प्रधानमंत्री नरेंद्र मोदी ह आज नई दिल्ली म सेवा तीर्थ म एआई अउ डीपटेक स्टार्टअप के मुख्य कार्यकारी अधिकारी मन संग एक बइठका करीन। एमा प्रधानमंत्री ह कृषि, पर्यावरण संरक्षण अउ मातृभाषा म उच्च शिक्षा म बढ़ावा दे जइसे आने-आने क्षेत्र म एआई तकनीक के उपयोग के संभावना उपर चर्चा करीन। श्री मोदी ह मजबूत डेटा प्रबंधन के जरूरत उपर बल दीन। ओमन गलत सूचना के प्रति चेताइन अउ देस के जरूरत के अनुरूप समाधान विकसित करे के विनती करीन। प्रधानमंत्री ह यूपीआई ल सरल अउ विस्तार योग्य डिजीटल नवाचार के एक मॉडल बतात भारतीय कंपनी म विस्वास जतइन अउ घरेलू उत्पाद म भरोसा करे बर ओमन ल प्रोत्साहित करीन।
इंडिया एआई समिट
भारत अउ अमेरिका ह आज नई दिल्ली म इंडिया एआई इम्पैक्ट समिट म पैक्स सिलिका घोषणा-पत्र म हस्ताक्षर करीन। ए घोषणा पत्र महत्वपूर्ण खनिज अउ सेमीकंडक्टर के उत्पादन अउ तेजी ले विकसित होवत आर्टिफिसियल इंटेलिजेंस के क्षेत्र म सहयोग ल मजबूत करही।
ए मउका म केंद्रीय इलेक्ट्रानिक्स अउ सूचना प्रौद्योगिकी मंत्री अश्विनी वैष्णव ह किहीन कि भारत के लक्ष्य सेमी कंडक्टर अउ इलेक्ट्रानिक्स उद्योग म अग्रणी भूमिका निभाना हे। श्री वैष्णव ह किहीन कि भारत के आने-आने राज्य ले छात्र चिप्स डिजाइन करत हे।
श्री वैष्णव ह किहीन कि भारत के पहिली सेमीकंडक्टर संयंत्र जल्दी ही वाणिज्यिक उत्पादन सुरू करही।
जल संरक्षण अभियान-समीक्षा
जल संरक्षण अउ भू-जल संवर्धन बर देसभर म छत्तीसगढ़ के कोरिया जिला म सफल पांच प्रतिसत मॉडल ल लागू करे जाही। ए निरनय मुख्यमंत्री विष्णुदेव साय के अध्यक्षता म केंद्रीय जल शक्ति मंत्री सी.आर.पाटिल के उपस्थिति म आयोजित वीडियो कांन्फ्रेंसिंग के बेरा ले गीस। बइठका म छत्तीसगढ़ के सबो जिला के कलेक्टर मन के संग जल संरक्षण अउ संवर्धन बिसय उपर चर्चा करे गीस, जेमा कोरिया जिला के नवाचार ल राष्ट्रीय स्तर म अपनाय के सहमति बनिस। केंद्रीय मंत्री सी.आर.पाटिल ह ए उदिम के सराहना करत हुए किहीन कि देसभर म जल संकट के बीच कोरिया के ए नवाचार पूरा देसबर एक प्रेरणादायक उदाहरण हे।
गौरतलब हे कि कोरिया जिला म जल संरक्षण उपर आधारित आवापानी झोंकी अभियान के सुरूआत करे गेहे।
स्कूल शिक्षा विभाग डहार ले सहायक शिक्षक, शिक्षक, व्याख्याता अउ सहायक शिक्षक विज्ञान-प्रयोगशाला के कुल पांच हजार पद उपर भर्ती के विज्ञापन जल्दी ह जारी करे जाही। शासन ह परीक्षा के आयोजन बर छत्तीसगढ़ व्यावसायिक परीक्षा मंडल ल अधिकृत करे हे। स्कूल शिक्षा विभाग ह विज्ञापन जारी करे संबंधी सबो प्रक्रिया ल पूरा करके जरूरी प्रपत्र व्यापमं ल उपलब्ध करा देहे।
छत्तीसगढ़ माध्यमिक शिक्षा मंडल के बारहवीं बोर्ड के परीक्षा आज ले सुरू हो गेहे। उहें, दसवीं के परीक्षा काली इक्कीस फरवरी ले आयोजित करे जाही। ए दूनों परीक्षा म प्रदेस के करीबन छै लाख विद्यार्थी हिस्सा लेवत हे।
इही बीच, स्कूल शिक्षा मंत्री गजेन्द्र यादव आज बिहनिया परीक्षा व्यवस्था के जायजा लेबर दुरूग स्थित आदर्श कन्या शासकीय स्कूल पहुंचिन। ए दउरान ओमन परीक्षा केंद्र के निरीक्षण करके अधिकारी मन ल जरूरी दिसा-निरदेस दीन। ओमन जम्मो विद्यार्थी मन ल बोर्ड परीक्षा के सुभकामना देत बिना तनाव के परीक्षा देके अपील करीन।
क्षेत्रीय-सम्मेलन
छत्तीसगढ़ राज्य उपभोक्ता विवाद प्रतितोष आयोग डहार ले काली इक्कीस फरवरी ले रईपुर म क्षेत्रीय सम्मेलन के आयोजन करे जाही। ए सम्मेलन भारत सरकार के उपभोक्ता मामला अउ खाद्य के संघरा सार्वजनिक वितरण मंत्रालय के सहयोग ले आयोजित करे जाही।
राज्य उपभोक्ता विवाद निवारण आयोग के रजिस्ट्रार श्रीनिवास तिवारी ह बतइन कि सम्मेलन म उपभोक्ता मनके अधिकार के संरक्षण उपर चर्चा करे जाही। दू दिन के ए सम्मेलन के दउरान आयोजित कार्यसाला म आठ राज्य के उपभोक्ता विवाद प्रतितोष आयोग के अध्यक्ष अउ दूसर पदाधिकारी सामिल होही। एखर अलावा राष्ट्रीय विधि विश्वविद्यालय के प्रतिनिधि घलो हिस्सा लिही।
विधि विश्वविद्यालय-दीक्षांत समारोह
हिदायतुल्ला राष्ट्रीय विधि विश्वविद्यालय के नौवां दीक्षांत समारोह रईपुर म बाईस फरवरी के आयोजित करे जाही। सुप्रीम कोर्ट के मुख्य न्यायाधीश न्यायमूर्ति सूर्यकांत दीक्षांत समारोह के मुख्य अतिथि होही। समारोह म मुख्यमंत्री विष्णुदेव साय, सर्वोच्च न्यायालय के न्यायाधीश, न्यायमूर्ति पी.एस.नरसिन्हा, प्रशांत कुमार मिश्रा अउ छत्तीसगढ़ उच्च न्यायालय के मुख्य न्यायाधीश रमेश सिन्हा विशिष्ट अतिथि के रूप म मौजूद रइही।
आज रईपुर म आयोजित पत्रकारवार्ता म हिदायतुल्ला राष्ट्रीय विधि विश्वविद्यालय के कुलपति प्रोफेसर वीसी विवेकानंदन अउ कुल सचिव डॉक्टर दीपक कुमार श्रीवास्तव ह बतइन कि ए दीक्षांत समारोह म छै पीएचडी, अठासी एल.एल.एम. अउ एक सौ अड़तालीस बी.ए.एल.एल.बी. ऑनर्स स्नातक मन ल उपाधि दे जाही। दीक्षांत समारोह म दस स्नातक अउ तीन स्नात्कोत्तर विद्यार्थी मन ल सैक्षणिक उपलब्धि बर कुल छत्तीस स्वर्ण पदक प्रदान करे जाही।
सुप्रीम कोर्ट के मुख्य न्यायाधीश न्यायमूर्ति सूर्यकांत हिदायतुल्लाह राष्ट्रीय विधि विश्वविद्यालय के परिसर म पचास करोड़ रूपिया के लागत ले बनने वाला ऑडिटोरियम परिसर के सिलान्यास करही। मुख्य न्यायाधीश डहार ले नव स्थापित रिसर्च हब एंड स्पोक ब्लॉक के घलो उद्घाटन करे जाही।
आवासीय योजना-चयन प्रक्रिया
भारतीय खेल प्राधिकरण-सांई के रईपुर स्थित प्रसिक्षण केंद्र डहार ले आवासीय योजना म प्रवेस बर अवइया तेईस ले पच्चीस फरवरी के दउरान रईपुर स्थित बूढ़ातलाब आउटडोर स्टेडियम म चयन प्रक्रिया राखे जाही। एमा बारह ले अट्ठारा बछर के अइसे खिलाड़ी सामिल हो सकत हे, जेमन अंतरर्राष्ट्रीय अउ राष्ट्रीय चैंपियनशिप म भाग ले होही। संघरा राज्य स्तरीय चैंपियनशिप म पदक पाय होही। आवासीय योजना के तहत बालक-बालिका वर्ग म तीरंदाजी अउ वॉलीबॉल के ट्रायल होही। इच्छुक बालक-बालिका मन ल तेईस फरवरी के बिहनिया आठ बजे सांई प्रसिक्षण केंद्र रईपुर म उपस्थित होना होही।
एनएसयूआई-राष्ट्रीय अध्यक्ष
कांग्रेस ह विनोद जाखड़ ल भारतीय राष्ट्रीय छात्र संगठन-एनएसयूआई के राष्ट्रीय अध्यक्ष नियुक्त करे हे। अखिल भारतीय कांग्रेस कमेटी डहार ले जारी विज्ञप्ति म निवर्तमान अध्यक्ष वरूण चौधरी के योगदान के सराहना करत उंखर कार्यकाल महत्वपूर्ण बतइन। ए आदेस कांग्रेस के महासचिव केसी वेणुगोपाल डहार ले जारी करे गेहे।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों में‘‘ ए बखत पùश्री सम्मान बर छत्तीसगढ़ ले चुने गे डॉक्टर बुधरी ताती ले लेगे भेंटवार्ता के प्रसारण करे जाही। एखर प्रसारण काली इक्कीस फरवरी के आकाशवाणी के रईपुर डहार ले एफ.एम. अउ प्रायमरी चैनल म बिहनिया नौ बजे ले करे जाही। एला छत्तीसगढ़ स्थित आकाशवाणी के जम्मों केंद्र रिले करही।
श्रमिक जन संवाद सम्मेलन
राज्य शासन ह काली बलौदाबाजार जिला म श्रमिक जन संवाद सम्मेलन के आयोजन करीस। कारीकरम म राजस्व मंत्री टंकराम वर्मा मुख्य अतिथि के रूप म सामिल होइन। ए सम्मेलन म श्रमिक मन बर संचालित योजना के बारे म जानकारी दे गीस। कारीकरम म श्रम विभाग के आने-आने योजना के तहत हितग्राही मन ल एक करोड़ चार लाख ले जादा के रासि डीबीटी के माध्यम ले ओमन के खाता म अंतरित करे गीस।