श्री सिन्हा ह बतइन कि आत्मसमर्पण के दउरान माओवादी मन ह अपन चौदह हथियार ल घलो पुलिस ल सौंपे हे। एमा तीन एके-फोर्टी सेवन, दू एसएलआर, दू इंसास, चार थ्री नॉट थ्री रायफल अउ बारह बोर के बंदूक के संगेसंग ऑटोमेटिक हथियार सामिल हे। ए जम्मों माओवादी बलांगीर-बरगढ़-महासमुंद डिवीजन म लंबा बेरा ले सक्रिय रिहीस हे।
अधिकारी मन ह बतइन कि आत्मसमर्पण करइया माओवादी मन ल राज्य सरकार के पुनर्वास कारीकरम के फायदा मिलही अउ ओमन ल समाज के मुख्यधारा म सामिल करे जाही। विज्ञप्ति म दावा करे गेहे कि ए आत्मसमर्पण के बाद माओवादी मनके ओडिसा स्टेट कमेटी के पश्चिमी सब जोन पूरा तरह ले सिरागेहे। एखर संगेसंग ओडिसा के संबलपुर रेंज घलो नक्सलमुक्त हो गेहे।
खबर के मुताबिक बैनर-पोस्टर के अलावा आने-आने माध्यम मन के संगेच आकाशवाणी के माध्यम ले घलो माओवादी मन ले आत्मसमर्पण करे के अपील करे गे रिहीस।
ऐति, सुकमा जिला म आज सर्चिंग के दउरान सुरक्षा बल मन ह ताड़मेटला अउ जगरगुंडा के जंगल म माओवादी मन डहार ले बनाय गे सिविर ले बीस किलो वजनी आईईडी समेत बिस्फोटक समान अउ माओवादी साहित्य बरामद करे हे।
हाईकोर्ट-सौम्या चौरसिया जमानत
छत्तीसगढ़ उच्च न्यायालय ह सराब घोटाला मामला म पूर्व अधिकारी सौम्या चौरसिया ल जमानत दे दे हे। अदालत ह दूनों पक्ष मनके दलील सुने के बाद ए फइसला सुनाय हे। न्यायालय ह सर्त के संग सौम्या चौरसिया के जमानत ल मंजूरी देत किहीन हे कि आरोपी जांच म मदद करही अउ बिना अनुमति प्रदेस ले बाहिर नइ जाय।
जनऔषधि सप्ताह
छत्तीसगढ़ समेत देसभर म आज ले जनऔषधि सप्ताह मनाय जावत हे। सात मार्च तक चलइया ए अभियान के तहत प्रदेस म हफ्ता भर जागरूकता ले जुड़े कतकोन कारीकरम कराय जाही। राज्य के आने-आने जिला मन म स्थित जनऔषधि केंद्र मन म घलो बिसेस सिविर लगाय जावत हे। ए सिविरि मन म मरीज मन ल जेनेरिक दवई मनके फायदा उंखर गुणवत्ता अउ कीमत म अंतर के जानकारी दे जावत हे। उहें, कई ठिन जघा मन म निसुल्क स्वास्थ्य जांच सिविर घलो आयोजित करे जावत हे। स्वास्थ्य विभाग ह लोगन मन ले अपील करीन हे कि अेमन प्रमाणित जेनेरिक दवई मन ल प्राथमिकता देवय।
खबर के मुताबिक हे कि ए बछर के थीम ‘‘जनऔषधि-सस्ती भी, भरोसेमंद भी‘‘ हरय।
राष्ट्रीय विज्ञान दिवस-कार्यशाला
राष्ट्रीय विज्ञान दिवस म रईपुर स्थित विज्ञान केंद्र म हाइड्रो रॉकेट कार्यसाला अउ नाइट स्काई गेजिंग कारीकरम के आयोजन करे गीस। छत्तीसगढ़ रीजनल साईंस सेंटर अउ छत्तीसगढ़ विज्ञान अउ प्रौद्योगिकी परिषद के समलात म राखे गे ए कारीकरम म आने-आने सरकारी विद्यालय मन के छात्र-छात्रा मन भाग लीन।
कारीकरम के सुभारंभ करत हुए सुप्रसिध्द वैज्ञानिक एम.के.बेग ह डॉक्टर सी.वी.रमन के ऐतिहासिक खोज ‘‘रमन प्रभाव‘‘ ल भारतीय विज्ञान के वैश्विक चिन्हारी के आधार बतइन। ओमन किहीन हे कि विज्ञान सिरिफ ज्ञान के बिसय नहीं, बल्कि नवाचार, तर्कसीलता अउ राष्ट्र निर्माण के सशक्त धुरी हरय। ओमन विद्यार्थी मन ले आह्वान करीन हे कि ओमन वैज्ञानिक सोच ल अपनाके अंतरिक्ष प्रौद्योगिकी अउ उभरत शोध क्षेत्र मन म सहभागिता निभावय। ए दउरान आयोजित कार्यसाला म विद्यार्थी मन ल हाइड्रो रॉकेट के प्रत्यक्ष प्रक्षेपण करके दिखाय गीस।
होली स्पेशल ट्रेन
होली तिहार के दउरान यात्री मन के सुविधा ल धियान म राखत दक्षिण पूर्व मध्य रेलवे डहार ले सत्तर होली स्पेशल ट्रेन के परिचालन करे जाही। एमा ले चौदह ट्रेन दक्षिण पूर्व मध्य रेलवे ले संचालित होही। उहें, छप्पन ट्रेन आने-आने स्टेसन ले होके जाही।
राजनांदगांव अउ डोंगरगढ़ रेलवे स्टेसन ले घलो कतकोन स्पेसल ट्रेन चलाय जाही। दुरूग-हजरत निजामुद्दीन, गोंदिया-छपरा, दुरूग-मधुबनी अउ गोंदिया-पटना होली स्पेशल ट्रेन के रूके के राजनांदगांव अउ डोंगरगढ़ स्टेसन म दे गेहे। उहें, गोंदिया-छपरा स्पेशल, गोंदिया-पटना स्पेसल अउ बिलासपुर-चर्लपल्ली स्पेसल ट्रेन के स्टापेज राजनांदगांव अउ डोंगरगढ़ म रहइी।
मुख्यमंत्री-फाल्गुन महोत्सव
मुख्यमंत्री विष्णुदेव साय आज राजनांदगांव जिला के डोंगरगढ़ स्थित नादिया के प्राचीन कबीर साहेब मठ म आयोजित अखिल भारती सद्गुरू कबीर संत सम्मेलन अउ तीन दिवसीय फाल्गुन महोत्सव म सामिल होइन। ए दउरान मुख्यमंत्री ह मठ पहुंचके संत मन के आसीर्वाद लीन अउ कबीर साहेब के बिचार ल समाज बर मार्गदर्सक बतइन। ए मउका म श्री साय ह मठ परिसर के विकास बर एक विसाल डोम अउ मिनी स्टेडियम के निर्माण के घोसना करीन। संगेसंग फागुन महोत्सव के नियमित अउ व्यवस्थित आयोजन बर राज्य बजट म बिसेस रासि उपलब्ध कराय के आस्वासन दीन।
भानुप्रताप-मैराथन दौड़
कांकेर जिला के भानुप्रतापपुर म आज मैराथन दौड़ के आयोजन करे गीस। ए दउड़ म प्रदेस के आने-आने जिला मनले पहुंचे धावक मन ह भाग लीन, जेमा चार झिन आत्मसमर्पित माओवादी घलो सामिल रिहीस। पुरूष अउ महिला वर्ग म राखेगे ए मैराथन म भिलाई के प्रतिभागी मन ह पहला स्थान पाय हे।
कारीकरम म विधायक सावित्री मंडावी मुख्य अतिथि के रूप म सामिल होइन। ओमन मैराथन ल हरियर झंडी देखाके रवाना करीन। अपन गोठबात म ओमन किहीन कि खेल समाज ल जोड़े के सशक्त माध्यम हे अउ अइसन आयोजन मन ले युवा मन ल साकारात्मक दिसा मिलथे।
ऐति, भिलाई म आज राष्ट्रीय सुरक्षा दिवस म राखेगे जन-जागरूकता रैली म भिलाई इस्पात संयंत्र के कर्मी अउ स्कूली लइका मन ह बढ़-चढ़के भाग लीन।
हाथी आतंक
सुरजपुर जिला के प्रतापपुर वन परिक्षेत्र म आज अट्ठारा हाथी मन के दल ह तीन झिन गांव वाले मनके घर ल तोड़ दीस। उहें, बाड़ी मन म लगे फसल ल घलो रौंद दीस। वन विभाग के टीम मउका म मौजूद हे अउ हाथी मन ल जंगल कोति भगाय के कोसिस करत हे। वन विभाग ह प्रभावित परिवार मन ल राहत रासि दे के काम सुरू कर देहे।
अउ अब पेस हे मौसम के हाल….
मौसम विभाग ह बस्तर संभाग के कुछेक जिला म अवइया बारह घंटा के दउरान गरज-चमक के संग हल्का बरसा होय के संभावना जताय हे। मौसम विभाग के मुताबिक उत्तरी छत्तीसगढ़ म एक पश्चिमी विक्षोभ सक्रिय हे, जेखर सेति प्रदेस के कुछेक जिला मन म बदली छाय रइही। उहें, अधिकतम तापमान म गिरावट दर्ज करे जा सकत हे। मौसम वैज्ञानिक ह किसान मन ल सलाह दे हे कि ओला खुला म राखे अनाज ल सुरक्षित जघा म पहुंचा दे।
अउ अब थोरकुन समाचार सार म –
– बिलासपुर नगर निगम ह आज अरपा नदी के तटवर्ती क्षेत्र मन म रिवर फ्रंट प्रोजेक्ट के तहत अतिक्रमणकारी मन ल नोटिस जारी करके सात दिन के भीतर हटाय जाय के निरदेस दे हे।
– धमतरी म आज होय जल उपयोगिता समिति के बइठका म अवइया रबी फसल के सिंचाई बर गंगरेल बांध ले पानी छोड़े के रूपरेखा तय करे गीस।
– रईपुर के माना स्थित स्वामी विवेकानंद विमानतल म सुरक्षा व्यवस्था के जायजा लेबर आज ‘फुल स्केल इमरजेंसी ड्रिल‘ के आयोजन करे गीस। एमा सीआईएसएफ, अग्निशमन दल अउ स्वास्थ्य विभाग के दल ह भाग लीन।
– छत्तीसगढ़ व्यावसायिक परीक्षा मंडल-व्यापमं डहार आज प्रदेस म डीटीपी ऑपरेटर अउ ग्राफिक्स डिजाइनर पद मन बर परीक्षा आयोजित करे गीस।
– रायगढ़ जिला प्रशासन अउ खनिज विभाग के टीम ह आज खरसिया क्षेत्र म कोयला के अवैध परिवहन करत चार ठिन ट्रक मन ल जब्त करे हे।
अउ
– राजनांदगांव-दुरूग रद्दा म आज बिहनिया एक तेज रफ्तार ट्रक ह फटफटी ल टक्कर मार दीस। ए हादसा म दू युवक मन के मउकच मउत होगे, जबकि एक झिन युवक गंभीर रूप ले घायल हो गेहे।