प्रधानमंत्री नरेंद्र मोदी ह किहीन हे कि छत्तीसगढ़ म होय बस्तर पंडुम उत्सव म बस्तर के समृध्द संस्कृति, परंपरा अउ आदिवासी विरासत ल बढ़िया ढंग ले देखाय गेहे। सोसल मीडिया पोस्ट म प्रधानमंत्री ह किहीन कि पहिली जब बस्तर के नांव ले जात रिहीस, त माओवाद, हिंसा अउ विकास म पिछड़े होय के छवि दिखत रिहीस, फेर अब हालात बदल चुके हे आज बस्तर विकास के संगेसंग इंहा के लोगन मनके बाढ़त आत्मविस्वास देखे जा सकथे। ओमन किहीन कि अइसन आयोजन भारत के सांस्कृतिक विरासत ल संजो के राखे म बड़का भूमिका निभावत हे। प्रधानमंत्री ह ए उत्सव ले जुड़े जम्मो लोगन मन ल बधई दे हवय।
जानबा के मुताबिक बस्तर के संभागीय मुख्यालय जगदलपुर म सात ले नौ फरवरी तक संभाग स्तरीय बस्तर पंडुम उत्सव राखे गे रिहीस।
अमित शाह-साइबर
केंद्रीय गृह मंत्री अमित शाह ह आज नई दिल्ली म साइबर धोखाधड़ी ले निपटे अउ एखर पारिस्थितिकी तंत्र ल नष्ट करे उपर राखे गे राष्ट्रीय सम्मेलन के उद्घाटन करीन। ए मउका म ओमन किहीन कि साइबर सुरक्षा ह अब देस के सुरक्षा ले जुड़े हे। ओमन किहीन कि सरकार ह देस म साइबर अपराध ल खतम करे बर कतकोन पहल सुरू करे हे। श्री शाह ह किहीन कि भारतीय साइबर अपराध समन्वय केंद्र- आई फोर-सी साइबर अपनराध के खिलाफ एक ठिन जरूरी मंच बन गेहे। ए सम्मेलन के उद्देस्य भारत म साइबर आधारित धोखाधड़ी के पैमाना, रूझान अउ बदलत स्वरूप के बारे म साझा जानकारी विकसित करना हे।
मुख्यमंत्री कन्या विवाह योजना
मुख्यमंत्री कन्या विवाह योजना के तहत प्रदेस के कतकोन जिला मन म आज राज्य स्तरीय विवाह कारीकरम होइस। ए दउरान छै हजार चार सौ ले जादा जोड़ा मनके बिहाव कराय गीस। रईपुर के साईंस कालेज मैदान म राखे गे कारीकरम म तेरह सौ ले जादा जोड़ा मनके रीति-रिवाज के मुताबिक बिहाव कराय गीस। ए जोड़ा मन ल मुख्यमंत्री कन्या विवाह योजना के तहत पैंतीस हजार रूपिया उंखर बैंक खाता म सहायता रासि अउ पंद्रह हजार रूपिया उपहार जिनिस के संगेसंग बिहाव के कारीकरम म खर्चा करे जाही। ए आयोजन ल लेके मुख्यमंत्री ह किहीन कि आज छै हजार ले जादा जोड़ा मन ह अपन नवा जिनगी के सुरूआत करके एक ठिन नवा रिकार्ड बनाय हे। ओमन किहीन कि मुख्यमंत्री कन्या विवाह योजना गरीब अउ गांव म रहइया परिवार मन बर राहत अउ सम्मान के संदेस हरय।
ऐति, कवर्धा म होय कारीकरम म दू सौ बहत्तर जोड़ा मन ह विवाह के बंधन म बंधिस। ए कारीकरम म उपमुख्यमंत्री विजय शर्मा ह सामिल होइन।
एमओयू
मुख्यमंत्री विष्णुदेव साय के अगुवई म आज रईपुर म इलेक्ट्रानिक्स अउ सूचना प्रौद्योगिकीय विभाग अउ सॉफ्टवेयर टेक्नालॉजी पार्क्स ऑफ इंडिया के बीच समझौता ज्ञापन उपर दस्तखत करे गीस। ए एमओयू के तहत राज्य म सेंटर ऑफ एंटरप्रेन्योरशिप अउ इलेक्ट्रानिक्स सिस्टम डिजाइन एंड डेवलपमेंट सेंटर बनाय जाही। एखर माध्यम ले आर्टिफिसियल इंटेलिजेंस, वन अउ औषधीय उत्पाद ले जुड़े मेडटेड, स्मार्ट सिटी समाधान के संगेसंग स्मार्ट कृषि जइसन क्षेत्र म नवाचार अउ स्टार्टअप ल मदद मिलही।
ए मउका म मुख्यमंत्री ह किहीन कि राज्य सरकार ह प्रदेस ल ज्ञान, तकनीक अउ नवाचार के क्षेत्र म अगवा बनाय के दिसा म सरलग काम करत हे।
एसआईआर-दावा/आपत्ति
मतदाता सूची के विशेष गहन पुनरीक्षण-एसआईआर के तहत मिले दावा अउ आपत्ति मन उपर सुनवाई अउ दस्तावेज मनके सत्यापन के काम चौदह फरवरी तक चलही। अब तक राज्य म जारी करे गे करीबन अंठानबे प्रतिसत नोटिस मनके सुनवाई पूरा हो चुके हे। दावा आपत्ति उपर सुनवाई अउ दस्तावेज मनके सत्यापन के काम पूरा होय के बाद पात्र पाय गे अर्जी मनके निराकरण करके इक्कीस फरवरी के मतदाता सूची अंतिम प्रकासन करे जाही। राज्य के मुख्य निर्वाचन पदाधिकारी यशवंत कुमार ह लोगन मनले अपील करे हवय कि ओमन कोनो प्रकार के अफवाह या गलत सूचना ले बचंय। मतदाता सूची ले जुड़े कोनो भी प्रकार के मदद बर निर्वाचन आयोग के वेबसाइट, एखर ले जुड़े बीएलओ या जिला निर्वाचन कार्यालय ले संपर्क करे जा सकथे।
आरबीआई-कार्यशाला
वित्तीय साक्षरता ल बढ़ावा देबर भारतीय रिजर्व बैंक डहार ले रईपुर म राज्य स्तरीय कारीकरम के आायेजन करे गीस। ए दउरान ‘‘केवाईसी- सुरक्षित बैंकिग की ओर पहला कदम‘‘ थीम उपर आधारित वित्तीय साक्षरता सप्ताह के सुरूआत करे गीस। ए दउरान केवाईसी ले जुड़े जम्मो जानबा के संगेसंग पोस्टर जारी करे गीस। वित्तीय साक्षारता सप्ताह के तहत आरबीआई मल्टीमीडिया कैम्पेन चलाय गीस। बैंक मन ल सलाह दे गेहे कि ओमन अपन ग्राहक मन ल एखर जानबा देवय।
राष्ट्रीय फाइलेरिया उन्मूलन कार्यक्रम
राष्ट्रीय फाइलेरिया उन्मूलन कारीकरम के तहत प्रदेस म आज ले सामूहिक दवा सेवन अभियान के सुरूआत हो गेहे। स्वास्थ्य विभाग के अधिकारी मन ह बतइन कि पच्चीस फरवरी तक चलइया ए अभियान के दउरान जम्मो पात्र लोगन मन ल स्वास्थ्य विभाग के टीम डहार ले डीईसी अउ एल्बेंडाजोल के दवई खवाय जाही। दवा सेवन स्वास्थ्य कर्मी मनके निगरानी म डॉट्स पध्दति के माध्यम ले कराय जाही। ए अभियान के तहत दू साल ले कम उमर के लइका, गर्भवती माईलोगिन अउ गंभीर बीमारी ले पीड़ित मनखे मन ल ए दवा नइ दे जाय। उहें, प्रदेस के आंगनबाड़ी केंद्र, स्कूल, सैक्षणिक संस्थान अउ सार्वजनिक जघा मन म सिविर लगाके दवा सेवन कराय जाही, जेखर बाद घरोंघर जाके पात्र मनखे मन ल दवा दे जाही।
अरपा महोत्सव
गौरेला-पेण्ड्रा-मरवाही जिला के पेण्ड्रा स्थित शासकीय स्कूल म आज जिला स्तरीय अरपा महोत्सव के आयोजन करे गीस। ए महोत्सव म मुख्य अतिथि के रूप म मुख्यमंत्री ह सामिल होइन। महोत्सव के दउरान मुख्यमंत्री कन्या विवाह योजना के तहत तीन सौ जोड़ा के मनके सामूहिक बिहाव कराय गीस। महोत्सव वाले जघा म आज संझा सांस्कृतिक कारीकरम घलो राखे गेहे। महोत्सव म विभागीय स्टाल, मेला, झूला अउ फूड जोन घलो लगाय गेहे।
सरगुजा ओलंपिक
सरगुजा संभाग के छै जिला म आज ले जिला स्तरीय सरगुजा ओलंपिक के आयोजन करे जात हे। राज्य के खेल संचालक तनूजा सलाम ह बतइन कि बारह फरवरी तक चलइया ए ओलंपिक म चौदह ले सत्रह साल के बालक-बालिका अउ सत्रह साल ले जादा उमर के महिला-पुरूष मन ह बारह ठिन आने-आने खेल म भाग लेवत हे। ओमन बतइन कि सरगुजा ओलंपिक म भाग लेबर तीन लाख उनचास हजार ले जादा खिलाड़ी मन ह पंजीयन कराय हे। प्रतियोगिता म कबड्डी, खो-खो, बॉलीबॉल, बैडमिंटन, फुटबाल, हॉकी, कुश्ती कराटे, तीरंदाजी, रस्साकसी के संगेसंग आने पारंपरिक खेल मन ल सामिल करे गेहे।
मैनपाट-महोत्सव
सरगुजा जिला के मैनपाट म तेरह ले पंद्रह फरवरी तक ‘‘मैनपाट महोत्सव‘‘ के आयोजन करे जाही। ए महोत्सव के सुभारंभ मुख्यमंत्री ह करही। कारीकरम के अध्यक्षता पर्यटन मंत्री राजेश अग्रवाल करही। तीन दिन तक चलइया ए महोत्सव म लोकगीत अउ आधुनिक संगीत के संगम देखे बर मिलही। ए महोत्सव के उद्देस्य मैनपाट ल राष्ट्रीय अउ अंतरराष्ट्रीय पर्यटन मानचित्र म नवा पहिचान देवाना हे।
भुइंया व्हाट्सऐप चैटबॉट
राजस्व मंत्री टंकराम वर्मा ह रईपुर स्थित अपन निवास कार्यालय म भुइंया व्हाट्सऐप चैटबॉट सेवा अउ ऑटो-डाइवर्जन सुविधा के सुभारंभ करीन। ए दूनों सेवा राज्य म ई-गवर्नेंस, पारदर्सिता अउ नागरिक केंद्रित प्रशासन के दिसा म एक ठिन बड़का कदम हे। ए सेवा के माध्यम ले लोगन मन ल अब राजस्व ले जुड़े सेवा बर ऑफिस के चक्कर नइ कांटे बर पड़य।
ए मउका म राजस्व मंत्री ह किहीन कि भुइंया व्हाट्सऐप चैटबॉट अउ ऑटो डाइवर्जन सुविधा राजस्व विभाग के कामकाज ल सरल अउ बेरा म करे के दिसा म एक ठिन बड़का पहल हे।
बीजापुर-नया सुरक्षा कैम्प
बीजापुर जिला के पल्सेगुण्डी गांव म सुरक्षा बल मन ह नवा सुरक्षा कैम्प बनाय हे। ए कैम्प के बने ले इंहा के लोगन मन ल स्वास्थ्य, शिक्षा, बिजली, पिये के पानी, रासन दुकान, मोबाइल नेटवर्क, सड़क अउ पुल-पुलिया जइसन मूलभूत सुविधा मिलत हे। संगेसंग माओवादी मनके गतिविधि मन ल बने ढंग ले रोके बर मदद घलो मिलत हे। जानबा के मुताबिक जिला म बछर दू हजार चौबीस ले लेके अब तक पैंतीस ठिन सुरक्षा कैम्प के स्थापना करे जा चुके हे।