राष्ट्रपति द्रौपदी मुर्मु गणतंत्र दिवस के पहिली संझा म अभी ले थोरकुन देर बाद राष्ट्र ल संबोधित करही। आकाशवाणी के सबो राष्ट्रीय चैनल म एखर प्रसारण संझा सात बजे ले होही। दूरदर्शन अउ आकाशवाणी के सबो चैनल हिन्दी अउ अंग्रेजी म एला प्रसारित करही।
उहें, छत्तीसगढ़ के राज्यपाल रमेन डेका के प्रदेस के जनता के नांव संदेस आज रतिहा सवा नौ बजे ले प्रसारित करे जाही।
आकाशवाणी अउ दूरदर्शन के सबो चैनल काली नई दिल्ली के कर्तव्य पथ ले बिहनिया नौ बजके चालीस मिनट ले गणतंत्र दिवस परेड के सीधा प्रसारण करही।
गणतंत्र दिवस-वीरता पदक
गणतंत्र दिवस के मउका म पुलिस, अग्निशमन, होमगार्ड अउ सिविल डिफेंस के संग करेक्शनल सर्विसेज के नौ सौ बयासी कर्मी मन ल वीरता अउ सेवा के पदक दे गे हवय। एमा ले एक सौ पचीस कर्मी मन ल वीरता पदक ले सम्मानित करे गेहे। ए पदक जीवन रक्षा बर, संपत्ति के रक्षा बर, अपराध रोके बर अउ अपराधी मन ल गिरफ्तारी कराय के प्रयास म बहादुरी देखाय बर दे जाथे। एखर अलावा एक सौ एक विशिष्ट कर्मी मन ल राष्ट्रपति सेवा पदक अउ सराहनीय सेवा बर सात सौ छप्पन कर्मी मन ल विसेस पदक दे गे हवय।
गणतंत्र दिवस के मउका म घोसित ए सम्मान म छत्तीसगढ़ के पुलिस अधिकारी अउ कर्मचारी मन सामिल हे। सहायक उपनिरीक्षक रामावतार िंसंह राजपूत ल विशिष्ट सेवा पदक बर चुने गे हवय। उहें, पुलिस महानिरीक्षक रामगोपाल गर्ग के संग पुलिस अधीक्षक मन म शशिमोहन सिंह, श्वेता श्रीवास्तव सिन्हा अउ राजश्री मिश्रा ल चुने गे हवय। एखर अलावा कमांडेंट निवेदिता पाल अउ मनीषा ठाकुर रावते, सहायक पुलिस अधीक्षक तर्केश्वर पटेल अउ उनेज़ा खातून अंसारी के संगेच सहायक कमांडेंट जैलाल मरकाम अउ प्लाटून कमांडर हजारी लाल साहू ल घलो सराहनीय सेवा पदक बर चुने गे हे।
गणतंत्र दिवस-ध्वजारोहण
छत्तीसगढ़ संघरा देसभर म काली सतहत्तरवां गणतंत्र दिवस देसभक्तिपूर्ण माहौल म मनाय जाही। राज्य म गणतंत्र दिवस समारोह के पूरा तियारी कर ले गेहे। मुख्य समारोह राजधानी रईपुर के पुलिस परेड मैदान म होही, जिंहा राज्यपाल रमेन डेका ध्वजारोहण करके परेड के सलामी लिही। उहें, मुख्यमंत्री विष्णुदेव साय बिलासपुर म आयोजित गणतंत्र दिवस समारोह म राष्ट्रीय ध्वज ल फंहराही। उपमुख्यमंत्री अरूण साव ह जगदलपुर म, विजय शर्मा अंबिकापुर म, केंद्रीय राज्य मंत्री तोखन साहू दुरूग म अउ विधानसभा अध्यक्ष डॉ. रमन सिंह ह राजनांदगांव म राखे गे गणतंत्र दिवस समारोह म सामिल होही। एखर अलावा प्रदेस के दूसर जिला मुख्यालय म राज्य शासन के मंत्री, सांसद अउ विधायक मन डहार ले ध्वजारोहण करे जाही।
राज्यपाल रमेन डेका, मुख्यमंत्री विष्णुदेव साय, प्रदेस भाजपा अध्यक्ष किरण सिंह देव अउ प्रदेस कांग्रेस अध्यक्ष दीपक बैज ह राज्य के जनता ल गणतंत्र दिवस के बधई अउ सुभकामना दीन हे।
गणतंत्र दिवस-साइकिल रैली
छत्तीसगढ़ अउ ओडिसा सब एरिया-कोसा डहार ले गणतंत्र दिवस समारोह के मउका म आज रईपुर म साइकिल रैली के आयोजन करे गीस। ए कारीकरम म खेल प्रेमी मनके संस्था ‘‘स्पोर्ट्स एंथुसियास्टिक एसोसिएशन ऑफ रायपुर‘‘ ह घलो मदद करीस। ए साइकल रैली राजधानी के तेलीबांधा चौक ले सुरू होइस अउ नवा रईपुर के सेंध झील परिसर म सिराइस, जिंहा करीबन चालीस किलोमीटर के दूरी तय करे गीस। ए रैली म साइकिल प्रेमी अउ भारतीय सेना के जवान मन ह उछाह के संग भाग लीन। कारीकरम के समापन के मउका म सेंध झील परिसर म भारतीय सेना के बैंड ह अपन शानदार प्रस्तुति घलो दीस।
कर्तव्य पथ-झांकी
काली नई दिल्ली म होवइया गणतंत्र दिवस समारोह म कर्तव्य पथ म छत्तीसगढ़ के झांकी प्रस्तुत करे जाही। कर्तव्य पथ म दिखाय जाने वाला ए झांकी म छत्तीसगढ़ के जनजातीय वीर नायक मन ल समर्पित देस के पहिली डिजीटल संग्रहालय के झलक देखाय जाही।
मन की बात
प्रधानमंत्री नरेंद्र मोदी ह देसवासी मन ले, बिसेसकर स्टार्टअप उद्यम म लगे युवा मन ले गुणवत्ता म जोर देके अपील करीन हे। आकाशवाणी ले मन की बात कारीकरम म श्री मोदी ह किहीन कि भारत के अर्थव्यवस्था तेजी ले विकसित होवत हे अउ पूरा विश्व के नजर भारत उपर हे। प्रधानमंत्री ह लोगन ले देस म बने हर वस्तु के क्वालिटी म सुधार के संकल्प ले के आग्रह करीन।
प्रधानमंत्री ह किहीन कि दस बछर पहिली जनवरी दू हजार सोलह म भारत ह स्टार्टअप इंडिया के सुरूआत के संग ए यात्रा ल सुरू करे रिहीस। भारत म आज दुनिया के तीसरा सबले बड़े स्टार्टअप इकोसिस्टम बनगे हवय।
श्री मोदी ह किहीन कि भारत के लोगन छब्बीस जनवरी ल परब के रूप म मनाथे। ए दिन ह हमन ल अपन संविधान निर्माता मन ल नमन करे के मउका देथे। राष्ट्रीय मतदाता दिवस म श्री मोदी ह किहीन कि जब कभी कोनो युवा पहिली घांव मतदान करथे, त पूरा पड़ोस गांव या सहर ल एकजुट होके ओला बधाई देना चाही अउ मिठाई बांटके ए मउका म उत्सव मनाना चाही। प्रधानमंत्री ह किहीन कि ‘एक पेड़ मां के नाम‘ अभियान के तहत देस म अभी तक दू सौ करोड़ ले जादा पौधा लगाय गे हवय।
पद्म पुरस्कार
असाधारण योगदान बर ए बछर घलो देस के आने-आने भाग म उल्लेखनीय काम करइया बहुत झन गुमनाम नायक मन ल पद्म पुरस्कार ले सम्मानित करे जावत हे। सरकार ह पद्मश्री सम्मान बर चौव्वन झन विभूति मन ल चुने हे। एमा छत्तीसगढ़ के तीन झन विशिष्ट हस्ती मन घलो सामिल हे। दंतेवाड़ा के बुधरी ताती ल समाज सेवा के क्षेत्र म अउ रामचंद गोड़बोले अउ उंखर पत्नी सुनीता गोड़बोले ल चिकित्सा के क्षेत्र म बिसेस योगदान बर पद्मश्री सम्मान दे जाही।
राष्ट्रीय मतदाता दिवस-छत्तीसगढ़
राष्ट्रीय मतदाता दिवस के मउका म आज छत्तीसगढ़ म घलो कतकोन कारीकरम कराय जावत हे। माय भारत रईपुर डहार ले जिला प्रशासन अउ मुख्य निर्वाचन पदाधिकारी कार्यालय के मदद ले राज्य स्तरीय युवा मतदाता जागरूकता पदयात्रा के आयोजन करे गीस। ए पदयात्रा म एक हजार ले जादा युवा स्वयं सेवक मन भाग लीन। पदयात्रा इंदिरा गांधी कृषि विश्वविद्यालय ले सुरू होइस, जेखर समापन कृषि मंडपम म होइस। ए पदयात्रा के उद्देस्य युवा अउ नागरिक मन ल अपन मताधिकार के महत्व बर जागरूक करना, पहिली घांव वोट देवइया मतदाता मन ल प्रोत्साहित करना अउ लोकतांत्रिक सहभागिता ल मजबूत बनाना रिहीस। ए मउका म नवा अउ पहिली घांव वोट देवइया लोगन ल सम्मानित करे गीस। कारीकरम म रईपुर कलेक्टर डॉ. गौरव कुमार सिंह ह युवा मन ल मतदाता दिवस के सपथ देवाइन।
राष्ट्रीय मतदाता दिवस म आज लोकभवन सचिवालय म राज्यपाल के सचिव डॉ. सी.आर. प्रसन्ना संघरा अधिकारी अउ कर्मचारी मन ह अपन मताधिकार के परयोग करे के सपथ लीन।
उहें, नवा रईपुर के स्वास्थ्य संचालनालय म राखे गे समारोह म संचालक संजीव कुमार झा के अगुवई म अधिकारी अउ कर्मचारी मन ह मतदान दिवस के सपथ लीन।
राष्ट्रीय मतदाता दिवस
देस आज राष्ट्रीय मतदाता दिवस मनावत हे। राष्ट्रपति द्रौपदी मुर्मु ह नई दिल्ली म समारोह के अध्यक्षता करत किहीन कि मतदान सिरिफ राजनीतिक अभिव्यक्ति नइ हे, फेर देस के लोकतांत्रिक चुनावी प्रक्रिया म नागरिक मनके विस्वास के प्रतीक हे। राष्ट्रपति ह लोकतंत्र ल मजबूत करे बर मतदाता मन ल खासकर के माईलोगिन मन ल मतदाता दिवस के बधई दीन।
उहें, मुख्य निर्वाचन आयुक्त ज्ञानेश कुमार ह किहीन कि देस के मतदाता ह हमेसा आयोग के हरेक पहल, नीति अउ निर्णय के केंद्र रहे हे।
आकाशवाणी के समाचार सेवा प्रभाग ल मतदाता जागरूकता के सर्वश्रेष्ठ अभियान बर इलेक्ट्रानिक रेडियो के श्रेणी म बछर दू हजार पचीस के मीडिया पुरस्कार दे गीस। आकाशवाणी के महानिदेशक राजीव कुमार जैन ह ए पुरस्कार ग्रहण करीन।
अउ अब पेस हे मौसम के हाल…
अवइया चौबीस घंटा के दउरान प्रदेस के मौसम शुष्क रेहे के संभावना हे। रईपुर के मौसम कार्यालय के अनुसार ए बेरा हिमाचल प्रदेस अउ पंजाब के उपर एक ठन कम दबाव के क्षेत्र बने हे। मौसम वैज्ञानिक के अनुसार अवइया दिन म न्यूनतम तापमान म सरलग बढ़ोत्तरी होय के आसार हे।