नितिन नबीन भारतीय जनता पार्टी के राष्ट्रीय अध्यक्ष बन गेहे। नई दिल्ली स्थित भाजपा मुख्यालय म संगठन पर्व के मउका म पार्टी के राष्ट्रीय रिटर्निंग अधिकारी डॉक्टर के. लक्ष्मण ह उंखर नाम के घोषणा करीन। श्री नबीन ल बधाई देवत प्रधानमंत्री नरेन्द्र मोदी ह पहिली के जम्मों अध्यक्ष मनके योगदान के अभिनंदन करीन। श्री मोदी ह किहीन कि नितिन नबीन ह हर काम ल सुघ्घर निभाय हे। प्रधानमंत्री ह भाजपा ल विश्व के सबले बड़का पार्टी बतईन। ओमन किहीन कि श्री नबीन ह पार्टी के विरासत ल आगू बढ़ाही।
श्री नबीन ल भाजपा के बड़का नेता अउ केन्द्रीय मंत्री अमित शाह, राजनाथ सिंह अउ नितिन गडकरी के संगेसंग पार्टी के पूर्व अध्यक्ष अउ केन्द्रीय मंत्री जे.पी. नड्डा ह बधाई दीन।
नव-निर्वाचित राष्ट्रीय अध्यक्ष नितिन नबीन ह प्रधानमंत्री के प्रति आभार जतावत ओमन ल धन्यवाद दीन।
भारतीय जनता पार्टी के छत्तीसगढ़ प्रभारी नितिन नबीन अब पार्टी के राष्ट्रीय अध्यक्ष बन गेहे। एखर पहिली, हालेच म ओमन ल पार्टी के कार्यकारी अध्यक्ष बनाय गे रिहीस। श्री नबीन भाजपा के इतिहास म सबले युवा राष्ट्रीय अध्यक्ष हरय अउ बिहार ले ए पद म नियुक्त होवइया पार्टी के पहिली नेता हरय। अध्यक्ष बने के पहिली संगठन म ओमन कतकोन महत्वपूर्ण भूमिका निभा चुके हे। श्री नबीन ए बेरा पटना जिला के बांकीपुर विधानसभा क्षेत्र ले विधायक हवय। नितिन नबीन के जन्म तेईस मई उन्नीस सौ अस्सी के रांची म होइस। उंखर पिता स्वर्गीय नबीन किशोर प्रसाद सिन्हा पटना पश्चिम ले चार बखत के विधायक रिहीन। पहिली बखत बछर दू हजार छह म पटना पश्चिम सीट ले विधायक चुने गे नितिन नबीन लगातार पांच घांव ले बिहार विधानसभा के सदस्य हवय। श्री नबीन भारतीय जनता युवा मोर्चा म प्रदेस अध्यक्ष के संगेसंग राष्ट्रीय महामंत्री के भूमिका निभा चुके हे। बछर दू हजार उन्नीस म ओमन सिक्किम के प्रभारी अउ बछर दू हजार इक्कीस ले दू हजार चौबीस तक छत्तीसगढ़ म भाजपा के सह प्रभारी रिहीन। दू हजार इक्कीस म ही संगठन म बड़का जिम्मेदारी निभाय के संगेसंग ओमन बिहार सरकार म सड़क निर्माण विभाग के मंत्री के पदभार घलो संभालीन।
श्री नबीन के राष्ट्रीय अध्यक्ष चुने जाय म मुख्यमंत्री विष्णुदेव साय ह ओमन ल बधाई दीन। ओमन विश्वास जतईन कि श्री नबीन के कार्यकाल पार्टी ल नवा गति देवत राष्ट्रसेवा के संकल्प ल अउ मजबूत करही।
उहें, प्रदेस भाजपा अध्यक्ष किरण सिंह देव ह किहीन कि श्री नबीन के अगुवई म कार्यकर्ता मन ह ऊर्जावान बनही अउ पार्टी के आदर्स ल ऊंचाई मिलही।
फसल बीमा-पुरस्कार
छत्तीसगढ़ ल प्रधानमंत्री फसल बीमा योजना अउ पुनर्गठित मौसम आधारित फसल बीमा योजना के सुघ्घर क्रियान्वयन बर देस के सर्वश्रेष्ठ राज्य घोषित करे गेहे। एखर बर उद्यानिकी अउ कृषि विभाग ल सामलात रूप ले पहिली पुरस्कार ले सम्मानित करे गेहे। प्रदेस ल ए पुरस्कार कर्नाटक म अट्ठारह अउ उन्नीस जनवरी के राखे गे तेरहवां नेशनल रिव्यू कॉफ्रेेंस म दे गीस। उद्यानिकी विभाग कोति ले प्रभारी संयुक्त संचालक नीरज शाहा ह ए पुरस्कार लीन।
ए उपलब्धि म मुख्यमंत्री विष्णुदेव साय अउ कृषि मंत्री रामविचार नेताम ह विभाग के अधिकारी मन ल बधाई दीन।
राज्यपाल-फ्लैगशिप योजना
राज्यपाल रमेन डेका ह बेमेतरा जिला के टेमरी, गरियाबंद जिला के बिजली अउ खैरागढ़-छुईखदान-गंडई जिला के सोनपुरी गांव म केन्द्र अउ राज्य सासन के योजना मनके क्रियान्वयन करे के निरदेस दीन हे। एखर बर ओमन मार्च महीना तक लक्ष्य निर्धारित करे हे। ए बारे म राज्यपाल ह आज लोकभवन म एखर ले जुड़े अधिकारी मनके बइठका लीन। बइठका म राज्यपाल ह शिक्षा, स्वास्थ्य, पोषण, पर्यावरण, जल संरक्षण, स्वच्छता, जैविक खेती अउ आजीविका ले जुड़े काम उपर जोर दीन। राज्यपाल ह ग्राम बिजली म मुक्तिधाम निर्माण बर तीन लाख रूपिया अपन स्वेच्छानुदान मद ले देके, सोनपुरी गांव म स्कूली लइका मन बर लाइब्रेरी म किताब अउ टेमरी गांव म सामुदायिक भवन अउ ओपन जिम बर सी.एस.आर. मद ले रासि देके बात कहिन।
खबर के मुताबिक राज्यपाल ह ए तीनों गांव ल गोद लेके एखर विकास के जिम्मा लेहे।
सरगुजा ओलंपिक
सरगुजा संभाग म पहिली घांव सरगुजा ओलंपिक के आयोजन करे जाही। कलेक्टर चंदन त्रिपाठी ह बतईन कि सरगुजा ओलंपिक के तहत तीन चरण म प्रतियोगिता आयोजित करे जाही। एमा विकासखंड स्तर म अट्ठाईस जनवरी ले तीन फरवरी, जिला स्तर म पांच ले दस फरवरी अउ संभाग स्तर म एक ले तीन मार्च तक आने-आने खेल के आयोजन करे जाही।
सरगुजा ओलंपिक के तैयारी ल लेके कलेक्टर ह आज बइठका लीन। बइठका म कलेक्टर ह एसडीएम समेत आने-आने विभाग के अधिकारी मनके संग जिला खेल अधिकारी मन ल ओलंपिक के तैयारी, प्रचार-प्रसार, दीवाल लेखन अउ ग्राम-वार्ड स्तर म मुनादी कराय के निरदेस दीन।
सरगुजा ओलंपिक म भाग ले बर युवा मन ह पच्चीस जनवरी तक ऑनलाइन या ऑफलाइन के माध्यम ले पंजीयन करा सकत हे।
विवेकानंद सिन्हा-नक्सल समस्या
छत्तीसगढ़ सासन म नक्सल ऑपरेशन साखा के अतिरिक्त पुलिस महानिदेशक विवेकानंद सिन्हा ह कहिन हे कि पाछु दू बछर के दउरान सुरक्षा बल मनके प्रयास ले बस्तर संभाग के जम्मों जिला समेत राज्य के आने जिला मन ह बड़ अकन नक्सली समस्या ले मुक्त होगे हे। ओमन बांचे नक्सली मन ले अपील करीन हे कि ओमन हथियार छोड़के समाज के मुख्यधारा म सामिल होवय। आकाशवाणी समाचार ले विशेष गोठबात म श्री सिन्हा ह कहिन कि नक्सली मनके पुनर्वास बर सुघ्घर नीति लागू करे गेहे, जेमा आत्मसमर्पित नक्सली मन ल प्रसिक्षण देके ओमन ल आजीविका के साधन मुहैया कराय के प्रावधान हवय।
सीजीएमएससी घोटाला-गिरफ्तारी
छत्तीसगढ़ मेडिकल सर्विसेज कॉर्पोरेशन लिमिटेड-सीजीएमएससी घोटाला मामला म एंटी करप्शन ब्यूरो-एसीबी की टीम ह तीन झन लोगन ल गिरफ्तार करे हे। एमा समवन्यक के भूमिका निभइया प्रिंस जैन, पंचकुला के अभिषेक कौशल अउ शारदा इंडस्ट्रीज के प्रोप्राईटर राकेश जैन सामिल हे। बताय गेहे कि प्रिंस जैन आरोपी शशांक चोपड़ा के रिश्तेदार हरय। गिरफ्तार आरोपी मन ल आज रायपुर के विशेष न्यायालय म पेस करे गीस, जिहंा ले ओमन ल सत्ताईस जनवरी तक पुलिस रिमांड म भेज दे गेहे।
वीबी-जी राम जी-मोहला मानपुर
मोहला-मानपुर-अंबागढ़ चौकी जिला के ग्राम पंचायत करमरी म विकसित भारत – जी राम जी योजना के तहत जागरूकता कार्यक्रम के आयोजन करे गीस। ए दउरान ग्रामीण मन ह मानव श्रृंखला बनाके ‘‘आत्मनिर्भर गांव – विकसित भारत‘ के संदेस दीन। ए मउका म जिला पंचायत अध्यक्ष नम्रता सिंह ह जी राम जी योजना के उद्देश्य अउ रोजगार उपर प्रकास डालीन। ओमन कहिन कि ग्राम स्तर म सक्रिय सहभागिता, पारदर्सिता अउ सामुदायिक स्वामित्व के बिना कोनों भी योजना के सफलता संभव नइ हे।
ऑटो एक्सपो
रायपुर के सड्डू स्थित श्रीराम बिजनेस पार्क म आज ले ऑटो एक्सपो के आयोजन करे जावत हे। रायपुर ऑटोमोबाइल डीलर्स एसोसिएशन डहार ले पांच फरवरी तक राखे गे ए एक्सपो म परिवहन विभाग डहार ले गाड़ी मनके खरीदी म आरटीओ टैक्स म पचास प्रतिशत के छूट दे जावत हे। गाड़ी ले बर प्रदेस के लोगन मन ल रायपुर आय के जरूरत नइ हे, ओमन अपन सहर या गांव के तीर-तखार के डीलर मनके माध्यम ले घलो ए योजना के फायदा ले सकत हे। ऑटो एक्सपो म देस के आने-आने फाइनेंसर अउ बैंक मन डहार ले कमती दर म लोन दे जावत हे। उहें, इंश्योरेंस कंपनी मन ह घलो कमती दर म गाड़ी मनके बीमा के सुविधा देवत हे।
चित्रोत्पला फिल्म सिटी
मुख्यमंत्री विष्णुदेव साय ह काली इक्कीस जनवरी के नवा रईपुर के तूता गांव म बनइया चित्रोत्पला फिल्मसिटी एंड कन्वेंशन सेंटर के भूमिपूजन करही। सौ एकड़ म बनइया ए फिल्म सिटी म अत्याधुनिक स्टूडियो, स्थायी सेट्स, स्कूल, अस्पताल, जेल, पुलिस स्टेसन अउ कृत्रिम नदी-पर्वत, आवास व्यवस्था, फूड कोर्ट अउ तरिया-बाग बगीचा जइसन सुविधा होही। ए फिल्मसिटी के निर्माण बर छत्तीसगढ़ पर्यटन बोर्ड अउ मुंबई के ईगल स्टूडियोज एंटरटेनमेंट लिमिटेड के बीच अनुबंध करे गेहे।