केंद्रीय वित्त मंत्री निर्मला सीतारामन ह आज लोकसभा म वित्त वर्ष-दू हजार छब्बीस-सत्ताईस के बजट पेस करीन। वित्त मंत्री ह अपन नौवां बजट ल युवा सक्ति संचालित बजट बतइन। ओमन बजट म खादी, हथकरघा अउ हस्तसिल्प ल मजबूत करे बर महात्मा गांधी ग्राम स्वराज पहल सुरू करे के प्रस्ताव करीन। उहें, मेगा टेक्सटाइल पार्क बनाय बर बजट म नेशनल फाइबर स्कीम अउ नेशनल हैंडलूम के संगेसंग हैंडीक्राफ्ट प्रोग्राम के कारीकरम घलो प्रस्ताव करीन। वित्त मंत्री ह बजट म चुने गे मानदंड के आधार उपर उद्यम मन ल प्रोत्साहित करके भविष्य के चैंपियन एसएमई बनाय बर दस हजार करोड़ रूपिया के एक ठिन फंड पेस करीन।
वित्त मंत्री ह इलेक्ट्रॉनिकी कंपोनेंट्स मैन्युफैक्चुरिंग स्कीम के खरचा ल बढ़ाके चालीस हजार करोड़ रूपिया करे के प्रस्ताव करीन। उहें, खनन, प्रसंस्करण, अनुसंधान अउ विनिर्माण ल बढ़ावा देबर तीन ठिन केमिकल पार्क बनाय जाय के घोसना करीन। बजट म मुंबई-पुणे, पुणे-हैदराबाद, हैदराबाद-बेंगलुरू, हैदराबाद-चेन्नई, चेन्नई-बेंगलुरू, दिल्ली-वाराणसी अउ वाराणसी-सिलीगुड़ी के बीच सात ठिन हाई-स्पीड रेल कॉरिडोर विकसित करे के प्रस्ताव करीन।
ओमन बतइन कि सरकार ह विकसित भारत बर बैंकिंग क्षेत्र के समीक्षा बर बैंकिंग उपर एक ठिन उच्च स्तरीय समिति बनाय के फइसला लेहे।
केंद्रीय बजट
बजट म वित्त मंत्री ह स्वास्थ्य सेवा के क्षेत्र म घलो कतकोन घोसना करीन। कैंसर रोगी मन बर सत्रह ठिन दवई अउ औषधी मन उपर मूल सीमा सुल्क ले छूट दे गेहे। उहें, तीन ठिन नवा अखिल भारतीय आयुर्वेद संस्थान बनाय जाही। वित्त मंत्री ह बतइन कि सरकार ह खेल क्षेत्र ल बढ़ावा देबर खेलो इंडिया मिशन सुरू करही। अइसने, सरकार ह निम्हान्स-दू के स्थापना करही अउ रांची, तेजपुर म राष्ट्रीय मानसिक स्वास्थ्य संस्थान मन ल क्षेत्रीय संस्थान के रूप म आगु लाही।
ओमन बतइन कि आयकर म कोनो बदलाव नइ करे गेहे। फेर संसोधित रिटर्न या विलंबित रिटर्न दाखिल करे के बेरा ल बढ़ाय के प्रस्ताव करे गेहे। संसोधित रिटर्न दाखिल करे के बेरा ल बछर के बाद इकतीस मार्च तक तय करे गेहे। संगेसंग सरकार ह लाभांस अउ म्यूचुअल फंड आय उपर ब्याज कटौती ल हटाय के घोसना करे हे। एखर अलावा बजट म वायदा कारोबार उपर एसटीटी सून्य दसमलव दू प्रतिसत ले बढ़ाके सून्य दसमलव पांच प्रतिसत करे गेहे। वित्त मंत्री ह बतइन कि उच्च शिक्षा अउ एसटीईएम संस्थान मन म छात्रा मनके चुनौती के समाधान बर हरेक जिला म नोनी मन बर एक ठिन छात्रावास बनाय जाही। एखर अलावा आईआईएम के साझेदारी म, हाईब्रिड मोड म प्रसिक्षण पाठ्यक्रम के माध्यम ले बीस ठिन पर्यटन वाले जघा म दस हजार गाइड के नियुक्ति करे जाही।
बजट-प्रतिक्रिया
प्रधानमंत्री नरेंद्र मोदी ह केंद्रीय बजट ल ऐतिहासिक बताय हे। प्रधानमंत्री ह अपन संदेस म किहीन कि ए बजट एक सौ चालीस करोड़ भारतीय मनके उम्मीद ल दर्साथे। ए बजट ह देस हित म हवय अउ एखर ले देस के विकास ल नवा ऊर्जा मिलही। बजट विकसित भारत के सपना के आधार हे।
त उहें, छत्तीसगढ़ के मुख्यमंत्री विष्णुदेव साय ह केंद्रीय बजट उपर अपन बात राखत किहीन कि ए बजट भारत के सुनहरा अउ विकसित भविष्य के दिसा म ऐतिहासिक दस्तावेज हरय। मुख्यमंत्री ह किहीन कि ए बजट ह गरीब, किसान, युवा, महिला, मध्यम वर्ग अउ मजूर मनके सफलता बर मील के पत्थर साबित होही। ओमन किहीन कि छत्तीसगढ़ जइसन राज्य मन ल ए बजट के सोज्झे फायदा मिलही।
बजट-प्रतिक्रिया
बजट उपर प्रतिक्रिया देवत उपमुख्यमंत्री अरूण साव ह किहीन कि बजट म ‘सबका साथ-सबका विकास‘ के भावना ल केंद्र म राखे गेहे। ओमन किहीन कि छत्तीसगढ़ बर ए बजट के सबले बड़का घोसना जनजातीय समुदाय मनके स्वास्थ्य अउ बुनियादी ढांचा ले जुड़े हे। केंद्र सरकार ह छत्तीसगढ़ के संगेसंग आठ ठिन राज्य मन म जनजातीय स्वास्थ्य वेधशाला बनाय के फइसला लेहे। ऐति, उद्योग मंत्री लखनलाल देवांगन ह किहीन कि ए बजट छत्तीसगढ़ के औद्योगिक, कृषि अउ ग्रामीण विकास ल नवा गति दिही। ओमन किहीन कि आत्मनिर्भर भारत के लक्ष्य के मुताबिक औद्योगिक कलस्टर मन ल एक घांव फेर आगु लाय बर दू हजार करोड़ रूपिया के प्रावधान ले छत्तीसगढ़ म सूक्ष्म, लघु अउ मध्यम उद्योग मन ल मजबूत करे जाही। एखर ले स्थानीय युवा मन ल रोजागर के मउका मिलही। अइसने स्वास्थ्य मंत्री श्याम बिहारी जायसवाल ह किहीन कि ए बजट देस के स्वास्थ्य व्यवस्था ल मजबूत अउ सरल बनाय के दिसा म मील के पत्थर साबित होही।
बजट-प्रतिक्रिया
ऐति, महिला अउ बाल विकास मंत्री लक्ष्मी राजवाड़े ह किहीन कि ए बजट गरीब, किसान, युवा अउ माईलोगिन मन ल केंद्र म राख के तियार करे गेहे। उहें, भाजपा के प्रदेस अध्यक्ष किरण देव ह बजट ल मध्यम वर्ग के क्षमता बढ़इया वाले बताय हे। ओमन किहीन कि ए बजट ह विकसित भारत के लक्ष्य के दिसा म एक ठिन अहम कदम हरय।
दूसर कोति, कांग्रेस ह केंद्रीय बजट ल निरासाजनक बताय हे। पूर्व मुख्यमंत्री भूपेश बघेल ह किहीन हे कि बजट म स्वास्थ्य, शिक्षा, सामाजिक विकास अउ ग्रामीण विकास ले लेके सहरी विकास तक हर क्षेत्र म कटौती करे गेहे। ओमन किहीन कि ए बजट म बाढ़त महंगाई अउ बेरोजगारी ल रोके के कोनो परयास नइ करे गेहे। उहें, प्रदेस कांग्रेस अध्यक्ष दीपक बैज ह किहीन कि ए बजट देस के जनता ल निरास करइया हरय। ओमन किहीन कि शिक्षा, स्वास्थ्य रोजगार बर ए बजट म कुछू नइ हे।
राजिम मेला/सिरपुर महोत्सव
महानदी, पैरी अउ सोंढूर नदिया के त्रिवेणी संगम म आज ले मांघी पूर्णिमा राजिम कुंभ कल्प सुरू हो गेहे। एखर उद्घाटन अब ले थोरिक देर बाद राज्यपाल रमेन डेका ह करही। राजिम कुंभ कल्प म शाही स्नान बर नदिया म श्रध्दालु मन बर बिसेस व्यवस्था करे गेहे। राजिम कुंभ कल्प म रोजेच संझा महानदी आरती के संगेसंग सांस्कृतिक कारीकरम होही।
इही बीच, रेलवे ह राजिम कुंभ मेला म अवइया श्रध्दालु मनके सुविधा बर आज ले पंद्रह फरवरी तक रईपुर अउ राजिम के बीच दू ठिन राजिम कुंभ मेला मेमू स्पेसल रेलगाड़ी चलाय के फइसला लेहे।
उहें, ऐतिहासिक अउ सांस्कृतिक नगरी सिरपुर म घलो आज ले तीन दिन तक चलइया सिरपुर महोत्सव सुरू हो गेहे। आज कारीकरम के उद्घाटन मुख्यमंत्री विष्णुदेव साय ह करही। ए दउरान मुख्यमंत्री ह महासमुंद जिला बर एक सौ निन्यानबे करोड़ रूपिया ले जादा के बिकास काम के लोकार्पण अउ भूमिपूजन करही। सिरपुर महोत्सव वाले जघा म सरकारी विभाग डहार ले स्टॉल अउ प्रदर्सनी लगाय जाही। स्टॉल के माध्यम ले लोगन मन ल शासन के योजना अउ जन कल्याणकारी कारीकरम के जानबा दे जाही। सिरपुर महोत्सव म पढ़इया छात्र मन डहार ले बनाय गे पेंटिंग प्रदर्सनी घलो बिसेस आकर्षण के केंद्र रइही।
आज ले ही जांजगीर-चांपा जिला के शिवरीनारायण म शिवरीनारायण मेला घलो सुरू होगे।
मुख्यमंत्री विष्णुदेव साय ह आज दामाखेड़ा म माघी पूर्णिमा के मउका म राखे गे सतगुरू कबीर संत समागम समारोह म सामिल होइन। ए मउका म ओमन संत समागम समारोह बर दे जाय पइसा पचास लाख रूपिया ल बढ़ाके पचहत्तर लाख रूपिया करे के घोसना करीन। समारोह ल संबोधित करत मुख्यमंत्री ह किहीन कि कबीर धर्म नगर दामाखेड़ा के संत समागम समारोह ह हर साल भव्य होते जात हे। ओमन बतइन कि दामाखेड़ा के नांव कबीर धर्मनगर करे के बारे म राजपत्र म प्रकासन बर आखिरी प्रक्रिया जारी हे। मांघी पूर्णिमा के मउका म मुख्यमंत्री ह प्रदेस के लोगन मन ल सुभकामना दीन।
अउ अब थोरकुन समाचार सार म –
– कबीरधाम पुलिस ह चिल्फी थाना क्षेत्र ले गांजा ले जावत तीन झिन अंतर्राज्यीय तस्कर मन ल गिरफ्तार करे हे। एखर मन तीर ले करीबन सोलह किलो गांजा बरामद करे गेहे। जेखर भाव करीबन पौने आठ लाख रूपिय बताय गेहे।
अउ
– रईपुर कमिश्नरेट क्षेत्र म नसा के खिलाफ चलाय जात बिसेस अभियान के तहत खम्हारडीह थाना क्षेत्र ले लाखों रूपिया के हुक्का अउ प्रतिबंधित जिनिस जब्त करे गेहे। ए मामला म पुलिस ह एक झिन आरोपी ल गिरफ्तार करे हे।