वित्तमंत्री ओपी चौधरी ह आज राज्य विधानसभा म बछर दू हजार छब्बीस-सत्ताईस बर बजट पेस करीन। ए बजट करीबन एक लाख बहत्तर हजार करोड़ रूपिया के हवय।
अपन बजट भाषण म वित्तमंत्री ह कहिन कि ए बखत बजट के थीम ‘‘संकल्प‘‘ हवय। संकल्प ले आसय हवय – समावेशी विकास, अधोसंरचना, निवेस, कुशल मानव संसाधन, अंत्योदय, लाईवलीहुड अउ पॉलिसी ले परिणाम तक। बजट म पांच मिशन सुरू करे के घलो घोषणा करे गेहे। एमा मुख्यमंत्री एआई मिशन, पर्यटन विकास मिशन, खेल उत्कर्ष मिशन, अधोसंरचना मिशन अउ स्टार्टअप के संग निपुण मिशन सामिल हे। ए जम्मों मिशन मन बर अवइया पांच बछर के दउरान हर बछर कम ले कम सौ-सौ करोड़ रूपिया के रासि के प्रावधान करे जाही।
बजट म बारह नवा योजना सुरू करे के घलो घोषणा करे गेहे। मुख्यमंत्री आदर्श शहर-समृद्धि योजना के तहत नगर पालिका अउ नगर पंचायत मन म बुनियादी अधोसंरचाना के संग नागरिक सेवा मनके विस्तार करे जाही। मुख्यमंत्री दु्रतगामी सड़क संपर्क योजना के तहत राज्य म तेज गति वाले दू ले चार लेन वाले सड़क बनाय जाही। एखर संगेसंग शिक्षा के गुणवत्ता बढ़ाय बर स्वामी विवेकानंद उत्कृष्ट साला योजना सुरू करे जाही। राज्य के सरकारी कर्मचारी मन ल कैशलेस चिकित्सा सुविधा देवाय बर योजना सुरू करे जाही। एखर बर बजट म सौ करोड़ रूपिया के प्रावधान करे गेहे। प्रतियोगी परीक्षा के तैयारी करइया युवा मन ल आर्थिक मदद दे बर घलो सीजीएस नाम ले योजना सुरू करे जाही। एखर संगेसंग बिलासपुर, जगदलपुर अउ अंबिकापुर ले हवाई सेवा मन ल बढ़ावा दे बर सीजी वायु योजना सुरू करे जाही।
वित्तमंत्री ह बतईन कि राज्य सरकार रानी दुर्गावती योजना सुरू करही। एखर तहत परिवार म नोनी मनके जन्म होय म ओ बालिका के आयु अट्ठारह बछर पूरा होय के बाद डेढ़ लाख रूपिया दे जाही। एखर संग आर्थिक रूप ले कमजोर मेधावी छात्र-छात्रा मन ल पढ़ाई बर किराया म आवासीय सुविधा बर आर्थिक मदद देवाय के उद्देश्य ले मुख्यमंत्री शिक्षा सहयोग योजना सुरू करे जाही।
प्रदेस के लखपति दीदी मन ल देस के सफल महिला उद्यमी मनके कामकाज ले अवगत कराय बर लखपति दीदी भ्रमण योजना सुरू होही। उहें, लोगन मन ल राज्य के पांच सक्तिपीठ – दंतेवाड़ा, डोंगरगढ़, रतनपुर, चंद्रपुर अउ कुदरगढ़ के आस्था केन्द्र मनके दर्सन बर सक्तिपीठ भ्रमण योजना सुरू करे के घोसना करे गेहे। एखर संग सरकारी स्कूल के प्रतिभासाली विद्यार्थी मन ल छत्तीसगढ़ के प्रमुख ऐतिहासिक अउ सांस्कृतिक केन्द्र मनके भ्रमण कराय बर छत्तीसगढ़ युवा दर्सन योजना सुरू करे जाही। संगेसंग केन्द्र सरकार डहार ले मनरेगा के जघा म सुरू करे गे विकसित भारत जी-राम-जी योजना बर बजट म चार हजार करोड़ रूपिया के प्रावधान करे गेहे।
वित्तमंत्री ह अपन बजट भासन म बतईन कि छत्तीसगढ़ म समावेशी विकास बर सरकार ह कतकोन नवा पहल सुरू करे फइसला लेहे। एखर तहत अबूझमाड़ अउ जगरगुंडा म एजुकेसन सिटी स्थापित करे जाही। राज्य म तेईस नवा औद्योगिक पार्क स्थापित करे जाही। जनसमस्या के निराकरण बर मुख्यमंत्री हेल्प लाइन पोर्टल सुरू करे जाही। राज्य म साइबर तहसील बनाय जाही। उहें, छत्तीसगढ़ म बने हस्तशिल्प उत्पाद मन ल बढ़ावा दे बर देस के पांच प्रमुख हवाई अड्डा म हैंडीक्राफ्ट शो रूम बनाय जाही।
एखर संगेसंग जनजातीय लोक संगीत अउ सांस्कृतिक विरासत के संरक्षण बर जनजातीय ‘‘सुरगुड़ी स्टुडियो‘‘ स्थापित करे जाही।
वित्तमंत्री ह अपन बजट भासन म बतईन कि राजधानी रायपुर म प्रदेस के पहिली होम्योपैथी कॉलेज खोले जाही। उहें, रायपुरेच म एडवांस कार्डियेक इंस्टीट्यूट घलो बनाय जाही। इंद्रावती नदी म मटनार अउ देउरगांव म बैराज अउ नहर के निर्माण करे जाही। एखर ले बस्तर के करीबन बत्तीस हजार हेक्टेयर क्षेत्र म सिंचाई सुविधा के विस्तार होही। बस्तर म बस्तर फाइटर्स बल बर पन्द्रह सौ नवा पद मन म भर्ती करे जाही। एखर संगेसंग बस्तर म खेल अकादमी सुरू करे जाही।
वित्तमंत्री ह अपन बजट भासन म कहिन कि राजधानी रायपुर ह प्रदेस के सबले बड़े परीक्षा केन्द्र आय। इहां सरलग प्रतियोगी परीक्षा होवत रहिथे, जेमा छत्तीसगढ़ के संगेसंग पड़ोसी राज्य ले घलो उम्मीदवार आथे, एला ध्यान म राखत रायपुर म एक मेगा परीक्षा केन्द्र स्थापित करे जाही। एखर ले राज्य म प्रतियोगी परीक्षा करवाय म आसानी होही। एखर संगेसंग रायपुर, बिलासपुर अउ दुर्ग म तीन नवा छत्तीसगढ़ इंस्टीट्यूट ऑफ टेक्नोलॉजी स्थापित करे जाही।
वित्तमंत्री ह बतईन हे कि सुधार के श्रृंखला म आगू बाढ़त सरकार ह छत्तीसगढ़ स्टेट फाइनंेसियल सर्विस लिमिटेड के स्थापना करे के फइसला लेहे। एखर संग प्रदेस म सेंट्रल ट्रेजरी के स्थापना करे जाही। वित्तमंत्री ह बतईन कि छत्तीसगढ़ सरकार डहार ले करे गे रिफॉर्म्स के एवज म केन्द्र सरकार ह पाछु दू बछर म करीबन तेरह हजार करोड़ रूपिया के रासि राज्य सरकार ल देहे।
वित्तमंत्री ह बतईन हे कि सरकार ह सरकारी कर्मचारी मन बर जिला अउ विकासखंड स्तर म क्वाटर्स बनाय के फइसला लेहे। ए बछर ग्यारह जिला मुख्यालय अउ पच्चीस विकासखंड मुख्यालय मन म क्वार्टर बनाय जाही।
वित्तमंत्री ह अपन बजट भासन म एक ठिन बिसेस घोसना करत बतईन कि माईलोगिन मनके आर्थिक अउ सामाजिक सशाक्तिकरण बर बजट म प्रस्ताव करे गेहे कि अवइया बछर ले माईलोगिन मनके नाम ले अंचल संपत्ति खरीदे म भारित पंजीयन सुल्क म पचास प्रतिसत के छूट दे जाही।
बजट प्रतिक्रिया
विधानसभा म आज पेस करे गे बजट उपर प्रतिक्रिया देवत मुख्यमंत्री विष्णुदेव साय ह कहिन हे कि ए बजट समावेशी विकास, सुशासन अउ जनकल्याण के संकल्प ल आगू बढ़ाने वाला साबित होही। ओमन कहिन कि ए बजट विकसित अउ समृद्ध छत्तीसगढ़ के निर्माण बर सरकार के विज़न ल नवा मजबूती दीही। श्री साय ह कहिन कि राज्य के बुनियादी ढांचा, रोजगार सृजन, कृषि उन्नयन, सामाजिक सुरक्षा अउ मानव संसाधन विकास ल नवा दिसा दे म ए बजट प्रमुख भूमिका निभाही।
दूसर कोति, नेता प्रतिपक्ष डॉक्टर चरणदास महंत ह कहिन कि बजट म प्रदेस के युवा अउ माईलोगिन मन बर कुछु नइ हे।
माओवादी आत्मसमर्पण
माओवादी मनके एक शीर्ष नेता देवजी समेत चार झिन माओवादी मन ह आज तेलंगाना पुलिस के आगू आत्मसमर्पण कर देहे। छत्तीसगढ़ के उपमुख्यमंत्री अउ गृह मंत्री विजय शर्मा ह कहिन हे कि माओवादी मनके शीर्ष अगुवई आज सिरा होगे हे। ए ह एक ठिन बड़का उपलब्धि हरय।
गांजा-बरामद
कबीरधाम पुलिस ह करीबन पांच करोड़ रूपिया कीमत के नौ क्विंटल गांजा बरामद करे हे। ए मामला म पुलिस ह राजस्थान के एक झिन आरोपी ल गिरफ्तार करे हे।
मिले खबर के मुताबिक गांजा ल एक कंटेनर म भरके ओड़िसा ले राजस्थान ले जावत रिहीस। इही दउरान चिल्फी पुलिस ह नागालैंड पासिंग तीर कंटेनर ल रोकीस। जांच के दउरान कंटेनर म तीस-तीस किलो के तीस बोरी ले नौ सौ किलो गांजा जब्त करीस। आरोपी कंटेनर म गुप्त चैंबर बनाके गांजा के तस्करी करत रिहीन। पुलिस ह कंटेनर ल घलो जब्त कर लेहे।
अउ अब थोरकुन समाचार सार म –
– सारंगढ़-बिलाईगढ़ जिला म एकेच परिवार के तीन झिन लोगन के हत्या के मामला आगू आय हे। धारदार हथियार ले करे गे हमला म दू झिन सदस्य मन गंभीर रूप ले घायल होगे हे।
अउ
– भिलाई के प्रथम वाहिनी छत्तीसगढ़ सशस्त्र बल म काली ले चौदहवां अखिल भारतीय पुलिस तीरंदाजी प्रतियोगिता सुरू होगे हे। प्रतियोगिता के सुभारंभ उपमुख्यमंत्री विजय शर्मा ह करीन।