मुख्यमंत्री विष्णुदेव साय काली अट्ठाईस फरवरी के बिलासपुर जिला म आयोजित राज्य स्तरीय कारीकरम म किसान मनके खाता म दस हजार करोड़ रूपिया ले जादा के रासि के अंतरण करही। कृषक उन्नति योजना के तहत समर्थन मूल्य म धान बेचइया पच्चीस लाख चौबीस हजार किसान मन ल इकतीस सौ रूपिया प्रति कुंटल के मान ले धान के अंतर के ए रासि के भुगतान करे जाही। ए संबंध म राज्य शासन डहार ले प्रदेस के जम्मों विकासखंड म कारीकरम के आयोजन के व्यवस्था सुनिश्चित करे बर जम्मों जिला कलेक्टर अउ जिला पंचायत के मुख्य कार्यपालन अधिकारी मन ल दिसा निरदेस जारी करे गेहे।
इही बीच, मुख्यमंत्री विष्णुदेव साय ले आज ओखर निवास कार्यालय म प्रदेस के किसान मनले सौजन्य भेंट करीन। किसान मन धान के अंतर के रासि होली ले पहिली देबर मुख्यमंत्री के आभार जतइन।
विस सत्र
छत्तीसगढ विधानसभा के बजट सत्र म पांचवां दिन आज कांग्रेस विधायक मन ह बजट म सम्मिलित कार्य ल वित्तीय स्वीकृति देके मुद्दा उठात सदन ले बहिर्गमन कर दीन। कांग्रेस विधायक संगीता सिंह ह प्रश्नकाल म बजट म सम्मिलित कार्य ल वित्तीय स्वीकृति देके मुद्दा उठात सवाल करीन कि अब तक कोन-कोन काम वित्त विभाग करा लंबित हे अउ काबर हे? एमा वित्त मंत्री ओपी चौधरी ह स्पष्ट करीन कि कोनो भी काम वित्त विभाग म लंबित नइ हे।
एमा संगीता सिंह ह सिंचाई अउ लोक निर्माण विभाग के कार्य के वित्तीय विभाग म लंबित होय के बात किहीन। एमा वित्त मंत्री किहीन कि राज्य सरकार के स्पष्ट मंसा हे कि कोनो भी काम लंबित न रहे। इंखर बर नवीन मद के रासि घलो बढ़ा दे गेहे।
एमा पूर्व मुख्यमंत्री भूपेश बघेल ह वित्त मंत्री ले बालोद म लोक निर्माण विभाग के लंबित कार्य के बारे म जानकारी मांगिन अउ ओमन ल वित्तीय स्वीकृति देबर किहीन। अपन जवाब म वित्त मंत्री ह जम्मों काम नियमानुसार होय के बात किहीन। वित्त मंत्री के जवाब ले कांग्रेस सदस्य असंतुष्ट होगिन अउ नाराबाजी करत सदन ले बहिर्गमन कर दीन।
उहें, सदन म प्रश्नकाल के दउरान विधायक कुंवर िंसंह निषाद ह राज्य म घुमन्तू पशु मन के रख-रखाव अउ संरक्षण बर चलाय जात योजना के मुद्दा उठाइन। ओमन जानना चाही कि घुमन्तू पशु के रख-रखाव अउ संरक्षण बर राज्य म कोन-कोन योजना चलत हे। जवाब म आदिमजाति मंत्री रामविचान नेताम ह बतइन कि राज्य सरकार डहार ले आदर्स गोधाम अउ गोकुल धाम गौ अभ्यारण्य योजना चलाय जात हे। ओमन बतइन कि गौधाम योजना के तहत छै सौ बीस पशु मनके संरक्षण के इंतेजाम करे गेहे। कई ठिन जघा म कार्य प्रक्रिया धीन हे। मंत्री ह बतइन कि छत्तीस गौठान म गौधाम के प्रशासकीय स्वीकृति दे गेहे अउ एला जल्दी चालू करे जाही।
बजट अनुदान चर्चा
सदन म आज घलो आने-आने विभाग के बजट अनुमान उपर चर्चा जारी हे। चर्चा के सुरूआत कांग्रेस विधायक उमेश पटेल ह करीन। चर्चा म भाजपा सदस्य धरमलाल कौशिक अउ किरण सिंह देव के संग कांग्रेस सदस्य अटल श्रीवास्तव अउ नेता प्रतिपक्ष डॉक्टर चरणदास महंत बजट अनुमान उपर अपन बात सदन म राखीन। समाचार लिखे जाय तक वित्तमंत्री ओपी चौधरी ए चर्चा के जवाब सदन म देवत हे।
पूर्व माओवादी-विधानसभा कार्यवाही
छत्तीसगढ़ विधानसभा म छियासठ पुरूष अउ चौव्वन महिला समेत एक सौ बीस आत्मसमर्पित माओवादी मन आज पहिली घांव विधानसभा के कार्रवाई ल देखिन। एमा माओवादी मनके केंद्रीय समिति के छै पूर्व सदस्य-रूपेश, बसवा, चैतू, ललिता अउ राजू घलो सामिल रिहीन। नक्सली संगठन के आम सदस्य ह दर्सक दीर्घा ले विधानसभा के कार्रवाई ल देखिन, जब्कि नक्सल केंद्रीय समिति के नेता अध्यक्ष के दीर्घा म बइठे रिहीन।
सत्र के दउरान सभापति धर्मजीत सिंह ह सदन ल सूचित करीन कि आत्मसमर्पित माओवादी सदन के कार्रवाई देखे बर विधानसभा म मौजूद हे। राज्य शासन के नीति के तहत पूनर्वास करइया आत्मसमर्पित माओवादी मन ले एक सौ बीस माओवादी आज पहिली घांव विधानसभा के जीवंत कार्रवाई देखिन। ए दउरान आसंदी ह ओमन ल समाज के मुख्यधारा म लहुटे म सुभकामना दीन।
उपमुख्यमंत्री विजय शर्मा ह सदन म आज के दिन ल ऐतिहासिक बतात किहीन कि हमन लोकतंत्र म सामिल होय माओवादी मनके सुवागत अउ अभिनंदन करत हन। ओमन बतइन कि आत्मसमर्पण करइया माओवादी बुधवार के राजधानी रईपुर पहुंचे रिहीन। एमन ल नवा रईपुर स्थित जनजातीय संग्रहालय अउ जंगल सफारी के घलो भ्रमण कराय गीस।
विधानसभा म आज पहिली घांव पहुंचे ए पूर्व माओवादी मन आकाशवाणी समाचार ले गोठियात अपन अनुभव साझा करीन। ओमन किहीन कि विकास के दृष्किण अपनात समाज के सेवा करे के परयास करही।
सिटी गैस परियोजना-शुभारंभ
मुख्यमंत्री विष्णुदेव साय ह आज राजधानी रईपुर म सिटी गैस अवसंरचना परियोजना के सुभारंभ करीन। ए मउका म ओमन सीएनजी युक्त वाहन ल हरा झंडा दिखाके रवाना करीन। मुख्यमंत्री ह रईपुर नगर निगम के पहिली पाइपलाइन गैस उपभोक्ता पुनम चौबे ले गोठबात करके घरेलू उपयोग म पाइपलाइन गैस के सुविधा के बारे म जानकारी लीन।
मुख्यमंत्री ह किहीन कि सिटी गैस अवसंरचना परियोजना छत्तीसगढ़ के विकास यात्रा म एक नवा उपलब्धि हे। ओमन किहीन कि ए पहल स्वच्छ ऊर्जा, पर्यावरण संरक्षण अउ आधुनिक अधोसंरचना के दिसा म प्रदेस के संकल्प हे। मुख्यमंत्री ह बतइन कि अब मैट्रो सहर के तर्ज म डोमेस्टिक पाइप्ड नेचुरल गैस के माध्यम ले घर अउ व्यवसायिक प्रतिष्ठान ल पाइपलाइन ले गैस उपलब्ध होही। एखर ले घरेलू उपभोक्ता मन ल रिफिलिंग के झंझट ले मुक्ति मिलही। अेमन किहीन कि सस्ता अउ सुलभ ऊर्जा मिले ले उद्योग क्षेत्र ल भी गति मिलही।
बतादन कि सिटी गैस अवसंरचना परियोजना रईपुर, बलौदाबाजार अउ गरियाबंद जिला म सुरू करे गेहे। एखर माध्यम ले घरेलू उपयोग अउ व्यावसायिक प्रतिष्ठान बर पाइपलाइन ले पीएनजी के आपूर्ति करे जाही अउ वाहन मन बर सीएनजी घलो उपलब्ध होही।
गाईड लाइन-दर
प्रदेस के दंतेवाड़ा, बीजापुर, सुकमा अउ बलरामपुर-रामानुजगंज जिला म आज ले नवा गाईडलाइन दर लागू कर दे गेहे। जिला मूल्यांकन समिति मन ले मिले संशोधित प्रस्ताव म महानिरीक्षक पंजीयन के अध्यक्षता म केंद्रीय मूल्यांकन बोर्ड के बइठका म प्रस्ताव के अनुमोदन करे गीस। नवा गाइड लाइन दर के जानकारी संबंधित जिला पंजीयन कार्यालय अउ विभाग के आधिकारिक वेबसाइट ले प्राप्त करे जा सकत हे।
दुर्घटना
बिलासपुर जिला म पाछू रतिहा होय सड़क दुर्घटना म चार मनखे के मउत हो गेहे। मिले जानकारी के अनुसार राष्ट्रीय राजमार्ग म सकरी थाना क्षेत्र के संबलपुरी करा विपरीत दिसा ले आत एक ट्रेलर ह एक चारपहिया वाहन ल जोरदार टक्कर मार दीस। ए हादसा म चार मनखे के मउकच म मउत होगे। जबकि एक मनखे गंभीर रूप ले घायल हो गेहे। घटना के सूचना मिलते ही सकरी पुलिस मउका म पहुंचिस अउ शव ल पोस्टमार्टम बर भेज दीस। फिलहाल पुलिस ह ट्रेलर चालक के खिलाफ मामला दरज करके जांच सुरू कर देहे।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों में‘‘ ए बखत होली परब म हर्बल गुलाल अउ रंग के बाढ़त प्रचलन अउ ओखर ले जुड़े रोजगार उपर केंद्रित रइही। एखर प्रसारण काली अट्ठाईस फरवरी के आकाशवाणी के रईपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
अउ अब थोरकुन समाचार सार म –
– राज्य शासन ह बीजापुर, बलौदाबाजार-भाटापारा अउ रईपुर जिला म पांच सड़क के निर्माण बर करीबन एक सौ नौ करोड़ रूपिया के निविदा ल मंजूरी दीन हे।
– केंद्रीय सड़क परिवहन अउ राजमार्ग मंत्री नितिन गडकरी ह बिलासपुर जिला म बत्तीस किलोमीटर लंबा बिलासपुर रिंग रोड परियोजना ल सैध्दांतिक स्वीकृति प्रदान कर देहे। ए रिंग रोड के निर्माण बोदरी ले सेंदरी गांव के बीच करे जाही।
अउ
– मुख्यमंत्री विष्णुदेव साय ह राष्ट्रीय स्वयं सेवक संघ के सौ साल के गौरव गाथा म आधारित फिलिम शतक ल छत्तीसगढ़ म टैक्स फ्री करे के घोसना करीन हे।