प्रधानमंत्री नरेंद्र मोदी ह किहीन कि केंद्र सरकार ह भारत अउ विदेस म युवा मन बर नया मउका बनाय के परयास करत हे। श्री मोदी ह आज नई दिल्ली म वर्चुअल माध्यम ले अट्ठारवां राष्ट्रीय रोजगार मेला म किहीन कि रोजगार मेला ह एक ठन संस्थागत व्यवस्था बन गेहे, जेखर ले युवा मन ल रोजगार मिलत हे।
आज के कारीकरम म कतकोन सरकारी विभाग अउ संगठन म भर्ती होय इकसठ हजार ले जादा युवा मन ल नियुक्ति पत्र दे गेहे। प्रधानमंत्री ह किहीन कि आज सौंपेगे नियुक्ति पत्र ह युवा मन ल राष्ट्र निर्माण बर आमंत्रण पत्र अउ विकसित भारत कोति ले जाय के संकल्प पत्र हे।
रोजगार मेला-छत्तीसगढ़
ऐति, रईपुर के आरंग म सीआरपीएफ गु्रप केंद्र म घलो रोजगार मेला के आयोजन करे गीस। ए मउका म केंद्रीय राज्यमंत्री तोखन साहू ह प्रदेस के चार सौ ले जादा युवा मन ल केंद्र सरकार के आने-आने सुरक्षाबल बर नियुक्ति दे गीस। ए युवा मन ह अब सीआरपीएफ, बीएसएफ, आईटीबीपी, अउ एसएसबी जइसन प्रतिष्ठित सुरक्षाबल के हिस्सा बनके देस के सुरक्षा के जिम्मेदारी संभालही।
समारोह म केंद्रीय राज्य मंत्री श्री तोखन साहू ह किहीन कि ए सिरिफ नियुक्ति पत्र नइ हे, फेर प्रधानमंत्री के ‘‘विकसित भारत-दू हजार सैंतालीस‘‘ के संकल्प ल पूरा करे के दिसा म एक ठन बड़े कदम हे।
चित्रोत्पला फिल्म सिटी
मुख्यमंत्री विष्णुदेव साय ह आज नवा रईपुर अटल नगर के माना-तूता म चित्रोत्पला फिल्म सिटी एंड कन्वेंशन सेंटर के भूमिपूजन करीन। सौ एकड़ क्षेत्र म बनने वाला ए फिल्म सिटी म अत्याधुनिक स्टूडियो, स्थायी सेट्स, स्कूल, अस्पताल, जेल, पुलिस स्टेसन अउ नदी-पर्वत, कन्वेंशन सेंटर, जनजातीय सांस्कृतिक केंद्र, ई-बस सेवा अउ रिसॉर्ट, प्री-पोस्ट प्रोडक्शन के संगेच आवास व्यवस्था, फूड कोर्ट अउ तालाब-गार्डन जइसन सुविधा होही।
फिल्म सिटी के भूमिपूजन के बाद पत्रकार मनले गोठबात करत मुख्यमंत्री मन ले किहीन कि छत्तीसगढ़ के विकास आज एक ठन नवा कड़ी जुड़ गेहे। कई बछर पुराना मांग ल पूरा करत आज चित्रोत्पला फिल्म सिटी के भूमिपूजन करे गेहे, जेखर ले प्रदेस के कला अउ प्रतिभा ल नवा पहिचान मिलही।
मुख्यमंत्री सड़क सुरक्षा
मुख्यमंत्री विष्णुदेव साय आज राजधानी रईपुर के पंडित दीनदयाल उपाध्याय ऑडिटोरियम म राष्ट्रीय सड़क सुरक्षा माह के अंतर्गत आयोजित राज्य स्तरीय सड़क सुरक्षा सम्मान समारोह म सामिल होइन। ए मउका म मुख्यमंत्री श्री साय ह किहीन कि जन-जागरूकता ले सड़क दुर्घटना म कमी आही। यातायात नियम बर सजकता ही हमन ल जनहानि ले बंचा सकत हे।
मुख्यमंत्री श्री साय ह सड़क सुरक्षा के संदेस देवत खुद घलो हेलमेट पहिर के बाईक चालक मनके दल के संग स्कूटी चलाइन। कारीकरम म मुख्यमंत्री श्री साय ह राजधानी रईपुर के पंडरी म आधुनिक लाइसेंस सेंटर के कार्यालय भवन के भूमिपूजन अउ प्रदेसभर म मुख्यमंत्री ग्रामीण बस योजना के तहत बारह ठन नवा रद्दा म बस के संचालन के सुरूआत करीन।
ए मउका म सड़क सुरक्षा मितान ल पचीस हजार अउ पांच हजार रूपिया के रासि दे गीस। एखरे संग सड़क सुरक्षा बर सुघ्घर काम करइया चिकित्सा अधिकारी, यातायात सिपाही, वाहन चालक, भारत स्काउट गाइड के सदस्य, यूनिसेफ के प्रतिनिधि, एनएचआई के अधिकारी अउ एनएसएस अउ एनसीसी के कैडेट मन ल घलो सम्मानित करे गीस।
ईओडब्लयू-कार्रवाई
राज्य आर्थिक अपराध अन्वेषण ब्यूरो-ईओडब्ल्यू ह भारतमाला परियोजना मुआवजा घोटाला मामला म गिरफ्तार तीन झन लोकसेवक के खिलाफ पहला पूरक चालान बिसेस न्यायालय रईपुर म पेस कर देहे। एमा आरोपी मनके सेति सरकार ल चालीस करोड़ रूपिया के नुकसान के खुलासा करे गेहे। ईओडब्ल्यू के मुताबिक ए मामला म आरोपी दिनेश पटेल, लेखराम देवांगन अउ बसंती धृतलहरे ल पाछू बछर उनतीस अक्टूबर के गिरफ्तार करे गे रिहीस।
राष्ट्रीय मतदाता दिवस
काली राष्ट्रीय मतदाता दिवस हे। ए मउका म निर्वाचन आयोग डहार ले काली नई दिल्ली म राखे गे कारीकरम म राष्ट्रपति द्रौपदी मुर्मु ह नवा मतदाता मन ल मतदाता पहचान पत्र प्रदान करही। संगेसंग ओमन ह तकनीक के प्रभावी उपयोग, चुनाव प्रबंधन अउ मतदाता जागरूकता बर आने-आने श्रेणी म पुरस्कार घलो प्रदान करही। कारीकरम म मीडिया बर घलो बिसेस पुरस्कार दे जाही।
उहें, केंद्रीय युवा कारीकरम अउ खेल मंत्रालय के अंतर्गत माय भारत रईपुर डहार ले काली पचीस जनवरी के रईपुर म राज्य स्तर म मतदाता जागरूकता पदयात्रा के आयोजन करे जाही। ए रैली इंदिरागांधी कृषि विश्वविद्यालय ले सुरू होही।
माय भारत के उपनिदेशक अर्पित तिवारी ह पत्रकारवार्ता म किहीन कि एक मजबूत राष्ट्र के नींव तभे बनथे, जब हरेक युवा नागरिक जागरूक होके निष्पक्ष मतदान करथे। ओमन बतइन कि पदयात्रा के दउरान पहिली घांव मतदान करइया मतदाता मनके सम्मान, मतदान के महत्व उपर जन-जागरूकता कारीकरम अउ मतदाता सपथ कारीकरम कराय जाही।
मन की बात
प्रधानमंत्री नरेंद्र मोदी काली बिहनिया ग्यारा बजे आकाशवाणी ले ‘मन की बात‘ कारीकरम म देस अउ विदेस के लोगन ले अपन बिचार साझा करही। ए मासिक रेडियो कारीकरम के एक सौ तीसवां कड़ी होही। कारीकरम के प्रसारण आकाशवाणी अउ दूरदर्सन के जम्मो नेटवर्क, एआईआर न्यूज वेबसाइट अउ न्यूज ऑन एआईआर मोबाइल ऐप म करे जाही। एखर सीधा प्रसारण एआईआर न्यूज, डीडी न्यूज, प्रधानमंत्री कार्यालय अउ सूचना अउ प्रसारण मंत्रालय के यूट्यूब चैनल म घलो होही। हिन्दी प्रसारण के तुरते बाद आकाशवाणी क्षेत्रीय भाषा म घलो कारीकरम के प्रसारण करही।
रायपुर साहित्य उत्सव
लाला जगदलपुरी मंडप म छत्तीसगढ़ के लोकगीत, आज की हिंदी कहानियां, राष्ट्रीय मीडिया में बहस, डिजीटल युग के लेखक और पाठक, डॉ. अंबेडकर विचार पुंज की आभा बिसय उपर केंद्रित परिचर्चा होइस। अइसने श्यामलाल चतुर्वेदी मंडप अउ अनिरूध्द नीरव मंडप म होय आने-आने सत्र म वक्ता मन ह अपन बिचार साझा करीन।
एखर पहिली, काली पहिली दिन देस के जाने-माने साहित्यकार स्वर्गीय विनोद कुमार शुक्ल अउ उंखर साहित्य के स्मरण करे गीस। स्मृति शेष स्वर्गीय विनोद कुमार शुक्ल : साहित्य की खिड़कियां बिसय उपर राखे गे परिचर्चा म साहित्य, प्रशासन, पत्रकारिता अउ फिल्म ले जुड़े वक्ता मन ह उंखर व्यक्तित्व अउ कृतित्व म भावपूर्ण संवाद करीन।
उहें, सुरजीत नवदीप मंडप म महिला साहित्यकार मनके बिसेस काव्यपाठ संघरा काव्य अउ व्यंग्य के कतकोन सत्र आयोजित करे गीस, जेमा प्रदेस के आने-आने जघा ले आय नवा रचनाकार मन ह सहभागिता करीन।
अइसने, कवि पद्मश्री सुरेंद्र दुबे ल समर्पित ओपन माइक मंच म पहिली दिन चार ठन सत्र राखे गीस, जेमा प्रतिभागी मन ह अपन प्रस्तुति दीन।
रईपुर साहित्य उत्सव के समापन काली होही, जेमा राज्यपाल रमेन डेका मुख्य अतिथि के रूप म मौजूद होही अउ अध्यक्षता प्रसिध्द रंगकर्मी डॉ. सच्चिदानंद जोशी करही।
आज राष्ट्रीय बालिका दिवस हे। एखर उद्देस्य समाज म नोनी मनके अधिकार अउ उंखर सशक्तिकरण बर जागरूकता फैलाना हे, जेखर ले ओमन ह राष्ट्र के विकास म अपन योगदान दे सकय। महिला अउ बाल विकास मंत्रालय ह पहिली घांव बछर दू हजार आठ म ए दिन के सुरूआत करे रिहीस।
मुख्यमंत्री विष्णुदेव साय ह राष्ट्रीय बालिका दिवस के सुभकामना देवत किहीन कि आज नोनी मन ह हर क्षेत्र म आगु बाढ़त हे। उंखर ए संकलप ल अउ सक्ति देत हुए छत्तीसगढ़ सरकार ह नोनी मनके सुघ्घर भविष्य बर पूरा तरीका ले समर्पित हे।
खबर के मुताबिक प्रधानमंत्री नरेंद्र मोदी डहार ले बाईस जनवरी दू हजार पंद्रह के सुरू करे गे ‘बेटी बचाओ-बेटी पढ़ाओ‘ योजना के वर्षगांठ देसभर म मनाय गीस।