प्रधानमंत्री नरेन्द्र मोदी ह आर्टिफिशियल इंटेलीजेंस-एआई के लोकतंत्रीकरण के उपर जोर देवत किहीन कि एला विशेष रूप ले ग्लोबल साउथ बर सशक्तिकरण के साधन बनना चाही। आज नई दिल्ली के भारत मंडपम म इंडिया एआई इम्पैक्ट समिट के उद्घाटन करत श्री मोदी ह ए बात किहीन।
प्रधानमंत्री ह कहिन कि भारत न सिरिफ नवा तकनीक के विकास करत हे, फेर ओला तेजी ले अपनावत घलोक हे। श्री मोदी ह किहीन कि भारत विश्व के सबले बड़े तकनीकी केन्द्र हे। ओमन किहीन कि ए भारत अउ ग्लोबल साउथ बर गर्व के विषय हे कि नई दिल्ली म एआई इम्पैक्ट समिट के आयोजन करे जावत हे।
प्रधानमंत्री ह कहिन कि आर्टिफिशियल इंटेलीजेंस ले मानव इतिहास म क्रांतिकारी अध्याय जुड़त हे। श्री मोदी ह एआई बर मानव विजन के रूपरेखा प्रस्तुत करीन, जेखर अर्थ हे – नैतिक अउ सैद्धांतिक प्रणाली, जवाबदेह शासन, राष्ट्रीय संप्रभुता, सुलभ अउ समावेशी, वैध अउ न्यायसंगत।
बाल सुरक्षा के महत्व उपर जोर देवत प्रधानमंत्री ह कहिन कि स्कूल के पाठ्यक्रम जइसने ही एआई घलो लइका मन बर सुरक्षित अउ परिवार के मार्गदर्शन म होना चाही।
सम्मेलन म विश्व के नेता मनके स्वागत करत केन्द्रीय इलेक्ट्रॉनिक्स अउ सूचना अउ प्रौद्योगिकी मंत्री अश्वनी वैष्णव ह किहीन कि सरकार ह एआई स्टैक के सबो पांच स्तर म काम करत हे। ओमन बतईन कि सरकार ह एक ठन अइसन कॉमन कंप्यूट प्लेटफॉर्म बनाय हे, जउन ह स्टार्टअप, सोधकर्ता, शैक्षणिक संस्थान अउ विद्यार्थी मन ल किफायती दर म अड़तीस हजार जीपीयू देवाथे। श्री वैष्णव ह कहिन कि एआई ले जुड़े खतरा ल कम करे के रस्ता खोजना होही।
एआई इम्पैक्ट समिट-छत्तीसगढ़
नई दिल्ली के भारत मंडपम म आयोजित इंडिया एआई इम्पैक्ट समिट म रायपुर के युवा अनुराग मानिक अउ आस्था मानिक ल पहला स्थान मिले हे। ओमन ह बिल्डथॉन म चालीस हजार ले जादा प्रतिभागी मनके बीच तीन ठन कठिन चरण ल पार करत ए उपलब्धि हासिल करीन। ए युवा मन डहार ले बनाय गे ऐेप ‘‘कर्तव्य‘‘ ह एआई ले बने आवाज़ अउ असली आवाज के अंतर ल पहिचान के लोगन ल डिजिटल धोखाधड़ी ले बचाय म मदद करही।
ए उपलब्धि म मुख्यमंत्री विष्णुदेव साय ह दूनों युवा मन ल बधाई दीन हे। ओमन किहीन कि परंपरा अउ समृद्धि अउ सांस्कृतिक विरासत ल सहेजत छत्तीसगढ़ के युवा मन ह आधुनिकता के दउड़ म घलो आगू बाढ़त हे। एखर ले प्रदेस म होवत समग्र विकास के पता चलथे।
खबर के मुताबिक इंडिया एआई इम्पैक्ट समिट म छत्तीसगढ़ डहार ले घलो स्टॉल लगाय गेहे। ‘‘छत्तीसगढ़ ड्रिवन बाय इंटेजिलेंस‘‘ थीम म आधारित ए स्टॉल म राज्य के एआई क्षमता, आधुनिक डिजिटल अधोसंरचना अउ निवेश के संभावना ल देखाय गेहे। स्टॉल म डिजिटल प्रस्तुति, सूचना पैनल अउ इंटरैक्टिव माध्यम ले छत्तीसगढ़ ल उभरत टेक्नोलॉजी हब के रूप म प्रस्तुत करे जावत हे। स्टॉल म विशेष रूप ले नवा रईपुर म बनाय गे देस के पहिली एआई डाटा सेंटर पार्क के जानकारी दे गेहे।
एआई समिट-विशेष कार्यक्रम
भारत एआई इम्पैक्ट सम्मेलन म प्रादेशिक समाचार एकांश रायपुर डहार ले तैयार करे गे विशेष कार्यक्रम के प्रसारण आज रतिहा आठ बजे ले आठ बजके दस मिनट तक करे जाही। ए कार्यक्रम ल छत्तीसगढ़ के सबो आकाशवाणी केन्द्र मन ह रिले करही।
मांशिम-बोर्ड परीक्षा
छत्तीसगढ़ माध्यमिक शिक्षा मंडल के बारहवीं बोर्ड के परीक्षा काली बीस फरवरी ले सुरू होही। उहें, दसवीं के परीक्षा इक्कीस फरवरी सनिवार ले सुरू होही। बारहवीं के परीक्षा अट्ठारह मार्च के अउ दसवीं के परीक्षा तेरह मार्च के सिरा जही। दूनों परीक्षा के बेरा बिहनिया नौ बजे ले मंझनियाकुन सवा बारह बजे तक तय करे गेहे।
ऊर्जा विभाग-प्रेसवार्ता
राज्य सरकार ह प्रदेश ल देस के ‘‘ऊर्जा राजधानी‘‘ बनाय बर ऊर्जा उत्पादन क्षमता ल दुगुना करे के अउ ट्रांसमिशन-डिस्ट्रिब्यूशन नेटवर्क ल मजबूत करे बर कार्ययोजना बनाय हे। ए जानकारी ऊर्जा विभाग के सचिव डॉक्टर राहुल यादव ह आज रईपुर म अपन विभाग के पाछु दू बछर के काम के ब्यौरा पेश करत दीन। ओमन किहीन कि राज्य सरकार ह पारंपरिक ऊर्जा म कम निर्भर होवत नवीकरणीय ऊर्जा, स्मार्ट मीटरिंग अउ ग्रिड आधुनिकीकरण म जोर देवत हे।
डॉक्टर यादव ह बतईन कि देश म ऊर्जा के क्षेत्र म छत्तीसगढ़ के रैंकिंग अउ ग्रेडिंग म सुधार होवत हे। ओमन बतईन कि अवइया बछर म बत्तीस हजार ले जादा मेगावॉट के नवा परियोजना बर एमओयू करे गेहे। एमा थर्मल, न्यूक्लियर, सोलर अउ पंप स्टोरेज परियोजना सामिल हे। ‘‘प्रधानमंत्री सूर्य घर योजना‘‘ के जानकारी देवत ओमन बतईन कि प्रदेस म अभी तक एक लाख बत्तीस हजार लोगन ए योजना बर पंजीकरण कराय हे।
ए दउरान ऊर्जा विभाग के सचिव ह छत्तीसगढ़ स्टेट पावर कंपनीज के अवइया तीन बछर के कार्ययोजना के घलो पेस करीन।
बिलासपुर/जांजगीर लूट-आरोपी गिरफ्तार
बिलासपुर म एक झन सराफा कारोबारी उपर हमला करके करीबन तीन करोड़ पैंतीस लाख रूपिया के लूट के मामला म पुलिस ह चार झिन आरोपी मन ल उत्तरप्रदेश ले गिरफ्तार कर लेहे। उहें, एक झिन दूसर आरोपी ल बिलासपुर ले गिरफ्तार करे गेहे। मुखबिर ले मिले सूचना के आधार म आरोपी मनके पीछा करत पुलिस उत्तरप्रदेश पहुंचीस। ए दउरान आरोपी मन ह पुलिस ल देखके भागे बर लगीन। त ओमन ल पकड़े बर उत्तरप्रदेश अउ बिलासपुर पुलिस ह फायरिंग करीन, जेखर ले दू झन आरोपी मनके गोड़ म गोली लगीस अउ ओमन ह घायल होगीन। जेखर बाद पुलिस ह दूनों घायल के संगेच दू झिन आरोपी मन ल घलो गिरफ्तार करीन। ए मामला म पुलिस अभी तक पांच झिन आरोपी मन ल गिरफ्तार कर डरे हवय। खबर के मुताबिक पाछु मंगलवार के रतिहा आरोपी मन ह कारोबारी उपर हमला करके उंखर गाड़ी म सोना अउ नगदी ल लूट के भागे रिहीन।
ओति, जांजगीर-चांपा जिला के राहौद म होय लूट के मामला म पुलिस ह अंतर्राज्यीय गिरोह के दू झन सदस्य ल बिलासपुर ले गिरफ्तार करे हे। उहें, दू झन दूसर आरोपी मन ल फरार बताय जावत हे। बिहार के रहइया ए आरोपी मन ह जांजगीर-चांपा, रायगढ़, कोरबा, अंबिकापुर अउ सारंगढ़ जिला म करीबन नौ लाख तिरासी हजार रूपिया के लूट के घटना ल अंजाम दे रिहीन।
छत्रपति शिवाजी महाराज-जयंती
छत्रपति शिवाजी महाराज के जयंती म राज्यपाल रमेन डेका ह आज रईपुर के तात्यापारा चौक म उंखर प्रतिमा के आगू दिया जलाके ओमन ल नमन करीन। ए मउका म राज्यपाल ह कहिन कि छत्रपति शिवाजी महाराज ह सीमित साधन के बावजूद अदम्य साहस, दूरदृष्टि अउ संगठन क्षमता के बल म एक ठिन मजबूत अउ लोक कल्याणकारी राज्य के स्थापना करीन। उंखर प्रशासनिक ढांचा न्याय, पारदर्सिता अउ उत्तरदायित्व म आधारित रिहीस।
छत्रपति शिवाजी महाराज के जयंती म महाराष्ट्र मंडल के युवा समिति डहार ले आज रईपुर म महाआरती के आयोजन करे गीस।
रमजान-पवित्र महीना
देस के कतकोन जघा म काली संझा चांद दिखे के बाद आज ले रमजान के पवित्र महीना सुरू होगे हे। प्रधानमंत्री नरेन्द्र मोदी ह ए मउका म लोगन मन ल सुभकामना दीन हे। सोशल मीडिया के एक ठिन पोस्ट म श्री मोदी ह आशा जतईन कि ए महीना समाज म एकता के भावना ल अउ जादा मजबूत करही।
अउ अब थोरकुन समाचार सार म –
– छत्तीसगढ़ राज्य वन विकास निगम डहार ले बारनवापारा परियोजना मंडल के अंतर्गत सुकुलबाय गांव म वन अग्नि सुरक्षा अउ जागरूकता कारीकरम के आयोजन करे गीस। ए दउरान लोगन ल जंगल म आग लगे के कारण, ओखर ले होवइया नुकसान अउ बचाव के उपाय के बारे म जानकारी दे गीस।
– एंटी करप्शन ब्यूरो-एसीबी के टीम ह बलौदाबाजार-भाटापारा जिला के जनपद पंचायत पलारी म आरईएस विभाग के एसडीओ ल पच्चीस हजार रूपिया के रिस्वत लेवत रंगेहाथ गिरफ्तार करे हे।
– दुरूग जिला के भिलाई थाना क्षेत्र म सिरसा गेट तीर एक ठन तेज रफ्तार गाड़ी के टक्कर ले दूपहिया म बइठे मां-बेटी के मउत होगे अउ पिता घायल हो गेहे।