीन कि तेजी ले बाढ़त आर्थिक विकास विकसित भारत के सपना ल साकार करे के आधार बन गेहे। ओमन किहीन कि दुनिया ह विश्वास करइया अउ लचीला विनिर्माण साझेदार के खोज म हवय। ए दिसा म भारत के तीर बड़का भूमिका निभाय के मउका हे।
प्रधानमंत्री ह कहिन कि भारत ह कतकोन देस के संग मुक्त व्यापार समझौता करे हे अउ देस बर कतकोन मउका खुल गेहे।
राज्यसभा उम्मीदवार-सूची
भारतीय जनता पार्टी के केन्द्रीय चुनाव समिति ह राज्यसभा चुनई बर नौ झिन उम्मीदवार मनके सूची जारी कर देहे। छत्तीसगढ़ ले लक्ष्मी वर्मा ल प्रत्याशी घोषित करे गेहे। पार्टी के राष्ट्रीय महासचिव अउ प्रभारी अरूण सिंह ए सूची जारी करीन।
मुख्यमंत्री विष्णुदेव साय अउ भारतीय जनता पार्टी के प्रदेस अध्यक्ष किरण सिंह देव ह राज्यसभा चुनई बर लक्ष्मी वर्मा ल उम्मीदवार बनाय जाय म बधाई दे हवय।
लक्ष्मी वर्मा के जनम पांच जनवरी उन्नीस सौ सड़सठ के बलौदाबाजार म होइस। लक्ष्मी वर्मा ह बछर उन्नीस सौ नब्बे म भाजपा के प्राथमिक सदस्यता लेके बाद अपन राजनीति के सुरूवात रायपुर नगर निगम चुनई म पार्षद के रूप म सुरू करीन, जेखर बाद ओमन बछर दू हजार दस ले दू हजार पन्द्रह के बीच रायपुर जिला पंचायत के अध्यक्ष रिहीन अउ ए बेरा ओमन छत्तीसगढ़ राज्य महिला आयोग के सदस्य के रूप म काम करत हे।
जानबा के मुताबिक छत्तीसगढ़ के दू ठिन सीट के संगेसंग दस राज्य मनके सैंतीस राज्यसभा सीट बर ए बेरा नामांकन के काम चलत हे। नामांकन पत्र पांच मार्च तक दाखिल करे जा सकथे। छह मार्च के नामांकन पत्र मनके जांच करे जाही। प्रत्याशी मन नौ मार्च तक अपन नाव वापिस ले सकथे। त उहें, मतदान सोलह मार्च के होही अउ इही दिन परिणाम घलो घोषित कर दे जाही।
इंडिया स्किल प्रतियोगिता
भारत सरकार के कौशल विकास अउ उद्यमिता मंत्रालय डहार ले राखे गे इंडिया स्किल प्रतियोगिता म छत्तीसगढ़ के युवा मन ह बारह ठिन पदक अउ चार मेडल ऑफ एक्सीलेंस सम्मान पाय हे। युवा मन ह ईस्ट जोन रीजनल प्रतियोगिता म ए सफलता पईन। प्रतियोगिता जिला, राज्य, रीजनल अउ राष्ट्रीय स्तर म राखे गे रिहीस। राष्ट्रीय स्तर म चुने गे प्रतिभागी मन ल वर्ल्ड स्किल्स इंटरनेशनल के तहत भारत के अगुवई करे के मउका मिलही।
मुख्यमंत्री ह ए सफलता उपर युवा मन ल बधाई दे हवय।
ईस्ट जोन के रीजनल प्रतियोगिता के समापन काली दू मार्च के भुवनेश्वर म होइस। ए प्रतियोगिता म छत्तीसगढ़ के संगेसंग ओड़िशा, बिहार, पश्चिम बंगाल, झारखंड अउ अंडमान-निकोबार द्वीपसमूह के दू सौ ले जादा प्रतिभागी मन ह भाग लीन।
होली
प्रेम, भाईचारा अउ रंग गुलाल के तिहार होली काली उछाह के संग मनाय जाही। ए परब ल देखत राज्य के जम्मों बाजार मन म रंग-गुलाल के संग मिठई के दुकान सज गेहे। लोगन मन पिचकारी खरीदे बर बाजार म दिखत हे। कतकोन जघा होली मिलन समारोह के आयोजन घलो करे जात हे।
इही कड़ी म रईपुर प्रेसक्लब डहार ले काली होली मिलन समारोह ‘‘रंगोत्सव राखे गीस, जेमा मुख्यमंत्री विष्णुदेव साय ह घलो सामिल होइन। ए मउका म मुख्यमंत्री ह प्रदेस के लोगन मन ल होली तिहार के गाड़ा-गाड़ा बधाई देवत किहीन कि होली तिहार सिरिफ रंग के तिहार नइ हरय, भलूक ए ह आपस म प्रेम, भाईचारा ल बनाय के मउका देथे। ए मउका म पारंपरिक ढोल-नगाड़ा के धुन उपर मुख्यमंत्री ह घलो पत्रकार मनके संग फाग गीत अउ होली के उल्लास म सहभागी बनीन।
मुख्यमंत्री ह होली के मउका म प्रदेस के लोगन मन ल बधाई अउ सुभकामना देवत किहीन कि उल्लास, उमंग अउ आत्मीयता के ए महापरब जम्मों लोगन मनके जिनगी म सुख, सांति अउ नवा ऊर्जा के संचार करय।
उपमुख्यमंत्री अरूण साव ह घलो प्रदेस के लोगन मन ल होली तिहार के बधाई अउ सुभकामना दे हवय।
होली पर्व-शांति व्यवस्था
होली परब के दउरान शांति अउ कानून-व्यवस्था ल बने ढंग ले बनाय राखे बर प्रदेस म सुरक्षा के तगड़ा व्यवस्था करे गेहे। रायपुर, दुर्ग, राजनांदगांव अउ सारंगढ़-बिलाईगढ़ के संगेसंग कतकोन सहर मन म पुलिस ह फ्लैग मार्च करीन।
उहें, गौरेला-पेण्ड्रा-मरवाही जिला म सुरक्षा ल देखत चाक-चौबंद व्यवस्था करे गेहे। प्रमुख चौराहा अउ भीड़ वाले जघा म पुलिस बल तैनात करे गेहे। पुलिस के गाड़ी ह सरलग पेट्रोलिंग करत हे। जिला के अतिरिक्त पुलिस अधीक्षक अविनाश कुमार मिश्रा ह बतईन कि कोनों भी प्रकार के घटना ल रोके बर संवेदनशील जघा म बिसेस निगरानी राखे जात हे। पुलिस अधिकारी मन ह लोगन मन ले अपील करे हवय कि होली के परब ल आपसी भाईचारा अउ प्रेम के संग मनाय।
उहें, मुंगेली जिला म आज ले पांच मार्च तक विशेष निगरानी अभियान चलाय जाही, जेमा नियम के उल्लंघन करइया मनके खिलाफ जीरो टालरेंस के नीति अपनाय जाही। वरिष्ठ पुलिस अधीक्षक भोजराम पटेल ह बतईन कि सराब पीके गाड़ी चलाय या नाबालिग मन ह गाड़ी चलात पाय जाही, त ओखर मनके खिलाफ गाड़ी ल जब्ती म लेके कार्रवाई करे जाही। सुरक्षा ल देखत चेहरा म मुखौटा लगाय उपर घलो रोक लगाय गेहे। उहें, सोशल मीडिया म गलत अफवाह वाले पोस्ट करइया मनके खिलाफ आईटी एक्ट के तहत प्रकरण दर्ज करके कार्रवाई करे जाही।
होली-स्वास्थ्य विभाग
होली परब के दउरान सड़क दुर्घटना अउ रंग-गुलाल ले होवइया स्वास्थ्य ले जुड़े समस्या ल देखत स्वास्थ्य विभाग ह घलो कतकोन जिला म विशेष तैयार करे हे।
गौरेला-पेण्ड्रा-मरवाही जिला के मुख्य चिकित्सा अउ स्वास्थ्य अधिकारी डॉक्टर रामेश्वर शर्मा ह बतईन कि तिहार के दउरान सड़क दुर्घटना के मामला आगू आथे, जेला ध्यान म राखत जिला अस्पताल म विशेष व्यवस्था करे गेहे। ओमन बतईन कि इमरजेंसी वार्ड म उपरहा स्टाफ मनके ड्यूटी लगाय गेहे अउ संगेसंग दवई अउ जरूरी मसीन मनके व्यवस्था घलो करे गेहे।
हर्बल गुलाल
प्रदेस म एसो के होली तिहार म घलो हर्बल गुलाल के मांग जादा देखे जात हे। राष्ट्रीय ग्रामीण आजीविका मिशन-बिहान ले जुड़के स्व-सहायता समूह के माईलोगिन मन ह हर्बल गुलाल बनावत हे।
इही कड़ी म बलौदाबाजार-भाटापारा जिला के धमनी गांव के ‘वंदनी स्व-सहायता समूह के ग्यारह झिन माईलोगिन मन ह प्राकृतिक जिनीस के परयोग करके हर्बल गुलाल तैयार करत हे, जेला बाजार मन म स्टॉल लगाके बेचे जात हे।
ओति, सरगुजा जिला म स्व-सहायता समूह के माईलोगिन मन ह गेंदा अउ पलाश के फूल, चुकंदर, पालक भाजी, हल्दी अउ चंदन ले गुलाल बनाके ओला बेचत हे। राज्य सासन के बिहान योजना के अंतर्गत जिला के माईलोगिन मन डहार ले तैयार हर्बल गुलाल के पूछ-परख प्रदेस म बने ढंग ले दिखत हे।
होलिका दहन
राजधानी रईपुर के संगेसंग प्रदेश के जम्मों जिला मन म काली रतिहा होली दहन मनाय गीस। बस्तर के पांरपरिक होलिका दहन के अलावा दंतेवाड़ा के फागुन मड़ई के होलिका दहन, माड़पाल के होलिका दहन अउ जगदलपुर के जोड़ा होलिका दहन विधि-विधान के संग मनाय गीस। माड़पाल म राखे गे होलिका दहन कार्यक्रम म पूर्व राजपरिवार के सदस्य कमलचंद भंजदेव सामिल होइन। त उहें, जगदलपुर म जोड़ा होलिका दहन के पहिली भगवान श्री जगन्नाथ मंदिर ले भगवान कृष्ण के पालकी निकाले गीस। ए पालकी ल मावली माता मंदिर के आगू जोड़ा होलिका दहन वाले जघा म लाय गीस, जिहां पूजा-पाठ अउ बाजा-गाजा के संग होलिका दहन करे गीस।
अउ अब थोरकुन समाचार सार म –
– दुनिया के कतकोन जघा म आज पूर्ण चंद्रग्रहण दिखत हे। ए खगोलीय घटना मंझनिया तीन बजके बीस मिनट ले सुरू होइस, जउन ह संझा छह बजके सैंतालीस मिनट तक चलही।
अउ
– नवा रईपुर स्थित शहीद वीरनारायण सिंह स्मारक सह जनजातीय स्वतंत्रता संग्राम सेनानी संग्रहालय अउ जनजातीय संग्रहालय ह होली परब के मउका म चार अउ पांच मार्च के बंद रइही।