मुख्य निर्वाचन पदाधिकारी कार्यालय डहार ले जारी विज्ञप्ति के अनुसार प्रारूप सूची ले पहिली प्रदेस म मतदाता मनके संख्या दू करोड़ बारह लाख तीस हजार सात सौ सैंतीस रिहीस। एसआईआर के प्रक्रिया के बाद प्रदेस म चौबीस लाख निन्यानवे हजार आठ सौ तेईस मतदाता कम हो गेहे। मतदाता सूची के प्रारूप के प्रकासन के बाद मतदाता मनके संख्या एक करोड़ चौरासी लाख पंचानवे हजार नौ सौ बीस रिहीस। एखर बाद प्राप्त दावा-आपत्ति मनके निराकरण चौदह फरवरी तक करे गीस। मतदाता सूची के अंतिम प्रकासन म प्रारूप सूची के मुकाबला मतदाता मनके संख्या म दू लाख चौंतीस हजार नौ सौ चौरानवे के वृध्दि होय हे। छत्तीसगढ़ म विशेष गहन पुनरीक्षण कारीकरम के दउरान मतदाता मनले प्राप्त उंखर नवीनतम फोटोग्राफ घलो अंतिम मतदाता सूची म प्रकासित कर दे गेहे। प्रदेस म सबले जादा तेरह लाख तिरानवे हजार नौ सौ सड़सठ मतदाता रईपुर म हे। उहें, सबले कम मतदाता सुकमा जिला म एक लाख चौव्वन हजार पांच सौ उनतालीस हे।
राज्य के मुख्य निर्वाचन पदाधिकारी यशवंत कुमार ह बतइन कि एसआईआर के प्रक्रिया के दउरान सत्ताईस हजार ले जादा बीएलओ मन घर-घर जाके गणना प्रपत्र बांटिन अउ मतदाता मनके मिलान अउ मैपिंग के काम घलो सफलता पूर्वक करीन। एसआईआर प्रक्रिया म अड़तीस हजार ले जादा बूथलेवल एजेंट अउ स्वयंसेवक मन के घलो सक्रिय भागीदारी रिहीस
अंतिम प्रकासित मतदाता सूची ल मुख्य निर्वाचन पदाधिकारी कार्यालय के आाधिकारिक वेबसाइट के संगेसंग वोटर पोर्टल म घलो देखे जा सकत हे। मुख्य निर्वाचन पदाधिकारी ह बइतन कि अगर कोनो मतदाता के नाम अंतिम प्रकासित मतदाता सूची म सामिल नइ हे, त ओहा अपन नाम दर्ज कराय बर फार्म छै भरके ओखर संग घोसना पत्र अउ जरूरी सहायक दस्तावेज संलग्न कर ऑनलाइन या ऑफलाइन माध्यम ले अपन आवेदन कर सकत हे। उहें, अगर ए सूची म उपलब्ध जानकारी म कोनो गलती हे त मतदाता फार्म आठ भरके ऑनलाइन या ऑफलाइन सुधार बर आवेदन कर सकत हे।
विस अध्यक्ष-प्रेसवार्ता
छत्तीसगढ़ विधानसभा के बजट सत्र तेईस फरवरी ले सुरू होही। बीस मार्च तक चलइया ए सत्र के दउरान कुल पंद्रह बइठका होही। सत्र के सुरूआत राज्यपाल रमेन डेका के अभिभाषण ले होही। उहें, चौबीस फरवरी के वित्त मंत्री ओ.पी. चौधरी बछर दू हजार छब्बीस-सत्ताईस बर बजट पेस करही।
विधानसभा अध्यक्ष डॉक्टर रमन सिंह ह आज रईपुर म पत्रकार मन ल बतइन कि राज्यपाल के अभिभाषण के कृतज्ञता ज्ञापन प्रस्ताव उपर पच्चीस फरवरी ले चर्चा सुरू होही। राज्यपाल के अभिभाषण अउ वित्त मंत्री के बजट भाषण के सीधा प्रसारण दूरदर्शन अउ आकाशवाणी केंद्र, रईपुर डहार करे जाही।
विधानसभा अध्यक्ष ह बतइन कि नौ ले सत्रह मार्च तक सदन म विभागवार अनुदान मांग उपर चर्चा होही। ओमन बतइन कि सत्र के दउरान तीन महत्वपूर्ण विधेयक पेस करे जाय के सूचना प्राप्त होय हे। एमा छत्तीसगढ़ धर्म स्वातंत्र्य विधेयक, छत्तीसगढ़ लोक सुरक्षा प्रवर्तन विधेयक अउ छत्तीसगढ़ अग्निशमन अउ आपातकालीन सेवा विधेयक सामिल हे। डॉक्टर सिंह ह बतइन कि आय व्यय के मांग ले संबंधित विनियोग विधेयक उपर अट्ठारा मार्च के चर्चा होही।
रमन सिंह-कवासी लखमा
कांग्रेस विधायक कवासी लखमा ल राज्य विधानसभा के बजट सत्र म सामिल होय के सशर्त अनुमति दे दे गेहे। बतादन कि सराब घोटाला मामला म आरोपी श्री लखमा ल सुप्रीम कोर्ट ले अंतिम जमानत मिले हे।
विधानसभा अध्यक्ष डॉक्टर रमन सिंह ह बतइन कि कवासी लखमा ल विधानसभा के कार्रवाई म सामिल होय के अनुमति कुछ सर्त के आधार म दे गेहे। ओमन अपन खिलाफ चलत मामला ल लेके विधानसभा म कोई वक्तव्य नइ दे सकय। हालांकि ओमन दूसर बिसय म सदन म चर्चा कर सकत हे। ओमन प्रेस कान्फ्रेंस घलो ले सकत हे।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी के ‘मन की बात‘ कारीकरम म देस अउ विदेस के लोगन मन ले अपन बिचार साझा करही। ए मासिक रेडियो कारीकरम के एक सौ इकतीसवां कड़ी होही। कारीकरम के प्रसारण आकाशवाणी अउ दूरदर्शन के सबो नेटवर्क आकाशवाणी समाचार वेबसाइट अउ न्यूज ऑन एआईआर मोबाइल ऐप म करे जाही। एखर सीधा प्रसारण एआईआर न्यूज, डीडी न्यूज, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल मन म घलो करे जाही। आकाशवाणी हिंदी के प्रसारण के तुरते बाद क्षेत्रीय भाषा मन म घलो कारीकरम के प्रसारण घलो करही।
सीजीपीएससी-प्रारंभिक परीक्षा
छत्तीसगढ़ लोकसेवा आयोग-सीजीपीएससी डहार ले राज्यसेवा के प्रारंभिक परीक्षा काली बाईस फरवरी के प्रदेस के सबो तैंतीस ठन जिला म आयोजित करे जाही। ए परीक्षा दू पाली म होही। पहिली पाली के बेरा बिहनिया दस बजे ले मंझनिया बारह बजे तक निर्धारित करे गेहे। उहें, दूसरइया पाली के परीक्षा मंझनिया तीन बजे ले संझा पांच बजे तक ले जाही। अभ्यर्थी मन अपन प्रवेस पत्र सीजीपीएससी के आधिकारिक वेबसाइट ले डाउनलोड कर सकत हे। ए भर्ती प्रक्रिया के माध्यम ले डिप्टी कलेक्टर, डीएसपी, नायब तहसीलदार जइसे दू सौ उनतालीस पद बर भर्ती करे जाही।
परीक्षा ले पहिली, पीएससी ह अभ्यर्थी मन बर आवश्यक दिसा-निरदेस जारी करे हे। परीक्षा सुरू होय के पंद्रह मिनट पहिली परीक्षा केंद्र के सबो प्रवेसद्वार बंद कर दे जाही। आयोग ह स्पष्ट करे हे कि परीक्षार्थी मन ल मोबाइल फोन या कोई भी इलेक्ट्रानिक डिवाइस परीक्षा केंद्र के भीतर ले जाय के अनुमति नइ राहय।
विधि विश्वविद्यालय-दीक्षांत समारोह
हिदायतुल्ला राष्ट्रीय विधि विश्वविद्यालय के नौवां दीक्षांत समारोह रईपुर म काली बाईस फरवरी के आयोजित करे जाही। सुप्रीम कोर्ट के मुख्य न्यायाधीश न्यायमूर्ति सूर्यकांत दीक्षांत समारोह के मुख्य अतिथि होही। समारोह म मुख्यमंत्री विष्णुदेव साय, सर्वोच्च न्यायालय के न्यायाधीश न्यायमुर्ति पी.एस.नरसिन्हा, प्रशांत कुमार मिश्रा अउ छत्तीसगढ़ उच्च न्यायालय के मुख्य न्यायाधीश रमेश सिन्हा विशिष्ट अतिथि के रूप म उपस्थित रइही।
दीक्षांत समारोह म उत्कृष्ट सैक्षणिक उपलब्धता मन बर छत्तीस स्वर्ण पदक प्रदान करे जाही।
मुख्यमंत्री-रक्तदान शिविर शुभारंभ
छत्तीसगढ़ के मुख्यमंत्री विष्णुदेव साय के आज बासठवां जन्मदिन हरय। ए मउका म मुख्यमंत्री के रईपुर स्थित निवास म रक्तदान शिविर के आयोजन करे गीस, जेमा बांसठ झन मन रक्तदान करीन। मुख्यमंत्री ह ए सिविर के उद्घाटन करत हुए किहीन कि रक्तदान महादान हरय अउ एहा मानवता के सच्चा सेवा आय। ए मउका म श्री साय ह रक्तदान करइया मन ल सम्मानित घलो करीन। ए मउका म सुरक्षित यातायात जागरूकता अभियान के आयोजन घलो करे गीस।
दुर्घटना
प्रदेस म पाछू चौबीस घंटा के दउरान दू आने-आने सड़क हादसा म पांच झन के मउत हो गेहे। मिले जानकारी के अनुसार रईपुर जिला के आरंग म पारागांव करा पाछू रतिहा एक तेज रफ्तार कार अनियंत्रित होके डिवाइडर ले टकरागे। ए हादसा म तीन झन युवक के मउका म ही मउत होगे, फेर एक झन युवक गंभीर रूप ले घायल हो गेहे। आरंग पुलिस के अनुसार सबो युवक मन महासमुंद ले लहुटत रिहीन।
उहें, बिलासपुर जिला के रतनपुर थाना क्षेत्र म घलो पाछू रतिहा दू ठन मोटर-साइकिल मनके बीच होय भिडंत म दू झन युवक मनके मउत होगे। उहें, एक झन युवक घायल हो गेहे, जेन ल बिलासपुर के अस्पताल म भर्ती कराय गेहे।