केन्द्रीय सूचना अउ प्रसारण मंत्री अश्विनी वैष्णव ह कहिन कि भारत वास्तविक दुनिया के समस्या के समाधान बर एआई उपर दृढ़ता ले ध्यान केन्द्रित करत हे। ओमन ह इंडिया एआई इम्पैक्ट समिट के तीसरइया दिन एक अनुसंधान संगोष्ठी के उद्घाटन समारोह ल संबोधित करत हुए ए बात कहिन।
श्री वैष्णव ह कहिन कि एआई शिखर सम्मेलन आने-आने तकनीकी मामला म विचार-विमर्श करे के एक जरूरी अवसर देवत हे।
एआई इम्पैक्ट समिट-उपमुख्यमंत्री
छत्तीसगढ़ के उपमुख्यमंत्री विजय शर्मा ह काली नई दिल्ली म आयोजित इंडिया एआई इम्पैक्ट समिति म सामिल होइन। राज्य के प्रतिनिधित्व करत हुए श्री शर्मा ह लीडर्स प्लेनरी सत्र म हिस्सा लीन अउ शासन-प्रशासन म आर्टिफिशियल इंटेलिजेंस-एआई के प्रभावी उपयोग म रूचि दिखईन। सम्मेलन के दउरान उपमुख्यमंत्री ह एआई के जरिया ले पारदर्सिता बढ़ाय, तुरते अउ गुणवत्तापूर्ण सेवा वितरण सुनिश्चित करे अउ डेटा-आधारित निर्णय प्रणाली विकसित करे के आने-आने मॉडल के अवलोकन करीन। ओमन ह स्वास्थ्य, शिक्षा, कृषि, आंतरिक सुरक्षा अउ आपदा प्रबंधन जइसे क्षेत्र म एआई के सफल उपयोग के उदाहरण ल घलो देखीन। श्री शर्मा ह अधिकारी मनके संग विचार-विमर्श करत हुए राज्य म एआई आधारित समाधान लागू करे संभावना उपर चर्चा करीन।
सम्मेलन के दउरान उपमुख्यमंत्री ह छत्तीसगढ़ ड्रिवन बाई आर्टिफिशियल इंटेलीजेंस के स्टॉल के घलो अवलोकन करीन।
जनगणना-मुख्यमंत्री
जनगणना-दो हजार सत्ताईस के सफल संचालन बर आज नवा रायपुर म राज्य अउ संभाग स्तरीय अधिकारी मनके प्रसिक्षण सम्मेलन आयोजित करे गीस। सम्मेलन ल संबोधित करत हुए मुख्यमंत्री विष्णुदेव साय ह किहीन कि जनगणना केवल जनसंख्या के गणना नइ हे, बल्कि राष्ट्र निर्माण के आधारशिला हे। ओमन ह प्रदेस के सबो संभाग के आयुक्त, कलेक्टर अउ प्रशासनिक अधिकारी मन ले ए राष्ट्रीय दायित्व ल पूरा गंभीरता, सटीकता अउ संवेदनशीलता के संग निभाय के आह्वान करीन। मुख्यमंत्री ह कहिन कि बछर दू हजार सत्ताईस के जनगणना स्वतंत्रता के बाद आठवीं अउ भारत के पहिली पूरा तरीका ले डिजिटल जनगणना होही। ओमन ह बतईन कि मोबाइल ऐप अउ वेबपोर्टल के जरिया ले डेटा संकलन करे जाही। छत्तीसगढ़ के सबो तैंतीस जिला मन म पहिली चरण के तहत मकान सूचीकरण अउ मकान के गणना के काम एक ले तीस मई तक संचालित करे जाही।
संशोधित गाइडलाइन दर
केन्द्रीय मूल्यांकन बोर्ड ह प्रदेस के ग्यारह जिला के संशोधित गाइडलाइन दर के अनुमोदन कर देहे। एमा राजनांदगांव, बस्तर, कबीरधाम, जशपुर, मुंगेली, कांकेर, कोंडागांव, गौरेला-पेण्ड्रा-मरवाही, खैरागढ़-छुईखदान-गंडई, मोहला-मानपुर-अंबागढ़ चौकी अउ मनेन्द्रगढ़-चिरमिरी-भरतपुर जिला सामिल हे। ए जिला म आज ले गाइडलाइन दर लागू होगे हे। एखर ले भूमि अउ संपत्ति पंजीयन प्रक्रिया म पारदर्सिता आही। संगेसंग वास्तविक बाजार मूल्य के अनुरूप मूल्यांकन म लोगन मन ल सुविधा होही। आम मनखे अउ एखर ले जुड़े हितधारक नवा गाइडलाइन दर के जानकारी संबंधित जिला पंजीयन कार्यालय अउ विभाग के आधिकारिक वेबसाइट ले पा सकत हे। आने जिला मनके संशोधित गाइडलाइन दर घलो जिला मूल्यांकन समिति मन ले प्रस्ताव मिले के बाद तुरते जारी करे जाही।
जानबा के मुताबिक प्रदेस म पाछु बछर बीस नवंबर ले लागू नवा गाइडलाइन दर के संबंध म राज्य सासन डहार ले जिला मूल्यांकन समिति ल जरूरत के अनुसार दुबारा देखे अउ प्रस्ताव ल केन्द्रीय मूल्यांकन बोर्ड भेजे के निरदेस दे गे रिहीस।
ग्राम पंचायत-महतारी सदन
प्रदेस के ग्राम पंचायत अब महतारी सदन बनाही। एखर बर ग्राम पंचायत के चयन क्रियान्वयन एजेंसी के रूप म करे गेहे। ए संबंध म पंचायत विभाग डहार ले मार्गदर्सिका घलो जारी कर दे गेहे। ग्राम पंचायत ल कार्य एजेंसी बनाय जाय ले महतारी सदन के बनाय के काम म तेजी आही। महतारी सदन बर प्रशासकीय स्वीकृति जिला पंचायत के मुख्य कार्यपालन अधिकारी डहार ले दे जाही अउ तकनीकी मार्गदर्शन ग्रामीण यांत्रिकी सेवा डहार ले प्रदान करे जाही। महतारी सदन के बने ले ग्राम पंचायत सशक्त होही अउ गांव म माईलोगिन मनके आर्थिक अउ सामाजिक गतिविधि म सुधार होही। ए सदन महिला मनके बइठका, प्रशिक्षण, स्व-सहायता समूह के गतिविधि अउ आजीविका संवर्धन के केन्द्र बनही।
जानबा के मुताबिक प्रदेस म तीन सौ अड़सठ महतारी सदन बनाय बर सौ करोड़ रूपिया के रासि स्वीकृत करे गेहे। वर्तमान म एक सौ सैंतीस महतारी सदन के बनाय के काम पूरा हो चुके हे।
एसडीएम-निलंबित
राज्य सरकार ह कुसमी के एसडीएम करूण डहरिया ल निलंबित कर देहे। ए कार्रवाई बलरामपुर-रामानुजगंज जिला के हंसपुर गांव म दू दिन पहिली अवैध खनन के जांच के दउरान एक किसान के मउत के मामला म करे गेहे। निलंबन के अवधि के दउरान ओखर मुख्यालय अंबिकापुर स्थित आयुक्त कार्यालय म निर्धारित करे गेहे। एखर पहिली पुलिस ह एसडीएम ल गिरफ्तार करके जेल भेज दे रिहीस।
आरोप हे कि अवैध उत्खनन म कार्रवाई के दउरान एसडीएम अउ बाकी आरोपी मन ह ग्रामीण मन संग मारपीट करे रिहीन। ए दउरान एक सियान के चोट लगे ले मउत होगे रिहीस अउ दू आने युवक घायल होय हे।
डिजिटल किसान किताब
राजस्व मंत्री टंकराम वर्मा ह रायपुर म डिजिटल किसान किताब के सुभारंभ करीन। ए किताब अब पारंपरिक मैन्युअल किसान किताब के जगह लीहीं। एखर जरिया ले किसान अपन भूमि संबंधी जानकारी ऑनलाइन पा सकही। ए सुविधा भूईंया पोर्टल म उपलब्ध रइही, जेला किसान आसानी ले डाउनलोड कर सकही। डिजिटल प्रणाली म जरूरी विवरण खुदे अपडेट होवत रइही। जेखर ले जानकारी संशोधन बर किसान ल कार्यालय के चक्कर लगाय के जरूरत नइ पड़ही। संगेसंग संबंधित पटवारी डहार ले डिजिटल हस्ताक्षर होय प्रमाणित प्रति उपलब्ध होय ले दस्तावेज के वैधता अउ पारदर्सिता घलो सुनिश्चित होही।
ए बेरा म राजस्व मंत्री ह कहिन कि डिजिटल ऋण पुस्तिका केवल एक तकनीकी नवाचार नहीं हे, फेर राजस्व व्यवस्था ल पारदर्सी, सशक्त अउ नागरिक-केन्द्रित बनाय के दिसा म ठोस कदम हे।
सतनाम सद्भाव पदयात्रा
मुख्यमंत्री विष्णुदेव साय ह आज रायपुर के मोवा स्थित सतनाम भवन परिसर ले ‘‘सतनाम सद्भाव पदयात्रा‘‘ के सुभारंभ करीन। ए बेरा म ओमन ह पदयात्रा ल हरा झंडी देखाके गिरौदपुरी धाम बर रवाना करीन। मुख्यमंत्री ह पदयात्रा म सामिल समाज के लोगन मन ले गोठबात करत किहीन कि बाबा गुरू घासीदास के ‘‘मनखे-मनखे एक समान‘‘ के संदेस पूरा मानव समाज बर प्रेरणा दायक हे। ओमन विश्वास जतईन कि ए पदयात्रा समाज म सद्भावना, समरसता अउ भाईचारा ल अउ मजबूत करही।
जानबा के मुताबिक रायपुर ले अट्ठारह फरवरी के निकले ए पदयात्रा बाईस फरवरी के गिरौदपुरी धाम पहुंचही। ए दउरान गिरौदपुरी धाम म सामाजिक, सांस्कृतिक अउ धार्मिक कार्यक्रम आयोजित करे जाही।
सूरजपुर-घटना
सूरजपुर जिला के चंद्रपुर गांव म एके परिवार के तीन लोगन मनके दम घुटे ले मउत होगे हे। ए घटना म तीन साल के लइका घलो सामिल हे। बताय जात हे कि पाछु रतिहा ठंड ले बचे बर ए परिवार ह बंद कमरा म कोयला के सिगड़ी जलाय रिहीस। बिहनिया जब कमरा के दरवाजा नइ खुलीस, तब घर के लोगन मन ह दरवाजा तोड़के ओमन ल उठाय के कोसिस करीन। फेर तब तक उंखर मउत होगे रिहीस। मामला के जानकारी मिलत मउका म पहुंचे कोतवाली पुलिस ह जांच सुरू कर देहे।