आज राष्ट्रपिता महात्मा गांधी के पुण्यतिथि आय। आजिक दिन ल शहीद दिवस के रूप म मनाय जाथे अउ हर बछर 30 जनवरी के जम्मो देस ह बापू के ‘‘जिनगी अउ विरासत‘‘ ल सुरता करथे।
नई दिल्ली के राजघाट म गांधी समाधि जघा सर्वधर्म प्रार्थना सभा के आयोजन करे गिस। ए मउका म राष्ट्रपति, उपराष्ट्रपति, प्रधानमंत्री अउ गृहमंत्री अमित शाह मन, महात्मा गांधी के समाधि म पुष्पांजलि अर्पित करिन।
प्रधानमंत्री ह सोसल मीडिया पोस्ट म किहीन कि गांधीजी स्वदेसी जिनिस उपर बिसेस जोर देइन, जउन विकसित अउ आत्मनिर्भर भारत के संकल्प के मूलभूत स्तंभ हे।
छत्तीसगढ़ के राज्यपाल रमेन डेका ह लोकभवन म राष्ट्रपिता महात्मा गांधी के छायाचित्र म पुष्पांजलि अर्पित करिन। ए बेरा ओमन किहीन कि गांधीजी ह मातृभूमि के सेवा बर सर्वस्व न्योछावर कर देइन, उंखर आदर्स अउ बिचार जम्मो दुनिया बर आज घलो प्रासंगिक हे।
उहें, मुख्यमंत्री विष्णुदेव साय ह घलो रइपुर स्थित अपन निवास म बापू ल सुरता करत नमन करिन।
जमीन-गाइड लाइन दर
छत्तीसगढ़ म जमीन के नवा संसोधित गाइडलाइन दर जारी कर दे गेहे। जिला मूल्यांकन समिति मन ले मिले प्रस्ताव के आधार म जमीन के नवा गाइडलाइन दर ल मंजूरी के संग प्रकासित कर दे गेहे। नवा गाइडलाइन म सहर के मुकाबला ग्रामीन क्षेत्र के दर म भारी कमी आय हे। उहें, नवा संसोधित गाइडलाइन दर आज ले ही प्रभावसील हो गेहे।
यूथ ग्राम सभा प्रतियोगिता
गरियाबंद जिला के एकलव्य आदर्श आवासीय विद्यालय कोसमबुड़ा के टीम ह नई दिल्ली म आयोजित राष्ट्रीय मॉडल यूथ ग्रामसभा प्रतियोगिता म पहिली पुरस्कार पाय हे। ए प्रतियोगिता भारत सरकार के पंचायती राज मंत्रालय के डहार ले आयोजित करे गे रिहीस, जेमा देसभर के 800 ले जादा स्कूल मन भाग ले रिहीन। ए सफलता बर मुख्यमंत्री विष्णुदेव साय, उपमुख्यमंत्री विजय शर्मा अउ आदिम जाति विकास मंत्री रामविचार नेताम ह एकलव्य आवासीय विद्यालय के लइका मन ल बधई देइन हें।
माओवादी-आत्मसमर्पण
सुकमा जिला म आज चार झन माओवादी मन आत्मसमर्पण कर देइन। एमा दू झन घलो माईलोगन घलो सामिल हें। ए माओवादी मन उपर कुल आठ लाख रूपिया के इनाम घोसित रिहीस। ए सबो माओवादी मन गोल्लापल्ली, कोंटा अउ किस्टराम इलाका म सक्रिय रिहीन हें। जेमन आज सुकमा जिला मुख्यालय म आयोजित एक ठन कारीकरम म बस्तर पुलिस महानिरीक्षक सुंदरराज पी. अउ पुलिस अधीक्षक किरण चव्हाण के संगे सुरक्षाबल के आने बड़का अधिकारी मन के आगु आत्मसमर्पण करिन। ए बेरा चारों माओवादी मन अपन हथियार घलो पुलिस ल सौंपिन।
राज्यपाल-दीक्षांत समारोह
राज्यपाल रमेन डेका आज, श्री रावतपुरा सरकार विश्वविद्यालय के चौथा दीक्षांत समारोह म सामिल होइन। ए मउका म तिरपन झन शोधार्थी मन ल पी.एच.डी. के उपाधि अउ 19 झन छात्र मन ल स्वर्ण पदक के संगे एक हजार चार सौ अड़तालीस छात्र मन ल उपाधि दे गिस। ए कारीकरम म राज्यपाल ह पद्मश्री फुलबासन बाई यादव, छत्तीसगढ़ के प्रसिध्द लेखक, कवि अउ गीतकार रामेश्वर वैष्णव के संगे हिंदी अउ छत्तीसगढ़ी के प्रसिध्द नाट्य कलाकार अउ लेखक विजय मिश्रा ल घलो डॉक्टर के मानद उपाधि प्रदान करिन। कारीकरम ल संबोधित करत राज्यपाल ह किहीन कि- ज्ञान के उपयोग सिरिफ अपन हित बर नइ, भलुक देस अउ समाज बर होना चाही।
गांजा तस्करी-आरोपी गिरफ्तार
एंटी नारकोटिक्स टास्क फोर्स अउ महासमुंद पुलिस के टीम ह कोमाखान इलाका म एंबुलेंस ले करीबन दू करोड़ साठ लाख कीमत के पांच सौ बीस किलो गांजा जब्त करे हे। ए मामला म पुलिस ह नौ झन आरोपी मन ल गिरफ्तार करे हे। एमा दू झन बेचइया, एक झन लेवइया, एक झन परिवहन सरगना, चार परिवहनकर्ता अउ एक झन मुख्य थोक विक्रेता सामिल हें। आरोपी म प्रमुख खरीदार रामदास चंदू सोनवाने पुणे ले गिरफ्तार होइस। उहें, मुख्य सरगना आकाश जाधव ल घलो गिरफ्तार करे गिस। ए कारवाही ‘‘ऑपरेसन निश्चय‘‘ के तहत करे गिस।
पुलिस कमिश्नरेट-प्रतिबंध
नाबालिग अउ युवा मन म बाढ़त नसा के सेवन ल देखत रइपुर पुलिस कमिश्नर के डहार ले रइपुर नगरीय क्षेत्र म रोलिंग पेपर, गोगो स्मोकिंग कोन अउ पर्फेक्ट रोल बेचइया मन उपर पूरा प्रतिबंध लगाय गिस। ए आदेस तत्काल प्रभाव ले लागू होगे हे। आदेस म केहे गे हे कि आने-आने सोसल मीडिया, सामाजिक संगठन अउ लोगन ले मिले जानकारी म ए आगू आय रिहीस कि नाबालिग अउ युवा मन म नसा जिनिस के परयोग बड़ तेजी ले बाढ़त हे। जारी आदेस ले रइपुर नगरीय क्षेत्र म पान ठेला, किराना, चाय दुकान, कैफे अउ रेस्टोरेंट जइसन जघा ले नसा जिनिस के बिक्री पूरा प्रतिबंध रइही। जदि, कोनो आदेस के उल्लंघन करही त, कानून के तहत दंडात्मक कार्रवाई करे जाही।
मुख्यमंत्री-नारायणपुर
मुख्यमंत्री विष्णुदेव साय दू दिन के नारायणपुर दउरा म हें। आज राज्य स्तरीय कारीकरम म महतारी वंदन योजना के चौबीसवीं किस्त के रासि जारी करिन। ए मउका म प्रदेस के अड़सठ लाख उनतालीस हजार ले जादा हितग्राही मनके खाता म छै सौ इकतालीस करोड़ चौंतीस लाख रूपिया डाले गिस।
आज ‘गढ़बेंगाल घोटुल‘ पहुंचके बस्तर के परंपरा अउ लोक-संस्कृति के प्रति अपन प्रतिबध्दता प्रदर्सित करिन। ए मउका म पारंपरिक बाजा के संग गा्रामीन मन मुख्यमंत्री मन मुख्यमंत्री मन जोरदार सुवागत करिन। ए बेरा मुख्यमंत्री ह घोटुल स्थापत्य कला के निरीक्षण करिन अउ बस्तर के विभूति मनले भेंट करके उंखर हौसला बढ़ाइन। ए बेरा मुख्यमंत्री किहीन कि घोटुल प्राचीनकाल ले ही आदिवासी समाज बर शिक्षा अउ संस्कार के केंद्र रेहे हे।
उहें, मुख्यमंत्री ह वैद्यराज पद्मश्री हेमचंद मांझी, पद्मश्री पंडीराम मंडावी अउ प्रसिध्द लोक कलाकार बुटलू राम ले भेंट करके उंखर सम्मान करिन।
सिरपुर-महोत्सव
एक ले तीन फरवरी तक सिरपुर महोत्सव के आयोजन करे जाही। एखर सुभारंभ मुख्यमंत्री विष्णुदेव साय करहीं अउ कारीकरम के अध्यक्षता पर्यटन- संस्कृति मंत्री राजेश अग्रवाल करहीं। सिरपुर महोत्सव के मउका म मुख्यमंत्री ह महासमुंद जिला म एक सौ निन्यानबे करोड़ रूपिया ले जादा के आने-आने बिकास कारज के लोकार्पण अउ भूमिपूजन करहीं।
सिरपुर महोत्सव के समापन तीन फरवरी के होही, जिहां मुख्य अतिथि के रूप म प्रभारी मंत्री दयालदास बघेल सामिल होहीं।
डेयरी बोर्ड-दुग्ध
राष्ट्रीय डेयरी विकास बोर्ड के अध्यक्ष डॉ. मिनेश शाह ह किहीन हें कि भारत म दूध उत्पादन अउ किसान मनके आय बढ़ाय बर अवइया पांच बछर म, 75 हजार नवा गांव मन ल डेयरी सहकारिता ले जोड़े जाही। ओमन बतइन कि ए योजना ‘‘व्हाइट रिवॉल्यूशन-टू‘‘ के दिसा म एक ठन बड़का कदम होही। डॉ. शाह ह काली दुरूग के कामधेनु विश्वविद्यालय के दीक्षांत समारोह म ए गोठ किहीन।
डॉ. मिनेश शाह ह यहू किहीन कि राष्ट्रीय डेयरी विकास बोर्ड ह छत्तीसगढ़ के दुग्ध महासंघ के प्रबंधन ल संभाले हे। राज्य म ग्यारा अधिकारी तैनात करे गेय हें अउ अब तक करीबन दू सौ गांव म नवा डेयरी समिति घलो बनाय जा चुके हे। ओमन बतइन कि राज्य म ‘देवभोग‘ ब्रांड के तहत दूध अउ ओखर आने-आने उत्पाद के बजार घलो बिस्तार करे गेय हे, एखर संगेसंग संयंत्र के साफ-सफाई अउ सुरक्षा उपर घलो बिसेस धियान दे जावत हे।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘‘बातों-बातों में‘‘ ए दरी पद्मश्री सम्मान बर छत्तीसगढ़ ले चुने गेय, डॉ. बुधरी ताती, सुनीता गोडबोले अउ उंखर पति रामचंद्र गोडबोले के भेंटवार्ता के प्रसारण काली आकाशवाणी केंद्र रइपुर डाहर ले एफ.एम. अउ प्रायमरी चैनल म बिहनिया 9 बजे ले करे जाही। जेला छत्तीसगढ़ के जम्मो आकाशवाणी केंद्र एके संघरा रिले करही।