केन्द्रीय मंत्रिमंडल ह आज अटल पेंशन योजना ल बछर दू हजार तीस-इकतीस तक जारी राखे के संगेसंग प्रचार अउ विकास ले जुड़े गतिविधि खातिर वित्तीय सहायता बढ़ाय बर मंजूरी दे देहे। प्रधानमंत्री नरेन्द्र मोदी के अगुवई म आज नई दिल्ली म होय मंत्रिमंडल के बइठका म ए फइसला ले गीस। ए योजना साठ बछर के आयु के बाद हरेक महीना एक हजार ले पांच हजार रूपिया तक के न्यूनतम गारंटीकृत पेंसन देथे, जउन लाभार्थी के योगदान म निर्भर करथे। ए योजना म अभी तक आठ करोड़ छियासठ लाख ले जादा लाभार्थी मनके पंजीयन होगे हे।
केन्द्र-मंजूरी
केन्द्र सरकार ह छत्तीसगढ़ बर चना, मसूर अउ सरसों फसल बर मूल्य समर्थन योजना के प्रस्ताव ल मंजूर देहे। ए मंजूरी प्रधानमंत्री अन्नदाता आय संरक्षण अभियान म नब्बे दिन के अवधि खातिर दे गेहे। आज नई दिल्ली म छत्तीसगढ़ के कृषि मंत्री रामविचार नेताम ह केन्द्रीय कृषि मंत्री शिवराज सिंह चौहान ले भेंट करीन। ए दउरान केन्द्रीय कृषि मंत्री ह राज्य म रबी फसल अउ न्यूनतम समर्थन मूल्य ले जुड़े मूल्य समर्थन योजना के बढ़वार के समीक्षा करीन।
मंत्रिपरिषद-निर्णय
मुख्यमंत्री विष्णुदेव साय के अगुवई म आज रईपुर म राखे गे राज्य मंत्रिमंडल के बइठका म कई ठन फइसला ले गीस। मंत्रिपरिषद ह अवइया वित्तीय बछर बर छत्तीसगढ़ आबकारी नीति के प्रस्ताव के अनुमोदन करे हे। उहें, नवा रईपुर अटल नगर म नरसी मोंजी प्रबंधन अध्ययन संस्थान बनाय खातिर श्री विले पारले कलावनी मंडल ल करीबन चालीस एकड़ भूईंया के आवंटन नब्बे बछर बर लीज म देके मंजूरी देहे।
बइठका के बाद पत्रकार मन ले गोठबात करत उपमुख्यमंत्री अरूण साव ह बतईन कि मंत्रिपरिषद ह अटल नगर म चार नवा उद्यमिता केन्द्र के स्थापना करे बर सॉफ्टवेयर टेक्नोलॉजी पार्क्स ऑफ इंडिया के संग एमओयू करे के फइसला लेहे। एखर ले राज्य म आईटी-आई.टी.ई.एस. उद्योग अउ तकनीकी स्टार्ट-अप इको सिस्टम ल बढ़वार करे म मदद मिलही।
ए आने फइसला म मंत्रिपरिषद ह राज्य के जिला अस्पताल, सामुदायिक स्वास्थ्य केन्द्र अउ प्राथमिक स्वास्थ्य केन्द्र म जांच के संख्या बढ़ाय बर लैब चलाय के फइसला ले गीस।
आईएएस-पदस्थापना
राज्य सरकार ह भारतीय प्रशासनिक सेवा के तीन झिन अधिकारी मनके नवा पदस्थापना करे हे। वरिष्ठ अधिकारी किरण कौशल ल अवइया आदेस तक समग्र सिक्षा के आयुक्त के पद देवत छत्तीसगढ़ पाठ्य पुस्तक निगम के प्रबंध संचालक के अतिरिक्त प्रभार सौंपे गेहे।
उहें, आईएएस अधिकारी अवनीश कुमार शरण ल उंखर वर्तमान दायित्व के संगेसंग आरडीए के मुख्य कार्यपालन अधिकारी के अतिरिक्त प्रभार दे गेहे। अइसने आकाश छिकारा ल बस्तर जिला के कलेक्टर बनाय गेहे।
धान खरीदी-कार्रवाई
प्रदेस म समर्थन कीमत म किसान मन ले धान बिसाय जात हे। उहें, धान के अवैध परिवहन, भंडारण, विक्रय अउ मिलिंग म होवइया गड़बड़ी के खिलाफ राज्यभर म अभियान चलाय जात हे। खाद्य सचिव रीना बाबा साहेब कंगाले ह किहीन कि धान बिसाय के काम म कोनांें भी किसम के कोताही बर्दास्त नइ करे जाही।
इस बीच, मुंगेली जिला म धान खरीदी म अट्ठारह करोड़ रूपिया ले अधिक के फर्जीवाड़ा पकड़ म आय हे। ए मामला म राईस मिलर संचालक अउ समिति प्रबंधक सहित पांच झिन आरोपी मन ल गिरफ्तार करे गेहे। उहें, चार दूसर आरोपी फरार बताय जात हे।
वहीं, महासमुंद जिला के रेहटीखोल क्षेत्र म बिना कोनांें वैध दस्तावेज के धान लेगत एक ट्रक ले तीन सौ उन्नीस कुंटल के करीब सात सौ बोरी धान जब्त करे गेहे। जिला म पाछु दू दिन के दउरान करे गे कार्रवाई म करीबन दू हजार नौ सौ छियासी कट्टा अवैध धान जब्त करे गीस।
ऐति, धमतरी जिला म मोहदी के प्राथमिक कृषि सहकारी साख समिति म गड़बड़ी पाय जाय म समिति प्रबंधक अउ ऑपरेटर ल हटा दे गेहे।
अइसने बलौदाबाजार-भाटापारा जिला के गांव बिलारी म अवैध परिवहन के मामला म पचहत्तर कट्टा धान जब्त करे गेहे।
ओति, बिलासपुर जिला म धान उठाव म गड़बड़ी पाय जाय म एक राईस मिल ले चौव्वन हजार कुंटल ले जादा धान ल जब्त करके ओला सील कर दे गेहे। पकड़े गे धान के कीमत करीबन सोलह करोड़ रूपिया बताय गेहे।
माओवादी-आत्ससमर्पण अपील
गरियाबंद जिला म पाछु उन्नीस जनवरी के नौ झिन माओवादी मन ह आत्मसमर्पण करीन। आत्मसमर्पण करइया महिला नक्सली अंजू घलो सामिल हे। अंजू ह आकाशवाणी समाचार ले बात करत गरियाबंद जिला म सक्रिय आने नक्सली मन ले अपील करीन हे कि ओमन हथियार छोड़के आत्मसमर्पण करयं। ओहर किहीस कि सबो माओवादी जिला के पुलिस अधीक्षक ले सोझे बात करके आत्मसमर्पण कर सकत हे।
उहें, आत्मसमर्पित एक आने माओवादी बलदेव ह अपन संगी ज्योति रामदास अउ आने नक्सली मन ले समाज के मुख्यधारा म लहुटे के अपील करीन।
गरियाबंद जिला के पुलिस अधीक्षक वेदव्रत सिरमौर ह घलो ए क्षेत्र म सक्रिय नक्सली मन ले किहीन कि आत्मसमर्पण करके समाज के मुख्यधारा म लहुटे अउ राज्य सासन के पुनर्वास नीति के फायदा उठावयं।
होल्ड बाईट – वेदव्रत सिरमौर (20 सेकेंड)
खबर के मुताबिक केन्द्र सरकार ह एसो मार्च महीना तक छत्तीसगढ़ समेत देसभर ल नक्सल समस्या ले मुक्त कराय के संकलप लेहे। छत्तीसगढ़ म पाछु दू बछर म दू हजार ले जादा नक्सली राज्य सासन के पुनर्वास योजना ले प्रभावित होके अपन हथियार सौंप के आत्मसमर्पण करे हे।
माओवादी-सामग्री बरामद
धमतरी जिला म सुरक्षा बल मन ह माओवादी मन कोति ले लुका के राखे गे हथियार बरामद करे हे। खबर के मुताबिक डिस्ट्रिक्ट रिजर्व गार्ड-डीआरजी के जवान दौड़ पंड़रीपानी क्षेत्र म सर्चिंग अभियान म निकले रिहीन। इही दउरान जवान मन ह माओवादी मन कोति ले भूईंया म गढ्ढा खन के लुकाय गे ऑटोमेटिक रायफल के संगेसंग ओखर खाली मैंगजीन, बारह बोर के बंदूक अउ भरमार बंदूक जब्त करीन। धमतरी पुलिस ह माओवादी मन ले हिंसा के रद्दा छोड़के राज्य सासन के आत्मसमर्पण नीति के फायदा लेके अपील करीन।
रायपुर साहित्य उत्सव
नवा रईपुर के पुरखौती मुक्तांगन म तेईस ले पच्चीस जनवरी तक ‘‘रायपुर साहित्य उत्सव‘‘ राखे जाही। तीन दिवसीय ए महोत्सव म देसभर के जाने-माने साहित्यकार, कवि, कथाकार, विचारक, कलाकार, पत्रकार, रंगकर्मी अउ साहित्य प्रेमी भाग लीहीं।
एखर संगेसंग आम लोगन मन बर उत्सव स्थल तक पहंुचे बर मुफत म आय-जाय के बेवस्था करे गेहे।
अउ अब थोरकुन समाचार सार म –
– राज्यपाल रमेन डेका ह आज रईपुर के पंडित रविशंकर शुक्ल विश्वविद्यालय म स्थापित श्रीमंत शंकर देव शोध पीठ के लोकार्पण करीन।
अउ
– रईपुर तीर सीआरपीएफ के आरंग स्थित गु्रप केन्द्र म अवइया चौबीस जनवरी के रोजगार मेला के आयोजन करे जाही। ए मउका म भारत सरकार के आने-आने विभाग अउ केन्द्रीय सशस्त्र पुलिस बल म चुने गे उम्मीदवार मन ल नियुक्ति पत्र दे जाही। कार्यक्रम के मुख्य अतिथि केन्द्रीय राज्यमंत्री तोखन साहू होही।