खबर के मुताबिक पाछु दू बछर म कृषक उन्नति योजना म राज्य के किसान मन ल धान के मूल्य के अंतर के रूप म पच्चीस हजार करोड़ रूपिया ले जादा के भुगतान करे गेहे। एसो होरी के पहिली किसान मन ल दस हजार करोड़ रूपिया के भुगतान होय ले ए रकम बाढ़के पैंतीस हजार करोड़ रूपिया हो जही। राज्य सरकार कोती ले किसान मन ले समर्थन मूल्य म तीन हजार एक सौ रूपिया कुंटल के दर ले धान बिसाय जात हे, जउन देस म सबले जादा हे।
एखर संगेसंग बइठका म छत्तीसगढ़ विधानसभा के ए महीना सुरू होवइया बजट सत्र बर राज्यपाल के अभिभाषण के अनुमोदन करे गीस। उहें, कैबिनेट ह बजट अनुमान ल विधानसभा म प्रस्तुत करे बर छत्तीसगढ़ विनियोग विधेयक के प्रारूप के घलो अनुमोदन करे देहे।
मुख्यमंत्री-जीपीएम
गौरेला-पेण्ड्रा-मरवाही जिला के स्थापना दिवस म गौरेला म मुख्यमंत्री विष्णुदेव साय ह जिला अस्पताल के नवा भवन बनाए के काम के सुभारंभ करीन। सौ बिस्तर के सुबिधा वाले ए भवन करीबन अट्ठारह करोड़ रूपिया के लागत ले तियार होही। ए बेरा म राखे गे कारीकरम म बोलत मुख्यमंत्री ह किहीन कि नवा अस्पताल भवन बने ले जिला म स्वास्थ्य सुबिधा अउ बने होही। मुख्यमंत्री ह कारीकरम म जिला के बावन ग्राम पंचायत ल टीबी मुक्त अउ इकहत्तर ग्राम पंचायत ल बाल विवाह मुक्त घोषित करीन। ए मउका म ए पंचायत के सरपंच मन ल सम्मानित करे गीस।
उहें, मुख्यमंत्री ह ए बेरा म फाइलेरिया उन्मूलन अभियान के तहत तीन जागरूकता प्रचार वाहन ह हरियर झंडी देखाके रवाना करीन। फाइलेरिया उन्मूलन अभियान पच्चीस फरवरी तक चलही।
पीएससी परीक्षा
छत्तीसगढ़ लोक सेवा आयोग कोति ले राज्य सेवा प्रारंभिक परीक्षा – पीएससी प्रदेस के सबो जिला म बाईस फरवरी के होही। ए परीक्षा दू सौ अड़तीस पद बर सबो जिला केन्द्र मन म दू पाली म होही। परीक्षा बर प्रवेस पत्र जारी कर दे गेहे। प्रतिभागी आयोग के आधिकारिक वेबसाइट ले प्रवेस पत्र डाउनलोड कर सकत हे।
प्रवासी छत्तीसगढ़ कॉन्क्लेव
रईपुर म सत्ताईस अउ अट्ठाईस मार्च के प्रवासी छत्तीसगढ़ कॉन्क्लेव के आयोजन करे जाही। ए कॉन्क्लेव उत्तर अमेरिका छत्तीसगढ़ प्रवासी संघ-नाचा अउ छत्तीसगढ़ एनआरआई संघ के मदद ले राखे जात हे। दू दिवसीय ए कारीकरम म भारत ले बाहिर आने-आने देस म रहवइया छत्तीसगढ़ के रहवासी संघरही। ए कॉन्क्लेव बर पंजीयन के काम जल्दी सुरू करे जाही। एखर ले प्रवासी छत्तीसगढ़िया मन ल प्रदेस के सामाजिक, सांस्कृतिक अउ आर्थिक बिकास ले जोड़े के परयास करे जाही।
श्रम विभाग-ई केवाईसी
श्रम विभाग के अंतर्गत छत्तीसगढ़ भवन अउ अन्य सन्निर्माण कर्मकार कल्याण मंडल अउ छत्तीसगढ़ असंगठित कर्मकार राज्य सामाजिक सुरक्षा मंडल म पंजीयन होय श्रमिक मन बर ई-केवाईसी कराना जरूरी कर दे गेहे। अइसन पंजीयन होय श्रमिक जिखर जानकारी खाद्य नागरिक आपूर्ति विभाग के डाटा ले थोड़ बहुत मिलान होवत हे, उंखर नाव आधार कार्ड म दरज नाव के मुताबिक सत्यापित करे जाही। जउन हितग्राही मनके श्रमिक पंजीयन कार्ड म लिखाए नाव अउ आधार कार्ड म लिखाए नाव म अंतर हावय ओमन ल जरूरी रूप ले ई-केवाईसी कराए बर पड़ही।
उपमुख्यमंत्री-विद्युत केन्द्र
उपमुख्यमंत्री विजय शर्मा ह आज कबीरधाम जिला के सेमो गांव म दू करोड़ अड़तीस लाख रूपिया के लागत ले बनइया विद्युत उप केन्द्र बर भूमिपूजन करीन। ए उप केन्द्र के बने ले तीर-तखार के दस ठिन गांव ल फायदा होही अउ करीबन दू हजार ले जादा उपभोक्ता मन ल नियमित विद्युत आपूर्ति मिल सकही।
ड्रोन-संपत्ति सर्वे
नगर पालिक निगम भिलई क्षेत्र म संपत्ति के सही जानकारी बर अउ डेटा अपडेट करे खातिर जोन क्रमांक-पांच म ड्रोन ले सर्वे के काम सुरू कर दे गेहे। आधुनिक तकनीक ले करे जात ए सर्वे ले क्षेत्र के संपत्ति के सही जानकारी ले जाही। डिजिटल रिकार्ड तियार होय ले राजस्व वसूली म साफगोई आही।
ट्रेन परिचालन
छत्तीसगढ़ ले होके गुजरइया छब्बीस ठिन ट्रेन ल रद्द कर दे गेहे। एमा एक्सप्रेस अउ मेमू ट्रेन सामिल हे। रइपुर मंडल म हथबंध-भाटापारा सेक्सन म बिकास काम के सेती चउदा अउ पंदरा फरवरी के कुछ यात्री ट्रेन के अवई-जवई परभावित रही। ए दू दिन म बारह ठिन ट्रेन ल रद्द कर दे गेहे। एमा बिलासपुर-रइपुर मेमू, कोरबा-रइपुर पैसेंजर अउ इतवारी पैसेंजर सामिल हे। उहें, नागपुर मंडल के गोंदिया स्टेसन म बिकास काम के सेती अवइया चार ले छब्बीस अपै्रल तक चउदा ठिन ट्रेन ल रद्द करे गेहे। रेलवे ह रायगढ़, कोरबा, बिलासपुर, दुरूग, गोंदिया, नागपुर, अमृतसर अउ मुंबई रूट के यात्री मन ल यात्रा के पहिली अपन ट्रेन के सही जानकारी लेवय, ए अपील करे हे।
इही बीच, होरी के तिहार ल देखत रेलवे कोती ले दुरूग-मधुबनी के बीच स्पेसल ट्रेन के सुबिधा दे जावत हे। ए ट्रेन ए मार्च के दुरूग ले चलही अउ मधुबनी ले दू मार्च के दुरूग बर रवाना होही।
नारायणपुर-मावली मेला
नारायणपुर जिला के प्रसिद्ध माता मावली मेला आज ले सुरू होगे। मावली परघाव के रस्म अदायगी अउ आड़मावली मंदिर के ढाई परिक्रमा के संग पांच दिवसीय मेला के सुरू होय म देवी-देवता अउ आंगादेव के संगेसंग क्षेत्र के जम्मों पुजारी संघरीन। ए मउका म सुरक्षा के कड़ा इंतजाम करे गेहे। आदिवासी परंपरा के मुताबिक एक दिन पहिली गोंडवाना समाज कोति ले दुग्गाल अउ करंगाल परगना के सबो डांग, डोली, आंगादेव ल ए मेला म संघरे बर न्योता दे जाथे।
विश्व रेडियो दिवस
विश्व रेडियो दिवस तेरह फरवरी के मउका म आकाशवाणी अउ यूनेस्को के संयुक्त तत्वावधान म राजधानी रईपुर म एक समारोह राखे जाही। ए बछर विश्व रेडियो दिवस के थीम हरय – ‘‘रेडियो और आर्टिफिशियल इंटेलीजेंस’’। मुख्यमंत्री विष्णुदेव साय ए समारोह के सुभारंभ करही। ए मउका म आकासवाणी के महानिदेसक राजीव जैन मौजूद रिही। कारीकरम के दउरान आने-आने सत्र म रेडियो माध्यम के कतकोन पहलु के संगेसंगे कम्युनिटी रेडियो अउ एखर ले जुड़े बिसय म सत्र आयोजित करे जाही। उहें, सांस्कृतिक कारीकरम घलो होही।
रागी फसल
धमतरी जिला म किसान अब परंपरागत् धान फसल के संगेसंग दलहन-तिलहन अउ मोटा अनाज के खेती कोती आगू बाढ़त हे। ए रबी मौसम म जिला म अट्ठारह हजार हेक्टेयर ले जादा के क्षेत्र म दलहन फसल के खेती होवत हे। उहें, करीबन नौ हजार छह सौ हेक्टेयर क्षेत्र म तिलहन के फसल ले जावत हे। जिला म रागी फसल के खेती ल बिसेस रूप ले बढ़ावा दे जावत हे। कमती लागत अउ कमती पानी म तियार होवइया पोषण ले भरे रागी छोटे अउ सीमांत किसान मन बर फायदा के हावय। अभी जिला के बारह सौ किसान मन कोती ले रागी के फसल ले जावत हे।
अउ अब थोरकुन समाचार सार म –
– मनेन्द्रगढ़-चिरमिरी-भरतपुर जिला म जनगणना दू हजार सत्ताईस के तियारी तेज होगे हे। जिला प्रसासन कोती ले जनगणना काम ल व्यवस्थित करे खातिर एजेंसी कोती ले सत्रह झिन कर्मचारी मनके नियुक्ति करे जाही। एखर बर दू मार्च तक अरजी मंगाए गेहे।
– कोंडागांव जिला म कौसल विकास विभाग कोती ले सोलह अउ सत्रह फरवरी के रोजगार मेला लगाए जाही।
– उहें, दुरूग जिला के कोहका के प्रायवेट इंजीनियरिंग कालेज म संभाग स्तरीय रोजगार मेला चउदा अउ पंदरा फरवरी के लगाए जाही, जेमा प्रायवेट कंपनी कोती ले इंटरव्यू ले जाही।
अउ
– जशपुर म दू ठिन फटफटी के बीच होय टक्कर म दू झिन के मउत होगे अउ तीन झन गंभीर रूप ले घायल होगे हे।