देस म चालू वित्त बछर म वास्तविक सकल घरेलू उत्पाद वृद्धि दर ह सात दशमलव चार प्रतिशत रेहे के अनुमान हे। उहें, अवइया वित्त बछर म ए वृद्धि दर ह छह दशमलव आठ ले सात दशमलव दू प्रतिशत के बीच रहि सकत हे। ए अनुमान आज संसद म केन्द्रीय मंत्री निर्मला सीतारमण कोति ले पेस करे गे आर्थिक सर्वेक्षण म व्यक्त करे गेहे। आर्थिक सर्वेक्षण के अनुसार वि-निर्माण गतिविधि मजबूत होय हे अउ कृषि क्षेत्र ह स्थिरता देहे। ए सर्वेक्षण म केहे गेहे कि अनुकूल मानसून परिस्थिति के मदद ले चालू वित्त वर्ष म कृषि अउ संबंद्ध गतिविधि के वृद्धि ह तीन दशमलव एक प्रतिशत रेहे के अनुमान हे। उहें, उपभोक्ता मूल्य सूचकांक म आधारित कुल महंगाई दर ह घटके एक दमशलव सात प्रतिशत रहि गेहे, जेखर मुख्य कारण साग-भाजी अउ दार के कीमत म सुधार हे।
वित्त मंत्री कोति ले आर्थिक सर्वेक्षण पेस करे के बाद सदन के कार्यवाही ल दिनभर बर स्थगित कर दे गीस। अब सदन के अगला कार्यवाही एक फरवरी इतवार के होही। इही दिन केन्द्रीय बजट ल पेस करे जाही।
महात्मा गांधी-पुण्यतिथि
राष्ट्रपिता महात्मा गांधी के पुण्यतिथि ल काली देशभर म शहीद दिवस के रूप म मनाय जाही। उहें, छत्तीसगढ़ म घलो कतकोन कार्यक्रम होना हे। केन्द्रीय गृह मंत्रालय कोति ले जारी करे गे पत्र के अनुसार काली बिहनिया ग्यारह बजे दू मिनट के राष्ट्रव्यापी मौन रखके महात्मा गांधी अउ आने स्वतंत्रता संग्राम सेनानी मन ल श्रद्धांजलि दे जाही। एखर बर बिलासपुर राजस्व बोर्ड के अध्यक्ष ह सचिव, सबो विभाग के प्रमुख, संभागीय आयुक्त, कलेक्टर अउ जिला पंचायत के मुख्य कार्यकारी अधिकारी मन ल निरदेस जारी करीन हे।
विधानसभा बजट-सत्र
छत्तीसगढ़ विधानसभा के बजट सत्र ह तेईस फरवरी ले सुरू होवइया हे। बीस मार्च तक चले वाले ए सत्र के चलत कुल पन्द्रह ठिन बइठका होही। विधानसभा सचिवालय कोति ले एखर बर अधिसूचना दे गेहे। बजट सत्र के सुरूआत राज्यपाल के अभिभाषण ले होही अउ सत्र के बेरा म वित्तीय काम के संगेसंग आने-आने सरकारी काम ल संपादित घलो करे जाही।
विजय शर्मा-पत्रकारवार्ता
उपमुख्यमंत्री अउ पंचायत तथा ग्रामीण विकास मंत्री विजय शर्मा ह आज अपन विभाग के पाछू दू बछर के बेरा म करे गे काम के उपलब्धि ल बतईन। नवा रायपुर म पत्रकार मन ले गोठ करत हुए श्री शर्मा ह कहिन कि पाछु दू बछर म राज्य के लगभग पांच लाख माईलोगिन मन ल लखपति दीदी बनाय गेहे। अवइया बेरा म राज्य के दस लाख माईलोगिन मन ल लखपति दीदी बनाय के लक्ष्य राखे गेहे। ओमन ह बतईन कि राज्य म दू लाख बयासी हजार ले जादा स्व-सहायता समूह हे। श्री शर्मा ह किहीन कि राज्य म दू ‘‘बकरी पालक महिला किसान उत्पादन कंपनी‘‘ अउ एक राज्य स्तरीय ‘‘पशुधन विपणन संघ‘‘ बनाय जाही। उहें, माईलोगिन मन ल उद्यमी बनाय बर भारतीय प्रबंध संस्थान-आईआईएम रायपुर के सहयोग ले एक इन्क्यूबेसन केन्द्र बनाय जाही।
श्री शर्मा ह बतईन कि पाछु दू बछर म प्रधानमंत्री आवास योजना ग्रामीण के चलत चौरासी लाख घर बनाय जा चुके हे। उहें, बस्तर क्षेत्र म ‘‘नियद नेल्लानार योजना‘‘ के चलत नौ हजार ले जादा आवास निर्माण ल मंजूरी दे गेहे, जेमा ले बाईस सौ घर बनाय के काम ल पूरा कर ले गेहे।
मुख्य सचिव-सम्मानित
मुख्य सचिव विकासशील ह आज मंत्रालय म ई-ऑफिस म अच्छा काम करइया अधिकारी-कर्मचारी मन ल सम्मानित करीन हे। ए बेरा म मुख्य सचिव ह सबो अधिकारी अउ कर्मचारी मन ल जरूरी रूप ले तय करे गे बेरा म बायोमेट्रिक उपस्थिति ल दरज कराय के निरदेस दीन। संगेसंग ओमन ह राज्य सासन के सबो कार्यालय म ई-ऑफिस ले ही फाईल संचालन करे बर किहीन हे। मुख्य सचिव ह बतईन कि अवइया बेरा ले अधिकारी अउ कर्मचारी मनके छुट्टी ले संबंधित आवेदन ल ई-ऑफिस प्रणाली ले ही स्वीकार करे जाही।
माओवादी-मुठभेड़
बीजापुर जिला म आज सुरक्षा बल मनके संग होय मुठभेड़ म दू झिन माओवादी मन मारे गेहे। घटना वाले जघा ले दूनों माओवादी मनके सव के अलावा एके फोर्टी-सेवन रायफल, नौ एमएम पिस्तौल अउ आने हथियार के संग गोला बारूद घलो जब्त करे गेहे।
जिला के पुलिस अधीक्षक डॉक्टर जितेन्द्र यादव ह बतईन कि बीजापुर के दक्षिण क्षेत्र म माओवादी मनके रेहे के सूचना मिले म डिस्ट्रिक्ट रिजर्व गार्ड-डीआरजी के टीम ह खोज बर निकले रिहीन। इही बेरा म पहिली ले घात लगाके बइठे माओवादी मन ह सुरक्षा बल मन उपर गोली चलाना सुरू कर दीन, जेखर बाद जवान मन कोति ले करे गे जवाबी कार्रवाई म दू झिन माओवादी मन मारे गीन। पुलिस अधीक्षक ह बतईन कि ए जघा म सर्चिंग अभियान बढ़ा दे गेहे।
भारत पर्व
नई दिल्ली के लालकिला के ज्ञान पथ म होय राष्ट्रीय सांस्कृतिक और पर्यटन महोत्सव-भारत पर्व म छत्तीसगढ़ के कलाकार मन ह आज सांस्कृतिक कार्यक्रम के प्रस्तुति दीन। छह दिन तक चलइया ए महोत्सव म छत्तीसगढ़ के लोक संस्कृति, पारंपरिक व्यंजन अउ पर्यटन पवेलियन ल देखे बर बड़का संख्या म लोगन मन पहुंचत हे। पवेलियन के माध्यम ले राज्य के प्राकृतिक सौंदर्य, समृद्ध जनजातीय संस्कृति, तिहार अउ प्रमुख पयर्टन स्थल के जानकारी दे जात हे। एखर उद्देश्य देश-विदेश के पर्यटक मन ल छत्तीसगढ़ के पर्यटन स्थल ले अवगत कराना हे। एखर अलावा कर्तव्य पथ म गणतंत्र दिवस परेड म सामिल छत्तीसगढ़ के झांकी के घलो ए कार्यक्रम म प्रदर्सित करे गेहे, जउन कि लोगन मनके बीच आकर्षण के केन्द्र बने हे।
सरगुजा ओलंपिक-शुभंकर
मुख्यमंत्री विष्णुदेव साय ह आज बस्तर ओलंपिक के जइसे होय वाले सरगुजा ओलंपिक के ‘‘लोगो‘‘ अउ ‘‘शुभंकर‘‘ ‘‘गजरू‘‘ के अनावरण करीन। ए बेरा म ओमन ह कहिन कि अब सरगुजा संभाग के खेल प्रतिभा ल घलो अपन क्षमता देखाय के मउका मिलही।
उहें, उपमुख्यमंत्री अरूण साव ह किहीन कि ए कार्यक्रम ले सरगुजा के खिलाड़ी मन ल अपन प्रतिभा अउ कौसल देखाय के अच्छा मंच मिलही। ओमन ह बतईन कि सरगुजा ओलंपिक के विजेता खिलाड़ी मन ल राज्य के प्रसिक्षण अकादमी म सीधा प्रवेस दे जाही। ओमन ल यूथ आइकॉन घोषित करके युवा अउ लइका मन ल खेल ले जुड़े अउ खेले बर घलो प्रेरित करे जाही।
जानबा के अनुसार सरगुजा ओलंपिक के आयोजन तीन चरण – विकासखंड, जिला अउ संभाग स्तर म करे जाही। एखर बर अट्ठाईस दिसंबर तक पच्चीस जनवरी तक छह जिला ले साढ़े तीन लाख खिलाड़ी मन ह अपन पंजीयन कराय हे। सरगुजा ओलंपिक के चलत कबड्डी, खो-खो, तीरंदाजी फुटबॉल, वॉलीबॉल, हॉकी, कुश्ती, रस्साकसी समेत बारह ठिन विधा म खेल प्रतियोगिता कराय जाही।
अबूझमाड़ पीस हाफ मैराथन
नारायणपुर म इकतीस जनवरी के ‘‘अबूझमाड़ पीस हाफ मैराथन‘‘ के आयोजन होही। ए मैराथन म मुख्यमंत्री विष्णुदेव साय ह घलो सामिल होवइया हे। कार्यक्रम के सुरूआत जुंबा गतिविधि ले होही, जेखर बाद बिहनिया साढ़े छह बजे मुख्यमंत्री ह मैराथन के सुभारंभ करही।
इक्कीस किलोमीटर के ए हाफ मैराथन दौड़ नारायणपुर ले बासिंग तक होही। एमा भाग ले बर छत्तीसगढ़ समेत आने राज्य ले साढ़े छह हजार ले जादा धावक मन ह अपन पंजीयन कराय हे, जेमा सौ ले जादा अंतर्राष्ट्रीय धावक घलो सामिल हरय।
अउ अब थोरकुन समाचार सार म –
– मुख्यमंत्री विष्णुदेव साय ह काली ले नारायणपुर जिला के दू दिन के प्रवास म रइही। ए बेरा म जिला म तीन सौ इकसठ करोड़ रूपिया ले जादा के कतकोन विकास कार्य के लोकार्पण अउ भूमिपूजन करइया हे।
– रायपुर के सेजबहार के सासकीय इंजीनियरिंग महाविद्यालय म आज ले तीन दिन के राज्य स्तरीय रोजगार मेला के आयोजन करे जात हे। पहिली दिन दू हजार नब्बे झिन अभ्यर्थी मनके साक्षात्कार होइस। मेला के माध्यम ले पन्द्रह हजार ले जादा खाली पद म सीधा भर्ती करे जाही।
– जांजगीर-चांपा जिला के मोहतरा गांव म फ्लाईएश के समस्या ल लेके गांव वाला मन ह आज बिर्रा-शिवरीनारायण रद्दा म चक्काजाम करीन, जेखर सेती इहां करीबन चार घंटा तक अवई-जवई ह प्रभावित होइस।
– जांजगीर-चांपा जिला के नवापारा गांव म ट्रैक्टर के चपेट म आय ले मोटर साइकिल म सवार दू झिन जवान लइका के मउत होगे।