बलौदाबाजार-भाटापारा जिला के बकुलाही स्थित स्पंज आयरन फैक्ट्री म आज बिहनिया डस्ट सेटलिंग चैंबर म विस्फोट होय ले छै मजदूर मनके मउत होगे हे। उहें, पांच आने मजदूर गंभीर रूप ले घायल हो गेहे, जेला बिलासपुर स्थित बर्न ट्रॉमा सेंटर म रेफर करे गेहे। सूचना मिलतेच कलेक्टर दीपक सोनी अउ पुलिस अधीक्षक भावना गुप्ता ह घटनास्थल पहुंचके स्थिति के जायजा लीन। घटना के जांच बर एसडीएम के अध्यक्षता म टीम गठित करे गेहे। उहें, इस्पात संयंत्र ल सील कर दे गेहे।
मुख्यमंत्री विष्णुदेव साय ह ए घटना उपर दुख जतावत श्रमिक मनके परिवार वाले मनके प्रति संवेदना व्यक्त करीन हे। ओमन भरोसा देवईन कि पीड़ित परिवार वाले मन ल राज्य सरकार डहार हरसंभव मदद दे जाही। मुख्यमंत्री ह घायल मन ल बने चिकित्सा सुविधा देवाय के निरदेस जिला प्रशासन ल दीन। संगेसंग हादसा के सेति जांच सुनिश्चित करे बर घलो किहीन हे, जेखर ले भविष्य म अइसने घटना फेर झन होवय। श्री साय ह किहीन कि औद्योगिक इकाई म सुरक्षा मानक के पालन ल लेके कोनो भी प्रकार के लापरवाही बर्दास्त नइ करे जाही।
उहें, स्वास्थ्य मंत्री श्याम बिहारी जायसवाल ह प्रशासन ल निरदेस दीन हे कि घायल मन ल सुघ्घर चिकित्सा सुविधा देवाय जाय। ओमन किहीन कि ए मामला के गंभीरता ले जांच कर दोषी मन के खिलाफ कार्रवाई करे जाय।
माओवादी मुठभेड़
झारखंड म आज सुरक्षा बल मनके संग होय मुठभेड़ म पंद्रह माओवादी मारे गेहे। केंद्रीय रिजर्व पुलिस बल-सीआरपीएफ के पुलिस महानिरीक्षक साकेत सिंह ह बतइन कि घटनास्थल ले माओवादी मन के शव के संगेसंग ऑटोमेटिक हथियार अउ माओवादी जिनिस बरामद करे गेहे। ओमन बतइन कि इलाका म सर्चिंग अभियान तेज कर दे गेहे। मउका म कोबरा अउ सीआरपीएफ के जवान घलो मौजूद हे।
दुर्घटना
कांकेर जिला के चारामा थाना क्षेत्र के रतेसरा गांव के तीर आज बिहनिया दू ठिन ट्रक के बीच होय टक्कर म तीन झिन मनखे के मउत होगे। मउत होय मनखे म चालक अउ परिचालक दूनों सामिल हे। टक्कर अतका जोरदरहा रिहीस कि दूनों ट्रक क्षतिग्रस्त होगे। हादसा के बाद मुख्य मार्ग म अवई-जवई बंद रिहीस। घटना के सूचना मिलतेच पुलिस अउ हाईवे पेट्रोलिंग टीम ह मउका म पहुंचीस अउ जेसीबी के मदद ले ट्रक ल हटाय गीस।
उहें, सूरजपुर जिला म मसनकी घाट के तीर एक यात्री बस म आगी लग गे। बस ले धुगियां निकलत देखकके तुरते बस ल रोके गीस। एखर बाद यात्री मन ह बस ले कूदके अपन जान बचईन। बस म चालीस ले जादा यात्री बइठे रिहीन।
एसआईआर-दावा आपत्ति
प्रदेस म मतदाता सूची के विशेष गहन पुनरीक्षण-एसआईआर कार्यक्रम के तहत प्रारूप मतदाता सूची के संबंध म दावा आपत्ति करे के आज आखिरी दिन हरय। एखर बाद मतदाता सूची म नाम जुड़वाय, संशोधन करे अउ विलोपन बर मिले दावा-आपत्ति उपर जुड़े विधानसभा क्षेत्र के ईआरओ या एईआरओ डहार ले निर्वाचन आयोग के दिसा-निरदेस के अनुरूप चौदह फरवरी तक सुनवाई अउ जरूरी दस्तावेजा मनके सत्यापन करे जाही। सुनवाई अउ सत्यापन के दउरान दावा-आपत्ति के निराकरण करे जाही। मतदाता सूची के आखिरी प्रकासन इक्कीस फरवरी के करे जाही।
ऑटो एक्सपो-मुख्यमंत्री
रायपुर ऑटो मोबाइल डीलर्स एसोसिएशन डहार राजधानी के श्रीराम बिजनेस पार्क म बीस जनवरी ले पांच फरवरी तक ऑटो एक्सपो के आयोजन करे जावत हे। मुख्यमंत्री विष्णुदेव साय आज ऑटो एक्सपो के सुभारंभ कारीकरम म सामिल होइन। ए मउका म ओमन किहीन कि ए बछर ऑटो एक्सपो के आयोजन बड़का स्तर म करे गेहे। मुख्यमंत्री ह बतइन कि एक्सपो के पहिली ही दिन करीबन दू हजार वाहन मनके पंजीयन होगे हे। ए बछर पचास हजार वाहन मन के बिक्री के लक्ष्य हे। ए मउका म मुख्यमंत्री ह सड़क दुर्घटना के रोकथाम बर आम लोगन मन ले ट्रैफिक नियम के पालन करे के घलो अपील करीन।
खबर के मुताबिक राज्य सरकार डहार ऑटो एक्सपो के दउरान बिकइया वाहन उपर लाइफ टाइम रोड टैक्स म पचास प्रतिसत छूट दे जावत हे।
रायपुर साहित्य उत्सव
नवा रायपुर स्थित पुरखौती मुक्तांगन म काली ले ‘‘रायपुर साहित्य उत्सव‘‘ के आयोजन करे जाही। पच्चीस जनवरी तक चलइया ए महोत्सव म देशभर के जाने-माने साहित्यकार, कवि, कथाकार, विचारक, कलाकार, पत्रकार, रंगकर्मी अउ साहित्य प्रेमी मन भाग लीहीं। उत्सव के दउरान साहित्यिक संवाद, विचार-मंथन, समकालीन विषय उपर चर्चा, कविता पाठ, कथा सत्र, पुस्तक विमोचन, सांस्कृतिक प्रस्तुति अउ कला-प्रदर्सन आयोजित करे जाही। उहें, ओपन माइक सत्र के माध्यम ले आम लोगन, युवा अउ नवा रचनाकार मन ल कविता, कहानी, गीत, विचार अउ नाट्य अंश के रूप म अपन प्रतिभा प्रस्तुत करे के मउका मिलही।
‘मॉडल यूथ ग्राम सभा‘
गरियाबंद जिला के कोसमबुड़ा स्थित एकलव्य आदर्श आवासीय विद्यालय के टीम ह ‘मॉडल यूथ ग्राम सभा‘ प्रतियोगिता म पहिली स्थान पाय हे। केंद्रीय पंचायती राज मंत्रालय डहार अवइया अट्ठाईस जनवरी के नई दिल्ली म राखे के एक ठिन समारोह म ए टीम ल सम्मानित करे जाही।
ए उपलब्धि उपर कोसमबुड़ा के प्राचार्य डॉक्टर कमलाकांत यादव ह खुसी जतइन हे। ओमन बतइन कि प्रतियोगिता म देसभर के आठ सौ ले जादा स्कूल मनके प्रतिभागी मन ह भाग ले रिहीस। एमा कोसमबुड़ा के छात्र मन ह ग्रामीण शासन के असाधारण समझ के प्रदर्सन करीन।
बायर-सेलर मीट
पंचायत अउ ग्रामीण विकास विभाग डहार ले नवा रायपुर म बीस अउ इक्कीस जनवरी के राज्य स्तरीय बायर-सेलर मीट के आयोजन करे गीस। ए मीट म राज्य के बिहान महिला समूह अउ इंखर एफपीओ ल बने प्रतिसाद मिलीस। मीट म छत्तीसगढ़ के संगेसंग आने-आने राज्य के खरीददार मन घलो सामिल होइन। खरीदददार मन ह बिहान महिला समूह डहार ले बनाय गे ग्यारह प्रकार के दू लाख तेरह हजार मीटरिक टन उत्पाद के खरीदी बर सौदा करीन। एमा जैविक चाउर, विष्णु भोग, देवभोग, जवाफूल, जीराफूल, मसाला, चना दार, बेसन, उड़द दार, कोदो-कुटकी अउ तिखूर सामिल हे।
युवा वैज्ञानिक सम्मेलन
नवा रायपुर स्थित अंतर्राष्ट्रीय सूचना प्रौद्योगिकी संस्थान-ट्रिपल आईटी म सत्रह अउ अट्ठारह मार्च के इक्कीसवां छत्तीसगढ़ युवा वैज्ञानिक सम्मेलन के आयोजन करे जाही। छत्तीसगढ़ विज्ञान अउ प्रौद्योगिकी परिषद अउ ट्रिपल आईटी डहार ले राखे गे ए युवा सम्मेलन बर पंजीकरण अउ एकल लेखक सोध पत्र प्रस्तुति के आखिरी तारीख पन्द्रह फरवरी निर्धारित करे गेहे। हरेक विषयधारा म चयनित युवा वैज्ञानिक मन ल इक्कीस हजार रूपिया के नकद पुरस्कार रासि दे जाही।
रोजगार मेला
रायपुर के तीर केन्द्रीय पुलिस पुलिस बल-सीआरपीएफ के आरंग म स्थित गु्रप केन्द्र म अवइया चौबीस जनवरी के रोजगार मेला के आयोजन करे जाही। ए मउका म भारत सरकार के आने-आने विभाग अउ केन्द्रीय सशस्त्र पुलिस बल म चुने गे अभ्यर्थी मन ल नियुक्ति पत्र दे जाही। कार्यक्रम के माईपहुना केन्द्रीय राज्यमंत्री तोखन साहू होही।
‘पश्चिम क्षेत्रीय कैरम प्रतियोगिता‘
भारतीय लेखा परीक्षा अउ लेखा विभाग डहार रायपुर म होय तीन दिवसीय ‘‘पश्चिम क्षेत्रीय कैरम प्रतियोगिता‘‘ के समापन होगे हे। ए प्रतियोगिता के फाइनल मुकाबला म नागपुर ह जोरदरहा प्रदर्सन करत मुंबई के टीम ल दो-एक ले हराके खिताब अपन नांव करीन। उहें, पुरूष एकल वर्ग म घलो नागपुर के राजू भायसारे ह मुंबई के जीतेन्द्र काले ल हरईन। एखर संगेसंग महिला वर्ग म मुंबई के ऑड्रे मारिया डिसूजा ह मेजबान छत्तीसगढ़ के कविता विनय ल हराके स्वर्ण पदक जीत गीन। जबकि, वेटरन संवर्ग म रायपुर के हेमराज बाबने ह राजस्थान के रहीसुद्दीन ल हराइन। समापन समारोह म छत्तीसगढ़ के प्रधान महालेखाकार यशवंत कुमार ह विजेता मन ल पुरस्कार प्रदान करीन।
खबर के मुताबिक ए कैरम प्रतियोगिता म पश्चिम क्षेत्र के नौ आने-आने कार्यालय मन के इकसठ खिलाड़ी मन ह भाग लीन।