विधानसभा-सत्र
छतीसगढ़ विधानसभा म बजट सत्र के तीसरइया दिन आज प्रदेस म नसीला पदार्थ के अवैध बिक्री के मामला गुंजिस। भाजपा विधायक अजय चंद्राकर अउ धरमलाल कौशिक ह धियान खिचत सूचना के जरिया ले ए मामला उठाइन। सदस्य मन ह आरोप लगाइन कि प्रदेस म नसीला पदार्थ के अवैध बिक्री के कारण सरलग अपराध बाढ़त हे अउ प्रशासन एला रोके म विफल रेहे हे। जवाब म गृहमंत्री विजय शर्मा ह सदस्य मन के आरोप ल निराधार बतात हुए किहीन कि शासन-प्रशासन डहार ले नसीला पदार्थ के बिक्री उपर लगातार कार्रवाई करे जात हे। रईपुर म एक आरक्षक उपर घलो कार्रवाई होय हे।
एखर पहिली, प्रश्नकाल के दउरान नेता प्रतिपक्ष डॉक्टर चरणदास महंत ह सक्ति जिला म सीवेज ट्रीटमेंट प्लांट के निर्माण के मामला उठाइस अउ गलत जानकारी देने वाला अधिकारी मनके खिलाफ कार्रवाई के मांग करीन। एमा लोक स्वास्थ्य यांत्रिकी मंत्री अरूण साव ह किहीन कि यदि विभाग डहार ले एनजीटी ल गलत जानबा दे गीस, त एखर जांच कराके कार्रवाई करे जाही।
अइसने, बालोद जिला के कांग्रेस विधायक संगीता सिन्हा ह अपन निर्वाचन क्षेत्र म जल-जीवन मिसन के तहत करे जावत काम ल लेके सवाल पूछिन। अेमन ह किहीन कि ओखर क्षेत्र के एक सौ ग्यारा गांव म पाइप लाइन के जरिया ले पेयजल के आपूर्ति नइ हो पावत हे। जवाब म लोक स्वास्थ्य यांत्रिकी मंत्री अरूण साव ह बतइन कि एक सौ ग्यारा गांव मन म जल-जीवन मिसन के काम ल पूरा कर ले गेहे अउ सबो जघा नियमित रूप ले पेयजल के आपूर्ति होवत हे।
उहें, सदन म आज विधायक अजय चंद्राकर ह स्विगी, जोमैटो, ब्लिंकइट, रैपिडो जइसन ऑनलाइन सर्विस म काम करत गिग वर्कर अउ उंखर सुरक्षा के मामला उठाइन। श्री चंद्राकर ह किहीन कि प्रदेस म अइसने कतकोन कंपनी काम करत हे अउ एमा कतकोन गिग वर्कर काम म हे। जवाब म उद्योग मंत्री लखनलाल देवांगन ह बतइन कि प्रदेस म श्रम विभाग म अवइया स्विगी, जोमैटो, ब्लिंकइट, रैपिडो जइसन कंपनी पंजीकृत नइ हे। ओमन ह गिग वर्कर के संख्या के बारे म विभाग तीर जानकारी उपलब्ध नइ होय के बात किहीन। श्रम मंत्री ह बतइन कि सामाजिक सुरक्षा संहिता म अवइया केंद्रिय श्रम अउ रोजगार मंत्रालय डहार ले गिग वर्कर के सामाजिक सुरक्षा बर राष्ट्रीय सामाजिक सुरक्षा मंडल के गठन करे जाय के प्रावधान हे।
विधानसभा-बहिर्गमन
विधानसभा म आज राज्यपाल के अभिभाषण म धन्यवाद प्रस्ताव उपर चर्चा सुरू होइस। ए दउरान कांग्रेस विधयाक मन ह सदन म मुख्यमंत्री मनके संग मंत्रि अउ अधिकारी मन के मौजूदगी नइ होय उपर आपत्ति करत हुए सदन ले बहिर्गमन कर लीन। पूर्व मुख्यमंत्री भूपेश बघेल ह किहीन कि राज्यपाल के अभिभाषण म धन्यवाद प्रस्ताव उपर चर्चा होवत हे, फेर मुख्यमंत्री अउ मंत्रिमंडल के सदस्य अउ वरिष्ठ अधिकारी सदन म मौजूद नइ हे। इखर बाद मुख्यमंत्री विष्णुदेव साय, संसदीय कार्यमंत्री केदार कश्यप अउ आने मंत्री सदन म पहुंचिन। बाद म कांग्रेस विधायक मन ह घलो हिस्सा लीन।
माओवादी-आत्मसमर्पण
कांकेर जिला म आज माओवादी कमांडर मल्लेश ह पुलिस के आगू आत्मसमर्पण कर देहे। जिला के पुलिस अधीक्षक निखिल राखेचा ह बतइन कि माओवादी कमांडर ह एके-सैंतालीस राइफल के संग छोटेबेठिया कैंप म आत्मसमर्पण करे हे। ओहा कतकोन समय ले नारायणपुर जिला म सक्रिय रिहीस।
मुख्यमंत्री-नेशनल ट्रेड एक्सपो
मुख्यमंत्री विष्णुदेव साय राजधानी रईपुर स्थित बीटीआई मैदान म कंफेडरेशन ऑफ ऑल इंडिया ट्रेडर्स-कैट डहार ले आयोजित नेशनल ट्रैड एक्सपो के समापन समारोह म सामिल होइन। समारोह ल संबोधित करत हुए मुख्यमंत्री ह किहीन कि छत्तीसगढ़ म कृषि के संगेसंग व्यापार अउ उद्योग बर घलो अनुकूल वातावरण बने हे, जेखर परिणाम हे कि व्यापारी अउ उद्योग जगत के प्रतिनिधि राज्य म निवेस बर आगु आवत हे।
मुख्यमंत्री ह किहीन कि बछर दू हजार सैंतालीस तक विकसित छत्तीसगढ़ के निर्माण म व्यापारी मनके जरूरी भूमिका रइही। ओमन ह नेशनल ट्रैड एक्सपो के आयोजन बर कैट के टीम ल बधई दीन। ए बेरा म मुख्यमंत्री ह ट्रैड एक्सपो म आने-आने स्टाल के निरीक्षण करीन। कारीकरम म कैट डहार ले प्रकासित स्वदेसी पोस्टर के विमोचन घलो करे गीस।
अरूण साव-नियुक्ति पत्र
उपमुख्यमंत्री अरूण साव ह आज नवा रईपुर स्थित विधानसभा भवन म आयोजित कारीकरम म लोक स्वास्थ्य यांत्रिकी विभाग म केमिस्ट के पद म चयनित अभ्यर्थी मन ल नियुक्ति प्रमाण पत्र प्रदान करीन। ए बेरा म ओमन ह सबो चयनित अभ्यर्थी मन ल बधई देत हुए किहीन कि ए सफलता उंखर परिश्रम अउ लगन के परिणाम हे। ओमन ह चयनित अभ्यर्थी मन ल अपन दायित्व के निष्ठा अउ इमानदारी ले निर्वहन करे बर प्रेरित करीन।
उच्च न्यायालय-बम धमकी
छत्तीसगढ़ उच्च न्यायालय ल आज बम ले उड़ाय के धमकी मिले हे। ईमेल के जरिया ले हाईकोर्ट ल बम ले उड़ाय के धमकी भरे पत्र मिले के बाद सुरक्षागत कारण ले हाईकोर्ट म सुनवाई स्थगित कर दे गीस।
वरिष्ठ पुलिस अधीक्षक रजनेश सिंह ह बतइन कि मुख्य न्यायाधीश रमेश सिन्हा संग सबो न्यायाधीश अपन कोर्ट रूम म बइठके प्रकरण के सुनवाई करत रिहीन। ए दउरान ईमेल के जरिया ले हाईकोर्ट ल बम ले उड़ाय के धमकी वाला पत्र मिलिस। रजिस्ट्रार जनरल जिला अउ पुलिस प्रशासन ल इंखर जानकारी दे गीस। जेखर बाद बम निरोधक दस्ता हाईकोर्ट परिसर के संग कतकोन जघा के तालासी म जुटे हे। हाईकोर्ट परिसर म अवइया-जवइया सबो लोगन मनके तलासी ले जावत हे। उहें, हाईकोर्ट परिसर म सुरक्षा बढ़ा दे गेहे।
अंतर्राष्ट्रीय विशेषज्ञ-बस्तर दौरा
संयुक्त राष्ट्र ले संबध्द अंतरराष्ट्रीय बिसेसज्ञ अउ हिवा कोचिंग एंड कंसल्टिंग के संस्थापक किर्सी हेवैरिनेन अभी छत्तीसगढ़ के छै दिवसीय प्रवास म हे। ए दउरान ओमन ह बस्तर जिला के गांव धुड़मारास के दउरा करीन। उंखर सुवागत म धुरवाडेरा होमस्टे म धुरवा नाचा अउ गाना के जरिया ले गांव के लोगन मन ह अपन संस्कृति देखाइन। सुश्री किर्सी ह किहीन कि अइसन अनुभव उंखर बर बहुत बिसेस अउ यादगार हे। सुश्री किर्सी ह विश्व प्रसिध्द चित्रकोट जलप्रपात म पर्यटन संभावना के अवलोकन करीन। ओमन ह मेंदरी घूमर क्षेत्र म स्थानीय हितग्राही मनके संग पर्यटन गतिविधि उपर घलो चर्चा करीन। ए प्रवास बिसेस रूप ले यूनाइटेड मिसन ले जुड़े ‘‘बेस्ट टूरिज्म विलेज अपग्रेड प्रोग्राम‘‘ के मानक के अनुरूप धुड़मारास अउ आसपास के क्षेत्र ल विकसित करे उपर केंद्रित हे।
अउ अब थोरकुन समाचार सार म –
– महासमुंद पुलिस ह महासमुंद अउ सिंगौड़ा थाना क्षेत्र म एक सौ सैंतीस किलोग्राम गांजा जब्त करे हे। गांजा के कीमत अड़सठ लाख रूपिया बताय गेहे। ए मामला म एक माईलोगिन के संग आठ आरोपी मन ल गिरफ्तार करे गेहे।
– भिलाई के छावनी थाना पुलिस ह रेलवे म नौकरी लगाय के नाम म एक मनखे ले सात लाख रूपिया के ठगी करे के आरोप म दू आरोपी मन ल मध्यप्रदेस के रीवा ले गिरफ्तार करे हे।
– बलौदाबाजार-भाटापारा जिला म हथबंद क्षेत्र के उड़ेला-पौसरी तीर तेज रफ्तार गाड़ी के टक्कर ले मोटर-साइकल सवार दू पुलिस कर्मी के मउत होगिस।
– सारंगढ़-बिलाईगढ़ जिला के सरिया क्षेत्र म राजस्व अउ पुलिस के टीम ह रेत के अवैध उत्खनन अउ परिवहन के मामला म कार्रवाई करत हुए बारह टैक्टर जब्त करे हे।
अउ
– सारंगढ़-बिलाईगढ़ जिला म पशु चिकित्सा विभाग डहार ले खुरहा-एमएमडी के रोकथाम बर दू मार्च ले पंद्रह मार्च तक जागरूकता सिविर के आयोजन करे जाही। उहें, पंद्रह मार्च ले तीस मार्च तक गांव म सघन टीकाकरण अभियान चलाय जाही।