केंद्रीय गृहमंत्री अमित शाह ह अभी घलो सक्रिय नक्सली मनले अपील करीन हे कि ओमन ह हथियार सौंप के आत्मसमर्पण कर देवय अउ समाज के मुख्यधारा म वापिस लहुटय। सरकार पूरा सम्मान के संग उंखर मनके पुनर्वास करही। आज बस्तर के संभागीय मुख्यालय जगदलपुर म बस्तर पंडुम महोत्सव के समापन समारोह म केंद्रीय गृहमंत्री ह किहीन कि जउन भी नक्सली मन हथियार के साथ संघर्ष ल जारी रखही, ओमन ल बख्से नइ जाही अउ हथियार के जवाब हथियार ले दे जाही। ओमन किहीन कि सरकार के लड़ाई आदिवासी मनके सुरक्षा बर हे। श्री शाह ह किहीन कि दुनिया म माओवाद ले काखरो भला नइ होय हे सब जघा बर्बादीच होय हे।
बस्तर के संस्कृति अउ कला के तारीफ करत केंद्रीय गृहमंत्री ह किहीन कि इंहा के संस्कृति ह भारतीय संस्कृति के गहना हे। ओमन किहीन कि बस्तर के पहिचान बारूद ले नइ, फेर इंहा के संस्कृति अउ विरासत लेहे। केंद्रीय गृहमंत्री ह बतइन कि बस्तर पंडुम महोत्सव म बारह ठन विधा म होय प्रतियोगिता के पहिली तीन विजेता दल ल राष्ट्रपति भवन म बुलाय जाही अउ ओमन ह उंहा अपन कला के प्रदर्सन करही।
समापन समारोह के दउरान केंद्रीय गृहमंत्री श्री शाह ह बस्तर पंडुम महोत्सव म होय आने-आने प्रतियोगिता के विजेता मन ल पुरस्कार दीन। एमा जनजातीय नृत्य बर दंतेवाड़ा के बुधराम सोढ़ी, जनजातीय गीत बर दंतेवाड़ा के पालनार दल, जनजातीय नाट्य बर सुकमा के लेखम लखा, जनजातीय वाद्ययंत्र बर कोंडागांव के रजऊ मंडदी अउ साथी, जनजातीय वेशभूषा बर सुकमा के गुंजन नाग, जनजातीय आभूषण बर नारायणपुर के सुदनी दुग्गा अउ जनजातीय सिल्प बर कांकेर के ओमप्रकाश गावड़े सामिल हे। अइसने, जनजातीय चित्रकला बर कांकेर के दीपक जुर्री, जनजातीय पेय पदार्थ बर बीजापुरक के भैरम बाबा समूह, जनजातीय व्यंजन बर दंतेवाड़ा के ताराबती, आंचलिक साहित्य बर कोंडागांव के उत्तम नाईक अउ बस्तर वन औषधि बर बस्तर के राजदेव बघेल ल सम्मानित करे गीस।
ए मउका म मुख्यमंत्री विष्णुदेव साय अउ उपमुख्यमंत्री विजय शर्मा घलो मौजूद रिहीन।
केंद्रीय गृहमंत्री अमित शाह ह लालबाग मैदान म राखे गे जनजातीय परंपरा अउ संस्कृति म आधारित प्रदर्सनी के अवलोकन करीन। ओमन ह आने-आने स्टाल म घूमके जनजातीय समाज के जीवन म काम आने वाला जिनिस, हस्तसिल्प अउ कला के जानकारी लीन।
खबर के मुताबिक बस्तर पंडुम महोत्सव म जगदलपुर म सात ले नौ फरवरी तक तीन दिन म होय संभाग स्तरीय प्रतियोगिता म बस्तर के सात ठन जिला के कलाकार मन ह बारह ठन आने-आने विधा जइसे-जनजातीय चित्रकला, सिल्पकला, वाद्ययंत्र, गीत, नृत्य जइसन कला के प्रदर्सन करीन।
परीक्षा पे चर्चा
प्रधानमंत्री नरेंद्र मोदी ह लोकप्रिय संवाद कारीकरम परीक्षा पे चर्चा के नौवां संस्करण म विद्यार्थी मनले गोठबात करीन। आज जारी करे गे एखर दूसर वीडियो म ओमन ह परीक्षा के दउरान तनाव अउ चिंता ले निपटे के तरीका उपर गोठबात करीन। श्री मोदी ह विद्यार्थी मन ल परीक्षा के अलावा जीवन कौशल, खेल, रचनात्मकता अउ आत्मविकास म धियान लगाय बर घलो प्रेरित करीन।
प्रधानमंत्री ह ‘वेड इन इंडिया‘ अभियान के बारे म घलो बतइन, जउन ह विदेस के बजाय अपनेच देस म शादी समारोह करे बर प्रोत्साहित करथे।
प्रधानमंत्री नरेंद्र मोदी ह सफलता हासिल करे बर अनुशासन के जरूरत बतइन।
ओमन किहीन कि विद्यार्थी मन ल प्रौद्योगिकीय म निर्भर होय के बजाय एखर उपयोग बुध्दिमानी ले करना चाही। परीक्षा पे चर्चा के दउरान प्रधानमंत्री ह छत्तीसगढ़ के लोकप्रिय व्यंजन ठेठरी अउ खुर्मी के स्वाद घलो चखिन।
ए बछर रईपुर, देवमोगरा, कोयंबटूर, गुवाहाटी अउ दिल्ली के लोक कल्याण मार्ग म परीक्षा योध्दा मन संग संवाद सत्र कराय गीस।
श्रमिक योजना-लाभ
प्रदेस के नगरीय निकाय म काम करइया सफाई कर्मचारी मन ल घलो श्रम विभाग डहार ले चलत कतकोन योजना के फायदा देवाय जाही। नगरीय प्रशासन विभाग ह एखर बर सबो नगरीय निकाय ल पत्र जारी करके पात्र सफाई कर्मी मन ल श्रम विभाग म पंजीयन कराय बर किहीन हे। विभाग ह नगरीय निकाय म काम करत अइसन सफाई कर्मचारी जउन मन ह ईएसआईसी अउ ईपीएफ के पात्रता नइ राखय उंखर श्रम विभाग के असंगठित कर्मकार राज्य सामाजिक सुरक्षा मंडल म पंजीयन कराय के निरदेस दीन हे।
उपमुख्यमंत्री अरूण साव ह किहीन हे कि प्रदेस के सफाई कर्मचारी मन ह हमर सहर के स्वच्छता के रीढ़ हे। उंखर मेहनत अउ समर्पण ल सम्मान देवत राज्य सरकार ए सुनिश्चित करत हे कि कोनो भी पात्र सफाई कर्मी श्रम विभाग के कल्याणकारी योजना ले वंचित झन रहय।
फाइलेरिया उन्मूलन अभियान
राष्ट्रीय फाइलेरिया उन्मूलन कारीकरम म छत्तीसगढ़ म काली दस फरवरी ले सामूहिक दवा सेवन अभियान के सुरूआत करे जाही। एमा राज्य के अट्ठारा जिला के पैंसठ विकास खंड म बूथ के माध्यम ले अउ घर-घर जाके फाइलेरिया रोधी दवा के सेवन कराय जाही।
अरपा महोत्सव
गौरेला-पेण्ड्रा-मरवाही जिला म काली दस फरवरी के अरपा महोत्सव के आयोजन करे जाही। सुभारंभ कारीकरम म मुख्यमंत्री विष्णुदेव साय मुख्य अतिथि के रूप म सामिल होही। महोत्सव के दउरान मुख्यमंत्री कन्या विवाह योजना म तीन सौ जोड़ा के सामूहिक विवाह कराय जाही। संगेसंग मुख्यमंत्री श्री साय कतकोन विकास काम के भूमिपूजन अउ लोकार्पण करही। एखर अलावा कतकोन योजना के हितग्राही मन ल सामग्री अउ सहायता रासि के चेक दे जाही। टीबी मुक्त इंक्यावन पंचायत, बाल विवाह मुक्त इकहत्तर पंचायत अउ गौरेला-पेण्ड्रा के दू नगरीय निकाय ल प्रमाण पत्र दे जाही अउ कलाकार मन डहार ले सांस्कृतिक कारीकरम प्रस्तुत करे जाही।
पेट्रोलियम मंत्रालय-जागरूकता अभियान
केंद्रीय पेट्रोलियम अउ प्राकृतिक गैस मंत्रालय डहार ले पेट्रोलियम संरक्षण अनुसंधान संघ सक्षम जागरूकता अभियान म देसभर म साइक्लोथॉन, वॉकाथॉन अउ पेंटिंग प्रतियोगिता कराय जावत हे। इही कड़ी म आईआईटी भिलाई परिसर म इंडियन ऑयल डहार ले सक्षम अभियान म साइक्लोथॉन अउ वॉकाथॉन के आयोजन करे गीस। सक्षम जागरूकता अभियान के उद्देस्य पेट्रोल, डीजल जइसन प्राकृतिक संसाधन के संरक्षण, ईंधन के बचत अउ पर्यावरण सुरक्षा ल बढ़ावा देना हे। कारीकरम म आईआईटी भिलाई के निदेशक प्रोफेसर राजीव प्रकाश मौजूद रिहीन।
दूरदर्शन-साहित्य पर्व
रईपुर साहित्य महोत्सव के तीन दिन के आयोजन के दूरदर्शन म प्रसारण काली दस फरवरी ले सुरू होही। ए बिसेस कारीकरम ‘‘साहित्य पर्व‘‘ शीर्षक ले दूरदर्शन म प्रसारित करे जाही। कारीकरम के प्रसारण दस, बारह, पंद्रह, सत्रह, उन्नीस अउ बाईस फरवरी के संझा साढ़े तीन बजे ले करे जाही।
– मुख्यमंत्री विष्णुदेव साय के अध्यक्षता म राज्य मंत्रिपरिषद के बइठका ग्यारा फरवरी के बिहनिया ग्यारा बजे ले नवा रईपुर के मंत्रालय म होही।
– सड़क बनाय के मांग ल लेके चक्काजाम करे के मामला म जांजगीर ले कांग्रेस विधायक व्यास कश्यप अउ भाजपा के जिला पंचायत सदस्य उमा राठौर संघरा बारह झन लोगन ल पुलिस ह गिरफ्तार करीस। बाद म ओमन ल जमानत मुचलका म रिहा कर दे गीस।
– गरियाबंद जिला के निजी अस्पताल म इलाज के दउरान होय एक झन मरीज के मउत के मामला म मुख्य चिकित्सा अउ स्वास्थ्य अधिकारी ह चार झन सदस्य वाले विसेसज्ञ जांच समिति के गठन करीन हे।
– सूरजपुर जिला के रामनगर के मोहरा एनीकट म काली नहावत खानी दू झन स्कूली लइका मनके डूबे ले मउत होगे।
अउ
– भोरमदेव सहकारी शक्कर उत्पादक कारखाना कवर्धा ह गन्ना किसान मन ल भुगतान बर छै करोड़ तिरानवे लाख रूपिया के रासि जारी करे हे।