प्रधानमंत्री नरेंद्र मोदी ह अपन लोकप्रिय संवाद कारीकरम ‘‘परीक्षा पे चर्चा‘‘ के नौवां संस्करण के दउरान विद्यार्थी मनले गोठबात करीन। आज जारी एक वीडियो म प्रधानमंत्री ह परीक्षा के दउरान तनाव अउ चिंता ले मुक्ति के तरीका उपर छात्र मन ल संबोधित करीन। श्री मोदी ह छात्र मन ल अपन खुद के अनूठा शिक्षण तरीका उपर भरोसा राखे के सलाह दीन। श्री मोदी ह छात्र मन ले शिक्षक, अभिभावक अउ मार्गदर्सक डहार ले देगे सुझाव ल धियान ले सुने अउ ओला गहराई ले समझे उपर जोर दीन। प्रधानमंत्री ह विद्यार्थी मन ल दूसर के नकल करे के बजाय ओमन ल मिले गे सलाह ल अपन अनुभव म जोड़े उपर प्रोत्साहित करीन। श्री मोदी ह किहीन कि सच्चा आत्मविस्वास तभे आथे, जब मार्गदर्सन ल आत्मविस्वास के संग जोड़े जाथे।
प्रधानमंत्री ह लइका मन ले आर्टिफिसियल इंटिलेजेंस-एआई के सही इस्तेमाल उपर जोर दीन। ओमन किहीन कि एआई तकनीक नवा पीढ़ी बर सुपर पावर ह अउ एखर उपयोग समझदारी अउ सही तरीका ले करे जाना चाही।
परीक्षा पे चर्चा कारीकरम म सामिल होय बर छत्तीसगढ़ ले घलो कुछ लइका नई दिल्ली पहुंचे रिहीन, जेमन ल प्रधानमंत्री ले प्रश्न पूछे के मउका मिलिस। एमा महासमुंद जिला के सृष्टि साहू घलो सामिल हे। सृष्टि ह बतइन कि प्रधानमंत्री ले मिलना उंखर बर गौरव के बात हे। प्रधानमंत्री के मार्गदर्सन हर विद्यार्थी बर प्रेरणादायक हरय।
उहें, परीक्षा पे चर्चा कारीकरम बर दुरूग स्थित पीएम श्री केंद्रीय विद्यालय के अदिति उपाध्याय अउ ख्याति साहू के घलो चयन करे गे रिहीस। ओहू मन प्रधानमंत्री संग अपन बिचार साझा करीन।
राष्ट्रपति-छत्तीसगढ़ दौरा
राष्ट्रपति द्रौपदी मुर्मु काली सात फरवरी के एक दिन के दउरा म जगदलपुर आही। ए मउका म ओमन ‘‘बस्तर पंडुम महोत्सव‘‘ के उद्घाटन करही। राष्ट्रपति जगदलपुर के लालबाग मैदान म राखे गे कारीकरम ल संबोधित करही। निर्धारित कारीकरम के अनुसार श्रीमती मुर्मु महोत्सव स्थल म लगाय गे आने-आने प्रदर्सनी, स्टाल के निरीक्षण करके पारंपरिक हस्तसिल्प, जनजातीय कला, लोक वेसभूषा अउ स्थानीय उत्पाद ल लेके सिल्पकार मनले गोठबात घलो करही। एखर बाद उही दिन राष्ट्रपति जगदलपुर ले रईपुर होके नई दिल्ली बर रवाना हो जही।
बस्तर पंडुम महोत्सव म राज्यपाल रमेन डेका अउ मुख्यमंत्री विष्णुदेव साय ह घलो मौजूद रिही।
अमित शाह-छत्तीसगढ़
केंद्रीय गृह अउ सहकारिता मंत्री अमित शाह काली सात फरवरी ले छत्तीसगढ़ के तीन दिन के दउरा म रिही। अपन प्रवास के दउरान श्री शाह ह राज्य म आंतरिक सुरक्षा, वामपंथी उग्रवाद के समीक्षा करे के संघरा आने-आने कारीकरम म हिस्सा लिही।
निर्धारित कारीकरम के अनुसार श्री शाह काली संझा रईपुर म वरिष्ठ अधिकारी मन संग एक महत्वपूर्ण बइठका करही, जेमा राज्य ले जुड़े आने-आने प्रशासनिक अउ सुरक्षा बिसय उपर चर्चा करे जाही। अगला दिन आठ फरवरी के श्री शाह रईपुर म वामपंथी उग्रवाद उपर एक उच्चस्तरीय सुरक्षा बइठका के अध्यक्षता करही। ए बइठका म केंद्र अउ राज्य सरकार के वरिष्ठ अधिकारी अउ सुरक्षा एजेंसी के प्रतिनिधि सामिल होही। इही दिन केंद्रीय गृह मंत्री राष्ट्रीय कॉनक्लेव ‘छत्तीसगढ़ एट द रेट ट्वेंटी फाइवः शिफ्टिंग द लेंस‘ म मुख्य अतिथि के रूप म सामिल होही।
उहें, श्री शाह नौ फरवरी के जगदलपुर म आयोजित बस्तर पंडुम महोत्सव के समापन कारीकरम म सामिल होही।
प्रभात मिश्रा-छत्तीसगढ़ राजभाषा आयोग
राज्य सरकार ह प्रशासनिक स्तर म एक अहम निर्णय लेवत प्रभात मिश्रा ल छत्तीसगढ़ राजभाषा आयोग के अध्यक्ष नियुक्त करे हे। संस्कृति विभाग कोति ले जारी आदेस के अनुसार प्रभात मिश्रा ल उंखर कार्यभार ग्रहण करे के तिथि ले अवइया आदेस तक अस्थाई रूप ले छत्तीसगढ़ राजभाषा आयोग के अध्यक्ष पद उपर नियुक्त करे गेहे। श्री मिश्रा ए आयोग के चौथा अध्यक्ष होही।
राष्ट्रीय शिक्षानीति-कार्यशाला
नवा राष्ट्रीय शिक्षानीति के क्रियान्वयन ले जुड़े चुनौती अउ संभावना उपर विचार विमर्स के उद्देस्य ले उच्च शिक्षा विभाग डहार ले रईपुर म एक दिवसीय कार्यसाला के आयोजन करे गीस। कार्यसाला म उच्च शिक्षा मंत्री टंकराम वर्मा ह किहीन कि नवा राष्ट्रीय शिक्षा नीति के माध्यम ले शिक्षा ल रोजगारोन्मुख, नवाचार परख अउ वैश्विक स्तर म प्रतिस्पर्धी बनाय जात हे। स्थानीय लोककला अउ सिल्पकला ल पाठ्यक्रम म सामिल करे जाही। भारतीय ज्ञान परंपरा उपर विद्यार्थी मनके बीच ऑनलाइन प्रतियोगिता आयोजित करके ओमन म जागरूकता बढ़ाय जाही।
ज्ञानोदय हब
राजधानी रईपुर के सड्डू म ज्ञानोदय हब के निर्माण करे जात हे। ए केंद्र के सुरू हो जाय ले अनुसूचित जाति, जनजातीय, पिछड़ा अउ कमजोर वर्ग के लइका मन ल प्रतियोगी परीक्षा के तियारी बर बेहतर अवसर मिलही। प्रमुख सचिव सोनमणि बोरा ह ज्ञानोदय हब समेत विभाग डहार ले संचालित करे जात छात्रावास के निरीक्षण करीन।
चिकित्सा महाविद्यालय-काउंसलिंग
चिकित्सा महाविद्यालय म स्नात्कोत्तर स्तर के कक्षा म प्रवेस बर तीसरइया चरण के काउंसलिंग के प्रक्रिया काली ले सुरू हो गेहे। काउंसलिंग के माध्यम ले सरकारी अउ निजी चिकित्सा महाविद्यालय म दू सौ तीस सीट भरे जाही।
हाईकोर्ट-जुर्माना
बिलासपुर उच्च न्यायालय ह छत्तीसगढ़ मेडिकल सर्विसेस कॉरपोरेशन लिमिटेड उपर एक लाख रूपिया के जुर्माना लगाय के आदेस जारी करे हे। मामला जशपुर जिला के कोतबा प्राथमिक स्वास्थ्य केंद्र के हे, एहा अस्पताल भवन के निर्माण बर टेंडर जारी करे गे रिहीस, जेमा याचिकाकर्ता ह सबले कम बोली लगाय रिहीस। एखर बाद भी ओमन ल टेंडर नइ दे गीस। एखर बाद रायगढ़ के प्रतिवादी नटवर लाल अग्रवाल ह हाईकोर्ट म एक याचिका दायर करे रिहीस, जेखर सुनवाई करत मुख्य न्यायाधीश रमेश सिन्हा अउ न्यायमूर्ति रविन्द्र अग्रवाल के डिवीज बेंच ह फइसला सुनाइन कि मेडिकल सर्विसेस कॉपोरेसन लिमिटेड के ए आचरण संविधान के अनुच्छेद चौदह के सीधा उल्लंघन हरय। कोर्ट ह हालाकि ए अस्पताल परियोजना ल जनहित म जारी रखिस, लेकिन कार्पोरेसन के मनमानी स्वीकार करत याचिकाकर्ता ल एक लाख रूपिया के मुआवजा देके आदेस पारित कर दीस।
कमलोचन कश्यप-नियुक्ति
राज्य सरकार ह डीआईजी पद ले सेवानिवृत्त होय आईपीएस कमलोचन कश्यप ल पुलिस मुख्यालय के नवा ओएसडी नियुक्त करे हे। राष्ट्रपति विशिष्ट सेवा मेडल प्राप्त श्री कश्यप ल संविदा नियुक्ति दे गेहे। ए नियुक्ति कार्यभार करे के तिथि ले एक साल के अवधि अउ अवइया आदेस तक जउन भी पहिली हो, मान्य रहइी।
स्वतंत्रता संग्राम सेनानी संग्रहालय
नवा रईपुर शहीद वीर नारायण सिंह स्मारक सह जनजातीय स्वतंत्रता संग्राम सेनानी संग्रहालय के फेस-टू के निर्माण कार्य जल्द ही सुरू करे जाही। एखरे संग कन्वेंशन सेंटर के घलो काम सुरू हो जही। आदिम जाति विकास विभाग के प्रमुख सचिव सोनमणि बोरा ह ए संबंध म आर्किटेक्ट, इंजीनियर अउ विभागीय अधिकारी मनके बइठका लेके जरूरी निरदेस दीन।
दुर्घटना
प्रदेस म पाछू चौबीस घंटा के दउरान दूसर-दूसर चार ठिन सड़क हादसा म आठ मनखे के मउत होगे, जबकि छै झिन दूसर मनखे घायल हो गेहे। मिले जानकारी के अनुसार कोरबा म एक तेज रफ्तार कार के अनियंत्रित होके पलटे जाय ले एक मनखे के मउत होगे। उहें, दू झिन दूसर युवक गंभीर रूप ले घायल हो गेहे।
उहें, रईपुर म एक सरकारी गाड़ी ह स्कूल जात स्कूटर सवार भाई-बहिनी ल टक्कर मार दीस। हादसा म भाई के मउकच म मउत होगे, जबकि स्कूटर सवार बहिनी गंभीर रूप ले घायल हो गेहे।
इही बीच, बिलासपुर जिला म पिकअप वाहन के टक्कर म मोटर साइकिल सवार पति-पत्नी अउ उंखर बेटी के मउत होगे। ए दंपत्ति बेलपान मेला देखके घर लहुटत रिहीन, तभे ग्राम तेंदुआ मोड़ करा ओमन ए दुर्घटना के सिकार होगे।
उहें, कांकेर जिला म माकड़ी गांव करा तेज रफ्तार कार के अनियंत्रित होगे पलटे जाय ले दू झिन नाबालिग के मउत हेगे। ए हादसा म घायल चार युवा मन के इलाज अस्पताल म चलत हे।
माओवादी-मुठभेड़
छत्तीसगढ़ महाराष्ट्र सीमावर्ती क्षेत्र म गढ़चिरौली जिला के भमरागढ़ जंगल म आज सुरक्षा बल अउ माओवादी मनके बीच होय मुठभेड़ म तीन माओवादी मारे गेहे। मुठभेड़ के दउरान सी-सिक्सटी बल के एक जवान सहीद होगिन। जबकि एक झिन दूसर जवान घायल हो गेहे, जेखर इलाज जारी हे।