प्रधानमंत्री नरेन्द्र मोदी ह किहीन हे कि किसान, राष्ट्र निर्माण म ससक्त भागीदार हे अउ ओमन के प्रयास ले आत्मनिर्भर भारत अभियान ल मजबूती मिलत हे। ओमन कहिन कि केन्द्र सरकार, किसान मन ल सशक्त बनाय बर प्रतिबद्ध हरय अउ एखर बर कतकोन प्रयास करत हे। श्री मोदी ह आज सूचना अउ प्रसारण राज्य मंत्री डॉक्टर एल. मुरूगन के नई दिल्ली स्थित आवास म राखे के पोंगल समारोह म कहिन कि पोंगल पर्व जीवंत तमिल संस्कृति अउ प्रकृति के संग जुड़ाव के उत्सव हे।
श्रम मंत्री-प्रेसवार्ता
श्रम मंत्री लखनलाल देवांगन ह कहिन कि प्रदेस म पंजीकृत निर्माण श्रमिक मनके स्वास्थ्य परीक्षण बर अलग से योजना सुरू करे जाही। आज नवा रईपुर म पत्रकारवार्ता ल संबोधित करत ओमन कहिन कि श्रमिक मनके लइका मन ल उच्च सिक्षा दे बर प्रतियोगी परीक्षा के कोचिंग बर नवा योजना ‘‘अटल कैरियर निर्माण योजना‘‘ सुरू करे जाही। शहीद वीरनारायण सिंह श्रम अन्न योजना के विस्तार जम्मों जिला म श्रम अन्न केन्द्र बना के करे जाही।
गणतंत्र दिवस-लोकभवन
गणतंत्र दिवस म छब्बीस जनवरी के रायपुर स्थित लोकभवन म आयोजित होवइया स्वागत समारोह म प्रदेस के आने-आने जिला ले अच्छा काम करइया अड़तीस मनखे मन ल अतिथि के रूप म नेवता दे गेहे। ए जम्मों मन खेल, शिक्षा, कला, संस्कृति, पर्यावरण संरक्षण, महिला सशक्तिकरण, आजीविका, कृषि, समाज अउ राष्ट्र सेवा जइसे क्षेत्र म उल्लेखनीय योगदान दीन हे।
ए समारोह म बिलासपुर के कबड्डी खिलाड़ी संजू देवी, पर्यावरण योद्धा दूजराम भेंड़पाल अउ श्रेयांश बुधिया सामिल होही। उहें, दुरूग जिला के मूर्तिकार जॉन मार्टिन नेलसन अउ पंथी नर्तक राधेश्याम बारले ल घलो आमंत्रित करे गेहे। कोरबा जिला के व्याख्याता श्रद्धा जायसवाल अउ आंगनबाड़ी कार्यकर्ता बबीता कंवर, कोरिया के महिला उद्यमी हीना बेगम अउ सोनहनी उत्पादक रघुवीर समेत आने-आने क्षेत्र म उल्लेखनीय काम करइया मनखे घलो ए समारोह के हिस्सा बनही।
रक्षा बल पूर्व सैनिक दिवस
दसवां रक्षा बल पूर्व सैनिक दिवस आज देसभर म मनाय गीस। इही कड़ी म छत्तीसगढ़ अउ ओड़िशा सब एरिया ह आज नवा रायपुर स्थित मिलिट्री स्टेसन म पूर्व सैनिक दिवस मनईन। ए मउका म सेवानिवृत्त सैनिक मनके वीरता, बलिदान अउ सेवा ल श्रद्धांजलि दे गीस।
कार्यक्रम के मुख्य अतिथि सेवानिवृत्त लेफ्टिनेंट जनरल अउ एम्स रायपुर के निदेशक डॉक्टर अशोक कुमार जिंदल ह रिहीन। उहें, कोसा के कमांडर बिग्रेडियर तेजिंदर सिंह बावा ह सेवानिवृत्त सैनिक मन बर आने-आने कल्याणकारी उपाय करे म छत्तीसगढ़ सरकार अउ राज्य सैनिक बोर्ड के प्रयास के सराहना करीन।
बस्तर पंडुम-तिथि संशोधन
बस्तर पंडुम के समय-सारिणी म आंशिक बदलाव करे गेहे। संस्कृति विभाग के सचिव डॉक्टर रोहित यादव ह बस्तर संभाग के जम्मों जिला – बस्तर, दंतेवाड़ा, सुकमा, बीजापुर, कांकेर, कोंडागांव अउ नारायणपुर के कलेक्टर मन ल पत्र जारी करके नवा तिथि के अनुसार आयोजन सुनिश्चित करे के निरदेस दीन हे। पहिली चरण म जनपद स्तर म दस ले बीस जनवरी तक ग्राम पंचायत के दल के बीच बारह अलग-अलग विधा म प्रतियोगिता राखे जात हे। दूसरइया चरण म चौबीस ले उनतीस जनवरी तक जिला स्तरीय प्रतियोगिता होही। उहें, अब संभाग स्तरीय प्रतियोगिता के आयोजन छह ले आठ फरवरी के बीच करे जाही, जेमा जिला स्तर के चयनित कलाकार हिस्सा लीहीं।
माओवादी आत्मसमर्पण
सुकमा जिला म आज उनतीस माओवादी मन पुलिस के आगू आत्मसमर्पण कर दीन। एमा ले एक माओवादी उपर दू लाख रूपिया के इनाम घोषित रिहीस। आत्मसमर्पित माओवादी गोगुंडा थाना क्षेत्र म सक्रिय दरभा डिवीजन के सदस्य बताय जात हे। जिला के पुलिस अधीक्षक किरण चव्हाण ह बतईन कि ए जम्मों उपर आने-आने माओवादी घटना म सामिल रेहे के आरोप हे।
आत्मसमर्पित माओवादी मन ल राज्य सरकार के पुनर्वास नीति के तहत पचास-पचास हजार रूपिया के प्रोत्साहन रासि देके संघरा दूसर सुविधा दे जाही।
तातापानी महोत्सव-शुभारंभ
मुख्यमंत्री विष्णुदेव साय ह आज बलरामपुर म तीन दिन के तातापानी मोहत्सव के सुभारंभ करीन। ए मउका म मुख्यमंत्री ह छह सौ सड़सठ करोड़ रूपिया ले जादा के रासि ले आने-आने विकास काम के सिलान्यास अउ लोकार्पण करीन। मुख्यमंत्री ह तातापानी महोत्सव बर हर बछर राज्य सासन कोति ले पच्चीस लाख रूपिया देके घोषणा करीन। संघरा कामकाजी महिला मन बर छात्रावास बनाय के घलो बात कहिन।
राज्य ओपन स्कूल परीक्षा
छत्तीसगढ़ राज्य ओपन स्कूल ह मार्च-अप्रैल म होवइया परीक्षा के समय-सारिणी घोषित कर देहे। हायर सेकेंडरी के परीक्षा सोलह मार्च ले सुरू होके आठ अप्रैल तक चलही। उहें, हाईस्कूल के परीक्षा सत्रह मार्च ले सात अप्रैल तक आयोजित होही। विद्यार्थी परीक्षा संबंधी समय-सारिणी के अवलोकन पास के अध्ययन केन्द्र ले ले सकत हे।
इही बीच, जिला शिक्षा कार्यालय ह रायपुर जिला के जम्मों स्कूल म प्री-बोर्ड परीक्षा उन्नीस ले चौबीस जनवरी के बीच रखे के निरदेस दीन हे। एखर पहिली, छत्तीसगढ़ माध्यमिक शिक्षा मंडल ह एक ले बीस जनवरी के बीच प्रायोगिक परीक्षा आयोजित करे बर कहे रिहीस।
चित्रोत्पला फिल्म सिटी
मुख्यमंत्री विष्णुदेव साय इक्कीस जनवरी के नवा रायपुर के माना-तूता म प्रस्तावित चित्रोत्पला फिल्म सिटी एंड कन्वेंशन सेंटर के भूमिपूजन करही। एखर बर छत्तीसगढ़ पर्यटन बोर्ड अउ मुंबई के ईगल स्टूडियोज़ एंटरटेनमेंट लिमिटेड के बीच अनुबंध पूरा हो चुके हे।
ए संबंध म छत्तीसगढ़ पर्यटन बोर्ड के अध्यक्ष नीलू शर्मा ह चित्रोत्पला फिल्म सिटी एंड कन्वेंशन सेंटर के निर्माण के समीक्षा करीन। बइठका म श्री शर्मा ह ए परियोजना ल समय म पूरा करे के निरदेस दीन। सौ एकड़ क्षेत्र म बनइया ए फिल्म सिटी म अत्याधुनिक स्टूडियो, स्थायी सेट्स, स्कूल, अस्पताल, जेल, पुलिस स्टेसन अउ कृत्रिम नदी-पर्वत, कन्वेंशन सेंटर, जनजातीय सांस्कृतिक केन्द्र, ई-बस सेवा अउ रिसॉर्ट्स, प्री-पोस्ट प्रोडक्शन के संघरा आवास व्यवस्था, फूड कोर्ट अउ तालाब-उद्यान जइसे सुविधा होही।
मुख्यमंत्री-उच्च स्तरीय बैठक
मुख्यमंत्री विष्णुदेव साय ह कहिन कि रायपुर ल मेट्रो सिटी के रूप म विकसित करे जाही। ए बात मुख्यमंत्री ह मंत्रालय म रायपुर शहर अउ तीर-तखार के क्षेत्र के समग्र विकास ल लेके आयोजित उच्च स्तरीय बइठका म कहिन। ओमन किहीन कि रेलवे, नगर-निगम अउ लोक निर्माण विभाग बेहतर समन्वय के संग विकास काम म तेजी लावय।
मकर संक्रांति
सूर्य के उत्तरायण के परब मकर संक्रांति आज छत्तीसगढ़ समेत देस के आने-आने भाग म मनाय जात हे। मकर संक्रांति के परब हेमंत ऋतु के सिराय के अउ शिशिर ऋतु के आय के प्रतीक हरय। इही दिन ले दिन के बेरा बाढ़े लगथे। ए तिहार देस के आने-आने भाग म अलग-अलग नाव ले जाने जाथे। तमिलनाडु म एला पोंगल, गुजरात म उत्तरायण, असम म भोगाली बिहू अउ पश्चिम बंगाल म पौष संक्रांति के रूप म एला मनाय जाथे।
जाजंगीर-चांपा जिला म स्थित शिवरीनारायण के त्रिवेणी संगम – महानदी, शिवनाथ अउ जोंक नदी म श्रद्धालु मन आस्था के डुबकी लगईन अउ दीपदान करीन। श्रद्धालु मन भगवान नरनारायण अउ जगन्नाथ के दर्सन करीन।
सीएम ट्रॉफी फुटबॉल चैंपियनशिप
रायपुर जिला के खरोरा म आयोजित सीएम ट्रॉफी ऑल इंडिया फुटबॉल चैंपियनशिप के खिताब नारायणपुर स्थित रामकृष्ण मिशन के टीम ह केरल ल हराके अपन नाम कर लेहे। ए प्रतियोगिता म नौ राज्य के सोलह टीम हिस्सा लीन। प्रतियोगिता के समापन समारोह म काली मुख्यमंत्री विष्णुदेव साय सामिल होइन। ए मउका म ओमन किहीन कि राज्य सरकार खेल के समग्र विकास बर प्रतिबद्ध हरय। एखरे तहत खेल अलंकरण समारोह ल फेर सुरू करे गेहे। ओमन किहीन कि खेलो इंडिया योजना के तहत प्रदेस के खेल मैदान मनके निर्माण कराय जात हे। कार्यक्रम म मुख्यमंत्री ह समोदा बैराज निर्माण काम म तेजी लाय, खरोरा म बायपास रोड अउ गौरव पथ के निर्माण के घोषणा करीन।
ईडी संपत्ति कुर्क
प्रवर्तन निदेशालय-ईडी ह महादेव सट्टा मामला म सौरभ चंद्राकर, रवि उत्पल समेत दूसर आरोपी मनके इक्कीस करोड़ रूपिया ले जादा के संपत्ति अटैच कर लेहे। एमा लगभग एक करोड़ रूपिया के चल अउ घर, व्यावसायिक दुकान, कृषि भूमि अउ भारत अउ दुबई के लक्जरी अपार्टमेंट समेत सत्ताईस अचल संपत्ति सामिल हे।