राष्ट्रीय स्टार्टअप दिवस के मउका म नई दिल्ली के ‘‘भारत मंडपम‘‘ म कारीकरम के आयोजित करे गिस, जिंहा प्रधानमंत्री नरेंद्र मोदी ह किहीन हे कि सिरिफ दस बछर म स्टार्टअप इंडिया क्रांति बन गेहे। भारत आज दुनिया के तीसरइया सबले बड़का र्स्टाटअप तंत्र हे। भारत के युवा आज समस्या के समाधान करे बर चेत लगावत हे। ए बेरा प्रधानमंत्री ह नवा-नवा सपना देखइया युवा मन के साहस ल गजब संहरावत किहीन कि राष्ट्रीय र्स्टाटअप दिवस के मउका म स्टार्टअप्स सुरू करइया अउ नवा-नवा तरीका जुड़े ले भारत सरलग बिकास करत हे, जउन सुघ्घर भविष्य ल दरसाथे।
ए मउका म प्रधानमंत्री ह प्रदर्सनी के अवलोकन करत प्रदर्सक मनले गोठबात घलो करिन।
ए बेरा कारीकरम म केंद्रीय वाणिज्य अउ उद्योग मंत्री पीयूष गोयल ह किहीन कि प्रधानमंत्री के अगुवई म पाछू दस बछर म स्टार्टअप तंत्र म जबर बदलाव आय हे। बछर दू हजार सोलह म सिरिफ चार सौ स्टार्टअप रिहीन, जिंखर संख्या अब दू लाख ले जादा हो गेहे।
बातों-बातों में
प्रादेशिक समाचार एकांश के समसामयिक बिसय उपर आधारित कारीकरम ‘बातों-बातों में‘ केंद्र सरकार डहार ले चलाय जावत स्टार्टअप इंडिया उपर केंद्रित रइही। एखर तहत जशुपर जिला के जशप्योर बं्राड के जानकारी दे जाही। एखर प्रसारण काली सत्रह जनवरी के आकशवाणी केंद्र रइपुर ले एफ.एम. अउ प्राइमरी चैनल म बिहनिया 9 बजे ले करे जाही। एला छत्तीसगढ़ के जम्मो आकाशवाणी केंद्र रिले करही।
मुख्यमंत्री-लोकार्पण
मुख्यमंत्री विष्णुदेव साय ह जशपुर जिला प्रवास के बेरा करोड़ों के सौगात देइन हें। जशपुर दउरा म मुख्यमंत्री ह जिला म एक सौ बाईस करोड़ ले जादा के बिकास कारज के लोकार्पण अउ भमिपूजन करिन। ए बेरा म ओमन उज्ज्वला योजना के तहत दू हजार ले जादा माईलोगन मन ल घरेलू गैस कनेक्सन घलो बांटिन।
ए दउरान मुख्यमंत्री ह बगीचा विकासखंड म करीबन दू करोड़ तिरालीस लाख रूपिया के लागत ले बने तीस बिस्तर के सामुदायिक स्वास्थ्य केंद्र के लोकार्पण करिन। ओमन एला वनांचल अउ बिसेस पिछड़ा जनजाति पहाड़ी कोरवा के संगे करीबन दू लाख के आबादी बर जीवनरेखा बतइन। बतादन कि स्वास्थ्य केंद्र के संचालन बर सौ मेडिकल अउ पैरामेडिकल स्टाफ के स्वीकृति घलो दे जा चुके हे।
मुख्यमंत्री ह इही परिसर म बड़े स्वास्थ्य सिविर के घलो सुभारंभ करिन, जेमा न्यूरो, नेफ्रालॉजी, हड्डी रोग, स्त्रीरोग, ईएनटी, प्लास्टिक सर्जरी के संगे बिसेसज्ञ डॉक्टर मन हजारों लोगन के जांच करके निसुल्क दवा बांटिन।
धान-राइस मिल सील
धान खरीदी म गड़बड़ी करे के आरोप म प्रदेस के बारह जिला के समिति प्रबंधक अउ धान खरीदी ले जुड़े अड़तीस कर्मचारी मन उपर कार्रवाई करे गिस। तीन कर्मचारी मनके खिलाफ केस अउ इकतीस कर्मचारी मनके खिलाफ निलंबन कार्रवाई करे गिस। उहें, एक झन कर्मचारी के सेवा समाप्त, संगेसंग तीन झन आने करमचारी मन ल उंखर कारज ले अलगाय गेहे।
ओति, कस्टम मिलिंग म भारी गड़बड़ी पाय जाय म मुंगेली जिला प्रशासन ह जबर कार्रवाई करत जिला के चौदह ठन राइस मिल ल सील कर देय हे। संगेसंग बारह हजार कुंटल ले जादा धान घलो जब्त करे गिस।
बतादन कि जिला के कलेक्टर कुंदन कुमार, पुलिस अधीक्षक भोजराम पटेल के संग राजस्व, पुलिस अउ खाद्य विभाग के संयुक्त टीम ह जिलाभर के आने-आने राइस मिल म औचक निरीक्षन करिस। जिंहा जांच म भारी गड़बड़ी पाय गिस।
उहें, कुछेक राइस मिल म करीबन दू हजार कुंटल ले जादा के धान कमती पाय गिस। एखरे संग, जांच दल ह आने राइस मिल मन ले बारह हजार ले जादा कुंटल धान जब्त करिस।
जिला खाद्य अधिकारी ह बतइन कि छत्तीसगढ़ चांउर उपार्जन आदेस अउ मोटर वाहन अधिनियम के तहत मुंगेली जिला के उन्नीस राइस मिल म कार्रवाई करे जात हे, जेमा ले चौदह ठन राइस मिल ल सील करे जा चुके हे।
उहें, जांजगीर-चांपा जिला म खाद्य विभाग डहार ले एक ठन राइस मिल म छापामार के साढ़े बाईस हजार कुंटल धान जब्त करे गिस। एखर कीमत सात करोड़ रूपिया बताय जावत हे। बतादन कि एक दिन पहिली घलो सात करोड़ के बाईस हजार आठ सौ कुंटल धान जब्त करे गे रिहीस।
वंदे मातरम्‘-कार्यक्रम
राष्ट्रीय गीत वंद मातरम के एक सौ पचास बछर के पूरे के मउका म राज्यभर म चार चरण म बिसेस कारीकरम के आयोजन करे जावत हे। एखर तहत दूसरइया चरण के कारीकरम उन्नीस ले छब्बीस जनवरी तक करे जाही। जेमा गणतंत्र दिवस के कारीकरम म रइपुर म राज्यपाल अउ जगदलपुर म मुख्यमंत्री सामिल होही।
रायपुर-साहित्य उत्सव
छत्तीसगढ़ के साहित्यिक अउ सांस्कृतिक बिरासत ल नवा ऊर्जा देय के संग साहित्यकार, चिंतक, कलाकार अउ पाठक मन ल एके मंच म लाने के मंसा ले तेईस ले पच्चीस जनवरी तक ‘‘रइपुर साहित्य उत्सव‘‘ के आयोजन करे जाही। ए बेरा देसभर के आने-आने जघा ले आय बड़े-बड़े साहित्यकार, कवि, ेलेखक, पत्रकार, बिचारक अउ युवा रचनाकार, एके संघरा मंच साझा करहीं। कारीकरम के बेरा साहित्यिक संवाद, पुस्तक विमोचन, विचार-मंथन, सांस्कृतिक प्रस्तुति अउ कला प्रदर्सन करे जाही। ए कारीकरम नवा रइपुर के पुरखौती मुक्तांगन म आयोजन होही।
बतादन कि ‘‘साहित्य उत्सव‘‘ बर अब तक चार हजार ले जादा पंजीयन हो चुके हे अउ एखर प्रक्रिया सरलग जारी हे अउ इही दिन ले साहित्य उत्सव म पुस्तक मेला घलो लगही।
उहें, रईपुर साहित्य उत्सव के तियारी उपर नवा रइपुर म महत्वपूर्ण बइठका करे गिस। जेमा कारीकरम के संचालन उपर बिस्तार ले गोठबात होइस। बइठका म ए फइसला ले गिस कि साहित्य उत्सव के आने-आने सत्र के संचालन बर एक ठन बिसेस सहयोग टीम गठित करे जाही। जेमा हर सत्र बर अधिकारी नियुक्त होही जउन कारीकरम ले जुड़े आने-आने जिम्मेदारी ल संभालही।
गांजा-बरामद
महासमुंद पुलिस ह तीन झन अंतर्राज्यीय गांजा तस्कर मन ल गिरफ्तार करे हे। ओडिसा निवासी तीनों आरोपी मन ले पचहत्तर लाख रूपिया के डेढ़ सौ किलो गांजा जब्त करे गिस। एखर संगेसंग दू ठन फटफटी अउ तीन ठन मोबाइल घलो बरामद करे गिस। गिरफ्तार आरोपी मन ल कोर्ट म पेस करके न्यायिक रिमांड म भेज दे गेहे।
आईईडी-बरामद
बीजापुर जिला म सुरक्षाबल मन माओवादी मनके लगाय गे दू ठन आईईडी बम बरामद करे हे। मद्देड़ थाना इलाका के सोमनपल्ली-बंदेपारा के रद्दा म माओवादी मन दस-दस किलो के दू ठन बम लगाय रिहीन। जेला बेरा रहत बरामद करके बम निरोधक दस्ता ह मउका म नष्ट कर दिस। उहें, कांंडापड़गु इलाका म गड्ढा म लुकाय गे आने-आने माओवादी जिनिस घलो बरामद करे गिस।
दुर्घटना
राष्ट्रीय राजमार्ग-तिरपन म आरंग के तिर सड़क हादसा म बाप-बेटा के संग एके परिवार के तीन झन के मउत होगे। जानकारी ले फटफटी म सवार होके तीनों झन पारागांव तिर महानदी डहार जावत रिहीन। इही बेरा आगू डहार ले अवइया एक ठन टरक ह अपन चपेट म ले लिस। सबो मृतक आरंग के बागेश्वर पारा के रहइया बताय गिन। सूचना मिलतेच पुलिस ह मउका म पहुंचिस अउ सव ल पोस्टमार्टम बर भेज देहे। उहें, घटना के बाद ले टरक चलइया मउका ले भाग गिस। पुलिस ह गाड़ी ल जब्त करके आगू के कारवाही म जुट गेहे।
विशेष-कार्यक्रम
आज रतिहा आठ बजे आकाशवाणी केंद्र रइपुर ले भारत सरकार के जैविक खेती ल बढ़ाय के उदिम उपर, एक ठन बिसेस कारीकरम के प्रसारण करे जाही। जेला छत्तीसगढ़ के जम्मो आकाशवाणी केंद्र एके संघरा रिले करहीं।
ओपन गोल्फ चैंपियनशिप
नवा रइपुर म तीन फरवरी ले ओपन गोल्फ चैंपियनशिप प्रतियोगिता के आयोजन करे जाही। प्रोफेसनल गोल्फ टूर ऑफ इंडिया अउ खेल मंत्री अरूण साव ह आज संयुक्त रूप ले छत्तीसगढ़ ओपन गोल्फ चैंपियनशिप के आयोजन के घोसना करिन। ए बेरा खेल मंत्री अरूण साव ह बतइन कि ए प्रतियोगिता म विजेता खिलाड़ी मन ल डेढ़ करोड़ रूपिया के इनाम दे जाही।