प्रधानमंत्री नरेन्द्र मोदी काली छह फरवरी के ‘‘परीक्षा पे चर्चा‘‘ कार्यक्रम के नौवां संस्करण के तहत देशभर के छात्र, अभिभावक अउ सिक्षक मनके संग संवाद करही। ए कार्यक्रम म श्री मोदी ह परीक्षा ल लेके तनाव ल कमती करे के संग सकारात्मक सोच विकसित करे अउ विद्यार्थी मन म आत्मविश्वास बढ़ाय बर संवाद करथे। परीक्षा पे चर्चा कार्यक्रम बर छत्तीसगढ़ के दुरूग के पीएमश्री केन्द्रीय विद्यालय के अदिति उपाध्याय अउ ख्याति साहू के घलो चयन करे गेहे।
अमित शाह-छत्तीसगढ़
केन्द्रीय गृह अउ सहकारिता मंत्री अमित शाह सात फरवरी के छत्तीसगढ़ के तीन दिन के दउरा म आही। अपन प्रवास के दउरान श्री शाह ह राज्य म आंतरिक सुरक्षा, वामपंथी उग्रवाद के समीक्षा करे के संगेसंग आने-आने कार्यक्रम सामिल होही।
निर्धारित कार्यक्रम के मुताबिक श्री शाह ह सात फरवरी के संझा रायपुर म बड़का अधिकारी मनके संग एक ठिन महत्वपूर्ण बइठका करही, जेमा राज्य ले जुड़े प्रशासनिक अउ सुरक्षा विषय उपर गोठबात करे जाही। अवइया दिन यानि आठ फरवरी के श्री शाह रायपुर म वामपंथी उग्रवाद उपर एक ठिन उच्चस्तरीय सुरक्षा बइठका के पगरइति करही। ए बइठका म केन्द्र अउ राज्य सरकार के बड़का अधिकारी अउ सुरक्षा एजेंसी के प्रतिनिधि मन सामिल होही। इही दिन केन्द्रीय गृह मंत्री ह राष्ट्रीय कॉनक्लेव ‘छत्तीसगढ़ एट द रेट ट्वेंटी फाइव : शिफ्टिंग द लेंस‘‘ म माईपहुना के रूप म सामिल होही।
अपन प्रवास के तीसर अउ आखिर दिन श्री शाह नौ फरवरी के जगदलपुर म राखे गे बस्तर पंडुम महोत्सव के समापन कार्यक्रम म सामिल होही।
अमित शाह-भारत टैक्सी
केन्द्रीय गृह अउ सहकारिता मंत्री अमित शाह ह आज नई दिल्ली म भारत के पहिली सहकारी आधारित राइड-हेलिंग प्लेटफॉर्म – ‘‘भारत टैक्सी‘‘ के औपचारिक सुभारंभ करीन। ए मउका म श्री शाह ह किहीन कि सरकार ह टैक्सी सेवा क्षेत्र म प्रवेस नइ करत हे, बल्कि सहकारी समिति मन ह ए क्षेत्र म सामिल होवत हे। ओमन कहिन कि सहकारी टैक्सी सेवा ड्राइवर मनके समर्थन करही, ओमन आमदनी बढ़ाही अउ उंखर बर समृद्धि लाही। श्री शाह ह कहिन कि भारत टैक्सी ड्राईवर मन ल मिले किराया म कोनों कमीसन नइ लीहीं।
माओवादी मुठभेड़
बीजापुर जिला म आज सुरक्षा बल मनके संग होय मुठभेड़ म एक झिन माओवादी मारे गेहे। घटना जघा ले माओवादी के सव के संग एक ठिन एके-सैंतालीस रायफल, स्वचलित हथियार, विस्फोटक अउ माओवादी सामान बरामद करे गेहे।
जिला के पुलिस अधीक्षक डॉक्टर जितेन्द्र कुमार यादव ह बतईन कि तर्रेम थाना क्षेत्र के दक्षिण क्षेत्र म दक्षिण बस्तर डिवीजन डीवीसीएम उधम सिंह समेत आने-आने माओवादी मनके मौजूदगी के खबर मिलतेच डिस्ट्रिक्ट रिजर्व गार्ड-डीआरजी अउ कोबरा बटालियन के सामलात टीम सर्चिंग अभियान म निकले रिहीस। इही दउरान पहिली ले घात लगाके बइठे माओवादी मन ह सुरक्षा बल मन उपर गोलीबारी सुरू कर दीन। जवान मन डहार ले करे गे जवाबी कार्रवाई म उधम सिंह मारे गीस। ए माओवादी उपर पुलिस पार्टी उपर हमला करे समेत कई ठिन घटना म सामिल रेहे के आरोप रिहीस। खबर लिखे तक दूनों कोति ले रूक-रूक के गोलीबारी चलत हे।
इही बीच, बीजापुर जिला के ही भट्टीगुड़ा के जंगल ले सुरक्षा बल मन ह माओवादी मन डहार ले डम्प करे गे जिनीस बरामद करे हे। एमा सौ ले जादा आईईडी बनाय के सामान, जिलेटिन पाउडर, छत्तीस किलो डेटोनेटर अउ दू सौ पच्चीस कॉर्डेक्स वायर के संगेसंग बयालीस देशी बैरल ग्रेनेड लांचर सेल सामिल हे।
माओवादी आत्मसमर्पण
इही बीच, बीजापुर जिला म आज आठ माईलोगिन समेत बारह झिन माओवादी मन ह आत्मसमर्पण करे हे। ए जम्मों माओवादी मन उपर कुल चौव्वन लाख रूपिया के इनाम घोषित रिहीस। ए माओवादी मन ह बस्तर रेंज के पुलिस महानिरीक्षक सुंदरराज पी., पुलिस अउ सीआरपीएफ के बड़का अधिकारी मनके आगू आत्मसमर्पण करीन। आत्मसमर्पण के दउरान माओवादी मन ह एक ठिन एके-सैंतालीस रायफल अउ एक ठिन एसएलआर समेत आने-आने हथियार अउ गोला-बारूद घलो सौंपे हे। राज्य सरकार के पुनर्वास नीति के तहत आत्मसमर्पण करइया जम्मों माओवादी मन ल प्रोत्साहन रासि के रूप म पचास-पचास हजार रूपिया के आर्थिक मदद दे गीस।
मयाली-बगीचा विकास परियोजना
मुख्यमंत्री विष्णुदेव साय ह आज स्वेदश दर्शन योजना के तहत जशपुर जिला के मयाली नेचर कैंप म मयाली-बगीचा विकास परियोजना के भूमिपूजन करीन। करीबन दस करोड़ रूपिया के लागत ले बनइया ए परियोजना के तहत प्रसिद्ध मधेश्वर पर्वत अउ बगीचा स्थित कैलाश गुफा क्षेत्र म आने-आने पर्यटन सुविधा के विकास करे जाही।
कार्यक्रम ल संबोधित करत मुख्यमंत्री ह कहिन कि मयाली अब पर्यटन मानचित्र म तेजी ले उभरत हे अउ अवइया बेरा म ए ह एक वैश्विक पर्यटन केन्द्र के रूप म विकसित होही। श्री साय ह कहिन कि मयाली ल इको टूरिज्म अउ एडवेंचर डेस्टिनेशन के रूप म विकसित करे जाही।
कैंसर दिवस-एम्स रायपुर
विश्व कैंसर दिवस म रायपुर स्थित अखिल भारतीय आयुर्विज्ञान संस्थान-एम्स के बाल रोग विभाग डहार ले जागरूकता कार्यक्रम के आयोजन करे गीस। ‘‘आशा और संकल्प के कहानी‘‘ बिसय म आयोजित ए कार्यक्रम म मरीज, उंखर परिवार वाले, डॉक्टर अउ समाजिक संगठन के सहभागिता रिहीस। कार्यक्रम के विशेष आकर्षण ‘‘आशा की आवाज़‘‘ सत्र रिहीस, जेमा कैंसर ले ठीक होय लइका अउ किशोर मन ह अपन उपचार, संघर्ष अउ नवा आसा ले भरे जीवन यात्रा साझा करीन। ए मउका म करीबन पचास लइका अउ किशोर मनके सम्मान करे गीस।
उप पंजीयक कार्यालय
रजिस्ट्री अउ पंजीयन ले जुड़े सेवा लोगन मन ल उपलब्ध कराय बर प्रदेस म चार ठिन नवा उप पंजीयक ऑफिस खोले जाही। राजिस्ट्रीकरण अधिनियम के प्रावधान के तहत धमतरी जिला के भखारा, बलौदाबाजार-भाटापारा जिला के लवन अउ बिलासपुर जिला के सकरी अउ राजकिशोर नगर म उप पंजीयक कार्यालय खोले बर मंजूरी दे गेहे। ए कार्यालय मनके खुले ले संबंधित क्षेत्र के लोगन मन ल रजिस्ट्री काम बर जिला मुख्यालय तक नइ जाय बर पड़ही।
वाणिज्य कर पंजीयन मंत्री ओ.पी. चौधरी ह कहिन कि नवा उप पंजीयक कार्यालय खुले ले पंजीयन व्यवस्था मजबूत होही अउ लोगन मन ल उंखर क्षेत्र म गुणवत्तापूर्ण सेवा मिल सकही।
अग्निवीर भर्ती-आवेदन
भारतीय थल सेना डहार ले छत्तीसगढ़ के अविवाहित पात्र अभ्यर्थी मन ले अग्निवीर सैनिक के आने-आने पद मन म भर्ती बर ऑनलाइन आवेदन मंगाय गेहे। उम्मीदवार एक अप्रैल तक थल सेना के आधिकारिक वेबसाइट म आवेदन कर सकत हे। अग्निवीर भर्ती म जनरल ड्यूटी, तकनीकी, ऑफिस असिस्टेंट, ट्रेडमैन, महिला अउ सैन्य पुलिस अउ नियमित कैडर भर्ती के संगेसंग धर्म गुरू, नर्सिंग सहयोगी अउ हवलदार एसएसी के पद मन म भर्ती करे जाही। भर्ती प्रक्रिया के तहत ऑनलाइन लिखित परीक्षा बाईस अप्रैल के बाद संभावित हवय।
अग्निवीर भर्ती ले जुड़े जानकारी थल सेना के बेबसाइट, सेना भर्ती कार्यालय रायपुर अउ जिला रोजगार अउ स्वरोजगार मार्गदर्शन केन्द्र राजनांदगांव से ले सकत हे।
मयंक पटेल-बॉडीबिल्डिंग
बालोद जिला के दल्लीराजहरा म राखे गे राष्ट्रीय बॉडीबिल्डिंग चैंपियनशिप म कोंडागांव के मयंक पटेल ह सत्तर किलोग्राम वर्ग म स्वर्ण पदक जीते हे। उहें, प्रतियोगिता के ओवरऑल चैंपियनशिप म घलो ओमन ल रजत पदक ले सम्मानित करे गेहे। ए प्रतियोगिता म देसभर के जाने-माने बॉडीबिल्डर्स मन ह भाग लीन।
जांजगीर-आग
जांजगीर-चांपा जिला के बलौदा क्षेत्र म एक ठिन इलेक्ट्रॉनिक सामान के दुकान म आगी लग गे। ए आगी म एकेच परिवार के पांच लोगन मन फंस गे रिहीस, जेमा ले चार झिन ल बाहिर निकाल ले गेहे। उहें, एक झिन लइका अभी घलो फंसे हे। सूचना मिलतेच फायर बिग्रेड के टीम मउका म पहुंचीस अउ आगी म काबू पाय के कोसिस करत हे। उहें, तहसीलदार अउ थाना प्रभारी मउका म मौजूद हवय। ए घटना के सेती बिलासपुर-कोरबा मुख्य रद्दा म अवई-जवई प्रभावित होय हे।