प्रधानमंत्री नरेंद्र मोदी ह काली नई दिल्ली म सेवा तीर्थ परिसर के उद्घाटन करीन। इंहा पहिली दिन कई ठन जरूरी निरनय ले गीस। एमा पीएम राहत योजना ल मंजूरी, लखपति दीदी मन के लक्ष्य ल दुगुना करके छै करोड़ रूपिया करना, कृषि बुनियादी ढांचा कोष ल दुगुना करके दू लाख करोड़ रूपिया अउ स्टार्टप इंडिया फंड ऑफ फंड्स के दूसरइया चरण ल दस हजार करोड़ रूपिया के मंजूरी सामिल हे। श्री मोदी ह किसनहा, माईलोगिन, युवा मन अउ संकट म फंसे लोगन ले जुड़े जरूरी फाइल मन म दस्खत करीन।
सेवा तीर्थ ले प्रधानमंत्री के रूप म कामकाज सुरू करे के श्री मोदी के ए फइसला ह सेवा के भाव ल देखाथे अउ समाज के सब वर्ग ल एमा जोड़थे। प्रधानमंत्री राहत योजना म अब दुर्घटना पीड़ित ल डेढ़ लाख रूपिया तक के निसुल्क इलाज मिल पाही।
केंद्रीय सूचना और प्रसारण मंत्री अश्विनी वैष्णव ह किहीन हे कि काली साउथ ब्लाक म मंत्रिमंडल के आखिरी बइठका रिहीस। नई दिल्ली म संवाददाता मन संग गोठबात करत हुए ओमन बतइन कि अब मंत्रिमंडल के सबो बइठका सेवा तीर्थ म होही।
मंत्रिमंडल के बइठका म एक लाख करोड़ रूपिया के कुल केंद्रीय सहायता के संगेसंग अर्बन चैलेंज फंड ल सुरू करे के मंजूरी घलो दे गीस। ए अनुदान आधारित वित्त पोषण के जघा म बाजार आधारित, सुधार संचालित अउ परिणाम उन्मुख अधोसंरचना बनाय कोति देस के सहरी विकास दृष्टिकोण म एक बड़का बदलाव लाही।
भारत के बाढ़त स्टार्टअप इको सिस्टम ल एक बड़का प्रोत्साहन देत हुए स्टार्टअप इंडिया फंड ऑफ फंड्स के दूसरइया चरण के स्थापना ल मंजूरी दे गीस हे। एखर उद्देस्य देस के स्टार्टअप इको सिस्टम ल बढ़ावा देबर पूंजी जुरोना हे।
दुर्घटना
धमतरी जिला म राष्ट्रीय राजमार्ग क्रमांक-तीस म आज होय एक सड़क दुर्घटना म तीन जवान समेत चार झन के मउत होगे। केंद्रीय रिजर्व पुलिस बल सीआरपीएफ के कोबरा बटालियन के ए जवान मन कार ले जगदलपुर ले रईपुर ेकोति आवत रिहीन। खपरी बाईपास मेर ओमन के कार ह सड़क तीर खड़े टरक म टकरागे। ए हादसा म दू जवान के मउका म ही मउत होगे। फेर एक आने जवान अउ ड्राइवर ह अस्पताल ले जावत हुए दम तोड़ दीस। ए घटना म जेन जवान मनके मउत होइस हे, ओमा सहायक उपनिरीक्षक उमेंद्र सिंह, प्रधान आरक्षक मुकेश कुमार, आरक्षक राजकुमार गौड़ अउ वाहन चालक हीरालाल नागर सामिल हे। एक झन घायल जवान अभिमान राय ल प्राथमिक इलाज के बाद रईपुर रिफर करे गेहे। घटना के सूचना मिलतेच ही पुलिस ह मउका म पहुंचिस अउ क्षतिग्रस्त गाड़ी ल रद्दा ले हटाके अवई-जवई सुरू कराइस।
मुख्यमंत्री विष्णुदेव साय ह ए दुर्घटना म कोबरा बटालियन के जवान मन के असामयिक निधन उपर गहरा दुख जतइन हे। ओमन अधिकारी मन ल घायल जवान के अच्छा इलाज के निरदेस घलो दीन हे।
पुलवामा-स्मृति दिवस
केंद्रीय रिजर्व पुलिस बल-सीआरपीएफ के बस्तरिया बटालियन के अधिकारी अउ जवान मन कोति ले आज जगदलपुर म पुलवामा शहीद स्मृति दिवस मनाय गीस। ए मउका म कमाण्डेन्ट हरविन्दर सिंह ह शहीद जवान मन ल सुरता करत हुए किहीन कि ए दिन ह जवान मनके शौर्य अउ बलिदान के प्रतीक हे। आजे के दिन बछर दू हजार उन्नीस म कश्मीर के पुलवामा म सीआरपीएफ के चालीस झन जवान मन देस के रक्षा बर अपन प्राण के आहूति दे रिहीन। कमाण्डेन्ट ह किहीन कि सीआरपीएफ के इतिहास ह बड़ गौरवसाली रहे हे अउ पुलवामा के ए घटना ह देस के सुरक्षा के प्रति संकल्प ल अउ मजबूत करे हे।
मुख्यमंत्री-जी-राम-जी योजना
मुख्यमंत्री विष्णुदेव साय ह किहीन हे कि मनरेगा के जघा म केंद्र सरकार कोति ले लागू करे गे विकसित भारत-जी-राम-जी अधिनियम जादा परभावी हे। ए अधिनियम के अंतर्गत ग्रामीन विकास के काम ल ग्रामसभा ह निश्चित करही। गांव वाले मन खुदे ए तय करही कि, उंखर गांव म कोन-कोन सा काम पहिली होना हे।
मैनपाट-महोत्सव/जाज्वलयदेव लोक महोत्सव
सरगुजा जिला के मैनपाट म तीन दिनी मैनपाट महोत्सव सुरू हो गेहे। मुख्यमंत्री विष्णुदेव साय ह काली ए महोत्सव के सुभारंभ करीन। ए दउरान मुख्यमंत्री ह मैनपाट म पर्यटन के विकास बर एक करोड़ रूपिया अउ सीतापुर म बस स्टैंड बनाय के घोसना करीन। ए मउका म मुख्यमंत्री ह सरगुजा जिला म लगभग पांच सौ तेईस करेड़ रूपिया के आने-आने विकास काम के भूमिपूजन अउ लोकार्पण करीन।
मुख्यमंत्री ह किहीन हे कि ए समारोह ह सरगुजा के संस्कृति अउ अस्मिता ल देखाय बर एक बड़का माध्यम हे, एखर ले सरगुजा के संस्कृति ले देस-दुनिया के लोगन मन परिचित होही।
मुख्यमंत्री ह आने-आने विभाग के स्टाल ल देखिन। संगेसंग सरकार के जन-कल्याणकारी योजना के पात्र हितग्राही मन ल समान घलो बांटिन। कारीकरम म स्थानीय कलाकार मन कोति ले सांस्कृतिक प्रस्तुति दे गीस।
उहें, जांजगीर म चलत तीन दिनी जाज्वलयदेव लोक महोत्सव के समापन होगे। समापन समारोह म तकनीकी शिक्षा मंत्री खुशवंत साहेब ह सामिल होइन। इंहा लोक गायिका आरू साहू समेत आने-आने कलाकार मन ह अपन प्रस्तुति दीन।
माओवादी-स्मारक ध्वस्त
बीजापुर जिला म सुरक्षाबल ह आज नक्सल विरोधी अभियान म आने-आने थाना क्षेत्र म पांच माओवादी स्मारक ल ध्वस्त कर दीस। केंद्रीय सुरक्षा बल के जवान मन कोति ले तर्रेम थाना क्षेत्र के मंडीमरका म एक, उसूर थाना क्षेत्र के मारूड़बाका, पाउरगुड़ा अउ सिंगनपल्ली के जंगल म चार माओवादी स्मारक ल तोड़े हे।
गृहमंत्री-प्रेसवार्ता
उपमुख्यमंत्री अउ गृहमंत्री विजय शर्मा ह किहीन हे कि सरकार ह बस्तर म सांति बर पूरी तरह प्रतिबध्द हे। नक्सलवाद के नास बर केंद्रीय गृहमंत्री अमित शाह ह ए बछर के इकतीस मार्च तक के समय खच्चित करे हे। जेखर उपर मुख्यमंत्री विष्णुदेव साय के अगुवई म छत्तीगढ़ सरकार ह अड़िग हवय।
श्री शर्मा ह काली नवा रईपुर म राखे गे पत्रकारवार्ता म राज्य सरकार के दू बछर के उपलब्धि के बारे म जानकारी देत हुए ए बात किहीन। ओमन किहीन कि लोकतंत्र म पिस्तौल देखाके डर अउ हिंसा फैलाय वाला मनके कोनो जघा नइ हे। सरकार के परयास हे कि जादा ले जादा माओवादी मन ल मुख्यधारा म लाय जाय, एखरे परिणाम हे कि राज्य म नक्सल आपरेसन म मारे गे माओवादी मनके गिनती ले कई गुना जादा लोगन ह पुनर्वास के रद्दा चुने हे। एखर बर सरकार कोति ले रेडियो अउ आने-आने संचार माध्यम ले पुनर्वास संदेस जारी करे जावत हे। गृहमंत्री ह बतइन कि इलवद पंचायत योजना के तहत अब तक बस्तर म दू पंचायत ह अपन ल नक्सलमुक्त घोसित घलो कर देहे।
श्री शर्मा ह बतइन कि नवा आपराधिक कानून मनके परयोग ले पुलिस प्रक्रिया आसान होय हे। एखर क्रियान्वयन म पांचों स्तंभ ल एक स्तर म लाय म छत्तीसगढ़ राज्य ह आगु हे। ओमन बतइन कि राज्य म अवैध प्रवासी मनके पता लगाके चौतीस झन ल देस ले बाहिर करे के काम करे गेहे। गृहमंत्री ह बतइन कि प्रदेस म धर्मांतरन रोके बर सरकार कोति ले नवा कानून लाय के प्रस्ताव घलो हे।
एनएसपीसीएल-सीईओ-बैठक
एनटीपीसी सेल पावर कंपनी लिमिटेड-एनएसपीसीएल के सीईओ दिवाकर कौशिक ह दुरूग जिला के पुरैना म स्थित संयंत्र म भिलाई स्टील प्लांट एनएसपीसीएल के अधिकारी मनके बइठका लीन। ए दउरान ओमन भविष्य के योजना मन म सौर ऊर्जा अउ सुरक्षा पहल के समीक्षा करीन। संगेसंग ओमन भिलई म बनत नवा इकाई मनके काम ल घलो देखिन।
ए मउका म श्री कौशिक ह किहीन कि सौर ऊर्जा के क्षेत्र म कंपनी के विस्तार अउ भविष्य के योजना उपर काम करे जावत हे। एनएसपीसीएल, कोयला आधारित बिजली ले हटके नवीकरणीय ऊर्जा कोति बढ़त हे।