माओवादी-मुठभेड़
बीजापुर जिला म सुरक्षाबल अउ माओवादी मनके बीच काली ले मुठभेड़ चलत हे आज मउका ले दू ठिन अउ शव बरामद करे गीस। अइसने ए मुठभेड़ म मारे गे माओवादी मनके संख्या बाढ़के छै हो गेहे। एमा चार महिला माओवादी घलो सामिल हे। सुरक्षाबल ह मउका ले दू ठिन एके-फोर्टिसेवन, एक इंसास, दू ठिन थ्री नॉट थ्री रायफल अउ एक ठिन कार्बाइन समेत कुल छै राइफल घलो बरामद करे हे।
जिला के पुलिस अधीक्षक डॉक्टर जितेन्द्र यादव ह बतइन कि उत्तर-पश्चिम क्षेत्र के जंगल अउ पहाड़ी इलाका म माओवादी मनके मौजूदगी के सूचना मिले के बाद डिस्ट्रिक्ट रिजर्व गार्ड, कोबरा बटालियन अउ स्पेशल टास्क फोर्स के संयुक्ट टीम ह काली बिहनिया ले सर्च आपरेसन सुरू करे रिहीन। ए बेरा सुरक्षाबल अउ माओवादी मनके बीच रूक-रूकके गोलीबारी होत रिहीस। मारे गे सबो माओवादी मनके शव बरामद कर ले गहे। ऐमा चार झन के पहिचान होय हे। जेमा डीवीसीएम दिलीप बेड़जा घलो सामिल हे।
मुख्यमंत्री विष्णुदेव साय ह सोसल मीडिया म जारी अपन संदेस म माओवादी मन ले किहीन हे कि ओमन हिंसा छोड़के विकास के मुख्यधारा ले जुड़य। ओमन किहीन कि सरकार न्याय, सुरक्षा अउ सम्मान के संग पुनर्वास बर पूरा प्रतिबध्द हरय।
उहें, उपमुख्यमंत्री अउ गृहमंत्री विजय शर्मा ह किहीन कि ए आपरेसन के बाद नेशनल पार्क एरिया अब लगभग नक्सल मुक्त हो चुके हे, जउन राज्य बर एक बड़का सफलता हरय।
राष्ट्रीय राजमार्ग-ब्लैक स्पॉट
प्रदेस म राष्ट्रीय राजमार्ग म बनाय जाने वाला अंडरपास अउ सर्विस रोड निर्माण ले जुड़े परियोजना बर टेंडर प्रक्रिया पूरा कर ले गेहे अउ निर्माण ले जुड़े औपचारिकता प्रगति म हे। राष्ट्रीय राजमार्ग- तिरपन म दुरूग ले महाराष्ट्र, छत्तीसगढ़ सीमा म सुंदरा, पेंड्री, चिचोला, महाराजपुर अउ सोमनी गांव म लगभग नब्बे करोड़ रूपिया के लागत ले अंडरपास अउ सर्विस रोड के निर्माण करे जाना हे। एखर अलावा रसमड़ा म घलो लगभग तीस करोड़ रूपिया के लागत ले अंडरपास बनाय जात हे। अइसने प्रदेस म राष्ट्रीय राजमार्ग म कुल लगभग दू सौ सात करोड़ रूपिया के लागत ले अंडरपास अउ सर्विस रोड के आने-आने परियोजना चलत हे।
एखर अलावा नेशनल हाइवे अथारिटी ऑफ इंडिया- एनएचएआई कोति ले राष्ट्रीय राजमार्ग म चिन्हांकित ब्लैक स्पॉट्स म दुर्घटना के खतरा ले बचाय बर रंबल स्ट्रिप्स, क्रैश बैरियर्स, सोलर ब्लिंकर, हाई-मास्ट लाइट्स अउ मानक साइन बोर्ड लगाय गेहे।
दुर्घटना
बस्तर जिला के जगदलपुर म एक कार अनियंत्रित होके तालाब म गिर गे। ए हादसा म तालाब म डूबे ले तीन झिन युवक के मउत हेगे, जबकि चार झिन दूसर युवक मन ल पुलिस ह गाड़ी के कांच तोड़के सुरक्षित बाहिर निकाल लीस। जानकारी के अनुसार मृतक मनके पहिचान कर ले गेहे। कार म सवार जम्मो युवक क्रिकेट खेले गे रिहीन अउ रतिहा कालीपुर ले जगदलपुर सहर लहुटत रिहीन। इही दउरान ओमन के कार अनियंत्रित होके तालाब म जा गिरीस। ए दउरान मौजूद प्रत्यक्षदर्सी मन पुलिस ल सूचना दीन।
ओति, छत्तीसगढ़ ले जात एक बस झारखंड के लातेहार जिला म दुर्घटनाग्रस्त होगे। ए हादसा म पांच मनखे के मउत होगे। उहें, पच्चीस ले जादा मनखे घायल होय हे। ए घटना छत्तीसगढ़ झारखंड सीमा म ओरसाघाटी म होइस। घायल मनके इलाज महुआडांड़ के अस्पताल म जारी हे, जिंहा कुछेक यात्री मनके स्थिति गंभीर बने हुए हे।
बस्तर पंडुम
बस्तर पंडुम के संभाग स्तरीय आयोजन के तिथि म आंशिक संसोधन करे गेहें संस्कृति विभाग डहार ले जारी आदेस के तहत अब एखर आयोजन छै ले आठ फरवरी तक जगदलपुर म होही। जिंहा जिला स्तर म बस्तर पंडुम के अंतर्गत आयोजित बारह विधा के विजेता दल अउ कलाकार सामिल होही।
बतादन कि बस्तर पंडुम के तीन चरण म आयोजन जनपद जिला अउ संभाग स्तर म बारह विधा म करे जात हे। ए आयोजन ले बस्तर अंचल के लोक कला, सिल्प, नृत्य, गीत-संगीत, पारंपरिक व्यंजन, बोली-भाखा, वेसभूषा, आभूषण, वाद्ययंत्र, नाट्य अउ जनजातीय जीवन पध्दति के संरक्षण अउ संवर्धन ल एक मंच मिले हे। बस्तर पंडुम म जनपद स्तरीय स्पर्धा बीस जनवरी तक पूरा हो जही। एखर बाद चौबीस ले उनतीस जनवरी तक जिला स्तरीय अउ छै ले आठ फरवरी तक संभाग स्तरीय आयोजन होही।
कर्मा-महोत्सव
मुख्यमंत्री विष्णुदेव साय काली सूरजपुर जिला के चुनगुड़ी म राखे गे कर्मा महोत्सव म सामिल होइन। ए मउका म ओमन किहीन कि कर्मा महोत्सव छत्तीसगढ़ के समृध्द जनजातीय संस्कृति अउ परंपरा के प्रतीक हरय। अइसे आयोजन लोक परब ल सहेजे के संघरा नवा पीढ़ी ल अपन जड़ ले जोड़े के काम करथे।
ए मउका म मुख्यमंत्री ह एक सौ बहत्तर करोड़ रूपिया ले जादा के आने-आने विकास कार्य के लोकार्पण अउ भूमिपूजन करीन। ओमन चुनगुड़ी के स्कूल मैदान ल मिनी स्टेडियम के रूप म विकसित करे अउ नगर पंचायत भटगांव के विकास बर एक करोड़ रूपिया देके घोसना करीन।
कर्मा महोत्सव म सूरजपुर, सरगुजा, जशपुर, बलरामपुर, कोरिया अउ मनेंद्रगढ़ जिला ले आय तैंतीस लोक कलाकार मन ह पारंपरिक वेसभूषा म कर्मा नृत्य प्रस्तुत करीन।
उपमुख्यमंत्री-रानी दुर्गावती प्रतिमा
उपमुख्यमंत्री अरूण साव ह आज मुंगेली जिला के परसवारा गांव म वीरांगना रानी दुर्गावती के प्रतिमा के अनावरण करीन। ए मउका म उपमुख्यमंत्री ह किहीन कि महान वीरांगना रानी दुर्गावती के जीवन साहस, नेतृत्व अउ आत्मसम्मान के जीवंत उदाहरण हरय। ए प्रतिमा अवइया पीढ़ी ल उंखर अद्भुत सौर्य बलिदान अउ राष्ट्रभक्ति के भावना ल अउ मजबूत करही। ए मउका म उपमुख्यमंत्री ह लोरमी म मंगल भवन निर्माण बर पच्चीस लाख रूपिया अउ परसवारा म सीसी रोड निर्माण बर दस लाख रूपिया दे के घोसना करीन।
रायपुर साहित्य उत्सव-बस सेवा
रईपुर साहित्य उत्सव के आयोजन नवा रईपुर के पुरखौती मुक्तांगन म तेईस ले पच्चीस जनवरी तक करे जाही। ए दउरान आम नागरिक, साहित्य प्रेमी, विद्यार्थी अउ युवा मनके सुविधा ल धियान म राखत सहर म निसुल्क बस सेवा संचालित करे जाही। मिले जानकारी के अनुसार आयोजन स्थल तक आय-जाय बर लगभग पंद्रह ठिन बस के निसुल्क संचालन करे जाही। बस के विस्तृत समय सारिणी जल्दी जारी करे जाही।
सिरपुर महोत्सव
तीन दिन के सिरपुर महोत्सव के आयोजन एक फरवरी ले करे जाही। महोत्सव के तियारी के जायजा लेबर कलेक्टर विनय कुमार लंगेह के संग जिला प्रशासन के टीम सिरपुर पहुंचिस। निरीक्षण के दउरान कलेक्टर ह आयोजन ल सुव्यवस्थित अउ सुरक्षित ढंग ले संपन्न कराय के निरदेस दीन।
बतादन कि ए दरी सिरपुर के ऐतिहासिक महत्व ल लेके ऑनलाइन पेंटिंग प्रतियोगिता बर प्रविष्टी मंगाय जाही।
अउ अब थोरकुन समाचार सार म –
– राष्ट्रीय परीक्षण एजेंसी-एनटीए ह जेईई मेन दू हजार छब्बीस के पहिली सत्र के परीक्षा बर प्रवेस पत्र जारी कर देहे।
– उपमुख्यमंत्री विजय शर्मा ह काली ‘मूकमाटी एक्सप्रेस‘ ल रईपुर रेलवे स्टेसन ल हरा झंडा दिखाके रवाना करीन। हाले म केंद्र सरकार डहार ले रईपुर-जबलपुर इंटरसिटी एक्सप्रेस के नाम ‘मूकमाटी एक्सप्रेस‘ करे गेहे।
अउ
– वित्त मंत्री ओपी चौधरी ह रायगढ़ जिला अस्पताल म ब्रेन हेल्थ क्लीनिक के सुभारंभ करीन। ए मउका म ओमन किहीन कि ए क्लीनिक के सुरू होय ले मस्तिष्क, मानसिक अउ स्पाइन ले जुड़े बीमारी के इलाज मिल सकही।