केंद्रीय कृषि मंत्री शिवराज सिंह चौहान ह अपन एक दिन के दउरा म आज छत्तीसगढ़ पहुंचिन। ए दउरान ओमन दुरूग जिला के गिरहोला-खपरी गांव के दउरा करीन। ए मउका म ओमन प्रधानमंत्री किसान सम्मान निधि, राष्ट्रीय कृषि विकास योजना, प्राकृतिक खेती अउ टपक पध्दति ले सिंचई जइसन योजना ल लेके किसान मन ले गोठबात करीन। गिरहोला गांव म केंद्रीय मंत्री ह आमा के पउधा लगइन।
केंद्रीय कृषि मंत्री ह कुम्हारी म छत्तीसगढ़ युवा प्रगतिसील किसान संघ डहार ले राखे गे किसान मेला म सामिल होइन। केंद्रीय मंत्री ह किहीन कि सरकार के परयास हे कि संसद के इही सत्र म सीड अउ पेस्टीसाइड एक्ट लाय जाही। एखर ले नकली खातू अउ नकली बीजा बनाय अउ बेचे उपर रोक लगही। कृषि मंत्री ह किहीन कि खेती ल फायदा वाले बनाना हे, त किसान मन ल परंपरागत खेती के संगेसंग फल-फूल अउ सब्जी के खेती घलो करना पड़ही।
शिवराज सिंह चौहान-रायपुर
केंद्रीय कृषि मंत्री शिवराज सिंह चौहान आज नवा रईपुर म ग्रामीण विकास, कृषि अउ किसान कल्याण ले जुड़े रोडमैप उपर समीक्षा बइठका के अगुवई करीन। बइठका म मुख्यमंत्री, उपमुख्यमंत्री अउ कृषि मंत्री रामविचार नेताम सामिल होइन। बइठका म केंद्रीय कृषि मंत्री ह किहीन हे कि विकसित भारत जी-राम-जी योजना के लागू होय ले गांव मन म विकास के रफ्तार बाढ़ही। ए दउरान ओमन एनआरएलएम म खाली पद ल जल्दी भर्ती के माध्यम ले पूरा करे के निरदेस दीन।
बाद म पत्रकार मनले गोठबात करत कृषि मंत्री ह किहीन कि मुख्यमंत्री के अगुवई म छत्तीसगढ़ सरकार ह खेती के क्षेत्र म बढ़िया काम करत हे।
केंद्रीय बजट
केंद्रीय वित्त मंत्री निर्मला सीतारमण ह काली एक फरवरी के लोकसभा म वित्तीय वर्ष दू हजार छब्बीस-सत्ताईस के केंद्रीय बजट पेस करही। लोकसभा के बाद बजट के कापी ल राज्यसभा म पेस करे जाही। संसद म बजट भाषण खतम होय के बाद बजट के प्रति ल मोबाइल ऐप अउ वेबसाइट म घलो देखे जा सकथे। केंद्रीय वित्त मंत्री ह बजट के बाद देस के आने-आने क्षेत्र के कालेज ले आय तीस झिन छात्र मनले गोठबात करही।
अबूझमाड़ पीस हाफ मैराथन
अबूझमाड़ के धरती ले पूरा देस अउ दुनिया ल सांति के संदेस देके संगेसंग आज नारायणपुर म अबूझमाड़ पीस हाफ मैराथन के आयोजन करे गीस। मुख्यमंत्री ह नारायणपुर के हाई स्कूल परिसर ले ए मैराथन ल हरा झंडी दिखाके रवाना करीन। ए दउरान मुख्यमंत्री ह जीतइया प्रतिभागी मन ल मेडल घलो दीन। ए मउका म मुख्यमंत्री ह किहीन कि बस्तर ह माओवाद मुक्त होय ले इंहा के युवा मन म जोस अउ उछाह देखे जात हे।
इक्कीस किलोमीटर लंबा ए हाफ मैराथन नारायणपुर ले बासिंग तक राखे गे रिहीस। जेमा साठ ले जादा विदेसी प्रतिभागी मनके संगेसंग छत्तीसगढ़ अउ आने-आने राज्य मनके दस हजार ले जादा धावक मन भाग लीन। ए मैराथन म आत्मसमर्पण करइया माओवादी युवा मन ह घलो भाग लीन। एखर बाद आज मुख्यमंत्री ह नारायणपुर जिला के गरांजी स्थित परीयना दिव्यांग अवासीय विद्यालय म जाके इंहा के पढ़इया छात्र मनले गोठबात करीन। लइका मनके मांग उपर मुख्यमंत्री ह स्कूल म एक ठिन बस देके घोसना करीन।
मुख्यमंत्री-नारायणपुर
मुख्यमंत्री विष्णुदेव साय ह काली नारायणपुर म तीन सौ इंक्यावन करोड़ रूपिया ले जादा के आने-आने विकास काम के लोकर्पण अउ भूमिपूजन करीन। ए मउका म ओमन छै ठिन निर्माण काम के घोसना करीन। जेमा नारायणपुर के ओरछा-आदेर-लंका-बेदरे-कुटरूमैमे
ए मउका म मुख्यमंत्री ह बस्तर पंडुम के जिला स्तरीय कारीकरम म घलो सामिल होइन। ए दउरान ओमन आदिवासी व्यंजन, पहिरावा, आभूषण अउ प्राचीन धरोहर मन ल ठीकठाक राखे के बात किहीन। मुख्यमंत्री ह बस्तर प्रवास के दउरान आईटीबीपी, सीआरपीएफ, कोबरा बटालियन, बीएसएफ, डीआरजी, सीएएफ के जवान अउ अधिकारी मनले मिलके ओखर हिम्मत बढ़ाइन।
राजिम मेला/सिरपुर महोत्सव
महानदी, पैरी अउ सोंढूर नदिया के त्रिवेणी संगम म काली एक फरवरी के मांघी पूर्णिमा के मउका म राजिम कुंभ कल्प सुरू हो जही, जउन ह महाशिवरात्रि पंद्रह फरवरी तक चलही। राजिम कुंभ कल्प के उद्घाटन राज्यपाल रमेन डेका ह करही। काली के शाही स्नान बर नदिया म बैरिकेटिंग लगाय के संगेसंग सुरक्षा के तगड़ा व्यवस्था करे गेहे। राजिम कुंभ कल्प म काली ले रोजेच संझा महानदी आरती के संगेसंग सांस्कृतिक कारीकरम होही।
त उहें, ऐतिहासिक अउ सांस्कृतिक नगरी सिरपुर म घलो काली ले तीन दिन तक चलइया सिरपुर महोत्सव सुरू हो जही। काली के कारीकरम के उद्घाटन मुख्यमंत्री विष्णुदेव साय ह करही। ए दउरान मुख्यमंत्री ह महासमुंद जिला बर एक सौ निन्यानबे करोड़ रूपिया ले जादा के बिकास काम के लोकार्पण अउ भूमिपूजन करही। सिरपुर महोत्सव वाले जघा म सरकारी विभाग डहार ले स्टॉल अउ प्रदर्सनी लगाय जाही। स्टॉल के माध्यम ले लोगन मन ल शासन के योजना अउ जन कल्याणकारी कारीकरम के जानबा दे जाही। सिरपुर महोत्सव म पढ़इया छात्र मन डहार ले बनाय गे पेंटिंग प्रदर्सनी घलो बिसेस आकर्षण के केंद्र रइही।
काली ले ही जांजगीर-चांपा जिला के शिवरीनारायण म शिवरीनारायण मेला सुरू होही।
मुख्यमंत्री ह माघी पूर्णिमा के मउका म सुरू होवत राजिम कुंभ कल्प, सिरपुर महोत्सव अउ शिवरीनारायण मेला के मउका म प्रदेस के लोगन मन ल बधई अउ सुभकामना दे हवय।
भूमि-नई गाइडलाइन
राज्य सरकार डहार ले रईपुर अउ कोरबा जिला मन बर जारी संशोधित भूमि गाइडलाइन ल लेके रियल एस्टेट क्षेत्र, इंहा के लोगन, जन प्रतिनिधि अउ व्यापारी मन म उछाह देखे जात हे। नवा गाइडलाइन ल लोगन मनके हित म बतावत छत्तीसगढ़ रियल एस्टेट डेवलपर्स एसोसिएसन क्रेडाई के संगेसंग आने-आने प्रतिनिधि मंडल मन ह वित्त मंत्री ओपी चौधरी ले मिलके आभार जतइन।
मध्य क्षेत्रीय परिषद-बैठक
नवा रईपुर म काली मध्य क्षेत्रीय परिषद के स्थायी समिति के बइठका होइस। बइठका म परिषद के सदस्य राज्य-छत्तीसगढ़, मध्यप्रदेस, उत्तरप्रदेस, उत्तराखंड अउ केंद्र सरकार के बड़का अधिकारी मनके बीच चारों राज्य मन म सामाजिक आर्थिक विकास, योजना मनके बने ढंग ले काम, रोके गे बिसय मन के निराकरण जइसन कतकोन बिसय उपर गोठबात होइस। ए दउरान ए राज्य मनले जुड़े प्रशासनिक, आर्थिक अउ सामाजिक मुद्दा के समाधान खोजे उपर जोर दे गीस।
बइठका म मध्य क्षेत्रीय परिषद के स्थायी समिति के अध्यक्ष अउ छत्तीसगढ़ के मुख्य सचिव विकाससिंह के संगेसंग केंद्रीय गृह मंत्रालय के अंतर्राज्यीय परिषद सचिवालय के सचिव आशीष श्रीवास्तव अउ बड़का अधिकारी मन सामिल होइन।
मध्यान्ह भोजन योजना
स्कूल शिक्षा विभाग ह प्रधानमंत्री पोषण शक्ति निर्माण योजना के तहत मध्यान्ह भोजन योजना ल सरलग चलाय के निरदेस दे हे। जानबा के मुताबिक योजना म काम करइया रसोइया मन ह पाछू अट्ठाईस दिसंबर ले अनिश्चितकालीन हड़ताल म हवय, जेखर सेति कोनो-कोनो स्कूल मन म मध्यान्ह भोजन के काम नइ चल पात हे। शासन ह स्पष्ट केहे हे कि कोनो भी स्थिति म स्कूल मन म मध्यान्ह भोजन के काम चलना चाही।
महिला सेना पुलिस-भर्ती रैली
जबलपुर के सेना भर्ती कार्यालय डहार ले तेईस फरवरी के महिला सेना पुलिस पद बर भर्ती रैली राखे गेहे। ए भर्ती रैली कटनी जिला के झिंझरी पुलिस मैदान म होही, जेमा छत्तीसगढ़ के घलो तैंतीस जिला के चुनेगे महिला प्रतिभागी मन भाग लिही। भर्ती रैली के दउरान शारीरिक दक्षता अउ दस्तावेज के सत्यापन म सफल महिला उम्मीदवार मनके डॉक्टरी जांच चौबीस फरवरी के जबलपुर के सेना अस्पताल म होही। भर्ती रैली म भाग लेवइया महिला उम्मीदवार मनके प्रवेस पत्र भारतीय सेना के अधिकारिक वेबसाइट म जारी कर दे गेहे। उम्मीदवार मन ल रैली वाले जघा म प्रवेस पत्र, शैक्षणिक अउ पहिचान ले जुड़े दस्तावेज अउ आधार कार्ड ले लिंक मोबाइल नंबर लाय के निरदेस दे गेहे।