राष्ट्रपति द्रौपदी मुर्मू ह अवइया सात फरवरी के छत्तीसगढ़ के दौरा म आही। श्रीमती मुर्मू जगदलपुर म राखे गे बस्तर पंडुम के सुभारंभ कार्यक्रम म सामिल होही। राष्ट्रपति के दउरा ल लेके मुख्य सचिव विकासशील ह आज मंत्रालय ह वीडियो कॉन्फ्रेंसिंग के माध्यम ले अधिकारी मनके बइठका लीन। बइठका म ओमन सुरक्षा, चिकित्सा, अवई-जवई के संगेसंग जम्मों प्रकार के व्यवस्था के संबंध म दिसा-निरदेस दीन।
बस्तर पंडुम-जिला स्तरीय प्रतियोगिता
बस्तर के जनजातीय कला अउ संस्कृति ल संरक्षित करे के उद्देश्य ले ‘‘बस्तर पंडुम‘‘ के कार्यक्रम करे जात हे। ए दउरान काली अट्ठाईस जनवरी ले कोंडागांव जिला म जिला स्तरीय प्रतियोगिता राखे जाही। पहिली दिन काली जनजातीय नृत्य, गीत, वाद्ययंत्र, वेशभूषा अउ जनजातीय वन जड़ी-बुटी के प्रदर्सन करे जाही। उहें, उनतीस जनवरी के जनजातीय नाट्य, चित्रकला, पेय पदार्थ, जनजातीय व्यंजन, शिल्पकला अउ बस्तर आंचलिक साहित्य ल प्रदर्सित करे जाही। बस्तर पंडुम के तहत विकासखंड स्तर म चुने गे पांच सौ छत्तीस झन प्रतिभागी मन ह ए प्रतियोगिता म भाग लीहीं।
उहें, जगदलपुर के सिटी मैदान म काली बस्तर पंडुम के तहत जिला स्तरीय प्रतियोगिता के कार्यक्रम करे जाही।
संसद-बजट सत्र
संसद के बजट सत्र ह काली अट्ठाईस जनवरी ले सुरू हो जही, जउन ह दू अप्रैल तक चलही। बजट सत्र के पहिली आज नई दिल्ली के संसद भवन परिसर म सर्वदलीय बइठका राखे गीस। ए दउरान रक्षा मंत्री राजनाथ सिंह ह बइठका के अगुवई करीन। बइठका म राज्यसभा के नेता जे.पी. नड्डा, केन्द्रीय संसदीय कार्य मंत्री किरेन रिजिजू, संसदीय कार्य राज्यमंत्री अर्जुन राम मेघवाल अउ सूचना प्रसारण राज्यमंत्री एल. मुरूगन सामिल होइन। कांग्रेस नेता जयराम रमेश, डीएमके नेता तिरूचि शिवा, तृणमूल कांग्रेस नेता सागरिका घोष, समाजवादी पार्टी के सांसद रामगोपाल यादव समेत आने-आने नेता मन ह बइठका म भाग लीन।
बइठका के बाद पत्रकार मन ले गोठबात करत केन्द्रीय संसदीय कार्य मंत्री किरेन रिजिजू ह किहीन कि बजट सत्र के पहिली भाग म राष्ट्रपति के अभिभाषण उपर धन्यवाद प्रस्ताव राखे जाही। बाद म दूनो सदन म बजट उपर चर्चा करे जाही। श्री रिजिजू ह जम्मों दल के सदस्य मन ले सत्र ल बढ़िया चलाय म मदद मांगे हे।
शिवराज सिंह-छत्तीसगढ़
केन्द्रीय कृषि मंत्री शिवराज सिंह चौहान आज एक दिन के दउरा म छत्तीसगढ़ आय हे। ए दउरान ओमन किहीन कि खराब कीटनासक दवा मनके सिकायत मिले के बाद केन्द्र सरकार ह नवा कीटनासक अउ बीज अधिनियम लाय के तैयारी करत हे।
श्री चौहान ह यहू किहीन कि विकसित भारत- जी-राम-जी अधिनियम के तहत सरकार ह एक सौ पच्चीस दिन के रोजगार गारंटी देहे। ओमन किहीन कि ए अधिनियम ले गरीबी मुक्त अउ स्वावलंबी गांव बनाय के सपना ह पूरा होही।
खबर के मुताबिक केन्द्रीय कृषि मंत्री ह राजनांदगांव जिला के डोंगरगढ़ पहुंचीन। ए दउरान ओमन अखिल भारतीय विश्वगुरू जैनाचार्य विद्यासागर समाधि स्मारक महोत्सव म सामिल होइन।
भारत पर्व
लोकसभा अध्यक्ष ओम बिरला अउ केन्द्रीय संस्कृति अउ पर्यटन मंत्री गजेन्द्र सिंह शेखावत ह आज नई दिल्ली के लालकिला म राष्ट्रीय संस्कृति अउ पर्यटन महोत्सव भारत पर्व के उद्घाटन करीन। ए मउका म श्री बिरला ह किहीन कि छह दिन तक चलइया ए महोत्सव ह भारत के सांस्कृतिक विरासत ल अउ जादा मजबूत बनाय के मंच हरय। ओमन किहीन कि ए महोत्सव के माध्यम ले लोगन मन ल आने-आने राज्य अउ अलग अगल जघा मनके संस्कृति ल जाने के मउका मिलही।
ए मउका म संस्कृति अउ पर्यटन मंत्री गजेन्द्र सिंह शेखावत ह किहीन कि ए महोत्सव के माध्यम ले लोगन मन ल भारत के परंपरा, लोक कला, शिल्प कला, व्यंजन अउ पर्यटन स्थल मन ल जाने के मउका मिलही। ए आयोजन म चौंतीस ठन राज्य पर्यटन मंडप, चौबीस ठिन केन्द्रीय मंत्रालय मनके स्टॉल अउ देसभर के प्रमुख संस्थान अउ संगठन मन ह भाग लेवत हे।
मुख्यमंत्री-बिलासपुर
राष्ट्रीय गीत वंदेमातरम के एक सौ पचासवां बछर के मउका म मुख्यमंत्री विष्णुदेव साय ह बिलासपुर म राखे गे एक ठिन कार्यक्रम म सामिल होइन। कार्यक्रम के सुरूआत वंदेमातरम गीत ले सुरू करे गीस। ए दउरान रेलवे सुरक्षा बल के टीम डहार ले बैंड ग्रुप ह देसभक्ति के गीत पेस करीन।
मुख्यमंत्री श्री साय ह किहीन कि वंदेमातरम गीत ह आजादी के हथियार रिहीन हे। वंदेमातरम गीत गावत हमर देस के वीर जवान मन ह देस बर अपन जिनगी न्यौछावर कर दीन। कार्यक्रम म वरिष्ठ पुलिस अधीक्षक रजनेश सिंह ह पुलिस विभाग डहार ले चलाय जावत ‘‘चेतना‘‘ अभियान के जानकारी दीन।
राज्यपाल-ब्रेल पुस्तक विमोचन
राज्यपाल रमेन डेका ह आज लोकभवन म दू ठन ब्रेल पुस्तक अउ ऑडियो बुक्स के विमोचन करीन। ब्रेल पुस्तक ल छत्तीसगढ़ के वीर अउ दिव्यांग महिला मनके सफलता के कहानी मन उपर दर्साय गेहे। उहें, ऑडियो बुक्स म तीन हजार ले जादा पढ़े-लिखे के किताब मन ल संकलित करे गेहे। ए मउका म राज्यपाल ह ए काम म मदद देवइया राज्य के आने-आने जिला के सिक्षक मन ल सम्मानित करीन।
रोजगार मेला
रायपुर के सेजबहार स्थित सरकारी इंजीनियरिंग महाविद्यालय म उनतीस जनवरी ले तीन दिन तक राज्य स्तरीय रोजगार मेला के आयोजन करे जाही। ए मेला म निजी क्षेत्र के पैंतालीस ठन ले जादा कंपनी मन ह हिस्सा लीहीं। ए मेला के माध्यम ले पन्द्रह हजार ले जादा खाली पद मन म सोझे भर्ती करे जाही।
बैंक कर्मचारी-हड़ताल
यूनाइटेड फोरम ऑफ बैंक यूनियंस के बैनर तले छत्तीसगढ़ के संगेसंग देसभर के बैंक कर्मचारी मन ह आज हड़ताल म रिहीन। ए कर्मचारी मनके हफ्ता म पांच दिन काम करे के मांग हे। खबर के मुताबिक हड़ताल के सेती स्टेट बैंक, पंजाब नेशनल बैंक, बैंक ऑफ बड़ौदा, इंडियन ओवरसीज बैंक के संगेसंग बारह ठिन सरकारी बैंक के सेवा मन प्रभावित होय हे। उहें, कई ठिन निजी बैंक खुले रिहीन, जिहां कामकाज ह सामान्य रूप ले जारी रिहीस।
रईपुर के मोतीबाग चउक के तीर बैंक कर्मचारी मन ह प्रदर्सन करीन।
उल्लास नवसाक्षर मेला
उल्लास नवभारत साक्षरता कार्यक्रम के तहत काली गौरेला-पेण्ड्रा-मरवाही जिला के जम्मों गांव अउ नगरीय निकाय मन म उल्लास नवसाक्षर मेला के आयोजन करे गीस। जिला शिक्षा अधिकारी रजनीश तिवारी ह बतईन कि ए मेला के उद्देश्य नवसाक्षर मन ल भाषा कौसल, अंक ज्ञान अउ जरूरी जीवन कौसल सीखे के मउका देना हे। संगेसंग गांव मन म असाक्षर मनके सर्वें करके ओमन ल उल्लास साक्षरता केन्द्र ले जोड़त स्वयंसेवी सिक्षक मनके माध्यम ले साक्षर बनाना हे।
अउ अब पेस हे मौसम के हाल..
मौसम विभाग ह अवइया चौबीस घंटा के दउरान सरगुजा अउ बिलासपुर संभाग के एक-दू ठन जघा म हल्का बरसा होय के संभावना जताय हे। मौसम म आय बदलाव के सेती सरगुजा संभाग अउ ओखर ले लगे जिला के न्यूनतम तापमान म गिरावट दर्ज करे गेहे। मौसम विभाग के मुताबिक एक ठन पश्चिमी विक्षोभ उत्तर पाकिस्तान अउ ओखर आसपास म हवय, जेखर सेती राज्य के मौसम म बदलाव देखे जात हे।
अउ अब थोरकुन समाचार सार म –
– धमतरी जिला के भखारा रद्दा के तीर देमार गांव म आज बिहनिया ट्रक अउ कार के आपस म टकराय ले एक झिन मनखे के मउत होगे। उहें, चार झन मनखे मन गंभीर रूप ले घायल हे।
अउ
– कोंड़ागांव जिला म गारका गांव के तीर होय सड़क हादसा म कार म सवार डॉक्टर राजीव भगत के मउत होगे।