संसद के बजट सत्र आज ले सुरू होगे हे। बजट सत्र के पहिली दिन संसद के दूनों सदन के संयुक्त बइठका ल संबोधित करत राष्ट्रपति द्रौपदी मुर्मु ह किहीन कि ग्रामीण क्षेत्र म रोजगार अउ विकास बर विकसित भारत जी-राम-जी कानून लागू करे गेहे। नवा कानून के तहत गांव म एक सौ पच्चीस दिन के रोजगार गारंटी सुनिश्चित करे गेहे। ए कानून भ्रष्टाचार अउ गबन ल रोके म सहायक होही। राष्ट्रपति ह किहीन कि सरकार के सरलग प्रयास ले आज सामाजिक सुरक्षा योजना के लाभ लगभग पंचानवे करोड़ भारतीय मन ल मिलत हे। जबकि बछर दू हजार चौदह के सुरूआत म केवल पच्चीस करोड़ नागरिक मन ल ही ए योजना के फायदा मिलत रिहीस।
राष्ट्रपति ह किहीन कि ऑपरेशन सिंदूर ह आतंकवाद के खिलाफ दुनिया म भारत के कड़ा रूख पेस करे हे। ओमन किहीन कि पाछु एक बछर म दू हजार माओवादी मन आत्मसमर्पण करे हे। श्रीमती मुर्मु ह माओवाद के समस्या ले मुक्त होवत बस्तर के घलो जिकर करीन। ओमन किहीन कि पूरा देस माओवाद ले प्रभावित इलाका मन म बदलाव देखत हे।
केन्द्रीय मंत्री-मुलाकात
उपमुख्यमंत्री अरूण साव ह आज नई दिल्ली म केन्द्रीय सड़क परिवहन अउ राजमार्ग मंत्री नितिन गडकरी ले मुलाकात करीन। ए दउरान ओमन राज्य सासन डहार ले प्रस्तावित आने-आने सड़क परियोजना ल मंजूरी देके आग्रह करीन। श्री साव ह केन्द्रीय मंत्री ले बिलासपुर म बायपास निर्माण, भारतमाला परियोजना के तहत रईपुर ले बिलासपुर तक सिक्सलेन मार्ग के मंजूरी देके संघरा मुंबई-नागपुर मार्ग के विस्तार रईपुर तक करे के अनुरोध करीन। ओमन छत्तीसगढ़ म तेरह ठिन राष्ट्रीय राजमार्ग के उन्नयन के संघरा आठ सड़क ल नवा राष्ट्रीय राजमार्ग घोषित करे के घलो आग्रह करीन।
उपमुख्यमंत्री श्री साव ह नई दिल्ली म खेल अउ युवा कल्याण मंत्री डॉक्टर मनसुख मांडविया ले घलो भेंट करके राज्य म खेल के प्रशिक्षण अउ खेल अधोसंरचना ल मजबूत करे बर राज्य सासन के प्रस्ताव ल मंजूरी देके अनुरोध करीन। उपमुख्यमंत्री ह केन्द्रीय मंत्री ले राज्य सासन के प्रस्ताव के अनुसार भारतीय खेल प्राधिकरण के क्षेत्रीय केन्द्र शुरू करे, बिलासपुर स्थित खेलो इंडिया एक्सिलेंस सेंटर म दू ठिन अतिरिक्त खेल के मंजूरी दे अउ रईपुर म टेनिस के खेलो इंडिया एक्सिलेंस सेंटर के स्वीकृति प्रदान करे के अनुरोध करीन।
उहें, मुख्यमंत्री विष्णुदेव साय ले काली रईपुर म केन्द्रीय कृषि मंत्री शिवराज सिंह चौहान ह भेंट करीन। ए दउरान मुख्यमंत्री अउ केन्द्रीय मंत्री के बीच छत्तीसगढ़ के किसान मनके सशक्तिकरण, कृषि विकास अउ ग्रामीण आजीविका ले जुड़े विषय उपर चर्चा होइस। श्री चौहान ह प्रदेस म प्रधानमंत्री आवास योजना के क्रियान्वयन अउ माओवाद प्रभावित क्षेत्र मन म संचालित नियद नेल्लानार योजना के अंतर्गत बनाए जावत आवास निर्माण के पहल के सराहना करीन।
विमान हादसा-अजित पवार निधन
महाराष्ट्र के उपमुख्यमंत्री अजित पवार के आज बारामती म विमान हादसा म निधन होगे। नागर विमानन मंत्रालय ह बताय हे कि वी.एस.आर. डहार ले संचालित लेयरजेट-फोर्टी फाइव वीटी-एस.एस.के. विमान बारामती हवाई अड्डा म उतरत बेरा दुर्घटनाग्रस्त होगे। ए हादसा म विमान म सवार जम्मों पांच मनखे के मउत होगे। एमा उपमुख्यमंत्री के संग दू झन कर्मी अउ दू विमान कर्मी सदस्य सामिल हे।
राष्ट्रपति द्रौपदी मुर्मु, उपराष्ट्रपति सी.पी. राधाकृष्णन, प्रधानमंत्री नरेन्द्र मोदी अउ दूसर वरिष्ठ नेता मनके संगेसंग छत्तीसगढ़ के मुख्यमंत्री विष्णुदेव साय ह घलो अजित पवार के निधन म सोक जतईन हे।
प्रगति-विशेष कार्यक्रम
प्रादेशिक समाचार एकांश, रायपुर डहार ले भारत सरकार के ‘‘प्रगति‘‘ पोर्टल उपर तियार करे गे विशेष कार्यक्रम के प्रसारण आज रतिहा आठ बजे ले करे जाही। ए कार्यक्रम के प्रसारण छत्तीसगढ़ स्थित आकाशवाणी के जम्मों केन्द्र एक साथ करही।
पुलिस-रजत जयंती पदक
मुख्यमंत्री विष्णुदेव साय ह आज नवा रईपुर स्थित पुलिस मुख्यालय म छत्तीसगढ़ पुलिस ल समर्पित रजत जयंती पदक के विमोचन करीन। ए मउका म ओमन किहीन कि ए पदक प्रदेस म सांति अउ सुरक्षा बनाय राखे म पुलिस के अदम्य साहस, शौर्य अउ बलिदान के अमिट पहचान बनही। मुख्यमंत्री ह किहीन कि पाछु पच्चीस साल म छत्तीसगढ़ पुलिस ह कानून व्यवस्था ल सुदृढ़ राखे अउ नक्सल विरोधी अभियान म असाधारण साहस के परिचय देवत अपन सर्वोच्च बलिदान देहे। ओमन किहीन कि ए पदक उंखर समर्पण ल हमेसा सुरता म बनाय रखही।
बतादन कि मुख्यमंत्री ह गणतंत्र दिवस के मउका म छत्तीसगढ़ पुलिस बल ल रजत जयंती पदक प्रदान करे के घोषणा करे रिहीन।
हाईकोर्ट-आरक्षक भर्ती प्रक्रिया
छत्तीसगढ़ उच्च न्यायालय ह प्रदेस म आरक्षक भर्ती परीक्षा म गड़बड़ी के मामला म सुनवाई करत बाकी बाचे पद मन म नियुक्ति प्रक्रिया उपर रोक लगा देहे। याचिकाकर्ता मन भर्ती परीक्षा ल रद्द करके ए मामला के जांच सीबीआई ले कराय के मांग करे हे।
बतादन कि ए मामला सारीरिक योग्यता परीक्षा ले जुड़े हे। आरोप हे कि गड़बड़ी के सिकायत के बाद भी राज्य सरकार ह भर्ती परीक्षा रद्द करे के बजाय छह हजार पद म ले ढाई हजार पद उपर नियुक्ति दे दे रिहीस।
राष्ट्रीय नीति संवाद-उपमुख्यमंत्री
नई दिल्ली म राखे गे जल जीवन मिशन के राष्ट्रीय नीति संवाद कार्यक्रम म आज छत्तीसगढ़ के उपमुख्यमंत्री अरूण साव घलो सामिल होइन। ए कार्यक्रम के अध्यक्षता केन्द्रीय जल शक्ति मंत्री सी.आर. पाटिल अउ केन्द्रीय पंचायती राज्यमंत्री राजीव रंजन सिंह ह करीन। कार्यक्रम म केन्द्र सरकार अउ आने-आने राज्य के बीच ग्रामीण क्षेत्र म जलापूर्ति व्यवस्था ल दीर्घकालिक, सुदृढ़ अउ प्रभावी बनाय बर विचार-विमर्स करे गीस।
उपमुख्यमंत्री श्री साव ह छत्तीसगढ़ म जल जीवन मिशन के अंतर्गत संचालित कार्य, जमीनी स्तर म आवत चुनौती अउ राज्य के उपलब्धि के जानकारी दीन।
राष्ट्रपति-कलाकार मुलाकात
गणतंत्र दिवस के मउका म नई दिल्ली के कर्तव्य पथ म आयोजित समारोह म छत्तीसगढ़ के झांकी घलो निकाले गे रिहीस। झांकी म सामिल कलाकार मन काली राष्ट्रपति भवन म राष्ट्रपति द्रौपदी मुर्मु ले मुलाकात करीन। ए दउरान राष्ट्रपति ह छत्तीसगढ़ के झांकी सराहना करत किहीन कि झांकी के माध्यम ले देस के समृद्ध जनजातीय परंपरा अउ सांस्कृतिक विरासत ल देखाय गीस।
कलाकार मन राष्ट्रपति ल बतईन कि ए सम्मान ओमन अपन कला, संस्कृति अउ परंपरा ल अउ जादा निष्ठा के साथ आगू बढ़ाय के नवा प्रेरणा दीहीं।
रोजगार मेला
रायपुर के सेजबहार स्थित सरकारी इंजीनियरिंग महाविद्यालय म काली उनतीस जनवरी ले तीन दिन के राज्य स्तरीय रोजगार मेला के आयोजन करे जाही। ए रोजगार मेला म निजी क्षेत्र के पैंतालीस ले जादा प्रतिष्ठित कंपनी मन हिस्सा लीहीं। ए मेला के माध्यम ले पन्द्रह हजार ले जादा रिक्त पद मन म सीधा भर्ती करे जाही। रोजगार विभाग के अनुसार प्रदेस म ए पहिली घांव हे, जब अभ्यर्थी मन ल प्रतियोगी परीक्षा के तर्ज म प्रवेस पत्र दे जाही।
अंतर्राष्ट्रीय-केस सम्मेलन
भारतीय प्रबंध संस्थान-आईआईएम डहार ले नवा रायपुर म तीस जनवरी ले दू दिन के पहिली अंतर्राष्ट्रीय केस सम्मेलन-आई.सी.सी. के आयोजन करे जाही। अंतर्राष्ट्रीय केस सम्मेलन के संयोजक डॉक्टर प्रणीत कुमार रॉय ह बतईन कि ए सम्मेलन म सोधकर्ता, केस लेखक, उद्योग नेतृत्व अउ नीति निर्माता, व्यावसायिक प्रथा अउ केस आधारित सिक्षण उपर विचार-विमर्स करही।
रसोईया हड़ताल-स्पष्टीकरण
लोक शिक्षण संचालनालय ह रईपुर के तूता स्थित धरनास्थल म जारी रसोईया मनके हड़ताल के दउरान दू लोगन के मउत के खबर ल भ्रामक बताय हे। संचालनालय ह स्पष्ट करे हे कि रसोईया मनके मृत्यु के धरनास्थल या हड़ताल ले कोनों संबंध नइ हे। राज्य सासन जम्मों रसोईया के प्रति पूरा संवेदनशील हे अउ ओमन के स्वास्थ्य, सुरक्षा अउ कल्याण ल लेके सजग हरय। सासन डहार ले रसोईया मनके हित म जरूरी कार्रवाई करे जात हे। बतादन कि सासन डहार ले रसोईया मनके मानदेय म पांच सौ रूपिया के बढ़ोतरी करे जाय के जानकारी दे गे रिहीस अउ हड़ताल खतम करके अपन-अपन घर लहुटे के आग्रह करे गे रिहीस। एखर बावजूद कुछ रसोईया मन धरनास्थल म बइठे के निर्णय ले रिहीन।