प्रधानमंत्री नरेंद्र मोदी ह रोड एक्सीडेंट म घायल मन ल अस्पताल म भर्ती कराय अउ ओखर इलाज के गारंटी दे खातिर पीएम राहत योजना ल मंजूरी दे देहे। ए योजना के चलत कोनो भी तरह के रोड एक्सीडेंट होय के स्थिति म सात दिन तक इलाज बर डेढ़ लाख रूपिया तक के केसलेस इलाज के खर्चा सरकार ह देही। उहें, इलाज करइया अस्पताल मन ल मोटर वाहन दुर्घटना कोस ले भुगतान करे जाही।
केंद्रीय गृह मंत्री-शुभारंभ
केंद्रीय गृह मंत्री अमित शाह ह देस के किसान मन बर मोदी सरकार के कमिटमेंट ल दोहरावत भरोसा देवाइन कि सबो अंतरर्राष्ट्रीय व्यापार समझौता म किसान मवेसी पलइया अउ मछुवारा मनके हित के रक्षा ल बरकरार राखे जाही। श्री शाह ह आज गुजरात के गांधी नगर स्थित महात्मा मंदिर म देस के पहिली केंद्रीय बैंक डिजीटल मुद्रा वाले सार्वजनिक वितरण प्रणाली के सुभारंभ करे के बात किहीन। ओमन विपक्ष के दावा के खंडन करत किहीन कि भारत अमेरिका व्यापार समझौता अउ भारत यूरोपी संघ मुक्त व्यापार समझौता म किसान, पशु पालक अउ मुछवारा मन के हित के रक्षा करे गेहे। गृहमंत्री ह भरोसा जतइन कि नवा डिजीटल टोकन ले बांटे गे सिस्टम, सार्वजनिक वितरण प्रणाली म भ्रष्टाचार ल समाप्त करही अउ बांटे के प्रक्रिया म जरूरी पारदर्सिता लाही।
महाशिवरात्रि
महाशिवरात्रि के परब ल आज देसभर म श्रध्दा अउ उछाह के संग मनाय जात हे। राजधानी रईपुर समेत प्रदेस के सबो शंकर मंदिर मन म बिहनियच ले अभिषेक अउ पूजापाठ बर श्रध्दालू मनके रेम लगे हे। ए मउका म श्रध्दालू मन नंदिया घलो नहावत हे। रईपुर के महादेवघाट स्थित हटकेश्वर महादेव मंदिर म आज श्रध्दालू मन बेलपत्ता, धतूरा, दूध-दही, घींव, मधुरस अउ गंजाजल ले भगवान भोलेनाथ के अभिषेक करत हे।
मुख्यमंत्री विष्णुदेव साय ह अपन रायगढ़ दउरा बेरा गांव कोसमनारा के श्री सत्यनारायण बाबाधाम पहुंचिन। उंहा ओमन भगवान शंकर अउ श्री सत्यनारायण बाबा के पूजापाठ करके प्रदेस के रहवइया मनके खुसहाली अउ सुख-समृध्दि बर कामना करत महाशिवरात्रि परब के सुभकामना दीन हे। ए मउका म मुख्यमंत्री ह जिला खनिज न्यास मद के चलत एक करोड़ बीस लाख रूपिया के कई ठिन विकास काम मनके सिलान्यास घलो करीन।
उंहे, गरियाबंद जिला म महानदी, पैरी अउ सोंढूर नंदिया के त्रिवेणी संगम म होवत राजिम कुंभ कल्प मेला म आज बिहनियच ले हजारों मनखे मन पुण्य स्नान करे के संगे कुलेश्वर महादेव के पूजापाठ करीन। ए मउका म नागा साधु मनके संगे बड़ अकन अखाड़ा ले पहुंचे साधु संत मन घलो साही स्नान करीन। एक फरवरी ले सुरू होय राजिम कुंभ कल्प मेला के आज समापन होवत हे, जेमा मुख्यमंत्री विष्णुदेव साय सामिल होही।
ओति, जांजगीर-चांपा के धार्मिक नगरी खरौद स्थित लक्ष्मणेश्वर मंदिर म आज बड़ेफजर ले आज भक्त मनके भारी रेम लगे रिहीस। आठवीं सताब्दी मन बने ए मंदिर म दर्सन खातिर अब्बड़ झिन श्रध्दालु पहुंचे हवय।
उहें, सक्ती जिला के तुर्रीधाम घलो भगवान शिव के दर्सन बर भक्त मनके लंबा रेम लगे हे। तुर्रीधाम महाशिवरात्रि के मउका म पंद्रह दिन के मेला राखे जाथे।
उहेंं, महाशिवरात्रि के मउका म आज बलरामपुर जिला म चनान नंदिया तीर के जुन्ना सिवगढ़ी शिव मंदिर म घलो श्रध्दालु मन के भारी भीड़ देखे गीस। जम्मों क्षेत्र ह हर हर महादेव के जयकारा ले गुंजत हे।
दुरूग जिला के बैकुंठधाम, रूक्खड़नाथ, नारधा अउ आने शंकर मंदिर मन बिसेस पूजापाठ अभिषेक अउ भजन कीर्तन समेत सांस्कृतिक कारीकरम होवत हे। उहें, शिवनाथ नदी तीर बरफ ले शिवलिंग बनाय।
मुख्यमंत्री-कोसमनारा धाम
मुख्यमंत्री विष्णुदेव साय आज रायगढ़ जिला के कोसमनारा धाम म साहू समाज डहार ले राखे गे स्थापना दिवस अउ सपथ ग्रहण समारोह म सामिल होइन। ए मउका म ओमन कोसमनारा म सामूदायिक भवन के विस्तार बर पचास लाख रूपिया देय के घोसना करीन।
कारीकरम म बोलत श्री शाह ह किहीन कि साहू समाज के लोगन मन एकजुट होके प्रदेस ल सामाजिक अउ आर्थिक रूप ले आगू बढ़ाय म बड़का भूमिका निभावत हे। ओमन यहू किहीन कि न्यूनतम समर्थन मूल्य म धान बेचइया पचीस लाख ले जादा किसान मन ल एकतीस सौ रूपिय कुंटल पाछू के रेट ले अंतर के रासि ल होली तिहार ले पहिली एकमुस्त दे जाही।
मुख्यमंत्री-अघोर गुरू पीठ
मुख्यमंत्री विष्णुदेव साय काली रायगढ़ जिला के बनोरा स्थित अघोर गुरू पीठ ब्रम्हनिष्ठालय पहुंचिन। ए दउरान ओमन अघोरेश्वर अवधूत भगवान राम के मूर्ति उपर फूलमाला चढ़ाके प्रदेसवासी मनके सुख-समृध्दि के कामना करीन। ए मउका म मुख्यमंत्री ह किहीन कि अघोर गुरू पीठ जइसन संस्थान ह समाज ल संस्कार, सेवा अउ सद्भाव के आरो देवत हे। इंहा आके आत्मिक सांति अउ सकारात्मक ऊर्जा के अनुभव होथे।
सरगुजा ओलंपिक
सरगुजा ओलंपिक के चलत पांच ले तेरह फरवरी तक होय जिला स्तरीय खेलकूद प्रतियोगिता म संभाग के सबो छै ठन जिला के दस हजार पांच सौ ले जादा खिलाड़ी मन भाग लीन। जिला स्तरीय प्रतियोगिता के जीते खिलाड़ी मन अब संभाग स्तरीय प्रतियोगिता म भाग लेही।
सरगुजा ओलंपिक के संभाग स्तरीय विजेता मन ल खेल अउ युवा कल्याण विभाग डहार ले राज्य म चलत खेल अकादमी मन म सोज्झें प्रवेस दे जाही। संगे ओमन ल यूथ आईकान घोसित करे जाही।
गेट परीक्षा-आरोपी गिरफ्तार
इंजीनियरिंग म स्नातक योग्यता परीक्षा-गेट म नकल कराय के साजिस रचे के मामला म रईपुर पुलिस ह छै झिन आरोपी ल गिरफ्तार करे हे। रईपुर पश्चिम जोन के पुलिस उपायुक्त संदीप पटेल ह आज एक ठिन पत्रकारवार्ता म बतइन कि पुलिस ल सूचना मिले रिहीस कि कोनो-कोनो मनखे डहार ले इलेक्ट्रानिक उपकरण के माध्यम ले परीक्षा देवइया मन ल अनुचित लाभ देवाय खातिर नकल कराय के योजना बनाय जात हे। ए आधार म पुलिस के संघरा टीम ह परीक्षा केंद्र तीर ए आरोपी मन ल गिरफ्तार करीस। ओमन बतइन कि एमा ले तीन झिन पढ़इया लइका परीक्षा केंद्र ले बइठके परीक्षा देत रिहीन अउ तीन झिन आने आरोपी परीक्षा केंद्र के बाहिर ब्लूटूथ डिवाइस के माध्यम ले ओमन ल नकल करावत रिहीस हे। गिरफ्तार सबो आरोपी हरियाणा के रहवइया बताय गेहे। एखर मन तीर ले ब्लूटूथ ईयर अउ इलेक्ट्रानिक डिवाइस, मोबाइल फोन, सिम कार्ड अउ आने नकल कराय ले जुड़े जिनिस बरामद होय हे।
सरगुजा जिला के मैनपाट म राखे गे तीन दिन वाले मैनपाट महोत्सव के आज समापन होवत हे। जेमा आज संझा बॉलीवुड गायिका कनिका कपूर, रायगढ़ घराना के कथक नृत्यांगना ज्योतिश्री वैष्णव अउ छत्तीसगढ़ी गायक आयुष नामदेव अपन प्रस्तुति दिही। संगे स्कूली लइका मन डहार ले सांस्कृतिक कारीकरम घलो दे जाही।
प्रशिक्षु उपनिरीक्षक-प्रशिक्षण कार्यक्रम
रईपुर के चंदखुरी स्थित नेता जी सुभाषचंद्र बोस पुलिस अकादमी म आठ सौ सत्तर झिन प्रसिक्षु अधिकारी मन बर राखे गे प्रसिक्षण कारीकरम के सुभारंभ स्वास्थ्य मंत्री श्याम बिहारी जायसवाल अउ शिक्षा मंत्री गजेन्द्र यादव ह करीन। एमा ले पांच सौ सैंतीस उपनिरीक्षक, चौव्वन झिन सूबेदार, दू सौ ग्यारा प्लाटून कमांडर अउ अड़सठ झिन उपनिरीक्षक-एसबी सामिल हे।