प्रधानमंत्री नरेंद्र मोदी ह किहीन हे कि ए देसवासी मन बर गर्व के बात हे कि ‘‘भारत एआई इम्पैक्ट शिखर सम्मेलन‘‘ बर दुनिया भर ले लोगन आवत हे। श्री मोदी ह शिखर सम्मेलन बर विश्व के नेता, उद्योगपति, नवप्रवर्तक, नीति-निर्माता, सोधकर्ता अउ प्रौद्योगिकी प्रेमी मनके हार्दिक सुवागत करीन। श्री मोदी ह किहीन कि ए अवसर देस के युवा मनके क्षमता ल देखाथे। ओमन यहू बतइन कि शिखर सम्मेलन के बिसय ‘‘सर्वजन हिताय, सर्वजन सुखाय‘‘ यानि सबो बर कल्याण, सबो बर सुख हवय। ओमन किहीन कि ए सम्मेलन मानव केंद्रित प्रगति बर कृत्रिम बुध्दिमता-एआई के उपयोग करे बर देस मनके भागीदारी अउ प्रतिबध्दता ल देखाथे।
छत्तीसगढ़- बजट
छत्तीसगढ़ विधानसभा के बजट सत्र तेईस फरवरी ले सुरू होही। वित्त मंत्री ओपी चौधरी चौबीस फरवरी के बजट पेस करही। वित्त मंत्री ह आज रईपुर म बतइन कि ए बखत घलो बजट नवा थीम के संग आही। ओमन किहीन कि ए बखत के बजट माईलोगिन, युवा अउ किसान मन ल धियान म राखके बनाय जावत हे। राज्य सरकार के प्राथमिकता विकास के गति ल बढ़ाना अउ जन-कल्याणकारी योजना ल मजबूती देना हे।
बीस मार्च तक चलइया बजट सत्र म कुल पंद्रह ठन बइठका होही। पहिली, दिन सदन म राज्यपाल रमेन डेका के अभिभाषण होही।
केंद्रीय गृहमंत्री-माओवाद
केंद्रीय गृहमंत्री अमित शाह ह किहीन कि अनुच्छेद-तीन सौ सत्तर हटे के बाद ले कश्मीर, पूर्वोत्तर अउ माओवाद प्रभावित क्षेत्र ले हिंसा अस्सी प्रतिसत तक कम हो गेहे। ओमन किहीन कि ओ दिन दूर नइ हे, जब ए क्षेत्र ले हिंसा पूरा तरीका ले समाप्त हो जाही। दिल्ली पुलिस के उन्यासीवां स्थापना दिवस के मउका म श्री शाह ह किहीन कि माओवादी आतंक हमेसा देस के आंतरिक सुरक्षा बर बड़े चुनौती रहे हे।
इही बीच, मुख्यमंत्री विष्णुदेव साय ह सोशल मीडिया म किहीन हे कि केंद्रीय गृहमंत्री अमित शाह के ए दृढ़ संकल्प ह देस के आंतरिक सुरक्षा अउ स्थायी सांति बर केंद्र सरकार के अटूट प्रतिबध्दता के प्रतीक हे। अेमन किहीन कि केंद्र अउ राज्य सरकार ह मिलजुर के ए बछर इकतीस मार्च ले पहिली देस ल नक्सलवाद ले मुक्त कराय के दिसा म आगु बाढ़त हे।
एसडीएम-मामला जांच
बलरामपुर म पदस्थ एसडीएम करूण कुमार डहरिया उपर एक झन सियनहा के हत्या के आरोप लगे हे। मिले जानकारी के अनुसार एसडीएम अउ उंखर टीम कुसमी थाना क्षेत्र के ग्राम पंचायत हंसपुर म अवैध खनन उपर कार्रवाई करे बर पहुंचे रिहीन। आरोप हे कि ए दउरान उंखर टीम ह ग्रामीण मन संग मारपीट सुरू कर दीस। इही बीच, एक झन सियनहा के चोट लगे के सेति मउत होगे अउ दू झन दूसर युवक घायल हो गेहे। ए घटना के बाद गांव म तनाव के स्थिति ल देखत भारी पुलिस बल तैनात करे गेहे।
इही बीच, पुलिस ह ए मामला म एफआईआर दर्ज कर लेहे। एसडीएम अउ नायब तहसीलदार संघरा दूसर लोगन ले पूछताछ करे जावत हे।
सरगुजा संभाग के पुलिस महानिरीक्षक दीपक झा ह किहीन कि ए मामला के गंभीरता ले जांच करे जावत हे अउ जउन कोई भी दोषी होही उंखर उपर कार्रवाई करे जाही।
आईईडी-बरामद
बीजापुर जिला म सुरक्षाबल ह दू ठन आईईडी बरामद करे हे। ए आईईडी उसूर थाना क्षेत्र म ताड़पाला बेस तीर एक ठन नाला मेर लगाय गे रिहीस।
उहें, इही जिला के भोपालपटनम थाना क्षेत्र के कोंडापड़गु म सघन तलासी अभियान के दउरान सुरक्षा बल के संयुक्त टीम ह माओवादी मन डहार ले जमीन म लुकाके राखे गे चार ठन आईईडी बरामद करीन। एखरे संग माओवादी मन डहार ले जमीन के भीतर डंप करके रखे गे विस्फोटक अउ दूसर माओवादी जिनिस ल घलो बरामद करे गेहे।
उहें, माओवाद विरोधी अभियान म पुलिस ह गरियाबंद के बड़ेगोबरा के सतामरी पहाड़ी ले माओवादी मनके हथियार ल बरामद करे हे। एमा एक ठन इंसास, एक एसएलआर अउ दू ठन बारह बोर के रायफल के संगेच अट्ठाईस ठन कारतूस अउ तीन मैग्जीन सामिल हे।
सीबीआई-बोर्ड परीक्षा
केंद्रीय माध्यमिक शिक्षा बोर्ड-सीबीएसई के कक्षा दसवीं अउ बारहवीं के परीक्षा काली सत्रह फरवरी ले सुरू होही। ए बछर ए दूनों परीक्षा म करीब छियालिस लाख लइका मन के सामिल होय के संभावना हे। सबो विद्यार्थी मन बर परीक्षा केंद्र म जाय ले पहिली ड्रेसकोड, एंट्री रूल जइसन परीक्षा ले जुड़े सबो निरदेस के पालन करना जरूरी हे। कक्षा दसवीं के परीक्षा ग्यारा मार्च अउ कक्षा बारहवीं के परीक्षा दस अप्रैल के सिराही।
इही बीच, सीबीएसई ह स्पष्ट करे हे कि कक्षा दसवीं के पहिली बोर्ड परीक्षा म सामिल होना सबो विद्यार्थी मन बर जरूरी हे। यदि कोनो छात्र पहिली परीक्षा म तीन या तीन ले जादा बिसय म अनुपस्थित रइही त, ओहा दूसर परीक्षा म बइठे के पात्र नइ होही।
राजिम मेला-समापन
महानदी, पैरी अउ सोंढूर नदी के संगम म चलत राजिम कुंभ कल्प मेला काली सिरागे। समापन समारोह म मुख्यमंत्री विष्णुदेव साय मुख्य अतिथि के रूप म सामिल होइन। ए मउका म मुख्यमंत्री ह किहीन कि ए आयोजन छत्तीसगढ़ के आध्यात्मिक चेतना, सांस्कृतिक गौरव अउ सामाजिक समरसता के जीवंत उदाहरण हे। ओमन किहीन कि राजिम कुंभ कल्प सिरिफ धार्मिक मेला नइ हे, फेर एहा छत्तीसगढ़ के सम्मान अउ पहिचान के प्रतीक पर्व हे। मुख्यमंत्री ह श्रध्दालु मनके सुविधा बर राजिम सर्वसुविधा वाले धरमसाला बनाय बर पचास लाख रूपिया दे जाय के घोसना करीन। संगेसंग राजिम बैराज बनाय के काम ल जल्दी सुरू करे के अउ पहिली ले प्रस्तावित विकास के काम म तेजी लाय के निरदेस दीन।
ओिंत, सरगुजा जिला के मैनपाट म राखेगे तीन दिन के मैनपाट महोत्सव के घलो काली समापन होइस। ए मउका म सरगुजा सांसद चिंतामणि महराज मुख्य अतिथि के रूप म सामिल होइन। ए मउका म ओमन किहीन कि पर्यटन के क्षेत्र म मैनपाट सरलग आगू बाढ़त हे। अवइया बछर म ए महोत्सव अउ जादा बड़े रूप म आयोजित करे जाही। ओमन किहीन कि ए महोत्सव सिरिफ सांस्कृतिक आयोजन नइ हे, फेर एहा सरगुजा के पहिचान अउ सम्मान के प्रतीक हे।
समापन समारोह म कवि सम्मेलन के संगेच दूसर रंगारंग कारीकरम प्रस्तुत करे गीस। मुख्य आकर्षण के रूप म बालीवुड के गायिका कनिका कपूर के प्रस्तुती ह ए समारोह ल यादगार बना दीस।
गन्ना हार्वेस्टर मशीन
बालोद जिला म गन्ना किसान ल प्रशासन डहार ले रियायती दर म हार्वेस्टर मसीन के सुविधा देवाय जाही। जिला खनिज न्यास-डीएमएफ मद ले करीबन डेढ़ करोड़ रूपिया के लागत ले आधुनिक गन्ना हार्वेस्टर मसीन के खरीदी करे गेहे। ए मसीन के उपयोग ले किसान मन के समय अउ मेहनत बांचही। हाल के दिन म जिला के ग्राम तमोरा म गन्ना हार्वेस्टर मसीन के लोकार्पण होइस, जिंहा दस एकड़ खेत म लाइव प्रदर्सन करके कटाई, छिलाई अउ लोडिंग सब दिखाय गीस। अब ए मसीन ह क्षेत्र के किसान मन बर उपलब्ध हे।
अउ अब थोरकुन समाचार सार म –
– भारतीय जनता पार्टी के संयुक्त मोर्चा के बइठका आज प्रदेस कार्यालय कुशाभाऊ ठाकरे परिसर म आयोजित करे जावत हे। बइठका म मुख्यमंत्री विष्णुदेव साय, भाजपा प्रदेस अध्यक्ष किरण सिंह देव, क्षेत्रीय संगठन महामंत्री अजय जामवाल, प्रदेस महामंत्री यशवंत जैन संघरा दूसर पदाधिकारी मन घलो सामिल होवत हे।
– धान खरीदी नइ होय के आरोप लगावत जांजगीर म आज कृषक चेतना मंच म किसान मन ह धरना प्रदर्सन करीन।
अउ
– कोंडागांव जिला के शिक्षित बेरोजगार युवक-युवती मन ल रोजगार देवाय बर अट्ठारा फरवरी के बिहनिया ग्यारा बजे ले लाइवलीहुड कालेज परिसर म प्लेसमेंट कैंप के आयोजन करे जाही। एखर माध्यम ले नौ सौ अस्सी खाली पद म भर्ती करे जाही।