भारत-अमरीका व्यापार समझौते
प्रधानमंत्री नरेन्द्र मोदी ह कहिन हे कि अमरीका के संग भारत के ऐतिहासिक व्यापार समझौता सरलग धीरज राखे के बात आय। प्रधानमंत्री ह आज संसदीय दल के बइठका म एनडीए सांसद मन ल संबोधित करत कहिन कि ए व्यापार समझौता ह सुघ्घर आर्थिक वातावरण बनाय हे अउ वैश्विक व्यापार वार्ता के प्रति सरकार के संतुलित दृष्टिकोण ल बताय हे। ओमन कहिन कि विपक्ष ह टैरिफ के आलोचना करीन, फेर सरकार ह धीरज बनाय राखीस अउ एखर परिणाम अब स्पष्ट रूप ले दिखाई देवत हे। प्रधानमंत्री ह किहीन कि विश्व व्यवस्था बदलत हे अउ एखर झुकाव तेजी ले भारत कोति बाढत हे।
भारत-अमरीका व्यापार समझौता के अंतर्गत मेड इन इंडिया उत्पाद मन उपर अमरीका ह भारत म पच्चीस प्रतिशत के जगह अट्ठारह प्रतिशत के टैरिफ लगाही।
भारत-अमरीका व्यापार समझौता के व्यापक स्तर म स्वागत करे जावत हे। उद्योग जगत के संगठन ह कहिन कि एखर ले द्विपक्षीय व्यापार ल बढ़ावा मिलही अउ रोजगार के बढ़ोतरी होही।
छत्तीसगढ़ के उपमुख्यमंत्री अरूण साव ह आज नवा रईपुर म पत्रकार मन ले गोठबात करत किहिन कि भारत-अमेरिका के बीच होय ट्रेड डील अउ टैरिफ ल अट्ठारह प्रतिशत तक सीमित करे जाना बिसेस विषय हरय। ओमन कहिन कि अमेरिकी राष्ट्रपति डहार ले करे गे ए घोषणा स्वागत योग्य हवय अउ एखर ले भारत ल निश्चित रूप ले फायदा मिलही। श्री साव ह कहिन कि ए ह प्रधानमंत्री नरेन्द्र मोदी के दूरदर्शी, कूटनीति के सफलता ल प्रामाणित करथे।
पीएम-परीक्षा पे चर्चा
प्रधानमंत्री नरेन्द्र मोदी ह लोगन मन ले सुक्रवार के ‘‘परीक्षा पे चर्चा‘‘ कार्यक्रम ल देखे के आग्रह करीन हे। एक ठिन सोशल मीडिया पोस्ट म प्रधानमंत्री ह कहिन कि युवा मनके संग गोठबात करना ऊर्जापूर्ण रहिथे। ओमन परीक्षार्थी मन ले तनावमुक्त होके परीक्षा देके, चुनौती ले निपटे के व्यावहारिक तरीका अपनाय के तरीका के संगेसंग सामंजस्य स्थापित करे अउ आत्मविश्वास बढ़ाय उपर जोर दीन। श्री मोदी ह बतईन कि ए बछर परीक्षार्थी मनके संगेसंग रईपुर, देवमोगरा, कोयंबटूर, गुवाहाटी अउ उंखर आधिकारिक आवास, सात लोक कल्याण मार्ग अउ दिल्ली म बिसेस सत्र आयोजित करे गीस।
केन्द्रीय राज्यमंत्री-रेलवे
केन्द्रीय राज्यमंत्री तोखन साहू ह छत्तीसगढ़ म रेलवे अधोसंरचना के जल्दीच विकास बर प्रधानमंत्री नरेन्द्र मोदी अउ रेल मंत्री अश्विनी वैष्णव के प्रति आभार जतईन हे। ओमन बतईन कि राज्य म इंक्यावन हजार अस्सी करोड़ रूपिया के रेलवे परियोजना आने-आने चरण म प्रगति म हवय। ए परियोजना म नवा रेल लाइन के निर्माण, ट्रैक दोहरीकरण, स्टेसन पुनर्विकास अउ यात्री सुरक्षा ले जुड़े काम सामिल हवय। ओमन बतईन कि बछर दू हजार नौ ले चौदह के दउरान छत्तीसगढ़ बर सालाना रेलवे बजट तीन सौ ग्यारह करोड़ रूपिया रिहीस, जउन ह बाढ़के बछर दू हजार छब्बीस-सत्ताईस म सात हजार चार सौ सत्तर करोड़ रूपिया होगे हे।
केन्द्रीय मंत्री ह बतईन कि अमृत स्टेसन योजना म छत्तीसगढ़ के बत्तीस रेलवे स्टेसन मन ल आधुनिक सुविधा ले युक्त करके पुनर्विकसित करे जावत हे। अब तक डोंगरगढ़, अंबिकापुर, भानुप्रतापपुर, भिलाई अउ उरकुरा रेलवे स्टेसन के पुनर्विकास के काम पूरा करे जा चुके हे।
केन्द्रीय राज्यमंत्री-बजट प्रतिक्रिया
केन्द्रीय आवासन अउ सहरी कार्य राज्यमंत्री तोखन साहू ह केन्द्रीय वित्त मंत्री निर्मला सीतारमण डहार ले पेस करे गे बजट ल ‘‘विकसित भारत‘‘ के निर्माण के दिसा म एक दूरदर्सी अउ समावेशी दस्तावेज बतईन हे। ओमन कहिन कि ए बजट सिरिफ वित्तीय प्रावधान के दस्तावेज नइ हे, बल्कि राष्ट्र निर्माण के एक सशक्त रोडमैप हवय। केन्द्रीय मंत्री ह बतईन कि ए बजट आर्थिक विकास, जनशसक्तिकरण अउ समावेशी प्रगति जइसन तीन ‘कर्तव्य‘ उपर आधारित हवय।
केन्द्रीय राज्यमंत्री ह किहीन कि ए बजट छत्तीसगढ़ बर नवा मउका लेके आही। बायोफार्मा हब, सेमीकंडक्टर मिशन, टेक्सटाइल पार्क, एम.एस.एम.ई. सहायता, कार्बन क्रेडिट अउ ग्रामीण अर्थव्यवस्था ले जुड़े योजना राज्य के औद्योगिक अउ आर्थिक विकास ल गति दीहीं। ओमन बतईन कि पांच हजार करोड़ रूपिया के अर्बन इकोनॉमिक रीजन, म्युनिसिपल बॉन्ड प्रोत्साहन अउ सहरी बुनियादी ढांचा के सुधार ले छत्तीसगढ़ के सहर मन ल नवा मजबूती मिलही।
‘‘प्रोजेक्ट अंतरिक्ष संगवारी‘‘
मुख्यमंत्री विष्णुदेव साय ह आज नवा रायपुर के राखी गांव स्थित एक सासकीय स्कूल म ‘‘प्रोजेक्ट अंतरिक्ष संगवारी‘‘ के सुभारंभ करीन। ए केन्द्र छत्तीसगढ़ सरकार अउ एक निजी संस्था के मदद ले सुरू करे गेहे। ए मउका म अंतरिक्ष यात्री ग्रुप कैप्टन शुभांशु शुक्ला घलो मौजूद रिहीन।
मुख्यमंत्री ह कहिन कि प्रोजेक्ट अंतरिक्ष संगवारी वैज्ञानिक सोच के नर्सरी हरय, जिहां लइका मन सैटेलाइट निर्माण, ट्रैकिंग अउ अंतरिक्ष तकनीक ले जुड़े आधुनिक कौशल सीख सकही।
उहें, ग्रुप कैप्टन शुभांशु शुक्ला ह कहिन कि अंतरिक्ष के क्षेत्र म आगू बाढ़े बर अइसन केन्द्र के महत्वपूर्ण साबित होही।
ग्रेड सेपरेटर-राशि मंजूर
रायपुर अउ भिलाई-दुर्ग के बीच सुघ्घर यातायात बर राष्ट्रीय राजमार्ग क्रमांक-तिरपन म सिरगा गेट अउ खुर्सीपार गेट चौक म ग्रेड सेपरेटर बनाय जाही। राज्य सासन के प्रस्ताव म केन्द्रीय सड़क परिवहन अउ राजमार्ग मंत्रालय ह एखर बर ससत्तर करोड़ छत्तीस लाख रूपिया के मंजूरी देहे।
रायपुर अउ दुर्ग के बीच ग्रेड सेपरेटर के बने ले दूनों कोति अवइया-जवइया गाड़ी मन ल कोनों जघा रूकना नइ पड़ही। दूनों सहर के बीच कुम्हारी चउक, डबरा पारा, पावर हाउस चौक अउ सुपेला चौक म पहिलीच ले फ्लाईओवर्स बनाय गेहे।
तोमन कुमार-पदक
सातवां एनटीपीसी पैरा राष्ट्रीय तीरंदाजी प्रतियोगिता म छत्तीसगढ़ के तोमन कुमार ह व्यक्तिगत खेल स्पर्धा म रजत अउ सामूहिक टीम स्पर्धा म स्वर्ण पदक जीते हे। ए प्रतियोगिता पंजाब के एनएसआईएस पटियाला म तीस जनवरी ले दू फरवरी तक राखे गे रिहीस। बालोद जिला के तोमन कुमार ह पाछु दू बछर ले बिलासपुर स्थित तीरंदाजी एकेडमी म प्रसिक्षण लेवत हे।
खबर के मुताबिक तोमन कुमार केन्द्रीय रिजर्व पुलिस बल-सीआरपीएफ के जवान रहि चुके हे। नक्सल ऑपरेशन के दउरान आईईडी विस्फोट म ओमन अपन बायां गोड़ ल गंवा देहे।
रंग महोत्सव
रायपुर के पंडित दीनदयाल उपाध्याय ऑडिटोरियम म आज संझा ले पच्चीसवां भारत रंग महोत्सव के सुरूआत होही। राष्ट्रीय नाट्य विद्यालय कोति ले राखे गे ए महोत्सव आठ फरवरी तक चलही। महोत्सव म देस के आने-आने राज्य ले आए रंगमंच समूह मन ह अपन सुघ्घर प्रस्तुति दीहीं।
उद्घाटन प्रस्तुति के रूप म बाबा नागार्जुन के उपन्यास उपर आधारित नाटक ‘पारो‘ के मंचन करे जाही। उहें, काली चार फरवरी के बिरू मुखोपाध्याय डहार ले लिखे गे अउ बिधान चंद्र हालदार डहार ले निर्देशित बांग्ला नाटक ‘शास्ति‘ के मंचन होही।
वित्तीय धोखाधड़ी
भिलाई स्थित छत्तीसगढ़ स्वामी विवेकानंद तकनीकी विश्वविद्यालय म पीएचडी करत विद्यार्थी मन ले सुल्क के नाम म करीबन नौ लाख चवालीस हजार रूपिया के वित्तीय धोखाधड़ी के मामला आगू आय हे। विश्वविद्यालय प्रसासन के सिकायत म नेवई पुलिस ह पीएचडी साखा म पदस्थ कनिष्ठ सलाहकार सुनील कुमार प्रसाद के खिलाफ धोखाधड़ी के मामला दर्ज करके जांच सुरू कर देहे। जांच म आगू आय हे कि कनिष्ठ सलाहकार डहार ले विद्यार्थी मन ले नकद रासि लेके ओमन ल फर्जी सुल्क रसीद दे रिहीस। कुछेक मामला म रासि ल उंखर निजी बैंक खाता म घलो ऑनलाइन ट्रांसफर कराय गेहे।
इही बीच, ऑनलाइन सामान भेजे ले मिले नकद रासि म गबन अउ धोखाधड़ी के मामला म भिलाई पुलिस ह कंपनी के सुपरवाइजर ल गिरफ्तार कर लेहे। आरोपी उपर वाउचर अउ बैंक जमा रासि म एक लाख रूपिया ले जादा के हेराफेरी करके कंपनी ल आर्थिक नुकसान पहुंचाय के आरोप हवय।
अउ अब थोरकुन समाचार सार म –
– मुख्यमंत्री विष्णुदेव साय के अगुवई म काली चार फरवरी के मंत्रालय म राज्य मंत्रिपरिषद के बइठका होही।
– सर्वोच्च न्यायालय ह कांग्रेस विधायक अउ पूर्व आबकारी मंत्री कवासी लखमा ल राज्य म प्रवर्तन निदेशालय-ईडी डहार ले कथित सराब घोटाला के जांच के सिलसिला म अंतरिम जमानत दे देहे।
अउ
– सक्ती जिला म पुलिस ह चौरानवे नग नसीला सिरफ के संग चार आरोपी मन ल गिरफ्तार करे हे।