प्रधानमंत्री नरेंद्र मोदी ह किहीन हे कि इंडिया एआई इम्पैक्ट समिट अवइया बेरा म विश्व स्तर म एआई के पावर के दिसा म बड़का पड़ाव साबित होही। आकाशवाणी ले प्रसारित ‘मन की बात‘ कारीकरम म प्रधानमंत्री ह बतइन कि समिट बर नई दिल्ली म कतकोन देस के नेता, उद्योगपति, नवप्रवर्तक अउ स्टार्टअप क्षेत्र ले जुड़े लोगन मन एके जघा सकलाइन।
ए दउरान भारत ह तीन ठिन मेड इन इंडिया एआई मॉडल घलो लॉन्च करीन। श्री मोदी ह किहीन कि ओमन इंडिया एआई प्रदर्सनी म विश्व के नेता मन ल कतकोन जिनिस देखाइन। प्रधानमंत्री ह समिट के सफलता बर देस के लोगन मन ल बधाई दे हवय। ओमन किहीन कि देस म अंगदान के प्रति लोगन मन म जागरूकता बाढ़त हे। प्रधानमंत्री ह किहीन कि भारत म ऑर्गन डोनेसन ल लेके जागरूकता घलो सरलग बाढ़त हे। संगेसंग देस म मेडिकल रिसर्च ल घलो बल मिलत हे।
प्रधानमंत्री ह किहीन कि ‘मन की बात‘ म डिजीटल अरेस्ट अउ डिजीटल धोखाधड़ी उपर उंखर भाषण के बाद समाज म ए दिसा म जागरूकता आय हे।
ओमन किहीन कि भारत म किसान मन अब सिरिफ उत्पादन तक सीमित नइ हे, भलुक गुणवत्ता, मूल्यवर्धन, अउ नवा बाजार उपर घलो धियान देवत हे।
श्री मोदी ह बतइन कि राष्ट्रपति भवन म काली ले राजगोपालाचारी उत्सव मनाय जाही। एक मार्च तक चलइया ए उत्सव के दउरान राष्ट्रपति भवन के केंद्रीय प्रांगन म स्वतंत्र भारत के पहिली गर्वनर जनरल, सी.राजगोपालाचारी के मूर्ति के अनावरण होही।
मन की बात म प्रधानमंत्री ह परीक्षा देवइया छात्र मन ल तनाव ले हट के आत्मविस्वास के संग परीक्षा दे के बात किहीन।
श्री मोदी ह रमजान अउ अवइया होली तिहार के मउका म देस के लोगन मन ल सुभकामना देवत ओमन ‘वोकल फॉर लोकल‘ के मंत्र ल घलो दोहराइन।
मन की बात-मुख्यमंत्री
मुख्यमंत्री विष्णुदेव साय ह आज रईपुर स्थित अपन निवास म जनप्रतिनिधि अउ गणमान्य लोगन मन के संग प्रधानमंत्री नरेंद्र मोदी के मन की बात कारीकरम ल सुनिन। ए मउका म ओमन किहीन कि ‘मन की बात‘ के हरेक एपिसोड आत्मनिर्भर भारत, तकनीकी सशक्तिकरण अउ सामाजिक जागरूकता के दिसा म देस के आगू बाढ़त कदम एखर उदाहरण हरय। ए कारीकरम ह लोगन मन ल राष्ट्र निर्माण म बड़का भागीदारी बर आगु लाथे। मुख्यमंत्री ह किहीन कि ए कारीकरम के माध्यम ले देस के कतकोन राज्य मन म छुपे प्रतिभा ल जाने अउ पहिचाने के मउका मिलथे।
हिदायतुल्ला विधि विश्वविद्यालय-दीक्षांत समारोह
हिदायतुल्ला राष्ट्रीय विधि विश्वविद्यालय के नौवां दीक्षांत समारोह आज रईपुर म होइस। समारोह म मुख्यअतिथि के रूप म उच्चतम न्यायालय के मुख्य न्यायाधीश सूर्यकांत सामिल होइन। ए दउरान छै झिन विद्या.र्थी मन ल पीएचडी, अठ्यासी झिन छात्र मन ल एलएलएम अउ एक सौ अड़तालीस छात्र मन ल बीए एलएलबी ऑनर्स स्नातक के उपाधि दे गीस। समारोह म सैक्षणिक उत्कृष्टता बर दस झिन स्नातक अउ तीन स्नातकोत्तर छात्र मन ल छत्तीस ठिन स्वर्णपदक दे गीस।
समारोह ल संबोधित करत मुख्य न्यायाधीश ह किहीन कि कानूनी पेसा म लंबा अउ सफल तारीख खेले बर सहयोग अउ धैर्य दू ठिन बड़का स्तंभ हरय। ओमन किहीन कि कानून के क्षेत्र कोनो छोटे दउड़ नइ हरय, भलुक एक ठिन लंबा दूरी के खेल हरय। ओमन किहीन कि ए पेसा म पहिचान रातोंरात नइ मिलय, भलुक मेहनत अउ इमानदारी ले मिलथे।
कारीकरम म सर्वोच्च न्यायालय के न्यायधीश पी.एस.नरसिन्हा, प्रशांत कुमार मिश्रा, छत्तीसगढ़ उच्च न्यायालय के मुख्य न्यायाधीश रमेश सिन्हा के संगेसंग राज्य के जनजातीय मंत्री रामविचार नेताम अउ विधि मंत्री गजेन्द्र यादव आय रिहीन। एखर पहिली, मुख्य न्यायाधीश सूर्यकांत ह हिदायतुल्ला राष्ट्रीय विधि विश्वविद्यालय के परिसर म पचास करोड़ रूपिया के लागत ले बने सभागार परिसर के आधारसिला राखिन। ए मउका म विश्वविद्यालय के कुलपति प्रोफेसर वीसी विवेकानंदन, रजिस्ट्रार डॉक्टर दीपक के श्रीवास्तव अउ छत्तीसगढ़ उच्च न्यायालय के न्यायाधीश सामिल होइन।
मुख्य न्यायाधीश-डिजीटल संग्रहालय
सुप्रीम कोर्ट के मुख्य न्यायाधीश न्यायमूर्ति सूर्यकांत ह आज नवा रईपुर के आदिमजाति अनुसंधान अउ प्रसिक्षण संस्थान म बने देस के पहिली डिजीटल संग्रहालय ल देखिन। ओमन ए संग्रहालय के प्रसंसा करत किहीन कि देस के हर नागरिक ल जनजातीय इतिहास अउ संस्कृति के बारे म जानना चाही।
चीप जस्टिस ह छत्तीसगढ़ के जनजातीय स्वतंत्रता संग्राम सेनानी मनके आंदोलन अउ सौर्य गाथा मन उपर संग्रहालय म बने गैलरी ल देखिन।
विधानसभा अध्यक्ष-प्रेसवार्ता
छत्तीसगढ़ विधानसभा के बजट सत्र काली तेईस फरवरी ले सुरू होही। बीस मार्च तक चलइया सत्र म कुल पंद्रह बइठका होही। सत्र के सुरूआत राज्यपाल रमेन डेका के अभिभाषण ले होही। उहें, चौबीस फरवरी के वित्त मंत्री ओ.पी.चौधरी ह बछर दू हजार छब्बीस-सत्ताईस बर बजट पेस करही।
विधानसभा अध्यक्ष डॉक्टर रमन सिंह ह रईपुर म पत्रकार मनले गोठबात करत बतइन कि राज्यपाल के अभिभाषण के कृतज्ञता ज्ञापन प्रस्ताव उपर पच्चीस फरवरी के चर्चा सुरू होही। राज्यपाल के अभिभाषण अउ वित्त मंत्री के बजट भाषण के सोज्झे प्रसारण दूरदर्शन अउ आकाशवाणी केंद्र रईपुर डहार ले करे जाही।
विधानसभा अध्यक्ष ह बतइन कि नौ ले सत्रह मार्च तक सदन म विभागवार अनुदान मांग उपर चर्चा होही। सत्र के दउरान तीन जरूरी विधेयक पेस करे जाय के सूचना मिले हे। एमा छत्तीसगढ़ धर्म स्वातंत्र्य विधेयक, छत्तीसगढ़ लोक सुरक्षा प्रवर्तन विधेयक अउ छत्तीसगढ़ अग्निशमन के संगेसंग आपातकालीन सेवा विधेयक सामिल हे। विधानसभा अध्यक्ष ह बतइन कि आय-व्यय के मांग ले जुड़े विनियोग विधेयक उपर अट्ठारा मार्च के चर्चा होही।
इही बीच, आज रईपुर म प्रदेस कांग्रेस कार्यालय म बजट सत्र ल लेके कांग्रेस विधायक दल के बइठका चलत हे। बइठका म नेता प्रतिपक्ष डॉक्टर चरणदास महंत, पूर्व मुख्यमंत्री भूपेश बघेल अउ प्रदेस कांग्रेस अध्यक्ष दीपक बैज के संगेसंग आने बड़का नेता मन सामिल हवय।
लखेश्वर बघेल-उप नेता प्रतिपक्ष
अखिल भारतीय कांग्रेस कमेटी ह बस्तर के कांग्रेस विधायक लखेश्वर बघेल ल विधानसभा म उपनेता प्रतिपक्ष नियुक्त करे हे। त उहें, डोंगरगांव विधायक दलेश्वर साहू ल मुख्य सचेतक अउ मस्तुरी विधायक दिलीप लहरिया ल उप सचेतक नियुक्त करे गेहे। कांग्रेस अध्यक्ष मल्लिकार्जुन खड़गे के सहमति के बाद ए नियुक्ति करे गीस।
माओवादी मनके बड़का नेता देवजी अउ मल्ला राजिरेड्डी ह अपन करीबन पंद्रह झिन संगवारी के संग तेलंगाना पुलिस के आगु आत्मसमर्पण करीन। माओवादी देवजी ह छत्तीसगढ़ के संगेसंग तेलंगाना, महाराष्ट्र अउ मध्य प्रदेस राज्य म मोस्टवांटेड रिहीस। सरकार ह एखर उपर करीबन डेढ़ करोड़ रूपिया के इनाम घोसित करे रिहीन। देवजी नक्सल संगठन के सेंट्रल कमेटी के सेक्रेटरी रिहीस।
मुख्यमंत्री विष्णुदेव साय ह देवजी के संगेसंग आने माओवादी मनके आत्मसमर्पण ल नक्सल विरोधी अभियान के बड़का सफलता बताय हे। ओमन किहीन कि प्रधानमंत्री अउ केंद्रीय मंत्री अमित शाह के नक्सलमुक्त भारत के संकलप जरूर पूरा होही। त उहें, उपमुख्यमंत्री अउ गृहमंत्री विजय शर्मा ह किहीन कि ए माओवादी मनके समर्पण सशस्त्र माओवाद ल खतम करे दिसा म एक ठिन बड़का कदम हरय।
अउ अब पेस हे मौसम के हाल…
प्रदेस के एक-दू जघा म काली हल्का बरसा होय के संभावना बताय गेहे। बरसा के परमुख क्षेत्र बस्तर संभाग के जिला रइही। मौसम विभाग के मुताबिक न्यूनतम तापमान म हल्का बढ़ोत्तरी होय के संग कोनो बिसेस परिवर्तन होय के संभावना नइ हे। चौबीस फरवरी ले न्यूनतम तापमान म अवइया दू दिन तक गिरावट रइही।
मौसम विभाग के मुताबिक एक ठिन निम्नदाब के क्षेत्र अउ चक्रीय चक्रवाती घेरा दक्षिण-पश्चिम बंगाल के खाड़ी के उपर स्थित हे। उहें, एक ठिन द्रोणिका दक्षिण मध्य महाराष्ट्र तक बने हे। एखरे असर ले काली बस्तर संभाग के कोनो-कोनो जिला म हल्का बरसा हो सकथे।