निर्वाचन आयोग ह आज छत्तीसगढ़ के दू सीट समेत दस राज्य के सैंतीस राज्यसभा सीट बर चुनाव के अधिसूचना जारी कर देहे। नामांकन आज ले पांच मार्च तक दाखिल करे जा सकत हे। मतदान अवइया महिना के सोलह तारीख के होही।
राज्य विधानसभा के बजट सत्र के चौंथा दिन आज सदन म प्रदेस के केंद्रीय अउ जिला जेल म पाछू एक साल के दउरान न्यायिक अभिरक्षा म होय बंदी मनके मउत के मामला गुंजिस। पूर्व मुख्यमंत्री भूपेश बघेल ह प्रश्नकाल म ए मामला उठाइन।
जवाब म उपमुख्यमंत्री अउ गृहमंत्री विजय शर्मा ह बतइन कि जनवरी दू हजार पच्चीस ले इकतीस जनवरी दू हजार छब्बीस तक कुल छैंसठ बंदी मनके हिरासत म मउत होय हे। ओमन बतइन कि छैंसठ म ले अट्ठारा प्रकरण म राष्ट्रीय मानवाधिकार आयोग के दिसा-निरदेस के अनुरूप न्यायिक जांच पूरा हो चुके हे, जबकि अड़तालीस मामला म जांच के प्रक्रिया अभी जारी हे।
पूर्व मुख्यमंत्री भूपेश बघेल ह एक आदिवासी नेता जीवन ठाकुर के मउत ल हत्या बतात मामला के जांच विधानसभा के समिति ले कराय के मांग करीन। ओमन जेल म जीवन ठाकुर ल पर्याप्त उपचार नइ दे जाय के आरोप लगइन। एमा गृहमंत्री ह ए आरोप ल खारिज करत बतइन कि जेल अस्पताल रिपोर्ट के अनुसार ओमन सुगर के मरीज होय के बावजूद जरूरी परहेज नइ करत रिहीन। गृहमंत्री ह किहीन कि जब कोनो मामला म पहिली ले मजिस्ट्रेट जांच चलत हे, त समानांतर जांच के कोनो औचित्य नइ हे।
गृहमंत्री के जवाब ल असंतुष्ट विपक्षी सदस्य मन जमके नारेबाजी करत सदन ले बहिर्गमन कर दीन।
उहें, विधानसभा के सून्यकाल म विपक्षी सदस्य मन धान खरीदी के मुद्दा उठाइन। नेता प्रतिपक्ष डॉ. चरणदास महंत ह ए संबंध म सरकार के नीति ल नाकाम बतात ए मुद्दा उपर चर्चा बर स्थगन प्रस्ताव दीन।
इंखर पहिली, नेता प्रतिपक्ष डॉ. चरणदास महंत ह सदन म चर्चा के दउरान किहीन कि धान खरीदी के मामला म सरकार के नीति असफल रेहे हे। ओमन आरोप लगइन कि किसान मनके पूरा धान नइ खरीदे गीस अउ किसान मन ल टोकन के नांव म परेसान करे गीस।
उहें, कांग्रेस सदस्य उमेश पटेल ह किसान मन के करज माफ करे के मांग करीन। पूर्व मुख्यमंत्री भूपेश बघेल ह किहीन कि सरकार के मंसा धान अउ किसान उपर चर्चा नइ करे के हे। ओमन एला गंभीर मामला बतात एखर उपर चर्चा कराय के मांग करीन।
सभापति ह विपक्ष के स्थगन ल अग्राह्य कर दीन। एखर बाद विपक्षी सदस्य नारेबाजी करत गर्भगृह म पहुंच गीन। विधानसभा के नियमानुसार गर्भगृह पहुंचे वाला जम्मों सदस्य खुदे निलंबित होगिन।
उहें, सदन म आज भाजपा विधायक सुनील सोनी ह ध्यानाकर्षण सूचना के माध्यम ले स्कूल, धार्मिक मार्ग अउ व्यस्क सड़क करा सराब के दुकान अउ अहाता के आवंटन के मुद्दा उठाइन। अेमन राज्य सरकार घना आबादी वाला इलाका म चलत सराब के दुकान ल स्थानांनरित करे के मांग करीन। जवाब म आबकारी मंत्री लखनलाल देवांगन ह किहीन कि सराब के दुकान अउ अहाता आबकारी नियम के अनुसार चलाय जात हे।
अइसने, कांग्रेस विधायक अंबिका मरकाम ह ध्यानाकर्षण सूचना के माध्यम ले आदिवासी पारधी समुदाय के लोगन मन ल जाति प्रमाण पत्र जारी नइ करे जाय के मुद्दा उठाइन। ओमन किहीन कि स्थानीय सरकारी स्कूल म पढ़त कम से कम पच्चीस लइका मन ल जाति प्रमाण पत्र जारी नइ करे गेहे। जवाब म आदिम जाति विकास मंत्री रामविचार नेताम ह किहीन कि भारत सरकार डहार ले पारधी समुदाय ल आदिवासी समुदाय के रूप म अधिसूचित नइ करे गेहे। ओमन किहीन कि एखर बर राज्य सरकार केंद्र सरकार ले पत्राचार करही।
गणेश शंकर मिश्रा-नीति आयोग उपाध्यक्ष
राज्य सरकार ह सेवा निवृत्त आईएएस अधिकारी गणेश शंकर मिश्रा ल राज्य नीति आयोग के उपाध्यक्ष नियुक्त करे हे। ए संबंध म योजना, आर्थिक अउ सांख्यिकी अउ बीस सूत्रीय कार्यान्वयन विभाग ह आदेस जारी कर देहे। ए नियुक्ति ओखर कार्यभार ग्रहन करे के तिथि ले अवइया आदेस तक प्रभावी रइही।
माओवादी-मुठभेड़
बीजापुर जिला म आज सुरक्षा बल अउ माओवादी मनके बीच होय मुठभेड़ म एक महिला समेत दू माओवादी मारे गे। मारे गे माओवादी मन के शव के अलावा घटना स्थल ले एक एसएलआर राइफल, एक इंसास, बारह बोर के बंदूक अउ दू हैंड ग्रेनेड समेत दूसर हथियार अउ गोलाबारूद बरामद करे गेहे।
जिला के पुलिस अधीक्षक डॉ. जितेन्द्र यादव ह बतइन कि बीजापुर के इंद्रावती नदी क्षेत्र म माओवादी मनके मौजूदगी के सूचना मिले के बाद सुरक्षा बल के संयुक्त टीम ह सर्च अभियान सुरू करे रिहीस। अभियान के दउरान माओवादी मन सुरक्षा बल उपर घात लगाके हमला करीन अउ गोलीबारी सुरू कर दीन। सुरक्षा बल के जवाबी कार्रवाई म दू माओवादी ढेर हो गेहे। घटना स्थल ले माओवादी मनके शव बरामद कर ले गेहे। मारे गे माओवादी हिचामी मडडा अउ मनकी पोड़ियम के पहचान भैरमगढ़ एरिया कमेटी के सदस्य के रूप म होइस। ए माओवादी मन उपर पांच-पांच लाख रूपिया के इनाम घोसित रिहीस।
उहें, नारायणपुर जिला म सुरक्षाबल ह सर्च आपरेसन के दउरान माओवादी कोति ले भारी मात्रा म डंप करे गे हथियार के संघरा दैनिक उपयोग के जिनिस बरामद करे हे। जिला के पुलिस अधीक्षक रॉबिंसन गुड़िया ह बतइन कि ग्राम कुमुराडी ले भारी मात्रा म विस्फोटक सामग्री, आधुनिक हथियार अउ दैनिक उपयोग के जिनिस मिले हे। एमा एक ठिन रॉकेट लांचर, तेरह रॉकेट लांचर सेल, उन्नीस मोर्टार सेल, एक बीजीएल लांचर अउ विस्फोटक सामग्री सामिल हे।
इही बीच, दंतेवाड़ा जिला के तुलार क्षेत्र के जंगल ले सुरक्षा बल ह पांच-पांच किलो दू आईईडी बरामद करे हे।
प्रधानमंत्री-इंस्टाग्राम
प्रधानमंत्री नरेंद्र मोदी इंस्टाग्राम म दस करोड़ फॉलोअर्स के ऐतिहासिक आंकड़ा पार कर ले हे। एखरे संग ओमन ए मंच म ए उपलब्धि हासिल करइया पहिली वैश्विक राजनेता बन गेहे। प्रधानमंत्री मोदी दू हजार चौदह इंस्टाग्राम ले जुड़े रिहीन। उहें, अमेरिकी राष्ट्रपति डोनाल्ड ट्रंप चार करोड़ बत्तीस लाख फॉलाअर्स के संग दूसरा स्थान म हे।
हाईकोर्ट-स्कूल प्रवेश
छत्तीसगढ़ उच्च न्यायालय ह किहीन हे कि बिना अनुमति स्कूल प्रांगन म प्रवेस करना भारतीय दंड संहिता के तहत अपराध माना जाही। ए फइसला के संग उच्च न्यायालय ह स्कूल पं्रागन म प्रवेस संबंधी लगाय गे याचिका ल खारिज कर दीस।
बतादन कि याचिकाकर्ता विकास तिवारी ह कथिततौर म अपन संगी मन संग एक निजी स्कूल म घुसके दुर्व्यवहार करे रिहीस, जेखर खिलाफ स्कूल प्रबंधन ह सिकायत दरज कराय रिहीस। मामला के सुनवाई के बाद ट्रायल कोर्ट ह याचिकाकर्ता के खिलाफ आने-आने धारा के तहत आरोप तय करीस। याचिकाकर्ता ह रिविजनल कोर्ट म ट्रायल कोर्ट के आदेस ल चुनौती देवत याचिका दायर करे रिहीस। मामला के सुनवाई के बाद रिविजनल कोर्ट ह याचिका खारिज कर दीस। ए फइसला ले याचिकाकर्ता विकास तिवारी ह हाईकोर्ट चुनौती दे रिहीस।
मुख्यमंत्री-कपिल देव मुलाकात
मुख्यमंत्री विष्णुदेव साय ले आज नवा रईपुर स्थित मुख्यमंत्री निवास कार्यालय म भारतीय क्रिकेट टीम के पूर्व कप्तान कपिल देव ले सौजन्य भेंट करीन। ए दउरान दूनों के बीच प्रदेस म खेल ल बढ़ावा दे, आधुनिक खेल अधोसंरचना के विकास, अंतरराष्ट्रीय स्तर के प्रसिक्षण केंद्र अउ प्रतिभासाली खिलाड़ी मन ल तियार करे जइसे बिसय उपर चर्चा होइस।
मुख्यमंत्री ह राज्य सरकार डहार ले खेल के प्रोत्साहन अउ खिलाड़ी मन बर बेहतर सुविधा उपलब्ध कराय बर करे जात परयास के जानकारी दीन। पूर्व कप्तान कपिल देव ह छत्तीसगढ़ म होवत सकारात्मक परिवर्तन के सराहना करत किहीन कि सुरक्षा, विस्वास अउ विकास के ए माहौल म प्रदेस के प्रतिभागी मनल राष्ट्रीय अउ अंतरराष्ट्रीय स्तर म उत्कृष्ट मंच मिलही।