ए मउका म मुख्यमंत्री विष्णुदेव साय ह किहीन कि ए बेरा गणतंत्र के अमृतकाल अउ छत्तीसगढ़ राज्य के रजत जयंती बछर के हे। इही भाव ले ए उत्सव के आयोजन करे जावत हे। रइपुर साहित्य उत्सव के मंडप मन ल उन महान साहित्यकार मन ल समर्पित करे गेहे, जउन छत्तीसगढ़ के संस्कृति अउ साहित्य ल नवा चिन्हारी देइन हें।
ऐति, उपमुख्यमंत्री अरूण साव ह एला साहित्य के महाकुंभ बतावत किहीन कि छत्तीसगढ़ के माटी ह हिन्दी साहित्य ल आने-आने महान पुरोधा देय हे।
कारीकरम म महात्मा गांधी अंतराष्ट्रीय हिंदी विश्वविद्यालय वर्धा के कुलपति डॉ. कुमुद शर्मा के संग प्रसिध्द रंगकर्मी मनोज जोशी बिसेस अतिथि के रूप म अउ छत्तीसगढ़ साहित्य अकादमी के अध्यक्ष शशांक शर्मा घलो मौजूद रिहीन।
बतादन कि 3 दिन के ए साहित्य उत्सव म कुल 42 सत्र होही, जेमा समकालीन साहित्य के संगेसंग सामाजिक अउ सांस्कृतिक बिसय मन उपर गोठबात होही। ए उत्सव म देसभर के 120 साहित्यकार सामिल होवत हें।
बातों-बातों में
प्रतिभा सम्मान समारोह
राज्यपाल रमेन डेका अउ मुख्यमंत्री विष्णुदेव साय ह आज रइपुर के लोकभवन म आयोजित कारीकरम म बछर 2024 के 110 अउ बछर 2025 के 129 मेधावी छात्र मन ल पुरस्कार देइन। एमा पिछड़ा जनजाति वर्ग के पढ़इया लइका घलो सामिल हें। माध्यमिक शिक्षा मंडल के डाहर ले ‘‘पंडित दीनदयाल उपाध्याय मेधावी छात्र प्रोत्साहन योजना‘‘ के तहत ए प्रतिभा सम्मान समारोह के आयोजन करे गिस। ए मउका म राज्यपाल रमेन डेका ह पढ़इया लइका मन ले किहीन कि ओमन धैर्य के संग आगु बाढं़य अउ अपन सपना ल पुरोय बर सरलग अभ्यास करंय। ए दउरान राज्यपाल ह नवाचार उपर जोर देवत बिसेस पिछड़ा जनजाति वर्ग के लइका मन के शिक्षा के क्षेत्र म सरलग आगु बाढ़े के उदिम ल गजब संहराइन।
उहें, मुख्यमंत्री ह पढ़इया लइका मन ले किहीन कि तुंहरे खांद म देस के बहुते बड़का जिम्मेदारी हे अउ सियान मन के आशीर्वाद ले ही ए सफलता मिले हे।
ऐति, स्कूल शिक्षा मंत्री गजेंद्र यादव ह बतइन कि बछर 2024-25 के दसवीं-बारहवीं बोर्ड परीक्षा के 239 मेधावी छात्र मन ल प्रोत्साहन के रूप म पदक, प्रशस्ति पत्र अउ हर लइका ल डेढ़-डेढ़ लाख रूपिया सोज्झे उंखर खाता म डारे गेहे।
पुलिस कमिश्नरी प्रणाली
राजधानी रइपुर म आज ले पुलिस आयुक्त प्रणाली लागू हो गेहे। रइपुर के पहिली पुलिस आयुक्त के रूप म डॉ. संजीव शुक्ला ह कमिश्नर कार्यालय म आज पदभार संभालिन। एखर ले पहिली श्री शुक्ला ह बिलासपुर रेंज के पुलिस महानिरीक्षक, सीआईडी परमुख अउ दुरूग जिला के पुलिस अधीक्षक के संगेसंग रइपुर म ए.एस.पी. के रूप म सेवा दे चुके हे। बछर 2004 बैच के आईपीएस श्री शुक्ला ल उंखर सबले बढ़िया कारज के सेति दू घांव राष्ट्रपति पदक ले घलो सम्मानित करे जा चुके हे।
बतादन कि पुलिस आयुक्त प्रणाली म रइपुर सहर के 21 थाना अउ रइपुर ग्रामीण के 12 पुलिस थाना ल सामिल करे गेहे। रइपुर म पुलिस आयुक्त प्रणाली बर राज्य पुलिस सेवा के अधिकारी मन ल घलो नवा पदस्थापना देय गेहे।
पुलिस विभाग-फेरबदल
राज्य सरकार ह पुलिस विभाग म बड़का फेरबदल करत भारतीय पुलिस सेवा के पंद्रह अधिकारी मनके तबादला आदेस जारी कर देय हे। जारी आदेस ले रायगढ़ के पुलिस अधीक्षक दिव्यांग पटेल ल रइपुर रेल अउ जशपुर के पुलिस अधीक्षक शशिमोहन सिंह ल रायगढ़ के नवा पुलिस अधीक्षक बनाय गेहे। उहें, रइपुर के वरिष्ठ पुलिस अधीक्षक लाल उमेद सिंह ल जशपुर के पुलिस अधीक्षक नियुक्त करे गिस हे।
माओवादी-आत्मसमर्पण
धमतरी जिला म आज 9 झन माओवादी मन आत्मसमर्पण कर दीन। एमा 7 झन माओवादी माईलोगन हें। ए सबो झन माओवादी मन उपर सैंतालीस लाख रूपिया के इनाम रिहीस। ए सबो माओवादी मन रइपुर रेंज के पुलिस महानिरीक्षक अमरेश मिश्रा अउ धमतरी जिला के पुलिस अधीक्षक सूरज सिंह परिहार के आगु आत्मसमर्पण करिन। ए दउरान सबो माओवादी मन ह अपन हथियार ल घलो सौंपिन। ए माओवादी मन सीतानदी इलाका के नगरी, मैनपुर अउ गोबरा इलाका म सक्रिय रिहीन। एखर मन उपर कतकोन घटना म सामिल रेहे के आरोप हे।
आत्मसमर्पण करइया माओवादी मन प्रतिबंधित संगठन ओडिसा स्टेट कमेटी के धमतरी, गरियाबंद अउ नुआपाड़ा डिवीजन ले जुड़े रिहीन अउ बड़का-बड़का पद म रहिके नक्सली संगठन बर बूता करत रिहीन हें।
संयंत्र हादसा-जांच/मुआवजा
बलौदाबाजार-भाटापारा जिला के धौराभाठा म रियल इस्पात कारखाना परिसर म होय घटना के सुरूआती जांच म सुरक्षा मानक के उल्लंघन पाय गिस। एला देखत कारखाना के परभावित क्षेत्र के सबो कारज ल तुरते रोक देय गेहे।
बतादन कि काली रियल इस्पात कारखाना म बिस्फोट होय ले 6 झन मजदूर के मउका म ही मउत होगे रिहीस। उहें, 5 झन गंभीर रूप ले घायल हें। घटना के गंभीरता ल देखत बलौदाबाजार म औद्योगिक स्वास्थ्य अउ सुरक्षा के सहायक संचालक ह अधिकारी मनके संग टीम बनाके कारखाना के निरीक्षण करिस। सुरूआती जांच म पाय गिस कि कारखाना म कारज के बेरा मजदूर मनके सुरक्षा ले जुरे नियम ल ताख म राखे गे रिहीस, जेखर सेति ए घटना घटिस। फिरहाल अवइया आदेस तक कारखाना भट्ठी के संचालन बंद रइही। ए बेरा कारखाना म नियोजित सबो मजदूर मन ल तनखा अउ आने भत्तो निर्धारित तिथि म देच ल परही।
ऐति, कारखाना प्रबंधन के डाहर ले मृतक के परिजन मन ल 20-20 लाख रूपिया अउ घायल मन ल 5-5 लाख रूपिया देय के घोसना करे गेहे। एखर अलावा हरेक मृतक के परिजन ल करमचारी क्षतिपूर्ति कोष ले 10 लाख रूपिया अउ करमचारी राज्य बीमा निगम ले पेंशन के रूप म अवइया बछर म कुल 15 लाख रूपिया देय जाही।
छत्तीसगढ़-झांकी
गणतंत्र दिवस ले पहिली कर्तव्य पथ म आयोजित रिहर्सल म छत्तीसगढ़ के झांकी ह अपन बिसेस प्रस्तुति ले सबो के धियान खिंचिस। झांकी म जनजातीय समाज के रहन-सहन, पारंपरिक कला, लोक नृत्य, वेशभूषा अउ बिरासत के झलक ल देखाय गिस। ए झांकी देस के पहिली जनजातीय डिजीटल संग्रहालय के थीम म आधारित हे। झांकी म भूमकाल विद्रोह के नायक वीर गुंडाधूर अउ छत्तीसगढ़ के पहिली शहीद वीर नारायण सिंह के गाथा ल घलो दरसाय गेहे।
रक्षा मंत्रालय के डाहर ले आज नई दिल्ली म राष्ट्रीय मीडिया के आगु छत्तीसगढ़ के झांकी प्रदर्सन करे गिस। बतादन कि एसो कर्तव्य पथ म आयोजित गणतंत्र दिवस परेड म भाग लेय बर छत्तीसगढ़ के संगे 17 आने राज्य के झांकी के चयन करे गेहे।
चित्रोत्पला फिल्म सिटी
मुख्यमंत्री विष्ण्ुदेव साय काली नवा रइपुर के माना-तूता म प्रस्तावित चित्रोत्पला फिल्म सिटी एंड कन्वेंशन सेंटर के भूमिपूजन करही। 100 एकड़ म बनइया फिल्म सिटी म आत्याधुनिक स्टूडियो, स्कूल, अस्पताल, जेल समेत सबो परकार के सुविधा होहीं।
कृष्णा दास-केबिनेट मंत्री
राज्य सरकार ह मुख्यमंत्री विष्णुदेव साय के नवा सलाहकार आर. कृष्णा दास ल कैबिनेट मंत्री के दरजा देय हे। जारी आदेस ले श्री दास ह मुख्यमंत्री ल मीडिया ले जुड़े बिसय अउ आने बड़का मामला म सलाह दिहीं। इही बीच, श्री दास ह मुख्यमंत्री ले उंखर निवास कार्यालय म सौजन्य भेंट करिन। ए दउरान मुख्यमंत्री ह ओमन ल बधई अउ सुभकामना देइन।