केन्द्रीय कृषि मंत्री शिवराज सिंह चौहान ह आज जयपुर ले किसान मन बर डिजिटल सहयोगी ‘‘भारत विस्तार‘‘ के सुभारंभ करीन। ए पहल के उद्देश्य किसान मन ल सशक्त अउ सूचना समृद्ध बनाना हे। एखर माध्यम ले किसान अपन मोबाइल फोन ले एके कॉल म जम्मों जानकारी ले सकही। ए मउका म केन्द्रीय कृषि मंत्री ह एला कृषि क्षेत्र म डिजिटल क्रांति के दिसा म एक ऐतिहासिक कदम बतईन। ओमन किहीन कि एखर ले किसान मन ल फसल आधारित वैज्ञानिक सलाह, मंडी मूल्य अउ मौसम संबंधी जानकारी मिलही। श्री चौहान ह किहीन कि सरकार के लक्ष्य फसल के उत्पादन ल बढ़ाना हे।
सरगुजा विकास प्राधिकरण बैठक
मुख्यमंत्री विष्णुदेव साय के अगुवई म आज कोरिया जिला के बैकुंठपुर म सरगुजा क्षेत्र आदिवासी विकास प्राधिकरण के बइठका राखे गीस। बइठका म सरगुजा संभाग के जिला म चलाय जात विकास काम के समीक्षा करे गीस। उहें, जनप्रतिनिधि मनके सुझाव म नवा योजना ल मंजूरी दे गीस।
ए मउका म मुख्यमंत्री ह किहीन कि राज्य सरकार ह सरगुजा अउ बस्तर क्षेत्र के विकास ल प्राथमिकता म राखे हे। प्राधिकरण ले पिछड़े अउ वनांचल क्षेत्र ल मुख्यधारा ले जोड़े के परयास करे जात हे। बइठका म चालू वित्तीय बछर म प्राधिकरण खातिर पचास करोड़ रूपिया के बजट प्रावधान ल मंजूरी दे गीस। उहें, क्षेत्रीय जनप्रतिनिधि कोति ले प्रस्तुत प्रस्ताव के आधार म पांच सौ तिरालीस विकास काम बर वित्तीय मंजूरी दे गीस। संगेसंग बछर दू हजार चौबीस-पच्चीस म मंजूर छह सौ छह काम के अनुमोदन करे गीस। मुख्यमंत्री ह सबो मंजूर करे गे काम ल तय बेरा म मार्च महीना तक पूरा करे के निरदेस दीन हे।
बिरनपुर-दोषमुक्त
बेमेतरा जिला के बिरनपुर म करीबन तीन बछर पहिली एक समुदाय के दू झन मनखे के हत्या के मामला म गिरफ्तार सबो सत्रह आरोपी मन ल आज जिला अउ सत्र न्यायालय ह दोषमुक्त करार दे देहे। बेमेतरा न्यायालय ह ए फइसला साक्ष्य के अभाव म सुनाय हे।
खबर के मुताबिक अप्रैल दू हजार तेईस म कुछेक संगठन कोति ले छत्तीसगढ़ बंद के आह्वान करे गे रिहीस। ए दउरान बेमेतरा जिला के कोरवाय गांव के तीर खेत बकरी चराय बर गे पिता-पुत्र के सव बरामद करे गे रिहीस। ए दोहरा हत्याकांड के आरोप म पुलिस ह सत्रह झिन ल गिरफ्तार करे रिहीस।
जिला अउ सत्र न्यायालय ह आज ए मामला म सुनवाई पूरा करत सबो सत्रह आरोपी मन ल दोषमुक्त करार देहे।
माओवादी-आत्मसमर्पण
सुकमा जिला म आज एक महिला समेत बाईस झिन माओवादी मन ह पुलिस के आगू आत्मसमर्पण करीन हे। जिला के अतिरिक्त पुलिस अधीक्षक नक्सल ऑपरेशन रोहित शाह ह बतईन कि आत्मसमर्पण करइया ए सबो माओवादी जगरगुंडा, पेद्दाबोडकेल अउ मोरपल्ली क्षेत्र म पाछु कतकोन बेरा ले सक्रिय रिहीन। आत्मसमर्पण करइया माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन रासि दे गीस।
माओवादी स्मारक-सामग्री बरामद
बीजापुर जिला म आज सुरक्षा बल कोति ले करे गे आने-आने कार्रवाई म बारह माओवादी स्मारक ध्वस्त करे गेहे। खबर के मुताबिक केन्द्रीय रिजर्व पुलिस बल-सीआरपीएफ के टीम ह एरिया डोमिनेशन के दउरान पिल्लूर के जंगल म माओवादी मन कोति ले बनाय गे सात ठिन स्मारक ल ध्वस्त करके दू आईईडी बरामद करीन।
उहें, सुरक्षा बल ह गंगालूर थाना क्षेत्र के पालनार गांव तीर बनाय गे तीन अउ पेद्दाकोरमा गांव म एक माओवादी स्मारक ल ध्वस्त कर देहे।
ऐति, नारायणपुर जिला म आईटीबीपी के टीम ह अबूझमाड़ क्षेत्र ले बढ़ मात्रा म माओवादी जिनीस बरामद करे हे। एमा हैंडग्रेनेड, पावर बैंक, डायरी, नक्सल प्रेस, नक्सल वर्दी समेत आने माओवादी जिनीस सामिल हे।
होली स्पेशल ट्रेन
होली तिहार के मउका म यात्री मनके सुभीता ल देखत रेलवे ह एसो होली स्पेशल ट्रेन चलाय के योजना बनाय हे। एमा दक्षिण पूर्व मध्य रेलवे ह घलो पन्द्रह ठिन स्पेशल ट्रेन चलाही। रेलवे ह गोंदिया अउ पटना के बीच एक फेरा खातिर होली फेस्टिवल स्पेशल ट्रेन चलाय के फइसला लेहे। ए गाड़ी गोंदिया ले दू मार्च केे पटना बर रवाना होही। उहें, तीन मार्च के पटना ले गोंदिया लहुटही। ए स्पेशल ट्रेन म कुल अट्ठारह कोच रइही।
सुप्रीम कोर्ट-पेसा कानून
सर्वोच्च न्यायालय ह केहे हे गे पेसा कानून म ग्राम सभा अपन सामाजिक-सांस्कृतिक संरक्षण ले जुड़े विषय म फइसला ले सकत हे। न्यायालय के ए फइसला आदिवासी स्व-शासन ग्राम स्वायत्तता अउ परंपरागत अधिकार खातिर महत्ता के माने जात हे। सुप्रीम कोर्ट ह धर्म प्रचारक के प्रवेश निषेध संबंधी होर्डिंग के विरूद्ध दायर याचिका ल खारित करत ए फइसला सुनईन।
छत्तीसगढ़ के उपमुख्यमंत्री विजय शर्मा ह सुप्रीम कोर्ट कोति ले ग्राम सभा के पक्ष म दे गे फइसला के सुवागत करत किहीन कि ए निर्णय संविधान के भावना, आदिवासी संस्कृति अउ परंपरा के संरक्षण के संग पेसा कानून के प्रावधान के पृष्टि करथे। ओमन किहीन कि छत्तीसगढ़ सरकार ग्राम सभा के अधिकार के सुरक्षा बर प्रतिबद्ध हवय।
मुख्यमंत्री-ओपन थियेटर लोकार्पण
मुख्यमंत्री विष्णुदेव साय ह कोरिया जिला के बैकुंठपुर के झुमका पर्यटन स्थल म करीबन सत्ताईस लाख रूपिया के लागत ले बने ओपन थियेटर के लोकार्पण करीन। ए मउका म पांच सौ दर्सक के बइठक क्षमता वाले ए ओपन थियेटर सांस्कृतिक आयोजन खातिर नवा केन्द्र बनही।
शिक्षा संवाद-शुभारंभ
प्रदेस म उच्च शिक्षा अउ कौशल विकास म केन्द्रित ‘शिक्षा संवाद‘ कार्यक्रम के उच्च शिक्षा मंत्री टंकराम वर्मा ह रईपुर म सुभारंभ करीन। ए कार्यक्रम विकसित छत्तीसगढ़ बर सिक्षा, कौशल अउ रोजगार के सेतु थीम म आधारित हवय। उद्घाटन सत्र म उच्च सिक्षा ल रोजगारमुखी बनाय, उद्योग के जरूरत के मुताबिक पाठ्यक्रम अउ क्षेत्रीय विकास प्राथमिकता म गोठबात होइस।
कार्यक्रम म उच्च शिक्षा विभाग छत्तीसगढ़ शासन अउ ‘‘स्वयं प्लस – आईआईटी मद्रास‘‘ के बीच समझौता ज्ञापन म दस्तखत करे गीस। एखर संगेसंग उच्च सिक्षा विभाग ह मलेशिया के लिंकन यूनिवर्सिटी कॉलेज के संग घलो एमओयू करीन।
मुख्यमंत्री-विद्यार्थी शुभकामना
मुख्यमंत्री विष्णुदेव साय ह प्रदेस के विद्यार्थी मन ल परीक्षा बर सुभकामना देवत आत्मविश्वास अउ हौसला के संग आगू बढ़े के संदेस दीन हे। विद्यार्थी के नाव अपन संदेस म मुख्यमंत्री ह किहीन कि परीक्षा के बेरा जीवन के महत्वपूर्ण पड़ाव होथे, जेमा उत्साह के संग थोरिक संसो घलो होथे। फेर एखर ले डर्राय के जरूरत नइ हे। ओमन भरोसा जतईन कि प्रदेस के विद्यार्थी एसो घलो सबले बने प्रदर्सन करके अपन परिवार अउ प्रदेस के नाव रोसन करही।
रेडियो किसान दिवस
रेडियो किसान दिवस के मउका म पाछु पन्द्रह फरवरी के आकाशवाणी के रईपुर केन्द्र कोति ले रईपुर जिला के आरंग के तीर खेत म किसान दिवस मनाय गीस। ए कार्यक्रम म आकाशवाणी के अधिकारी अउ कृषि वैज्ञानिक के संगेसंग बड़ संख्या म किसान संघरीन। ए दउरान किसान मन ल उन्नत तकनीक ले खेती करे अउ जैविक खातू बउरे के सलाह दे गीस। संगेसंग किसान मन ल सम्मानित करे गीस।
कार्यक्रम म बोलत आकाशवाणी रायपुर के उपनिदेशक अभियांत्रिकी वी. राजेश्वर ह किहीन कि किसान अब उन्नत तकनीक ल अपनाके खरीफ अउ रबी फसल के जादा उत्पादन लेवत हे। उहें, आकाशवाणी रईपुर के सहायक निदेशक कार्यक्रम पंकज मेश्राम ह किसान मनके जागरूकता के प्रसंसा करत उंखर मेहनत के सराहना करीन।
ए बेरा म इफको के बड़का अधिकारी राजेश गोले ह नैनो उर्वरक बउरे के संबंध म किसान मन ल जानकारी दीन।
चित्रकोट महोत्सव
बस्तर जिला के चित्रकोट जलप्रपात म काली अट्ठारह फरवरी ले चित्रकोट महोत्सव के आयोजन करे जाही। दू दिवसीय ए महोत्सव के उद्घाटन कार्यक्रम म वन मंत्री केदार कश्यप सामिल होही। उहें, कार्यक्रम के अगुवई सांसद महेश कश्यप करही। राज्य सासन अउ छत्तीसगढ़ पर्यटन मंडल के मदद ले राखे गे ए महोत्सव ले बस्तर के समृद्ध सांस्कृतिक विरासत अउ पर्यटन ल वैश्विक पटल म देखाय के परयास करे जाही। ए महोत्सव म लोक कलाकार अउ स्कूल के पढ़ईया लइका मन कोति ले सांस्कृतिक कार्यक्रम प्रस्तुत करे जाही। उहें, कबड्डी अउ वॉलीबॉल जइसन खेल प्रतियोगिता होही।