छत्तीसगढ़ विधानसभा के बजट सत्र आज ले सुरू हो गेहे। बीस मार्च तक चलइया ए सत्र के दउरान कुल पंद्रह ठन बइठका होही। सत्र के सुरूआत राज्यपाल रमेन डेका के अभिभाषण ले होइस।
राज्यपाल ह अपन अभिभाषण म किहीन कि छत्तीसगढ़ सरकार विकसित भारत बर प्रदेस ल पावर हाउस के रूप म तियार करत हे। एखर बर एनर्जी समिट के आयोजन घलो करे गीस, जेमा साढ़े तीन लाख करोड़ रूपिया के निवेस प्रस्ताव मिलिस। राज्यपाल ह बतइन कि सरकार प्रदेस ल मैन्युफैक्चरिंग अउ सर्विस इंडस्ट्री के हब बनाय बर संकल्पित हे। सरकार ह डिजीटल गवर्नेंस के माध्यम ले पारदर्सिता ल अपनाय हे। लाल फीताशाही ल रोके बर ई-फाइल के बेवस्था लागू करे गेहे। संगेसंग बायोमेट्रिक अटेडेंस सिस्टम घलो सुरू होय हे। राज्यपाल ह किहीन कि छत्तीसगढ़ अब तेजी ले वैश्विक टूरिज्म के नक्सा म अपन जघा बनावत हे। ओमन किहीन कि छत्तीसगढ़ म विकास के बहुत संभावना हे। इंहा के सरल-सहज अउ मेहनती जनता के सेति राज्य सरकार ह ए संभावना ल हासिल करे के दिसा म कड़ा मेहनत करत हे।
राज्यपाल ह किहीन कि राज्य के किसान मन डहार ले उगाय जाने वाला अनाज निर्यात के माध्यम ले जादा ले जादा मात्रा म विदेस पहुंच सकय एखर बर छत्तीसगढ़ सरकार अइसन तकनीक म काम करत हे, जेखर ले अनाज के उमर बढ़ाय जा सकय। एखर बर इंदिरा गांधी कृषि विश्वविद्यालय रईपुर म भाभा परमाणु अनुसंधान केंद्र के मदद ले सेंटर ऑफ एक्सीलेंस के स्थापना करे जावत हे।
राज्यपाल ह किहीन कि सरकार ह माओवादी मनके आत्मसमर्पण बर सुघ्घर नीति बनाय हे, जेखर सेति भटके युवा मन ह अब मुख्यधारा म सामिल होवत हे। ओमन किहीन कि छत्तीसगढ़ तेजी ले माओवादी आतंक ले मुक्त होय के दिसा म आगू बाढ़त हे। ओमन किहीन कि जउन धुर नक्सल प्रभावित इलाका ल माओवाद ले मुक्त करे गे हवय, उंहा नियद नेल्लानार योजना के माध्यम ले बुनियादी सुविधा देवाय जात हे। संगेसंग बस्तर म विकास बर कनेक्टिविटी ल जादा प्राथमिकता दे गे हवय।
विस-आर्थिक सर्वेक्षण
वित्त मंत्री ओपी चौधरी ह आज सदन म आर्थिक सर्वेक्षण पेस करीन। एखर अनुसार बछर दू हजार पच्चीस-छब्बीस म छत्तीसगढ़ के सकल राज्य घरेलू उत्पाद-जीएसडीपी पाछू बछर के तुलना म ग्यारा दसमलव पांच-सात प्रतिसत बाढ़े के अनुमान हे। चालू वित्तीय बछर म सकल राज्य घरेलू उत्पाद बढ़के छै लाख इकतीस हजार दू सौ इंक्यानवे करोड़ रूपिया होना संभावित हे। ए वृध्दि दर राष्ट्रीय औसत ले जादा हे। सबले जादा बढ़ोत्तरी सेवा क्षेत्र म होय हे, जउन ह तेरह दसमलव एक-पांच प्रतिसत हे। उहें, कृषि क्षेत्र म घलो करीब साढ़े बारह प्रतिसत के बढ़ोत्तरी के अनुमान लगाय गेहे। राज्य म प्रति व्यक्ति आय म पाछू बछर के मुकाबला करीब दस प्रतिसत के बढ़ोत्तरी अनुमानित हे।
मुख्यमंत्री विष्णुदेव साय ह किहीन हे कि ए आर्थिक सर्वेक्षण छत्तीसगढ़ के मजबूत अउ संतुलित अर्थ व्यवस्था के प्रमाण हे। ओमन किहीन कि कृषि, उद्योग अउ सेवा क्षेत्र म बढ़ोत्तरी के अनुमान ए देखाथे कि छत्तीसगढ़ आज किसान मन के समृध्दि अउ औद्योगिक मजबूती के संग आगु बढ़त हे। ओमन किहीन कि सेवा क्षेत्र छत्तीसगढ़ के नवा अर्थ व्यवस्था के मजबूत आधार बनत हे।
मुख्यमंत्री ह किहीन कि राज्य के अर्थव्यवस्था म उद्योग के योगदान करीब उनचास प्रतिसत हे, जउन ह राष्ट्रीय औसत ले जादा हे। एखर ले पता चलथे कि राज्य म निवेस, रोजगार अउ विकास के नवा मउका सरलग बाढ़त हे।
विस-छत्तीसगढ़ बजट
इही बीच, वित्त मंत्री ओपी चौधरी काली चौबीस फरवरी के विधानसभा म बछर दू हजार छब्बीस-सत्ताईस बर बजट पेस करही। बजट भाषण के सीधा प्रसारण दूरदर्शन अउ आकाशवाणी केंद्र रईपुर डहार ले करे जाही।
इंडिया एआई इम्पैक्ट समिट
प्रधानमंत्री मोदी ह हाल म नई दिल्ली म होय इंडिया एआई इम्पैक्ट समिट के तारीफ करीन हे। सोसल मीडिया पोस्ट म संस्कृत के एक ठन श्लोक बोलत प्रधानमंत्री ह किहीन कि ए ऐतिहासिक समिट म भारत के क्षमता के विश्व स्तर म तारीफ होय हे। समिट के समापन, एआई इम्पैक्ट म नई दिल्ली घोसना पत्र ल अपनाय के संग होइस।
अमित शाह-टैक्सी सारथी
केंद्रीय सहकारिता मंत्री अमित शाह ह नई दिल्ली म भारत टैक्सी सारथी मन ले गोठबात करीन। आज जारी होय एक ठन वीडियो म श्री शाह ह किहीन कि भारत टैक्सी सहकारी समिति के उद्देस्य चालक मन ल उंखर काम के स्वामित्व दे के ओमन ल मजबूत बनाना हे। श्री शाह ह बतइन कि ए पहल के लक्ष्य निजी टैक्सी सेवा कंपनी ले जुड़े समस्या ल कम करना अउ चालक मन ल फायदा देवाना हे।
भारत टैक्सी के ‘सारथी दीदी‘ पहल के बारे म बतावत श्री शाह ह किहीन कि ए सुविधा होय ले महिला यात्री मन ह अपन यात्रा बर महिला चालक ल चुन सकत हे। श्री शाह ह बतइन कि भारत टैक्सी के सारथी माईलोगिन मन ल बीमा के फायदा अउ आसान ऋण के सुविधा मिलही। ओमन किहीन कि अवइया दिन म ये ऐप म महिला सुरक्षा बर खास उपाय लागू करे जाही।
विजय शर्मा-अपील
माओवादी मनके ओडिसा राज्य कमेटी के पश्चिम सब जोनल ब्यूरो सचिव विकास डहार ले छत्तीसगढ़ के उपमुख्यमंत्री अउ गृहमंत्री विजय शर्मा के नांव एक ठन चिट्ठी म आत्मसमर्पण करके समाज के मुख्यधारा म लहुटे के इच्छा जाहिर करे गेहे। ए पत्र के अनुसार बलांगीर, बरगड़ अउ महासमुंद इलाका म सक्रिय करीब पंद्रह झन माओवादी मन दू या तीन मार्च के आत्मसमर्पण करना चाहत हे।
ए पत्र के जुवाब म उपमुख्यमंत्री विजय शर्मा ह माओवादी मन ले अपील करीन हे कि ओमन ह कोनो भी प्रकार के चिंता झन करय अउ संबंधित जिला के पुलिस अधिकारी मनले मिल के आत्मसमर्पण करय। सरकार उंखर सुवागत करही अउ उंखर पुनर्वास बर सबो संभव उपाय करे जाही।
उपमुख्यमंत्री श्री शर्मा के माओवादी मनके नांव संपूर्ण अपील के प्रसारण घलो आकाशवाणी डहार ले करे जाही। ए प्रसारण आकाशवाणी के छत्तीसगढ़ के आने-आने केंद्र डहार ले पच्चीस फरवरी तक बिहनिया नौ बजके बीस मिनट ले अउ संझा पांच बजके तीन मिनट ले करे जाही।
जवान-घायल
बीजापुर जिला म आज आईईडी विस्फोट के चपेट म आय ले सुरक्षा बल के एक झन जवान ह घायल हो गेहे। मिले जानकारी के अनुसार जिला के दक्षिण क्षेत्र के गलगम के जंगल म सुरक्षा बल के संयुक्त टीम ह सर्चिंग अभियान म निकले रिहीस। ए दउरान माओवादी मन डहार ले लगाय गे आईईडी म बिस्फोट होय ले एसटीएफ के जवान घायल होगे जेला प्राथमिक उपचार के बाद इलाज बर रईपुर लाय जावत हे।
अउ अब पेस हे मौसम के हाल…
दक्षिण बंगाल के खाड़ी म एक ठन निम्नदाब के क्षेत्र बने हे। एखरे संग उपरी हवा के चक्रीय-चक्रवाती घेरा घलो बने हे। अवइया चौबीस घंटा म एखर सरलग उत्तर-पूर्व दिसा म आगु बाढ़त कमजोर होय के संभावना हे। उहें, एक ठन द्रोणिका गंगेटिक पश्चिम बंगाल ले ओडिसा होवत उत्तर तटीय आंध्रप्रदेस तक बने हे। एखर प्रभाव ले अवइया चौबीस घंटा म मध्य अउ दक्षिण छत्तीसगढ़ के एक-दू जघा म हल्का बरसा होय के या गरज-चमक के संग छींटा पड़े के संभावना हे। उहें, मौसम विभाग ह कुछेक जघा म गाज गिरे के आसंका घलो जताय हे।