भारतीय जनता पार्टी के कार्यकारी अध्यक्ष नितिन नबीन ह आज राष्ट्रीय अध्यक्ष पद बर अपन नामांकन भरीन। ए बेरा भाजपा के परमुख नेता अमित शाह, राजनाथ सिंह, नितिन गडकरी, जे.पी.नड्डा, उत्तर प्रदेस के मुख्यमंत्री योगी आदित्यनाथ, छत्तीसगढ़ के मुख्यमंत्री विष्णुदेव साय के संगेसंग राज्य इकाई मनके अध्यक्ष, सांसद अउ आने पदाधिकारी मन आय रिहीन।
मुख्यमंत्री विष्णुदेव साय ह ए बारे म सोसल मीडिया म किहीन कि मजबूत संगठन, बने अगुवई करइया अउ राष्ट्रप्रेम के संकलप के संग राष्ट्रीय अध्यक्ष के निर्वाचन प्रक्रिया म छत्तीसगढ़ भाजपा ह पूरा तियार हे।
राज्यपाल-सूचना आयुक्त शपथ
राज्यपाल रमेन डेका ह आज लोकभवन म राखे गे समारोह म आईएएस अमिताभ जैन ल मुख्य सूचना आयुक्त पद के सपथ देवाइन। उहें, नवा बने दू झिन राज्य सूचना आयुक्त उमेश कुमार अग्रवाल अउ शिरीष चंद्र मिश्रा ल घलो पद अउ गोपनीयता के सपथ देवाइन।
जानबा के मुताबिक नवा बने मुख्य सूचना आयुक्त अमिताभ जैन ह पहिली मुख्य सचिव रिहीन। उहें, राज्य सूचना आयुक्त उमेश अग्रवाल ह रिटायर्टड आईएएस हरय अउ शिरीष चंद्र मिश्रा ह पत्रकारिता ले जुड़े हे।
राज्य निर्वाचन आयोग
राज्य निर्वाचन आयोग डहार ले नगर पालिका अउ त्रिस्तरीय पंचायत मनके आम अउ उपचुनई के तियारी सुरू हो गेहे। ए बारे म राज्य निर्वाचन आयुक्त अजय सिंह ह आज नवा रईपुर क आयोग कार्यालय म बइठका राखके तियारी मनके समीक्षा करीन।
जानबा के मुताबिक प्रदेस म त्रिस्तरीय पंचायत मन म जनपद पंचायत सदस्य के पांच पद सरपंच के तिहत्तर पद अउ पंच मन के नौ सौ पद खाली हे। अइसने पंचायत स्तर म कुल एक हजार तिरालीस पद म आम या उप चुनई होना हे।
राइस मिल-छापा
जांजगीर-चांपा जिला म खाद्य विभाग के टीम ह बड़का कार्रवाई करत सेमरा अउ केरा गांव के दू ठिन राइस मिल मन ले इकसठ हजार नौ सौ कुंटल ले जादा धान के जब्ती करे हे। जेखर कीमत करीबन चौदह करोड़ चौबीस लाख रूपिया आंके गेहे। जांच म दस्तावेज मन म गड़बड़ी अउ स्टाफ म घलो गलती के मामला आगू आय हे।
त उंहे, राछाभाटा गांव म एक ठिन टरक ले करीबन नौ लाख रूपिया के धान जब्त करे गेहे। खाद्य विभाग ह जिला म अब तक बीस ले जादा राइस मिल के जांच करे हे, जेमा ले चार ठिन मिल मन म गड़बड़ी आगू आय हे।
शिक्षा-डिजिटल सुशासन
छत्तीसगढ़ ह शिक्षा प्रशासन म प्रौद्योगिकी के प्रभावी उपयोग के माध्यम ले सुशासन के सुघ्घर माडल पेस करे हे। आईआईटी भिलाई इनोवेशन एंड टेक्नोलॉजी फाउंडेसन ह राज्य के विद्या समीक्षा केंद्र ल शिक्षा क्षेत्र म प्रौद्योगिकी संचालित सुशासन के एक ठिन परमुख उदाहरण बतावत एला राष्ट्रीय स्तर म बढ़िया पहल के रूप म बताय हे। छत्तीसगढ़ ह भारत के सबले बड़का सार्वजनिक शिक्षा प्रणाली म एक के संचालन करथे, जेमा अड़तालीस हजार पांच सौ ले जादा सरकारी स्कूल, उनचालीस लाख ले जादा छात्र अउ करीबन एक लाख अस्सी हजार शिक्षक अउ कर्मचारी सामिल हे।
दुर्घटना
बलरामपुर के तीर छत्तीसगढ़-झारखंड सीमा उपर ओरसा घाट म काली होय एक ठिन बस दुर्घटना म मृतक मनके संख्या बाढ़के दस हो गेहे। ए दुर्घटना म करीबन अस्सी झिन यात्री मन घायल होय हे। जेमा ले उन्नीस झिन लोगन मनके हालत गंभीर बने हे। जानबा के मुताबिक काली ए घटना झारखंड के महुआडांड थाना क्षेत्र म अइसन बेरा होइस, जब एक ठिन यात्री बस ह ओरसा घाटी के तीर अंतेतंते होके खाई म गिर गे। ए बस म बलरामपुर विकासखंड के पीपारसोत गांव के पचयासी ले जादा यात्री मन बइठे रिहीन, जउन मन एक ठिन सगाई समारोह म सामिल होय बर झारखंड जावत रिहीन। मुख्यमंत्री ह ए दुर्घटना उपर दुख जतावत मृतक परिवार मन ल पांच-पांच लाख रूपिया अउ घायल मन ल पचास-पचास हजार रूपिया के आर्थिक मदद दे के घोसना करे हे।
गरियाबंद-नक्सली समर्पण
गरियाबंद जिला म नौ झिन माओवादी मन आत्मसमर्पण करीन हे। जेमा छै माईलोगिन घलो सामिल हे। आत्मसपर्मण करइया सबो माओवादी मन उपर कुल अड़तालीस लाख रूपिया के इनाम घोसित रिहीस। आज पुलिस महानिरीक्षक अमरेश मिश्रा के आगू आत्मसमर्पण करीन। ए बेरा माओवादी मन ह एके फोर्टिसेवन, एक इंसास समेत दूसर हथियार सौपिन। आत्मसमर्पण करइया माओवादी मन म कमांडर अउ डीवीसीएम स्तर के माओवादी मन सामिल हे।
माओवादी-मुठभेड़ आत्मसमर्पण
बीजापुर जिला म भोपालपट्टनम अउ फरसेगढ़ थाना क्षेत्र म सुरक्षाबल मन के संग होय मुठभेड़ म छै झिन माओवादी मारे गीस। मउका ले स्वचलित हथियार, विस्फोटक अउ माओवादी जिनिस बरामद करे गेहे।
बीजापुर पुलिस अधीक्षक डॉक्टर जितेन्द्र यादव ह आज बतइन कि मुठभेड़ म मारे गे जम्मो माओवादी मनके पहिचान कर ले गेहे। इखर मन उपर सत्ताईस लाख रूपिया के इनाम घोसित रिहीस। ओमन बतइन कि भोपालपट्टनम अउ फरसेगढ़ के जंगल म नेशनल पार्क एरिया कमेटी के सदस्य अउ आने सशस्त्र माओवादी मनके होय के सूचना मिले उपर सुरक्षा बल मन के संयुक्त टीम ल सत्रह जनवरी के सर्च ऑपरेसन बर भेजे गीस। सुरक्षा बल अउ माओवादी मन के बीच दू दिन तक रूक-रूक के फायरिंग होइस। ए दउरान छै झिन माओवादी मारे गीस।
रायपुर साहित्य-उत्सव
नवा रईपुर के पुरखौती मुक्तांगन म तेईस जनवरी ले रईपुर साहित्य उत्सव के आयोजन करे जाही। तीन दिन तक चलइया ए उत्सव म देस-प्रदेस के साहित्य प्रेमी, लेखक, विचारक अउ पाठक मन बड़ संख्या म भाग लिही।
छत्तीसगढ़ साहित्य अकादमी के अध्यक्ष शशांक शर्मा ह आकाशवाणी समाचार ल बतइन कि एखर सुभारंभ तेईस जनवरी के राज्यसभा के सभापति हरिवंश करही। ए मउका म मुख्यमंत्री विष्णुदेव साय अउ अंतर्राष्ट्रीय हिंदी विश्व विद्यालय वर्धा के कुलपति डॉक्टर कुमुद शर्मा ह घलो सामिल हेही। आयोजन के दउरान कुल बयालिस साहित्यिक सत्र राखे गेहे।
चित्रकला प्रतियोगिता
जनजातीय संस्कृति अउ जीवनशैली उपर आधारित चित्रकला प्रतियोगिता के आयोजन इक्कीस अउ बाईस फरवरी के नवा रईपुर म होही। भाग लेवइया प्रतिभागी मन पंजीयन अउ आने जानबा बर अनुसूचित जनजाति विभाग के अधिकारी मन ले इक्कीस जनवरी तक संपर्क कर सकथे।
बर्ड सर्वे
महासमुंद जिला के बारनवापारा वन्यजीव अभ्यरण्य म सोलह ले अट्ठारा जनवरी तक बर्ड सर्वे के आयोजन करे गीस। सर्वे के दउरान चिरई मनके आने-आने रूप रंग देखे बर मिलीस। ए सर्वे म चिरई मन के दू सौ ले जादा प्रजाति के रिकार्ड दरज करे गेहे। सर्वे म देस के ग्यारा ठिन राज्य मनके प्रतिभागी, वालिंटियर्स, विसेसज्ञ अउ फोटोग्राफर्स के संगेसंग करीबन सौ झिन लोगन मन भाग लीन। ए बर्ड सर्वे बारनवापारा अभ्यरण्य अउ ओखर तीर-तखार ले जुड़े कोठारी, सोनाखान अउ देवपुर क्षेत्र म घलो करे जात हे।
इग्नू प्रवेश-प्रक्रिया
इंदिरा गांधी नेशनल ओपन यूनिवर्सिटी-इग्नू के आने-आने पाठ्यक्रम म प्रवेस के काम ऑनलाइन रूप ले ए महिना जारी रइही। दुरूग साइंस कालेज के इग्नू अध्ययन केंद्र के मुख्य समन्वयक डॉक्टर अभिनेष सुराना ह बतइन कि जनवरी सत्र म भगवत गीता, ज्योतिष अउ डिप्लोमा इन रूलर डेवलपमेंंट पाठ्यक्रम मन म सबले जादा लोगन मन ह दाखिला लेहे। दिसंबर दू हजार पच्चीस सत्र म समाप्त होय टर्म एंड परीक्षा ले जुड़े आने-आने पाठ्यक्रम मनके प्रोयोगिक परीक्षा ए महिना के आखिरी हफ्ता म सुरू होही।
संक्षिप्त समाचार
– मुख्यमंत्री के अगुवई म अवइया इक्कीस जनवरी के मंत्रालय म राज्य मंत्रिपरिषद के बइठका होही।
– जांजगीर-चांपा जिला के अकलतरा पुलिस ह तीस करोड़ रूपिया के ठगी के मामला म फरार आरोपी प्रमोद वैष्णव ल गिरफ्तार कर लेहे।
अउ
– सहायक विकास विस्तार अधिकारी पद बर अभ्यर्थी मनके दस्तावेज सत्यापन के बाद पात्र अउ अपात्र अभ्यर्थी मनके सूची जारी कर दे गेहे।