बइठका म पुलिस मुख्यालय के विशेष शाखा के स्पेशल ऑपरेशन ग्रुप-एसओजी के गठन बर चवालीस नवा पद के मंजूरी दे गेहे। मंत्रिपरिषद ह राज्य के आने-आने एयरपोर्ट अउ हवाई पट्टी म उड़ान प्रशिक्षण संगठन-एफटीओ के स्थापना के फइसला लेवत एला चलाय के दिसा-निरदेस के अनुमोदन करीन।
बइठका म मंत्रिपरिषद ह छत्तीसगढ़ नवाचार अउ स्टार्टअप प्रोत्साहन नीति के अनुमोदन करे हे। ए नीति ले स्टार्टअप इको सिस्टम के संग इन्क्यूबेटर्स अउ आने हितधारक मनके बढ़वार होही। उहें, छत्तीसगढ़ गृह निर्माण मंडल अउ रईपुर विकास प्राधिकरण कोति ले बनाय गे अउ पूरा होय पैंतीस ठिन आवासीय कॉलोनी ल नगर निगम अउ नगर पालिका ल सौंपे के फइसला ले गीस। मंत्रिपरिषद ह नवा रईपुर अटल नगर म सरकारी विभाग अउ निगम मंडल के कार्यालय बर एनआरडीए कोति ले एक बहुमंजिला भवन बनाय के फइसला लेहे।
एक आने फइसला म मंत्रिपरिषद ह सिरपुर अउ अरपा क्षेत्र म सरकारी भूईंया के आवंटन के अधिकार संबंधित जिला के कलेक्टर ल देहे। उहें, ‘‘छत्तीसगढ़ क्लाउड फर्स्ट नीति‘‘ ल प्रदेस म लागू करे जाय के मंजूरी घलो दे गेहे। बइठका म डिजिटल अवसंरचना ल बढ़वार दे बर मोबाइल टावर योजना के अनुमोदन करे गेहे।
धान-खरीदी
राज्य सरकार ह प्रदेस म समर्थन कीमत म धान बिसाय के काम ल दू दिन बर आगू बढ़ा देहे। मुख्यमंत्री विष्णुदेव साय के निरदेस म तीन श्रेणी के किसान मन ल धान बेचे बर काली अउ परन दिन यानि पांच अउ छै फरवरी के अलग ले बेरा दे गेहे। पहिली श्रेणी म ओ किसान सामिल हे, जउन मन दस जनवरी के बाद टोकन बर अरजी दे रिहीन, फेर सत्यापन नइ हो पाय के सेती धान बेचे ले बांचे रिहीन। उहें, दूसर श्रेणी म जउन किसान मन दस जनवरी के बाद अरजी करे रिहीन अउ सत्यापन के बाद ओखर तीर धान बाच गे रिहीस अउ तीसर श्रेणी म अट्ठाईस ले तीस जनवरी के टोकन मिले किसान मन जउन कोनों कारण के सेती तय तिथि म धान बेच नइ पाय हे, ओमन ल सामिल करे गेहे।
गृह-नक्सलवाद
केन्द्रीय गृह राज्यमंत्री नित्यानंद राय ह आज स्पष्ट करे हे कि सरकार ए बछर मार्च तक नक्सलवाद मुक्त भारत बर प्रतिबद्ध हवय अउ एखर बर प्रधानमंत्री नरेन्द्र मोदी के अगुवई म कतकोन उदीम करे जात हे। राज्यसभा म प्रश्नकाल के दउरान श्री राय ह किहीन कि सरकार के नीति हवय कि नक्सलवाद ल कतई बर्दास्त नइ करे जाही। ओमन किहीन कि नक्सलवाद उन्मूलन बर छह ठिन प्रायोजित योजना ल लागू करे म दस हजार करोड़ रूपिया ले जादा के खरच करे गेहे। श्री राय ह किहीन कि पहिली जउन सरकार रिहीस, ओमन ए मुद्दा के समाधान एखर सेती नइ करीन, काबर कि उंखर मानना रिहीस कि ए जिम्मेवारी केन्द्र के नइ भलूक, राज्य के हवय। ओमन बतईन कि बछर दू हजार उन्नीस ले अब तक सुरक्षा बल ह तैंतीस बड़े माओवादी मन ल ढेर करे हे। उहें, सात हजार चार सौ ले जादा नक्सली मन ल गिरफ्तार करे गेहे। पांच हजार आठ सौ अस्सी नक्सली मन ह आत्मसमर्पण करीन हे। वामपंथी उग्रवाद ले जुड़े हिंसा के घटना म अठासी प्रतिशत के कमी आय हे। ओमन बतईन कि बछर दू हजार चौदह म करीबन एक सौ छब्बीस जिला नक्सलवाद ले परभावित रिहीस, जउन घटके आठ रहि गेहे। ओमन यहू किहीन कि बछर दू हजार चौदह म दस ठिन राज्य नक्सलवाद ले पीड़ित रिहीस। फेर दू हजार पच्चीस म ए संख्या घटके तीन राज्य तक रहि गेहे।
माओवादी आत्मसमर्पण
ओडिशा के मलकानगिरी जिला म आज इक्कीस लाख रूपिया के इनामी माओवादी सुखराम मरकाम ह पुलिस के आगू आत्मसमर्पण कर दीस। ए बेरा म पुलिस ह ए माओवादी तीर ले एक एसएलआर समेत विस्फोटक जिनीस बरामद करे हे। एसीएम रैंक के सक्रिय कैडर सुखराम मरकाम गजब दिन ले माओवादी संगठन ले जुड़े रिहीस। ए माओवादी मूल रूप ले छत्तीसगढ़ के सुकमा जिला के रहवासी बताय जात हे।
नई गाइडलाइन दर
धमतरी, बलौदाबाजार अउ गरियाबंद जिला म जमीन के नवा गाईड लाइन दर आज ले लागू होगे हे। केन्द्रीय मूल्यांकन बोर्ड ह ए जिला के संशोधन प्रस्ताव ल मंजूरी दे देहे। एखर ले प्रदेस म संपत्ति के कीमत तय करे के काम अउ जादा साफ-गोई अउ सरल हो जही। नवा दर के जानकारी जिला पंजीयन कार्यालय अउ विभाग के आधिकारिक वेबसाइट म हवय। राज्य सासन के मुताबिक आने जिला के प्रस्ताव म घलो जल्दी फइसला ले जाही।
खबर के मुताबिक राज्य म पाछु बीस नवंबर ले नवा गाइड लाइन दर लागू करे गे रिहीस। एखर बाद जिला मूल्यांकन समिति ल स्थानीय जरूरत के मुताबिक दर म बदलाव के प्रस्ताव भेजे के निरदेस दे गे रिहीस।ष्
प्रयोगशाला परिचारक परीक्षा
उच्च सिक्षा विभाग कोति ले प्रयोगशाला परिचारक भर्ती परीक्षा दू हजार तेईस म तीसरा अउ आखिरी मउका के रूप म दू सौ चौव्वन उम्मीदवार मनके दस्तावेज सत्यापन करे जाही। ए संबंध म उच्च शिक्षा विभाग के आयुक्त कोति ले सूचना जारी कर दे गेहे। उम्मीदवार मन ल छह फरवरी के अपन सबो जरूरी दस्तावेज अउ सत्यापन प्रपत्र के संग उपस्थित रेहे बर पड़ही। दस्तावेज सत्यापन के काम रईपुर के विज्ञान महाविद्यालय परिसर म बिहनिया साढ़े दस बजे ले संझाकुन पांच बजे तक होही।
सिरपुर महोत्सव-समापन
पुरातात्विक नगरी सिरपुर म राखे गे तीन दिवसीय सिरपुर महोत्सव काली सिरा गे। समापन कार्यक्रम म बोलत सांसद रूपकुमारी चौधरी ह किहीन कि सिरपुर महोत्सव हमर गौरवशाली परंपरा, सभ्यता अउ संस्कृति ल नवा पीढ़ी तक अमराय के मजबूत माध्यम हे। ओमन किहीन कि केन्द्र अउ राज्य सरकार कोति ले संस्कृति, पर्यटन अउ विरासत ल सुरक्षित करे के प्रयास करे जात हे।
खबर के मुताबिक सिरपुर महोत्सव के दउरान धार्मिक अनुष्ठान, सांस्कृतिक प्रस्तुति, लोक नृत्य, शास्त्री संगीत, भजन-कीर्तन अउ आधुनिक संगीत जइसन कार्यक्रम आयोजित करे गीस। महोत्सव म सुघ्घर प्रस्तुति देवइया कलाकार, सांस्कृतिक दल अउ प्रमुख आयोजक मन ल सम्मानित करे गीस। ए दउरान देस अउ प्रदेस ले आय पर्यटक मन ह ऐतिहासिक धरोहर अउ मंदिर ले देखीन।
वॉलीबॉल-चैंपियनशिप
रईपुर के सरदार बलबीर सिंह जुनेजा इंडोर स्टेडियम म काली ले सैंतीसवां फेडरेशन कप वॉलीबॉल प्रतियोगिता सुरू होगे हे। ए प्रतियोगिता के सुभारंभ मुख्यमंत्री विष्णुदेव साय ह करीन। ए मउका म मुख्यमंत्री ह किहीन कि छत्तीसगढ़ के खिलाड़ी राष्ट्रीय अउ अंतर्राष्ट्रीय स्तर म अपन प्रतिभा देखा सकय, एखर बर राज्य सरकार कोति ले खिलाड़ी मनके प्रसिक्षण अउ अधोसंरचना म विशेष ध्यान दे जावत हे।
छत्तीसगढ़ राज्य वॉलीबॉल एसोसिएशन कोति ले राखे गे ए प्रतियोगिता म छत्तीसगढ़ समेत देसभर के सोलह ठिन टीम भाग लेवत हे। एमा पुरूष वर्ग म दस अउ महिला वरग म छै टीम सामिल हे। ए प्रतियोगिता आठ फरवरी तक चलही।
अउ अब थोरकुन समाचार सार म –
– केन्द्रीय पर्यटन मंत्रालय के प्रसाद योजना म राजनांदगांव जिला के डोंगरगढ़ स्थित मां बम्लेश्वरी देवी मंदिर के विकास बर अड़तालीस करोड़ तिरालीस लाख रूपिया के मंजूरी दे गेहे।
– स्कूल सिक्षा विभाग म चालू वित्तीय बछर म प्रदेस के बैसठ ठिन स्कूल म नवा भवन बनाय बर सात करोड़ बाईस लाख रूपिया ले जादा के मंजूरी दे गेहे। एमा तीस पूर्व माध्यमिक स्कूल अउ बत्तीस प्राथमिक स्कूल सामिल हे।
– इंदिरा गांधी राष्ट्रीय मुक्त विश्वविद्यालय-इग्नू ह जुलाई ले सुरू होवइया सत्र म भर्ती बर आखिरी तारीख इकतीस जनवरी ले बढ़ाके पन्द्रह फरवरी कर देहे।
– एंटी करप्शन ब्यूरो-एसीबी के टीम ह जांजगीर-चांपा जिला के पामगढ़ के अतिरिक्त तहसीलदार करूणा आहिरे अउ पटवारी आयुष धु्रव ल पैंतीस हजार रूपिया के रिश्वत लेवत गिरफ्तार करे हे।
अउ
– श्रीरामलला दर्शन योजना म बिलासपुर रेलवे स्टेसन ले आज साढ़े आठ सौ श्रद्धालु मनके जत्था स्पेशल ट्रेन ले अयोध्याधाम बर रवाना होइस।