मुख्यमंत्री विष्णुदेव साय ह आज बिलासपुर जिला के बिल्हा म आयोजित राज्य स्तरीय कारीकरम म किसान मनके खाता म धान खरीदी के अंतर के दस हजार करोड़ रूपिया ले जादा के रासि अंतरित करीन। ए बेरा म श्री साय ह हितग्राही किसान मन ले संवाद करके उंखर अनुभव जानिन अउ किहीन कि आज अन्नदाता मनके सम्मान के दिन हे। ओमन किहीन कि किसान मनके समृध्दि ही प्रदेस के समृध्दि हे। श्री साय ह किहीन कि किसान मन ल अब ब्याज मुक्त ऋण के सुविधा मिलत हे। प्रधानमंत्री सिंचाई योजना के जरिया ले किसान मनके खेत तक पानी पहुंचत हे अउ प्रदेस म सिंचाई के रकबा घलो सरलग बाढ़त हे। मुख्यमंत्री ह बतइन कि ए बछर पच्चीस लाख चौबीस हजार किसान मनले एक सौ इकतालीस लाख मीट्रिक धान के खरीदी करे गेहे। ओमन ह विश्वास दिलाइन कि राज्य सरकार आगु घलो किसान मनके हित म प्रतिबध्दता के संग काम करत रइही।
मुख्यमंत्री ह किहीन कि राज्य सरकार के संकल्प हे कि किसान सशक्त अउ समृध्द हो जेखर ले छत्तीसगढ़ लगातार प्रगति के रद्दा म आगु बाढ़त राहय। ओमन ह किसान मन ल होली के सुभकामना देवत हुए किहीन कि सरकार के ए निर्णय ले ए बछर लाखों प्रदेसवासी मनके घर होली के खुसी दुगुना होही।
समारोह म करोड़ो रूपिया के आने-आने विकास काम के सिलान्यास अउ लोकार्पण करे गीस।
कारीकरम म कृषि मंत्री रामविचार नेताम अउ विधायक धरमलाल कौशिक, अमर अग्रवाल के संग कतकोन जनप्रतिनिधि उपस्थित रिहीन।
बजट-सामान्य चर्चा
वित्तमंत्री ओपी चौधरी ह काली बछर दू हजार छब्बीस-सत्ताईस के बजट म विधानसभा म होय सामान्य चर्चा के जवाब देवत किहीन कि साय सरकार के तीसरइया बजट ‘‘ज्ञान‘‘ अउ ‘‘गति‘‘ के बाद ‘‘संकल्प‘‘ के रणनीति उपर आधारित हे। ओमन किहीन कि ए बजट बछर दू हजार सैंतालीस तक विकसित छत्तीसगढ़ के रोड मैप हे।
वित्तमंत्री ह किहीन कि विकसित भारत- जी- राम-जी योजना के बजट म चार हजार करोड़ रूपिया के प्रावधान करे गेहे। जेन मनरेगा के तुलना म ऐतिहासिक वृध्दि हे। श्री चौधरी ह बतइन कि बजट म बस्तर अउ सरगुजा अंचल के विकास बर कतकोन जरूरी घोसना करे गेहे। संगेसंग पंद्रह सौ बस्तर फाइटर्स के पद बनाय जाही। ओमन ह किहीन कि शासकीय कर्मचारी मन बर कैसलेस चिकित्सा सुविधा सुरू करे जाही।
विज्ञान तीर्थ दर्शन अभियान
उपमुख्यमंत्री विजय शर्मा ह विज्ञान के प्रति जागरूकता बढ़ाय अउ युवा मन ल प्रोत्साहित करे बर विज्ञान तीर्थ दर्शन अभियान सुरू करे के घोसना करे हे। ए अभियान के तहत युवा वैज्ञानिक मन ल देस के प्रमुख वैज्ञानिक के जन्मस्थल के अध्ययन भ्रमण कराय जाही। श्री शर्मा आज राष्ट्रीय विज्ञान दिवस के मउका म जगदलपुर म आयोजित कारीकरम ल संबोधित करत रिहीस। ए बेरा म ओमन विज्ञान के क्षेत्र म नवाचार, शोध अउ वैज्ञानिक सोच ल बढ़ावा दे उपर बिसेस जोर दीन।
समारोह म उपमुख्यमंत्री श्री शर्मा ह दंडाकारण्य आमचो बस्तर विज्ञान महोत्सव के विमोचन करीन। विज्ञान महोत्सव के गतिविधि मार्च ले सितंबर तक आयोजित करे जाही, जेमा छात्र अउ वैज्ञानिक वार्ता, ग्राम समिति कार्यशाला, बस्तर लोक विज्ञान सम्मेलन, पारंपरिक वैद्य विज्ञान अध्ययन अनुसंधान कार्यशाला अउ प्रबुध्दजन मनके गोलमेज संगोष्ठी के आयोजन करे जाही। ए मउका म भोपाल अउ रईपुर ले पहुंचे वैज्ञानिक अउ विसेसज्ञ ह विज्ञान अउ प्रौद्योगिकी के नवा आयाम उपर प्रकाश डालिन।
शिक्षक भर्ती-परीक्षा
छत्तीसगढ व्यावसायिक परीक्षा मंडल-व्यापमं ह स्कूल शिक्षा विभाग म सहायक शिक्षक, शिक्षक अउ व्याख्याता पद बर होवइया भर्ती परीक्षा के संभावित तिथि जारी कर देहे। निर्धारित कारीकरम के अनुसार सहायक शिक्षा के परीक्षा ग्यारा अक्टूबर, शिक्षक के परीक्षा पच्चीस अक्टूबर अउ व्याख्याता के परीक्षा उनतीस नवंबर दू हजार छब्बीस के प्रस्तावित हे।
आईएसएस-पदस्थापना
राज्य सरकार ह काली मंझनिया भारतीय प्रशासनिक सेवा के ग्यारा अधिकारी मनके प्रभार म फेरबदल करे हे। सामान्य प्रशासन विभाग डहार ले जारी आदेस के मुताबिक छत्तीसगढ़ वेयर हाउस कॉर्पोरेसन के प्रबंध संचालक कुलदीप शर्मा ल बलौदाबाजार-भाटापारा जिला के नवा कलेक्टर बनाय गेहे। उहें, वित्त मंत्री के विशेष सहायक रहे आशीष टिकरिहा ल छत्तीसगढ़ वेयरहाउस कॉर्पोरेसन के प्रबंध संचालक के जिम्मेदारी सौंपे गेहे, फेर राज्यपाल के सचिव डॉ. सीआर प्रसन्ना ल सहकारिता अउ रजिस्ट्रार विभाग के आयुक्त पद म पदस्थ करे गेहे।
अइसने, तीर्थराज अग्रवाल ल आर्थिक सांख्यिकीय अउ धर्मस्व विभाग के उपसचिव बनाय गेहे। फेर सुश्री लीना कोसम ल छत्तीसगढ़ लोकसेवा आयोग म परीक्षा नियंत्रक, सौमिल रंजन चौबे ल कृषि विभाग म उपसचिव के जिम्मेदारी सौंपे गेहे। एखर अलावा विरेंद्र बहादुर पंचभाई ल नारायणपुर जिला के अपर कलेक्टर, सुमीत अग्रवाल ल नगर पालिक निगम दुरूग के आयुक्त, संदीप अग्रवाल ल बिलासपुर जिला पंचायत के मुख्य कार्यपालन अधिकारी, तरूण किरण ल कलेक्टर कार्यालय कोरबा म ओएसडी अउ ऋषभ पाराशर ल वित्त विभाग म उपसचिव बनाय गेहे।
जनऔषधि सप्ताह
छत्तीसगढ संग देसभर म काली एक मार्च ले सात मार्च तक जनऔषधि सप्ताह मनाय जाही। ए बछर के थीम ‘‘जन औषधि-सस्ती भी, भरोसेमंद भी‘‘ हे। ए दउरान प्रदेस म घलो सप्ताह भर आने-आने जागरूकता संबंधी कारीकरम आयोजित करे जाही। एखर उद्देस्य जनऔषधि केंद्र के जरिया ले उपलब्ध गुणवत्तापूर्ण जेनिरिक दवई के फायदा के प्रति आमलोगन मनल जागरूक करना हे। जन औषधि सप्ताह के तहत एक ले पांच मार्च तक राज्य के आने-आने जघा मन म स्वास्थय सिविर आयोजित करे जाही। एमा जिला चिकित्सालय, जशपुर, बिलासपुर, रतनपुर स्थित सामुदायिक स्वास्थ्य केंद्र, दुरूग के चयनित वार्ड के संग रईपुर, महासमुंद, राजनांदगांव सामिल हे। ए सिविर म निसुल्क स्वास्थ्य जांच, चिकित्सकीय परामर्स अउ किफायती जन औषधि दवई के जानकारी दे जाही।
गाईड लाइन-दर
प्रदेश के दुरूग अउ सरगुजा जिला म नवा गाईड लाइन दर काली ले प्रभावसील हो जाही। जिला मुल्यांकन समिति मन ले प्राप्त संशोधित प्रस्ताव उपर महानिरीक्षक पंजीयन के अध्यक्षता म केंद्रीय मूल्यांकन बोर्ड के बइठका म प्रस्ताव के अनुमोदन करे गीस। नवा गाईड लाइन दर के जानकारी संबंधित जिला पंजीयन कार्यालय अउ विभाग के आधिकारिक वेबसाइट ले पाय जा सकत हे।
परीक्षा गड़बड़ी-नोटिस
बलरामपुर जिला के शासकीय उच्चतर माध्यमिक शाला बलंगी म आयोजित हाई स्कूल के परीक्षा म अनियमितता पाय जाय म जिला शिक्षा अधिकारी ह केंद्र के अध्यक्ष के संगेसंग छै शिक्षक मन ल कारण बताओ नोटिस जारी करे गेहे।
तीरंदाजी-प्रतियोगिता
मुख्यमंत्री विष्णुदेव साय काली दुरूग म छत्तीसगढ़ पुलिस डहार ले आयोजित चौदहवां अखिल भारतीय पुलिस तीरंदाजी प्रतियोगिता के समापन समारोह म सामिल होइन। ए बेरा म श्री साय ह किहीन कि पुलिस के जवान कानून बेवस्था के जिम्मेदारी निभाय के संग खेल म घलो अच्छा प्रदर्सन करत हे, जेन उंखर अनुशासन अउ समर्पन के प्रमाण हे। ओमन किहीन कि तीरंदाजी छत्तीसगढ़ के जनजाति क्षेत्र के विशिष्ट पहिचान रहे हे अउ राज्य सरकार खेल अधोसंरचना ल मिसन मोड म विकसित करत हे। मुख्यमंत्री ह किहीन कि जशपुर म अर्चरी एकेडमी अउ नवा रईपुर म राष्ट्रीय स्तर के खेल सुविधा विकसित करे जात हे। समारोह म मुख्यमंत्री ह उत्कृष्ट प्रदर्सन करइया छै टीम-सीआईएसएफ, सीआरपीएफ, बीएसएफ, आईटीबीपी, राजस्थान अउ उत्तर प्रदेस ल सिल्ड देके सम्मानित करीन।
जिले की चिट्ठी
प्रादेशिक समाचार एकांश, आकशवाणी रईपुर डहार ले प्रस्तुत कारीकरम ‘‘जिले की चिट्ठी‘‘ के प्रसारण काली मंझनिया छै बजके पांच मिनट ले छै बजके दस मिनट तक करे जाही। ए कारीकरम ल छत्तीसगढ़ स्थित आकाशवाणी के सबो केंद्र रिले करही। ए बखत के अंक म ‘‘सुकमा‘‘ जिला के गतिविधि के बारे म जानकारी दे जाही।
सिविक एक्शन प्रोग्राम
नारायणपुर जिला के गांव कुड़मेल म स्थित आईटीबीपी कैंप परिसर म नशा मुक्ति अभियान अउ सिविक एक्शन कारीकरम के आयोजन करे गीस। ए कारीकरम म कुड़मेल के अलावा कुंजेकाल, इपोपाडा, कांडाकोटी अउ धोंडरबेड़ा के सौ ले जादा मनखे सामिल होइन। एमा लइका, माईलोगिन अउ युवा सामिल रिहीस। ए दउरान गांव के लोगन मन ल साइकल, पानी के टंकी, कृषि संबंधी औजार बांटे गीस। संगेसंग युवा मन ल फुटबॉल, क्रिकेट अउ वॉलीबॉल कीट दे गीस। उहें, स्कूली लइका मन ल स्कूल बैग, नोटबुक, पेंसिल अउ ज्योमेट्री बाक्स दे गीस।