केंद्र सरकार ह इजराइल-अमरीका डहार ले ईरान उपर हमला ल देखत हुए भारत म संभावित हिंसा ल लेके सबो राज्य ल चेतावनी जारी करे हे। जानबा के अनुसार केंद्रीय गृह मंत्रालय ह सबो राज्य अउ केंद्रशासित प्रदेस मन ल पत्र लिखके भड़काउ भाषण देवइया ईरान समर्थक कट्टरपंथी उपदेशक के पहिचान करे ल केहे हे। पत्र म कानून बेवस्था बिगड़े ले बचे बर खुफिया जानकारी साझा करे अउ कार्रवाई ल तेज करे के आवश्यकता उपर बल दे गेहे।
प्रधानमंत्री-बजट वेबिनार संबोधन
प्रधानमंत्री नरेंद्र मोदी काली तीन मार्च के बिहनिया ग्यारा बजे केंद्रीय सूक्ष्म लघु अउ मध्यम उद्यम मंत्रालय डहार ले आयोजित ‘‘पोस्ट बजट वेबिनार‘‘ ल संबोधित करही। ए दउरान प्रधानमंत्री श्री मोदी केंद्रीय बजट के घोसना अउ सूक्ष्म, लघु अउ मध्यम उद्यम के विकास अउ एला भारत के ग्रोथ इंजन के तौर म मजबूत बनाय के रोडमैप बिसय म अपन संबोधन देही।
राज्यपाल-रेस्पिरेटरी इंटेंसिव केयर यूनिट
राज्यपाल रमेन डेका ह आज भारतीय आयुर्विज्ञान संस्था-एम्स रईपुर म रेस्पिरेटरी इंटेंसिव केयर यूनिट के शुभारंभ करीन। ए बेरा म ओमन ह किहीन कि चिकित्सा के क्षेत्र म एम्स एक विश्वनीय संस्थान रेहे हे। एम्स रईपुर म मरीज मनके संख्या लगातार बाढ़त हे। एला देखत हुए संस्थान ल अउ बड़े जघा के जरूरत पढ़ही। ओमन राज्य शासन ल नवा रईपुर म एम्स के स्थापना बर भूमि आबंटित करे के सलाह दीन।
राज्यपाल ह प्रदेसभर म सुपर स्पेशलिटी कार्डियक फैसिलिटी के स्थापना म घलो बल दीन। जेखर ले हृदय रोग ल अपनेच प्रदेस म अच्छा इलाज मिल सकय। ओमन ह किहीन कि मेडिकल कालेज या एम्स म सुपर स्पेशलिटी कार्डियक फैसिलिटी के स्थापना करे जा सकथे।
विश्व किशोर मानसिक स्वास्थ्य दिवस
आज विश्व किशोर मानसिक स्वास्थ्य दिवस हे। ए बेरा म गौरेला-पेण्ड्रा-मरवाही जिला म समाज कल्याण विभाग डहार ले युवा मन ल सकारात्मक दिसा देबर आने-आने जागरूकता कारीकरम आयोजित करे जात हे। ए दउरान किशोर मनके मानसिक, भावनात्मक अउ शारीरिक स्वास्थ्य उपर बिसेस जोर दे गीस। समाज कल्याण विभाग के प्रभारी सहायक संचालक सुरेश कुमार भारती ह किहीन कि किशोर अवस्था जीवन के संवेदनसील अउ परिवर्तनसील दउर होथे। ए उमर म लइका मनके सही पहिचान करके ओमन ल मार्गदर्सन देना बहुत जरूरी हे। कतकोन बार गलत संगति या परिस्थिति के कारण किशोर गलत काम म आगु बाढ़ जथे। अइसना म समय राहत ओमन ल सही परामर्स अउ सहयोग देके मुख्यधारा म लाना समाज अउ प्रशासन के जिम्मेदारी हे।
मुख्यमंत्री-नक्सलवाद
मुख्यमंत्री विष्णुदेव साय ह किहीन कि राज्य सरकार के पुनर्वास नीति, सुरक्षा बल के कार्रवाई अउ विकास काम के विस्तार के परिणाम स्वरूप नक्सल मुक्त बस्तर के सपना तेजी ले साकार होवत हे। श्री साय ह किहीन कि महासमुंद जिला के सीमावर्ती क्षेत्र म सक्रिय पंद्रह सशस्त्र माओवादी मन ह हिंसा के रद्दा छोड़के समाज के मुख्यधारा म लहुटे के निर्णय लीन। हथियार के संग उंखर आत्मसमर्पण ए बात के प्रमाण हे कि भटके हुए युवा मनके विस्वास अब सुशासन, सुरक्षा अउ विकास के नीति म बाढ़त हे।
‘मुख्यमंत्री सुशासन फेलोशिप योजना‘- आवेदन
राज्य सरकार के ‘मुख्यमंत्री सुशासन फेलोशिप योजना‘ के तहत भारतीय प्रबंधन संस्थान-आईआईएम रईपुर ह बिसेस दू बछर पब्लिक पालिसी एंड गवर्नेंस- एमबीए बर प्रवेस प्रक्रिया सुरू कर देहे। इच्छुक उम्मीदवार ए फेलोशिप अउ एमबीए कारीकरम बर इकतीस मार्च तक ऑनलाइन आवेदन कर सकत हे। विस्तृत जानकारी अउ आवेदन बर संस्थान के आधिकारिक वेबसाइट म लॉग इन करे जा सकत हे। ए योजना के तहत राज्य सरकार चयनित सबो अभ्यर्थी के ट्यूशन फीस वहन करही। एखर अलावा नामांकित छात्र ल पाठ्यक्रम के पूरा अवधि के दउरान पचास हजार रूपिया हर महिना स्टायपेंड घलो दे जाही।
एचपीवी टीकाकरण अभियान
देशभर म अभी दिन चौदह बछर आयु वर्ग के एक करोड़ पंद्रह लाख युवती मन बर राष्ट्रव्यापी निसुल्क एचपीवी टीकाकरण अभियान चलाय जावत हे। ए अभियान के उद्देस्य माईलोगिन मन म सर्वाइकल कैंसर के रोकथाम करना हे। प्रधनमंत्री नरेंद्र मोदी ह पाछू अट्ठाईस फरवरी के राजस्थान के अजमेर ले ए राष्ट्रव्यापी एचपीवी टीकाकरण कारीकरम के सुभारंभ करीन। अभियान के सुरू होय के संगेसंग सबो राज्य अउ केंद्रशासित प्रदेस अपन-अपन क्षेत्र म एचपीवी टीकाकरण कारीकरम के आयोजन करत हे। ए टीका देसभर के सरकारी स्वास्थ्य केंद्र मन म निसुल्क उपलब्ध कराय गेहे। नब्बे दिन के अंदर पंद्रह बछर के आयु पूरा करइया युवती मन ल घलो तीन माह के ए बिसेस सघन अभियान बर पात्र होही। ए टीका पहली नब्बे दिन तक लगातार लगाय जाही। एखर बाद नियमित टीकाकरण दिवस म घलो इही टीका उपलब्ध रइही।
आर्द्रभूमि-निरीक्षण
रईपुर जिला के धरसींवा विकासखंड म अवइया चयनित पांच ग्राम पंचायत के आर्द्रभूमि जघा के निरीक्षण जिला पंचायत के सीईओ कुमार बिश्वरंजन के नेतृत्व म संयुक्त टीम डहार ले करे गीस। ए दउरान स्थानीय पक्षी विशेषज्ञ के उपस्थिति म मांढर, गोढ़ी, अकोली, बरबांदा अउ टोर ग्राम पंचायत के आर्द्रभूमि क्षेत्र घूमे गीस। विशेषज्ञ अउ अधिकारी मन डहार ले आर्द्रभूमि, स्थानीय जैव विविधता के संरक्षण अउ ए जघा के पर्यावरणीय अउ पर्यटन के दृष्टि ले विकसित करे के संभावना उपर चर्चा करे गीस।
गांजा-आरोपी गिरफ्तार
रायगढ़ पुलिस ह पाकरगांव अटल चौक तीर एक कार ले उनतीस किलो गांजा बरामद करे हे। ए मामला म दू आरोपी ल गिरफ्तार करे गेहे। ए आरोपी कार के दरवाजा अउ बैक लाइट के अंदर बनाय गे बिसेस गुप्त चेंबर म गांजा छिपाके लावत रिहीन। जब्त गांजा के कीमत साढ़े सत्रह लाख रूपिया बताय गेहे।
ब्राउन शुगर-आरोपी गिरफ्तार
मुंगेली पुलिस ह ‘‘ऑपरेशन बाज‘‘ के तहत थाना जरहागांव क्षेत्र ले ब्राउन सुगर के बिक्री करे के मामला म पांच आरोपी मन ल गिरफ्तार करे हे। आरोपी मन ले करीब चौव्वन ग्राम ब्राउन सुगर बरामद करे गेहे। जेखर कीमत लगभग ढाई लाख रूपिया ले जादा बताय गेहे। सबो आरोपी मन ल न्यायिक रिमांड म जेल भेज दे गेहे।
होलिका दहन
प्रेम, भाईचारा अउ रंग के तिहार होली चार मार्च के मनाय जाही। उहें, आज प्रदेसभर के आने-आने जघा म होलिका दहन करे जाही। राजधानी रईपुर के संग प्रदेसभर के आने-आने जिला मन म होलिका दहन के तियारी पूरा कर ले गेहे। ए बार घलो जागरूकता के कारण कतकोन जघा म लकड़ी के जघा छेना के होली जलाय के तियारी करे गेहे। विसेसज्ञ डॉक्टर मन ह रंग के ए परब ल सावधानी अउ सुरक्षा के संग मनाय के अपील करे हे। उहें, पुलिस प्रशासन डहार ले आज होली तिहार ल देखत हुए सुरक्षा के कड़ा इंतजाम करे गेहे। संगेसंग रईपुर अउ राजनांदगांव के संग आने-आने सहर मन म पुलिस ह फ्लैग मार्च घलो करीन।
इही बीच, राज्यपाल रमेन डेका अउ मुख्यमंत्री विष्णुदेव साय ह प्रदेसवासी मन ल रंग अउ उल्लास के परब होली के सुभकामना देहे।
हीट वेव-तैयारी
प्रदेस के तापमान म होवत लगातार बढ़ोत्तरी के कारण अब लोगन मन ल गर्मी के अहसास होवत हे। उहें, राजधानी रईपुर म संभावित हीट वेव के स्थिति ले निपटे बर जिला प्रशासन ह तियारी सुरू कर देहे। पंडरी स्थित जिला चिकित्सालय परिसर म ‘‘हीट स्ट्रोक रूम‘‘ स्थापित करे गेहे, जिंहा जादा बिस्तर के बेवस्था करे गीस। मरीज मनके सरीर के तापमान तेजी ले कम करे बर दू बिसेस बाथ टब लगाय गेहे। जेमा ठंडा पानी अउ बर्फ के सहायता ले इमर्शन कूलिंग करे जा सकही। एखर संगेसंग बर्फ के लगातार उपलब्धता बर आइस मेकिंग मसीन घलो स्थापित करे गेहे।